Баwәрийа Хwә Хwәде Биньн Бь Билани Сафикьрьна Бькьн

1. Чьрʹа Qайин сафикьрьнәкә нәбаш кьр у ахьрийа wе йәке чь бу?

QАЙИН гәрәке сафикьрьна фәрз бькьра. Әwи гәрәке бьжбарта йан жь гöнә бьрʹәвә йан жи хwәстьна дьле хwә бинә сери. Әв бьжартьна wи сәр тʹәмамийа әʹмьре wи wе һʹöкöм буйа. Ле әм заньн кö Qайин сафикьрьнәкә нәрʹаст кьр. Әw сафикьрьн, бу сәбәбе мьрьна бьре wийи амьн, Һабил. Һьн жи öса Qайин һәләqәтийа хwә тʹәви Хwәде хьраб кьр (Дәстп. 4:3-16).

2. Чьрʹа гәләк фәрз ә кö бь билани бьжартьн у сафикьрьна бькьн?

² Әм жи гәрәке әʹмьре хwәда бьжартьн у сафикьрьна бькьн. Һьнә сафикьрьн гәләк фәрз ьн, һьнәк жи на. У гәләк сафикьрьн дькарьн сәр әʹмьре мә һʹöкöм бьн. Һәрге әм сафикьрьнед баш бькьн, чәтьнайед мә wе кем бьн у әме рʹьһʹәт бьжин. Ле һәрге әм сафикьрьнед хьраб бькьн, чәтьнайед мә wе гәләк бьн у әме дьлтәнг бьн (Мәтʹлк. 14:8).

3. а) Сәва кö сафикьрьна бь билани бькьн, әм гәрәке баwәрийа хwә кʹе биньн у чьда дöдьли нәбьн? б) Кʹижан пьрса әме шеwьр кьн?

³ Чь wе али мә бькә wәки сафикьрьна бь билани бькьн? Әм гәрәке баwәрийа хwә Хwәде биньн, у дöдьли нәбьн wәки әw wе али мә бькә у биланийе бьдә мә. Хенщи ве йәке, әм гәрәке баwәрийа хwә Хәбәра Йаһоwа биньн у ширәтед wи qәбул кьн. (Бьхунә Аqуб 1:5-8.) Чахе әм незики Йаһоwа бьн у Хәбәра wи һʹьз бькьн, әме баwәр бькьн wәки әw занә чь дьһа баш ә бона мә. Һьн жи әме һин бьн кö пешийа тьштәки сафи кьн, жь Хәбәра Хwәде ширәта бьгәрʹьн. Ле гәло ча әм дькарьн һин бьн сафикьрьнед баш бькьн? У һәрге мә тьштәк ида сафи кьрийә, гәло әw те һʹәсабе wәки әм гәрәке ида әве сафикьрьне нәгöһезьн?

ӘМ ҺʹӘМУШК ЖИ ГӘРӘКЕ САФИКЬРЬНА БЬКЬН

4. Адәм чь бьжартьн кьр у ахьрийа бьжартьна wи чь бу?

⁴ Жь дәстпека әʹфьрандьна мәрьва һʹәта рʹожа иройин, һʹәму мәрьв сафикьрьнед фәрз дькьн. Мәрьве пешьн Адәм гәрәке бьжбарта йан гöрʹа Әʹфьрандаре хwә бькә йан жи гöрʹа Һеwайе бькә. Ле йазьх, Адәм сафикьрьна нәрʹаст кьр. Әwи гöһ да жьна хwә у бьжартьна öса кьр, кö баһе әʹмьре wийи һʹәта-һʹәтайе бу. Әw сафикьрьна wи сәр һʹәму мәрьва һʹöкöм бу. Ләма жи һʹәта рʹожа иройин инсанәт дьчәрчьрә у кöл-дәрда дькʹьшинә.

5. Чьрʹа гәрәке әм хwәха сафикьрьна бькьн?

⁵ Һьнәк дьбәкә бьфькьрьн кö әʹмьр wе дьһа һеса буйа һәрге нәлазьм буйа сафикьрьна бькьн. Дьбәкә һун жи öса дьшьрмиш дьбьн. Ле бир нәкьн, Йаһоwа мәрьв мина робота ченәкьр, кʹижан кö нькарьн бьфькьрьн йан жи бьжартьна бькьн. Әwи Кʹьтеба Пироз дайә мә, wәки әм һин бьн бь билани сафикьрьна бькьн. Йаһоwа дьхwазә әм сафикьрьна бькьн, чьмки әw йәк мәрʹа кʹаре тинә, нә кö зийане. Wәрә чәнд мәсәла бьньһерʹьн кö избат дькьн ве йәке.

6, 7. Исраелийа чь бьжартьн гәрәке бькьрана, у чьрʹа wанрʹа чәтьн бу бь билани сафикьрьне бькьн? (Бьньһерʹә шькле әʹwльн.)

⁶ Чахе Исраели Әʹрде Создайида щиwар бун, wана гәрәке бьжартьна гәләк фәрз бькьрана: Йан Йаһоwарʹа хьзмәт кьн йан хöданед дьнрʹа. (Бьхунә Йешу 24:15.) Дькарә бе кʹьфше кö әw сафикьрьнәкә һеса бу, ле бь рʹастийе әʹмьре wан ве сафикьрьнева гьредайи бу. Исраелийа wәʹде Һʹакьма гәләк щар бьжартьнед нәаqьлайи дькьрьн. Wана пьшта хwә дьданә Йаһоwа у хöданед qәлп дьһʹәбандьн (Һʹакьм. 2:3, 11- 23). Паше, wәʹде Елйас пʹехәмбәр, щьмәʹта Хwәде диса бәр бьжартьне бу. Wана гәрәке сафи кьра: Йан Йаһоwа бьһʹәбиньн йан жи хöдане qәлп Баәʹл (1 Пʹадш. 18:21). Ле Исраели дöдьли дьбун кö кʹерʹа хьзмәт кьн у ләма жи Елйас әwана сущдар кьрьн. Аликива бьньһерʹи, әw бьжартьна һеса бу, чьмки хьзмәткьрьн Йаһоwарʹа тʹьме кʹаре тинә. Һьн жи мәрьве билан wе тʹö щар хwә ль хöдане бекер нәгьрә. Ле Исраели «һәрдö алива» дькöлийан у нькарьбун бьжартьн бькьрана. Елйас әwана ширәт кьрьн wәки Хwәдайе рʹаст бьһʹәбиньн, демәк Йаһоwа.

⁷ Гәло чьрʹа Исраелийарʹа чәтьн бу сафикьрьне бь билани бькьн? Пешийе, wана баwәрийа һьндава Йаһоwа öнда кьрьн у гöһ нәдьданә wи. Wана wәʹде хwә хәрщ нәдькьр wәки Йаһоwа рʹьнд нас бькьн у итʹбарийа хwә wи нәдьанин. Һәрге билани у занәбуна wанә рʹаст һәбуйа, wана wе сафикьрьна бь аqьлайи бькьрана (Зәб. 25:12). Һьн жи, әwана бәр байе мьләтед дьн кʹәтьбун, йед кö хьзмәткʹаред Йаһоwа нибун. Исраели һәла һе жи изьн данә wан мьләта, кö дәwса wан сафикьрьна бькьн. Әв мьләтед пʹутпарьст һʹьше Исраелийа зьвьрандьн у Исраели жи мина wан дәстпекьрьн хöданед qәлп бьһʹәбиньн. Ле Йаһоwа гәләк сал пешда Исраели ширәт дькьрьн, wәки мьqати хwә бьн кö нәкʹәвьнә бәр байе мьләтед дьн (Дәркʹ. 23:2).

ГӘЛО WЕ РʹАСТ БӘ ҺӘРГЕ КӘСЕД ДЬН ДӘWСА МӘ САФИКЬРЬНА БЬКЬН?

8. Жь сәрһатийа Исраелийа әм чь дәрсәкә фәрз һин дьбьн?

⁸ Әw сәрһатийа Исраелийа дәрсәкә баш мә һин дькә, кö әм гәрәке хwәха сафикьрьна бькьн. У сәва кö бь билани сафикьрьн у бьжартьна бькьн, әм гәрәке рʹьнд бьзаньбьн Хәбәра Хwәде. Галати 6:5 мәрʹа дьбежә: «Һәр кәс wе баре хwә һьлгьрә, ИМ». Бәле, әм бона хwә гәрәке хwәха сафикьрьна бькьн у әве борщдарийа хwә нәвежьн стуйе кәсәки дьн. Әм гәрәке бьзаньбьн кö чь рʹаст ә бәр чʹәʹве Хwәде у әwе йәке бьжберьн.

9. Чьрʹа хоф ә һәрге әм изьне дьдьнә мәрьва кö дәwса мә сафикьрьна бькьн?

⁹ Ле ча дькарә öса бьqәwьмә кö кәсәки дьн дәwса мә сафикьрьна бькә? Һәрге әм пе фькьред кәсәки дьн сафикьрьна дькьн, wи чахи сафикьрьна мә дькарә нәбаш бә (Мәтʹлк. 1:10, 15). Әм борщдар ьн wәки пәй исафа хwә һәрʹьн кö пе Кʹьтеба Пироз һинкьри йә. Бь рʹастийе һәрге әм изьне дьдьн кö кәсәки дьн дәwса мә сафикьрьна бькьн, öса дәрте кö әм пәй wан дьчьн. Ле әw сафикьрьн дькарә ахьрийа хьраб мәрʹа бинә.

10. Паwлос бона чь Галати пешда ширәт кьр?

¹⁰ Паwлос Мәсиһийед Галати пешда ширәт кьр, wәки әwана һаш хwә һәбьн сәва изьне нәдьн кö дәwса wан кәсед дьн сафикьрьна бькьн. (Бьхунә Галати 4:17.) Галатида һьнә бьра дьхwәстьн дәwса хушк-бьра бьжартьна бькьн. Гәло нета wан чь бу? Нета wан әw бу кö хушк-бьра пәй wан һәрʹьн у жь шандийа бьqәтьн. Әw бьра хwәһʹьз бун у пәй наве хwә кʹәтьбун. Әwан бьра qәдьре азайа бьжартьна хушк-бьра ньзаньбун, чьмки дьхwәстьн дәwса wан сафикьрьна бькьн.

11. Ча әм дькарьн али хушк-бьра бькьн чахе әwана сафикьрьна дькьн?

¹¹ Паwлос мәсәләкә баш мәрʹа һишт. Әwи заньбу wәки азайа хушк-бьра һәйә кö хwәха бона хwә сафикьрьна бькьн у әwи qәдьре азайа wан дьгьрт. (Бьхунә 2 Корьнтʹи 1:24.) Иро чахе рʹуспи ширәта дьдьнә хушк-бьра дәрһәqа сафикьрьнед шәхси, чʹәʹв дьдьнә Паwлос. Әwана бь дьл у щан һазьр ьн ширәтед жь Кʹьтеба Пироз бьдьнә хушк-бьра. Ле йәкә рʹуспи фәсал ьн у дәwса wан сафикьрьна накьн, чьмки әw хушк-бьра wе хwәха щабдар ьн бона ахьрийа сафикьрьнед хwә. Ве йәкеда әм хwәрʹа дәрсәкә фәрз һин дьбьн: Әм дькарьн принсип у ширәтед жь Кʹьтеба Пироз нишани хушк-бьра кьн, ле диса жи әwана хwәха щабдар ьн бона хwә сафикьрьна бькьн. Чахе әwана бь билани сафикьрьна дькьн, кʹаре дьстиньн. Бәле, әм гәрәке тʹö щар нәфькьрьн кö һʹöкöме мә һәйә, wәки дәwса хушк-бьра сафикьрьна бькьн.

ПЕ ХWӘСТЬНА ДЬЛЕ ХWӘ САФИКЬРЬНА НӘКЬН

12, 13. Чьрʹа хоф ә сафикьрьна бькьн чахе әм һерс йан жи дьлтәнг ьн?

¹² Ве дьнеда әв гьли-готьн гәләк бәлабуйи йә: Дьле тә ча дьхwазә öса жи бькә. Ле әw йәк гәләк хоф ә у һьн жи нә сәр һʹиме Кʹьтеба Пироз ә. Кʹьтеба Пироз мә ширәт дькә wәки пе хwәстьна дьле хwә сафикьрьна нәкьн (Мәтʹлк. 28:26). Сәрһатийед жь Кʹьтеба Пироз дьдьнә кʹьфше, кö чахе мәрьв гöһ дьдә дьле хwә, әw дькарә ахьрийа нәбаш бинә. Гәло чьрʹа? Чьмки «дьл жь һәр тьшти зедәтьр хапиноки йә у qәлс ә» (Йерәм. 3:17; 13:10; 17:9; 1 Пʹадш. 11:9). Ле чь дькарә бьqәwьмә һәрге әм гöһ дьдьнә дьле хwә?

¹³ Йаһоwа тʹәми дайә мә, кö wи бь тʹәмамийа дьле хwә һʹьз бькьн у öса жи мәрьва wәкә хwә һʹьз бькьн (Мәт. 22:37-39). Ле чаwа рʹезед абзаса жореда те готьне, гәләк хоф ә һәрге әм дьһельн кö дьле мә һʹöкöм кә сәр фькьр у кьред мә. Мәсәлә, чахе әм һерс ьн, чәтьн ә сафикьрьна баш бькьн. У дьqәwьмә wә хwәха жи әʹмьре хwәда әw йәк тʹәхмин кьрийә (Мәтʹлк. 14:17; 29:22). Йан жи чахе әм дьлтәнг ьн, һьнге жи wе нәаqьлайи бә сафикьрьна бькьн (Жьмар 32:6-12; Мәтʹлк. 24:10). Лапә баш әw ә, кö чахе әм тьштәки сафи дькьн, әм гöһ бьдьнә Хәбәра Хwәде у qануна wи (Рʹом. 7:25). Бәле, чахе әм сафикьрьнед фәрз дькьн, әм гәрәке фәсал бьн кö пәй хwәстьна дьле хwә нәчьн.

ЧАХЕ ЛАЗЬМ Ә САФИКЬРЬНЕ БЬГÖҺЕЗЬН

14. Чьрʹа щара лазьм ә сафикьрьнед хwә бьгöһезьн?

¹⁴ Әм гәрәке сафикьрьна билани бькьн, ле әw найе һʹәсабе wәки тʹö щар әм гәрәке сафикьрьна хwә нәгöһезьн. Щара wе баш бә кö диса бьфькьрьн сәр ве сафикьрьне кʹижан кö мә ида кьр, у һәрге лазьм бә жи, гәрәке бьгöһезьн. Дина хwә бьдьнә кö wәʹде Уньсда Йаһоwа чь сафи кьр һьндава бьнәлийед Нинәwайе. Кʹьтеба Пироз дьбежә: «Гава Хwәде әв кьрьна wан дит, кö әw жь рʹийа хwәйә хьраб вәгәрʹийан, Хwәде бона wе хәзәба кö готьбу wе банийа ль сәре wан, готьна хwә гöһаст у әw йәк нә ани ль сәре wан» (Унс. 3:10). Бәле, Йаһоwа сафикьрьна хwә гöһаст, чьмки әwи дит кö бьнәлийед Нинәwайе гöнед хwә анинә рʹуйе хwә. Бь ве йәке Йаһоwа һәqи, мьлукти у рʹәʹмти нишан кьр. Йаһоwа тʹö щар ләз накʹәвә һерса хwә бьрежә, чаwа гәләк мәрьв дькьн. Әw тʹьме фькьранди тьшта сафи дькә.

15. Чь дькарә бьбә мәʹни wәки әм сафикьрьна хwә бьгöһезьн?

¹⁵ Дьбәкә щара лазьм бә кö әм сәр бьжартьн йан жи сафикьрьна хwә диса кʹур бьфькьрьн, мәсәлә чахе дәрәщед мә тенә гöһастьне. Биньн бира хwә wәки щара Йаһоwа жи ль гора гöһастьна дәрәще, сафикьрьна хwә дьгöһаст (1 Пʹадш. 21:20, 21, 27-29; 2 Пʹадш. 20:1-5). Щара әм чахе тьштәки тʹәзә педьһʹәсьн, әw жи дькарә бьбә мәʹни кö сафикьрьне бьгöһезьн. Мәсәлә, щарәке Даwьд Пʹадша дәрһәqа Мәфибошәте нәбийе Шаwул, әʹламәтийа qәлп пеһʹәсийа. Ле гава кö Даwьд рʹастийе пеһʹәсийа, әwи сафикьрьна хwә гöһаст (2 Сам. 16:3, 4; 19:24-29). Щара wе аqьлайи бә әм жи öса бькьн.

16. а) Ча әм дькарьн сафикьрьна бь билани бькьн? б) Чахе мә тьштәк ида сафи кьрийә, чьрʹа лазьм ә диса бьфькьрьн сәр ве сафикьрьне?

¹⁶ Хәбәра Хwәде ширәте дьдә мә, wәки ләз нәкʹәвьн чахе тьштәки фәрз сафи дькьн (Мәтʹлк. 21:5). Әме сафикьрьнәкә баш бькьн, һәрге рʹьнд һʹәму тьшти чап кьн у бьпивьн (1 Тʹеслн. 5:21). Чахе малхе мале тьштәки сафи дькә, пешийе әw гәрәке Кʹьтеба Пирозда у әʹдәбйәтада дәрһәqа ве пьрсе леколин бькә. Öса жи малхе мале гәрәке дәрһәqа ве сафикьрьне тʹәви нәфәред малбәта хwә жи шеwьр кә. Биньн бира хwә wәки Хwәде готә Бьраһим кö гöһдарийа готьна жьна хwә бькә (Дәстп. 21:9-12). Рʹуспи жи гәрәке тʹьме леколина бькьн чахе тьштәки сафи дькьн. Щара öса дьqәwьмә кö рʹуспи әʹламәтийа тʹәзә педьһʹәсьн, у дьньһерʹьн һәла лазьм ә сафикьрьна хwә бьгöһезьн йан на. Рʹуспийед сәрwахт у мьлук wе тʹö щар нәфькьрьн, кö һәрге әwана сафикьрьна хwә бьгöһезьн, wе qәдьре wан бькʹәвә. Рʹуспи гәрә тʹьме һазьр бьн чахе лазьм ә, ньһерʹандьна хwә у сафикьрьна хwә бьгöһезьн. Wе баш бә wәки әм жи ве йәкеда чʹәʹв бьдьнә wан, чьмки öса wе щьватеда әʹдьлайи у тʹәрбәти һәбә (Кʹар. Шанд. 6:1-4).

WӘ ЧА САФИ КЬРИЙӘ ÖСА ЖИ БЬКЬН

17. Әм ча дькарьн сафикьрьнед баш бькьн?

¹⁷ Һьнә сафикьрьн кö әм гәрәке бькьн гәләк фәрз ьн, ләма жи wәʹдә лазьм ә сәва кʹур-дур бьфькьрьн у гәләк дöа бькьн. Мәсәлә, һьнә Мәсиһи сафи дькьн һәла бьзәwьщьн йан на, йан кʹе бьстиньн, йан жи кʹәнге хьзмәткьрьна һәртʹьм дәстпекьн. Wәʹде wан сафикьрьна гәләк фәрз ә бь тʹәмами итʹбарийа хwә Йаһоwа биньн. Әw wе рʹебәрийе бьдә мә сәва әм бь билани сафи бькьн (Мәтʹлк. 1:5). Гәләк фәрз ә ширәтед жь Кʹьтеба Пироз бьгәрʹьн у дöада жь Йаһоwа һиви кьн wәки рʹебәрийе бьдә мә. Йаһоwа öса жи дькарә һʹöнöред öса бьдә мә, wәки сафикьрьнед рʹаст бькьн. Пешийа сафикьрьна, фәрз ә тʹьме пьрсед öса бьдьнә хwә: Гәло әв сафикьрьн wе бьдә кʹьфше кö әз Йаһоwа һʹьз дькьм? Гәло әw wе шабуне у әʹдьлайе бькә малбәта мьн? У гәло бь ве сафикьрьне wе бе кʹьфше кö сәбьра мьн һәйә у кö әз qәнщ ьм?

18. Чьрʹа Йаһоwа дьхwазә кö әм хwәха сафикьрьна бькьн?

¹⁸ Йаһоwа зоре мә накә, wәки wи һʹьз бькьн у жерʹа хьзмәт кьн. Әw бьжартьна мә йә у әw азайа бьжартьне Йаһоwа дайә мә. Әw qәдьре бьжартьна мә дьгьрә у ләма дьхwазә кö әм хwәха сафи кьн wирʹа хьзмәт кьн йан на (Йешу 24:15; Wаиз 5:4). Ле Йаһоwа дьхwазә wәки әм пе рʹебәрийа wи сафикьрьна бькьн. Һәрге әм итʹбарийа хwә рʹебәрийа wи биньн у принсипед wи биньн сери, әме сафикьрьна бь билани бькьн у һʹәму гавед хwәда qәwи бьсәкьньн (Аqуб 1:5-8; 4:8).