Әме Тʹәви Wә Бен

1, 2. а) Йаһоwа дәрһәqа рʹожед мә чь пʹехәмбәрти кьр? б) Дь ве тʹемайеда әме щабед кʹижан пьрса пебьһʹәсьн? (Бьньһәрʹә шькьле әʹwльн.)

ЙАҺОWА дәрһәqа wәʹде ньһа кӧ әм дьжин, пешда гот: «Дь wан рʹожанда жь һәр тәwре зьманед нәтәwәйанда [щьмәʹтада] дәһ кәс пе даwа кәсәки Щьһудива бьгьрьн у wе бь готьна: ‹Әм бь wәрʹа һәрʹьн, жь бәр, мә бьһистьн кӧ Хwәде бь wәрʹа йә!›» (Зәкәр. 8:23). Әw дәһ кәс кӧ «даwа кәсәки Щьһудива» дьгьрьн, бь симболик тенә һʹәсабе мәрьв гӧмана кʹе жи жийина сәр әʹрде йә. У бона wан qәдьр ә кӧ шьхӧлкʹарийе дькьн тʹәви рʹункьрийа, демәк «Исраела Хwәде», чьмки заньн кӧ Йаһоwа wана кʹәрәм дькә (Галт. 6:16).

² Чаwа кӧ Зәкәрйа пʹехәмбәр, Иса жи гот кӧ нава щьмәʹта Хwәдеда wе йәкти һәбә. Иса дәрһәqа пәйчуйед хwә гот, кӧ әwана жь дӧ кʹома нә, әw һәнә «кәрийе пези бьчʹук» у «пәзед дьн». Ле әwи гот кӧ әwана wе «кәрик» бьн у «шьванәки» wан wе һәбә (Луqа 12:32; Йуһʹн. 10:16). Чьмки әwана дӧ кʹом ьн, ләма һьнә пьрс пешда тен: 1) Гәло лазьм ә кӧ пәзед дьн бьзаньбьн наве һʹәму рʹункьрийа кӧ иро һәнә? 2) Рʹункьри ча гәрәке хwә бьдьнә кʹьфше? 3) Һун ча гәрәке хwә кʹьфш кьн чахе кәсәк дь щьвата wәда дәстпедькә сәр Биранине симбола бьхwә? 4) Гәло лазьм ә кӧ һун бәрхwә кʹәвьн жь бо ве йәке, кӧ һәжмара йед кӧ симбола дьхwьн зедә дьбә? Wәрә әм пебьһʹәсьн щабед wан пьрса.

ГӘЛО ЛАЗЬМ Ә КӦ ӘМ БЬЗАНЬБЬН НАВЕ ҺʹӘМУ РʹУНКЬРИЙА?

3. Чьрʹа әм нькарьн сәд сәләфи бьзаньбьн кӧ кʹе wе бьбә пʹарәк жь 144 000?

³ Гәло лазьм ә кӧ пәзед дьн бьзаньбьн наве һʹәму рʹункьрийа? Һәрге кьн бежьн, на. Чьмки һәрге жи кәсәк һатә рʹункьрьне, әw найе һʹәсабе кӧ әw wе сәд сәләфи хәлата хwә бьстинә, чьмки әw гәрәке һʹәта хьлазийе амьнийа хwә избат кә. Шәйтʹан әwе йәке занә, у ләма «пʹехәмбәред дәрәw» дьдә хәбате кӧ «бькарьбьн бьжартийед Хwәде жи бьхальфиньн» (Мәт. 24:24). Мәсиһийед рʹункьри сәд сәләфи нькарьн баwәр бьн кӧ әwана wе хәлата хwә бьстиньн, һʹәта кӧ Йаһоwа мора хьлазийе нәдә сәр wан. Йаһоwа wе йан пешийа мьрьна wан йан пешийа дәстпебуна «тәнгасийа мәзьн» мора хьлазийе бьдә сәр wан (Әʹйан. 2:10; 7:3, 14). Демәк әм нькарьн сәд сәләфи сәр кәсәки бежьн кӧ әw дькʹәвә нава 144 000 һʹәзара.^[1]

4. Һәрге әм нькарьн бьзаньбьн наве һʹәму рʹункьрийа йед кӧ иро ль сәр әʹрде нә, ле ча әм дькарьн тʹәви wан «һәрʹьн»?

⁴ Һәрге пәзед дьн нькарьн наве һʹәму рʹункьрийа бьзаньбьн, ле wе ча бькарьбьн тʹәви wан «һәрʹьн»? Дина хwә бьдьне Зәкәрйа чь гот дәрһәqа дәһ мера, кӧ бь симболик тенә һʹәсабе пәзед дьн. Әw дәһ мер «пе даwа кәсәки Щьһудива бьгьрьн у wе бь готьна [бежьн]: ‹Әм бь wәрʹа һәрʹьн, жь бәр, мә бьһистьн кӧ Хwәде бь wәрʹа йә!›» Рʹаст ә дь ве рʹезеда те готьне дәрһәqа Щьһуйәки, ле гьлийе «бь wәрʹа» те һʹәсабе гәләк нә кӧ йәк. Демәк әw Щьһуйе рʹӧһʹани те һʹәсабе кʹом, нә кӧ мәрьвәк. Ләма нәлазьм ә кӧ әм һәр Щьһуйе рʹӧһʹани нас кьн у паше тʹәви wи һәрʹьн. Әм гәрәке wана һʹәсаб кьн чаwа кʹом у пьштгьрийа wан бькьн. Кʹьтеба Пироз мәрʹа тʹӧ щар набежә кӧ әм пәй кәсәки һәрʹьн. Әм гәрәке тʹәне пәй Иса һәрʹьн, йе кӧ Рʹебәре мә йә (Мәт. 23:10).

РʹУНКЬРИ ЧА ГӘРӘКЕ ХWӘ БЬДЬНӘ КʹЬФШЕ?

5. Рʹункьри гәрәке бьфькьрьн сәр кʹижан ширәта фәрз, у чьрʹа?

⁵ Рʹункьри гәрәке гәләк кʹур дина хwә бьдьн сәр ширәта жь 1 Корьнтʹи 11:27-29. (Бьхунә.) Паwлос дь wан рʹезада дайә кʹьфше кӧ рʹункьри дькарә нәщайиз симбола бьхwә у вәхwә, һәрге һәләqәтийа хwә тʹәви Йаһоwа хwәй накә (Ибрн. 6:4-6; 10:26-29). Әw ширәт али рʹункьрийа дькә, кӧ бира хwәда хwәй кьн wәки wана һе хәлата хwә нәстандьнә. Әwана гәрәке qазанщ кьн «хәлата кӧ Хwәде дь газикьрьна хwә йа әʹзманида бь Мәсиһ Иса пʹешкʹеш дькә» (Фили. 3:13-16).

6. Мәсиһийед рʹункьри гәрәке ча хwә бьдьнә кʹьфше?

⁶ Паwлос Мәсиһийед рʹункьри һелан кьр кӧ әwана «бьжин, чаwа лайиqи wе газийе йә, кʹижанерʹа [әwана] һатьнә газикьрьне». Ле wана ча карьбу әw йәк бькьра? Паwлос шьровәкьр: «Бь тʹәмамийа мьлуктийе у шкәсти, бь сәбьре һʹьзкьрьнеда ль бәр һәв дахьн. Бьщәʹдиньн, кӧ йәктийа рʹӧһʹ пе һәвгьредана әʹдьлайийе хwәй кьн» (Әфәс. 4:1-3). Рʹӧһʹе Хwәдейи пироз али хьзмәткʹаред wи дькә кӧ әwана мьлук бьн, нә кӧ бабах бьн (Колс. 3:12). Рʹункьри ӧса нафькьрьн кӧ Хwәде рʹӧһʹе хwәйи пироз wанрʹа һе зедә дьдә, нә кӧ йед нәрʹункьрирʹа. Әwана набежьн кӧ занәбуна wан һе зедә йә. У әwана нә жи дьдьнә кʹьфше, кӧ жь йед дьн баштьр ьн. У әwана тʹӧ кәсирʹа набежьн кӧ әw жи рʹункьри йә, у кӧ әw гәрәке симбола бьхwә. Чьмки әwана заньн кӧ тʹәне Йаһоwа дьжберә, кӧ кʹе wе бе бьжартьне.

7, 8. Рʹункьри һивийа чь ниньн, у чьрʹа?

⁷ Рʹаст ә рʹункьри һʹәсаб дькьн qәдьрәки мәзьн кӧ әwана wе һәрʹьнә әʹзмен, ле йәкә әwана һивийе ниньн кӧ йед дьн щурʹәки мәхсус wана һӧрмәт кьн (Әфәс. 1:18, 19; бьхунә Филипи 2:2, 3.) Рʹӧһʹе Йаһоwайи пироз, шәхси шәʹдәтийе дьдә wан кӧ әwана рʹункьри нә. У тʹӧ кәс дәрһәqа ве йәке ньзанә. Ләма рʹункьрийарʹа әʹщебмайи нинә, һәрге һьнә мәрьв дәрберʹа нькарьн баwәр кьн кӧ әwана бь рʹастийе рʹункьри нә. Чьмки Кʹьтеба Пироз ширәте дьдә, кӧ әм гәрәке дәрберʹа баwәр нәкьн, һәрге кәсәк дьбежә кӧ әwи жь Хwәде щабдарийа мәхсус стандийә (Әʹйан. 2:2). Әwана хwә надьнә кʹьфше кӧ рʹункьри нә, сәва кӧ дина мәрьва нәкʹьшиньн сәр хwә. Әwана нә жи qӧрʹә дьбьн бь ве йәке кӧ әwана wе чь шьхӧли бькьн ль әʹзмен (1 Корн. 1:28, 29; бьхунә 1 Корьнтʹи 4:6-8.)

⁸ Һьн жи, Мәсиһийед рʹункьри хwә башqә накьн, йан жи тʹәне тʹәви рʹункьрийед дьн wәʹдә дәрбаз накьн. Әwана рʹункьрийед дьн нагәрʹьн, сәва кӧ тʹәви wан гьредайи бьн йан жи дьзива кʹома саз кьн сәва кӧ башqә Кʹьтеба Пироз леколин бькьн (Галт. 1:15-17). Һәрге рʹункьри ӧса бькьн, щьват дькарә пʹаравәбә. Һьн жи әw wе бьдә кʹьфше кӧ әwана мьqабьли рʹӧһʹе пироз дьчьн, кʹижан кӧ әʹдьлайи у йәктийе тинә щьвате. (Бьхунә Рʹомайи 16:17, 18.)

ҺУН ГӘРӘКЕ ҺЬНДАВА РʹУНКЬРИЙАДА ЧА БЬН?

9. Чьрʹа әм гәрәке фәсал бьн ве йәкеда кӧ ча бьн һьндава wан йед кӧ сәр Биранине симбола дьхwьн? (Бьньһерʹә чаргошә «Һʹьзкьрьн ‹Бепʹәргал Нинә›».)

⁹ Һун гәрәке ча бьн һьндава хушкбьред рʹункьри? Иса шагьртед хwәрʹа гот: «Һун һʹәму жи бьра нә». Паше әwи зедә кьр у гот: «Кʹи кӧ хwә бьльнд кә, әwе ньмьз бә, ле кʹи кӧ хwә ньмьз кә, әwе бьльнд бә» (Мәт. 23:8-12). Ләма жи wе нәрʹаст бә һәрге кәсәк йәки дьн бьльнд кә, һәла һе һәрге жи әw рʹункьри йә. Чахе Кʹьтеба Пироз дәрһәqа рʹуспийа дьбежә, әw мә һелан дькә кӧ әм чʹәʹв бьдьнә баwәрийа wан. Ле Кʹьтеба Пироз тʹӧ щар набежә кӧ әм мәрьва һʹәсаб кьн чаwа рʹебәре мә (Ибрн. 13:7). Бәле, Кʹьтеба Пироз дьбежә кӧ һьнәк «дӧбарә һежайи qәдьр» ьн. Әwана һежайи qәдьр ьн, нә бона ве йәке кӧ әwана рʹункьри нә, ле чьмки әwана «сәрwерийе рʹьнд дькьн» у «хәбәрдан у һинкьрьнеда дьхәбьтьн» (1 Тимтʹ. 5:17). Ләма wе нәлайиq бә, һәрге кәсәк рʹункьрийа рʹумәт кә йан зәʹф һӧрмәт кә. Һе хьраб әw ә, кӧ һәрге һәләqәтийа мә тʹәви рʹункьрийа мәхсус бә, демәк әм wана зәʹф һӧрмәт кьн, дькарә wанрʹа чәтьн бә кӧ мьлук бьминьн (Рʹом. 12:3). Бәле, тʹӧ кәс жь мә нахwазә хушк-бьрарʹа бьбә кәвьре лькʹӧмандьне! (Луqа 17:2).

10. Әм ча дькарьн qәдьр бьдьнә кʹьфше һьндава Мәсиһийед рʹункьри?

¹⁰ Ле әм ча дькарьн qәдьр бьдьнә кʹьфше һьндава рʹункьрийа? Әм гәрәке пьрсед шәхси нәдьнә wан дәрһәqа рʹункьрьна wан. Изьна мә тʹӧнә йә кӧ әм әwан тьштед шәхси бьзаньбьн (1 Тʹеслн. 4:11; 2 Тʹеслн. 3:11). Әм ӧса жи гәрәке мәрьвед wани незик нәпьрсьн кӧ әw жи рʹункьри нә йан на. Чьмки һәрге кәсәк рʹункьри йә, рʹункьрьна wи дәрбази сәр нәфәред мала wи набә (1 Тʹеслн. 2:12). Әм ӧса жи гәрәке мер йан жьна рʹункьри нәпьрсьн, кӧ әwана чь тʹәхмин дькьн, кӧ заньн wәки дьнйа тʹәзәда һәвалзәwаще wан wе тʹәви wан нибә. Дәwса wе йәке, кӧ бь wан гьлийа дьле wан бешиньн, wе һе баш бә кӧ әм баwәр бьн ве йәкеда кӧ Йаһоwа wе дәсте хwә фьрә кә у «дахwаза һәр жийандари бь щиһ» бинә (Зәб. 145:16, ИМ).

11. Әме хwә жь кʹижан хофе хwәй кьн, һәрге әм жь йед кӧ «һʹьләкʹарийа дькьн» дур бьн?

¹¹ Кʹе кӧ рʹункьрийа бьльнд накә, әw хwә хwәй дькә жь хофийе. Кʹьтеба Пирозда те готьне кӧ wе «бьрайед дәрәw» бькʹәвьнә щьвате (Галт. 2:4, 5; 1 Йуһʹн. 2:19). Һьнәк жь wан дькарьн һәла һе жи бежьн, кӧ әwана рʹункьри нә. Һьн жи, һьнәк рʹункьри дьбәкә нәамьн бьминьн (Мәт. 25:10-12; 2 Пәт. 2:20, 21). Һәрге әм жь wан дур бьн йед кӧ «һʹьләкʹарийа дькьн», демәк дӧрʹутийе дькьн, әме пәй wан нәчьн у жь рʹийа рʹаст дәрнәйен. Һьн жи әме баwәрийа хwә ӧнда нәкьн, һәрге әм бьвиньн кӧ кәсәк гәләк wәхт Йаһоwарʹа хьзмәт дькьр, ле нәамьн ма (Щьһуд. 16).

ГӘЛО ӘМ ГӘРӘКЕ БӘРХWӘ КʹӘВЬН ЖЬ БО ЗЕДӘБУНА ҺӘЖМАРА WАН КʹЕ СИМБОЛА ДЬХWЬН?

12, 13. Чьрʹа әм гәрәке бәрхwә нәкʹәвьн жь бо зедәкьрьна һәжмара wан, йед кӧ сәр Биранине симбола дьхwьн?

¹² Нава гәләк салада, әwед кӧ сәр Биранине симбол дьхwарьн һьнәк бун. Ле дь wан пашwәхтийада, һәр сал һәжмара wан һе зедә дьбә. Гәло гәрәке әм жь бо ве йәке бәрхwә кʹәвьн? На. Wәрә әм пебьһʹәсьн чьрʹа.

¹³ «Хӧдан, йед хwә нас дькә» (2 Тимтʹ. 2:19, ИМ). Бьред кӧ сәр Биранине һʹәсаб дькьн чьqас мәрьв симбола дьхwьн, сәд сәләфи нькарьн бежьн кӧ кʹе йә бь рʹастийе жь wан рʹункьри. Һьнәк жь wан симбола дьхwьн, чьмки дьфькьрьн кӧ рʹункьри нә. Һьнәк жи wәʹдәки дәстпекьрьн симбола бьхwьн, паше ида симбол нәдьхwарьн. Щәм һьнәка жи дьбәкә проблемед һʹьшда у емосиали һәйә, у ләма әwана дьфькьрьн кӧ һәрʹьнә ль әʹзмен тʹәви Иса сәрwертийе бькьн. Ләма жи, һәжмара йед кӧ симбола дьхwьн, рʹаст әʹйан накә һәжмара рʹункьрийа кӧ сәр әʹрде манә.

14. Кʹьтеба Пироз чь дьбежә дәрһәqа һәжмара рʹункьрийа, кӧ wәʹде дәстпебуна тәнгасийа мәзьн wе сәр әʹрде бьн?

¹⁴ Рʹункьри wе сәр әʹрде щурʹә-щурʹә щийада бьн, чахе Иса бе кӧ wана тʹоп кә ль әʹзмен. Дәрһәqа wи wәʹдәйи, Кʹьтеба Пироз дьбежә кӧ Иса wе «мьлйакʹәтед хwә . . . бьшинә у wе бьжартийед wи жь һәр чар qӧлба бәрәв кьн, жь пʹәрʹәки әʹзмана һʹәта пʹәрʹе дьн» (Мәт. 24:31). Кʹьтеба Пироз дьдә кʹьфше кӧ wәʹде рʹожед ахьрийе, сәр әʹрде wе һьнә рʹункьри һәбьн (Әʹйан. 12:17). Ле йәкә, Кʹьтеба Пироз набежә кӧ wәʹде дәстпебуна тәнгасийа мәзьн, чьqас рʹункьри сәр әʹрде бьн.

15, 16. Әм чь гәрәке фәʹм кьн дәрһәqа 144 000, кʹижана кӧ Йаһоwа дьжберә?

¹⁵ Йаһоwа хwәха сафи дькә кӧ кʹәнге рʹункьрийа бьжберә (Рʹом. 8:28-30). Йаһоwа дәстпекьр рʹункьрийа бьжберә паши мьрьн у сахкьрьна Иса. Те кʹьфше кӧ qьрʹна йәкеда һʹәму Мәсиһийед рʹаст, рʹункьри бун. Ле жь wи wәʹдәйи һʹәта дәстпебуна рʹожед ахьрийе, һʹәчʹи зәʹф жь wан кӧ дьготьн кӧ әwана пәйчуйед Иса нә, бь рʹастийе Мәсиһийед дәрәw бун. Иса wана бәрамбәри «зиwана» кьр. Ле йәкә, нава wан салада, Йаһоwа бәрдәwам дькьр рʹункьрийа бьжберә. У чаwа кӧ Иса гот әwана wе мина «гәньм» бьн (Мәт. 13:24-30). Нава wан рʹожед ахьрийеда, Йаһоwа диса жи бәрдәwам дькә бьжберә әwед кӧ wе бькʹәвьнә нава 144 000.^[2] Һәрге Йаһоwа һьнәка дьжберә wәʹде кʹӧтасийа рʹожед ахьрийе, фәʹмдари йә кӧ әм гәрәке дӧдьли нибьн кӧ әw рʹаст дькә (Иша. 45:9; Дан. 4:35; бьхунә Рʹомайи 9:11, 16.)^[3] Әм гәрәке фәсал бьн кӧ мина wан пʹала нибьн, йед кӧ сәр ахайе хwә кьрьнә котә-кот, кӧ әw ча бу һьндава wан пʹала, йед кӧ евaре сьһʹәта 5 дәстпекьрьн хәбьтин. (Бьхунә Мәтта 20:8-15.)

¹⁶ Нә һʹәмуйед кӧ гӧмана wан жийина сәр әʹзмана йә, һәнә пʹара «хӧламе амьн у сәрwахт» (Мәт. 24:45-47). Чаwа кӧ qьрʹна йәкеда, иро жи Йаһоwа у Иса бь сайа һьнәка, гәләкарʹа хwарьна рʹӧһʹани дьдьн. Qьрʹна йәкеда тʹәне һьнәк рʹункьрийа Ньвисаред Йунани ньвисин. Ӧса жи иро, тʹәне һьнәк рʹункьри щабдар ьн бона ве йәке, кӧ «wәхтда хwарьна» рʹӧһʹани бьдьн.

17. Һун чь пеһʹәсийан дь ве тʹемайеда?

¹⁷ Жь ве тʹемайе әм чь пеһʹәсийан? Йаһоwа жийина һʹәта-һʹәтайе сәр әʹзмана пʹешкʹеш дьдә Щьһуйе рʹӧһʹани, ле жийина һʹәта-һʹәтайе сәр әʹрде пʹешкʹеш дьдә бь симболик дәһ мера. Ле Йаһоwа жь wан һәрда жи дәʹwа дькә, кӧ әwана амьн бьн. Һьн жи, һәрдӧ жи гәрәке мьлук бьн. Һәрдӧ жи гәрәке әʹдьлайе бькьнә щьвате. Дә wәрә әм wан рʹожед хьлазийе бь амьни йәктийеда Хwәдерʹа хьзмәт кьн у пәй Иса һәрʹьн.