Тӧ Ча Сафикьрьна Дьки?
«Бьзаньбьн чь йә qьрара Хӧдан» (ӘФӘС. 5:17).
1. Гьли кьн һьнә qанунед Кʹьтеба Пироз, у әм чь кʹаре дьстиньн чахе wан qануна тиньн сери?
ЙАҺОWА бь Кʹьтеба Пироз qанун у тʹәмийед зәлал дайә мә. Мәсәлә, Йаһоwа qәдәхә дькә бенамусийе, пʹутпʹарьстийе, дьзийе, у сәрхwәшийе (1 Корн. 6:9, 10). Хенщи ве йәке, Кӧрʹе Хwәде, Иса Мәсиһ әв тʹәмийа конкрет да пәйчуйед хwә: «Һәрʹьн һʹәму мьләта һин кьн у wана бь наве Бав, Кӧрʹ у Рʹӧһʹе Пироз бьньхӧминьн у wан һʹәму тʹәмийед кӧ мьн данә wә мьләта һин кьн, wәки әw хwәй кьн. Әз ирода тʹьме һʹәта ахьрийа дьнйайе тʹәви wә мә!» (Мәт. 28:19, 20). Рʹасти жи, qанун у тʹәмийед Хwәде чьqас мә хwәй дькьн у кʹаре мәрʹа тиньн! Әw тʹәмийед Хwәде мә һин дькьн кӧ qәдьре хwә бьзаньбьн, сьһʹәт-qәwата хwә хwәй кьн, у ча малбәтеда бәхтәwар бьн. У һе зедә, чахе әм тʹәмийед Йаһоwа тиньн сери, у мьзгине бәла дькьн, әw мә qәбул дькә у мә кʹәрәм дькә.
2, 3. а) Чьрʹа Кʹьтеба Пирозда дәрһәqа һʹәму щурʹә дәрәща тʹәми тʹӧнәнә? б) Ве тʹемайеда әме кʹижан пьрса шеwьр кьн? (Бьньһерʹә шькьле әʹwльн.)
2 Кʹьтеба Пироз дәрһәqа һʹәму дәрәща тʹәмийед конкрет надә. Мәсәлә, Кʹьтеба Пирозда найе готьне кӧ Мәсиһи чь кʹьнщ гәрәке хwә кьн. Ве йәкеда рʹасти жи биланийа Йаһоwа те кʹьфше. Һәр wәлатәкида стил у qәйде кʹьнщхwәкьрьне щурʹә-щурʹә йә, у һьн жи чьqас wәʹдә дәрбаз дьбә, һаqас щурʹе кʹьнщхwәкьрьне тенә гӧһастьне. Ләма жи, һәрге Кʹьтеба Пирозда бьһата рʹезкьрьне щурʹе кʹьнщхwәкьрьне у хәмьландьне, әw йәк wе лайиqи кʹьнщхwәкьрьна иро нибуйа. Ӧса жи Кʹьтеба Пироз надә тʹәмийа конкрет дәрһәqа ве йәке кӧ Мәсиһи кʹижан хәбате гәрәке бьжберә, ча мьqати сьһʹәт-qәwата хwә бә, у ча wәʹде хwә дәрбаз кә. Wан пьрса Мәсиһи гәрәке хwәха сафи кә. Ле малбәтеда гәрәке малхе мале сафи бькә.
3 Ле гәло әw те һʹәсабе кӧ Йаһоwарʹа фьрqи тʹӧнә, әм ча wан сафикьрьна дькьн? Гәло Йаһоwа wе һʹәму сафикьрьнед мә qәбул кә, кʹижан кӧ мьqабьли qанун у принсипед Кʹьтеба Пироз начьн? Әм ча гәрәке тедәрхьн, һәла wе Йаһоwа хwәш бе сафикьрьна мә, һәрге Кʹьтеба Пирозда тʹәмийа рʹастә-рʹаст тʹӧнә йә?
ГӘЛО ФЬРQИ ҺӘЙӘ ӘМ ЧЬ САФИКЬРЬНА ДЬКЬН?
4, 5. Сафикьрьнед мә ча дькарьн сәр мә у сәр йед дьн һʹӧкӧм бьн?
4 Һьнәк мәрьв дьфькьрьн, wәки фьрqи тʹӧнә әwана сафикьрьна ча дькьн. Ле әм дьхwазьн дьле Йаһоwа ша кьн, у ләма чахе әм сафикьрьна дькьн, гәрәке qанун у принсипед Кʹьтеба Пироз һьлдьнә һʹәсаб. Мәсәлә, Кʹьтеба Пирозда те готьне дәрһәqа ньһерʹандьна Хwәде сәва хуне, ләма әм гәрәке ӧса бькьн ча Кʹьтеба Пироз дьбежә (Дәстп. 9:4; Кʹар. Шанд. 15:28, 29). Дӧа wе али мә бькә кӧ сафикьрьнед рʹаст бькьн, кʹижан ль гора qанун у принсипед Кʹьтеба Пироз ьн.
5 Сафикьрьнед мә дькарьн йан баш йан хьраб сәр мә һʹӧкӧм бьн. Чахе әм сафикьрьна баш дькьн, әw йәк һәләqәтийа мә тʹәви Йаһоwа qәwи дькә. Ле чахе әм сафикьрьна нәбаш дькьн, әw йәк дькарә һәләqәтийа мә тʹәви Йаһоwа хьраб кә. Хенщи wе йәке сафикьрьнед мә сәр мәрьвед дьн жи һʹӧкӧм дьбьн. Сафикьрьнед мәйә нәрʹаст дькарьн рʹӧһʹанида зийане бьдьнә мәрьвед дьн, йан жи wан әʹщьз кьн. Ӧса жи әм нахwазьн сәва wе йәке wанрʹа бьбьнә кәвьре лькʹӧмандьне, у ӧса йәктийа щьвате ӧнда бә. Бәле, гәләк фәрз ә кӧ әм чь сафикьрьна дькьн. (Бьхунә Рʹомайи 14:19; Галати 6:7.)
6. Әм ча гәрәке сафикьрьна бькьн?
6 Әм чь гәрәке бькьн, чахе тьштәки дьхwазьн сафи кьн, ле дәрһәqа ве йәке Кʹьтеба Пирозда рʹастә-рʹаст тʹәми тʹӧнә йә? Wан дәрәщада, әм гәрәке нә кӧ сафи кьн ӧса ча әм дьхwазьн, ле гәрәке дәрһәqа дәрәща хwә леколин бькьн, у сафикьрьна ӧса бькьн, кʹижан wе Йаһоwа qәбул кә у кʹәрәм кә. (Бьхунә Зәбур 37:5.)
ФӘʹМ БЬКЬН QЬРАРА ЙАҺОWА
7. Чахе Кʹьтеба Пирозда тʹәмийа конкрет тʹӧнә, әм ча дькарьн фәʹм бькьн кӧ Йаһоwа ча дьхwазә кӧ әм бькьн?
7 Wәʹде сафикьрьна дьбәкә әм дьфькьрьн: «Әз ча дькарьм тедәрхьм кӧ чь wе Йаһоwа хwәш бе, һәрге дәрһәqа дәрәща мьн тʹәмийа конкрет Кʹьтеба Пирозда тʹӧнә йә?» Әфәси 5:17-да те готьне: «Бьзаньбьн чь йә qьрара Хӧдан». Чахе Кʹьтеба Пирозда дәрһәqа дәрәща мә, qануна рʹастә-рʹаст тʹӧнә, әм ча дькарьн qьрара Хwәде бьзаньбьн? Әм гәрәке wирʹа дӧа бькьн у бь сайа рʹӧһʹе пироз рʹебәрийа wи бьвиньн.
8. Иса ча тедәрдьхьст qьрара Йаһоwа? Мәсәле биньн.
8 Шеwьр кьн кӧ Иса ча тедәрдьхьст qьрара Баве хwә. Мәсәлә, чахе дӧ дәрәщада Иса бь кʹәрәмәт әʹлаләта мәзьн тʹер кьр, пешийе әwи Хwәдерʹа дӧа кьр (Мәт. 14:17-20; 15:34-37). Ле чахе бәрʹийеда Иса бьрʹчи бу у Шәйтʹан wи дьщерʹьбанд, йәкә әwи инкʹар кьр кӧ бь кʹәрәмәт кәвьр бькә нан. (Бьхунә Мәтта 4:2-4.) Гәло чьрʹа? Чьмки әwи рʹьнд заньбу ньһерʹандьна Баве хwә, у ләма заньбу кӧ гәрәке ӧса нәкә. Иса фәʹм дькьр кӧ Йаһоwа хwәш найе, кӧ әw qәwата wи бона кʹара хwә бьдә хәбате. У чьмки Иса ӧса сафи кьр, бь ве йәке әwи да кʹьфше кӧ итʹбарийа хwә рʹебәрийа Йаһоwа тинә, у баwәр ә кӧ әwе али wи бькә.
9, 10. Чь wе али мә бькә кӧ сафикьрьнед билан бькьн? Мәсәле биньн.
9 Һәрге әм дьхwазьн сафикьрьнед билан бькьн, әм гәрәке мина Иса итʹбарийа хwә рʹебәрийа Йаһоwа биньн. Кʹьтеба Пироз дьбежә: «Бь һʹәмуйа дьле хwә, бь Хӧданва әwлә бьбә у пьшта хwә нәсьперә аqьле хwә. Дь һәр кʹаре кӧ тӧ дьки, wи нас бькә у әw жи рʹийа тә дәрхә рʹастийе. Хwә мина йәки занийар нәвинә, жь Хӧдан бьтьрсә у жь хьрабийе дур бьсәкьнә» (Мәтʹлк. 3:5-7). Чахе әм бь леколинкьрьна Кʹьтеба Пироз qьрара Йаһоwа педьһʹәсьн, әме бькарьбьн тʹьме тедәрхьн, кӧ сафикьрьна мә wе wи хwәш бе йан на. У әм чьqас рʹьнд Йаһоwа нас кьн, һаqас зәʹф әме рʹебәрийа wи бьвиньн у пәй wи һәрʹьн (Зәб. 119:11, 12).
10 Шеwьр кьн мәсәлә: Бьдьнә бәр чʹәʹве хwә кӧ кʹӧлфәтәк дькʹанеда дьхwазә тьшта бькʹьрʹә. Дькʹанеда соле рʹьнд wе хwәш һатьн, кʹижан кӧ гәләк бьһа нә. Ньһа әw дьфькьрә кӧ малхе wе чь wе бежә чахе әw wан солед бьһа бькʹьрʹә. Рʹаст ә малхе wе тʹәви wе нинә, ле әw кʹӧлфәт рʹьнд занә ньһерʹандьна малхе хwә, дәрһәqа хәрщкьрьна пʹәра. Ле әw ча занә? Ида епʹещә wәхт ә кӧ әwана зәwьщинә, у ләма әw занә кӧ малхе wе ча дьньһерʹә сәр хәрщкьрьна пʹәра. Демәк, әw фәʹм дькә фькьред малхе хwә дәрһәqа кʹьрʹина тьштед бьһа. Һәма wи щурʹәйи, чахе әм ньһерʹандьна Йаһоwа у рʹийед wи рʹьнд заньн, әме һе рʹьнд бькарьбьн тедәрхьн, кӧ әм ча гәрәке щурʹә-щурʹә дәрәща сафи кьн.
ТӦ ЧА ДЬКАРИ НЬҺЕРʹАНДЬНА ЙАҺОWА БЬЗАНЬБИ?
11. Әм кʹижан пьрса дькарьн бьдьнә хwә, чахе Кʹьтеба Пироз дьхуньн йан һинбуна шәхси дәрбаз дькьн? (Бьньһерʹә чаргошә «Чахе Тӧ Хәбәра Хwәде Дьхуни, Пьрсед Ӧса Бьдә Хwә».)
11 Ле әм ча дькарьн ньһерʹандьна Йаһоwа бьзаньбьн? Гәләк фәрз ә кӧ Кʹьтеба Пироз бьхуньн у леколин бькьн. Чахе әм әве йәке дькьн, wе баш бә әм пьрсед ӧса бьдьнә хwә: «Әw информасийа дәрһәqа Йаһоwа, рʹийед wи, у ньһерʹандьна wи мьн чь һин дькә?» Әм гәрәке чʹәʹв бьдьнә Даwьде зәбурбеж, йе кӧ ньвиси: «Йа Хӧдан, тӧ һини мьн бькә рʹийед хwә, нишани мьн бьдә алийед хwә. Бь рʹастийа хwәрʹа нишани мьн бьдә, жь бо мьн бьбә һиндар. Чьмки тӧ йи жь бо мьн Хwәдайе рьзгаркʹар [хьлазкʹар]. Һевийа мьн һәргав тӧ йи» (Зәб. 25:4, 5, ИМ). Чахе әм Кʹьтеба Пироз дьхуньн, әм гәрәке бьфькьрьн кӧ әм кʹидәре дькарьн бьдьнә хәбате чь кӧ мә хwәнд. Пьрсед ӧса бьдьнә хwә: «Әз ча дькарьм әве информасйайе бьдьмә хәбате малбәтеда, мәкʹтәбеда, у хьзмәтийеда?» Чахе әме сафи кьн кӧ кʹидәре әм дькарьн әве информасйайе бьдьнә хәбате, һьнге мәрʹа wе дьһа һеса бә фәʹм бькьн кӧ чаwа бьдьнә хәбате.
12. Ча әʹдәбйәт у щьвинед мә али мә дькьн, кӧ әм бьзаньбьн Йаһоwа чь дьфькьрә дәрһәqа щурʹә-щурʹә дәрәща?
12 Әм дькарьн һе зедә ньһерʹандьна Йаһоwа бьзаньбьн, чахе гӧһ дьдьнә рʹебәрийа тʹәшкиләта wи. Мәсәлә, «Индекса Әʹдәбйәтед Бьрща Qәрәwьлийе» у «Рʹебәрийа Леколинкьрьне бона Шәʹдед Йаһоwа», дькарьн али мә бькьн кӧ бьзаньбьн фькьред Йаһоwа дәрһәqа щурʹә-щурʹә дәрәща. Ӧса жи чахе әм рʹьнд гӧһе хwә дьдьнә сәр щьвата у щаба хwә дьдьн, у дьфькьрьн сәр ве чь кӧ әм пеһʹәсийан, ӧса әм гәләк кʹаре дьстиньн. Әw йәк али мә дькә кӧ һе рʹьнд фәʹм кьн ньһерʹандьна Йаһоwа у чʹәʹв бьдьнә ньһерʹандьна wи. У ахьрийеда, әме сафикьрьна ӧса бькьн кʹижан кӧ wи хwәш те у әw wе мә кʹәрәм кә.
WӘʹДЕ САФИКЬРЬНА БЬРА НЬҺЕРʹАНДЬНА ЙАҺОWА РʹЕБӘРИЙА ТӘ БЬКӘ
13. Мәсәле биньн, кӧ чаwа занәбуна ньһерʹандьна Йаһоwа, али мә дькә сафикьрьнед билан бькьн.
13 Шеwьр кьн мәсәле, кʹижан кӧ әʹйан дькә, кӧ чаwа занәбуна ньһерʹандьна Йаһоwа, али мә дькә кӧ сафикьрьнед рʹаст бькьн. Чаwа хьзмәткʹаред Хwәде, дьбәкә әм дьхwазьн пешәнгед һәртʹьм бьн. Сәва кӧ әве нете биньн сери, әм дәстпедькьн әʹмьре хwә һеса кьн, сәва һе зедә хьзмәт кьн. Һьнге дьбәкә әм хәмгин дьбьн, кӧ дьбәкә әм бәхтәwар нибьн, чьмки алийе материалида әме дәwләти нибьн. Бәле, Кʹьтеба Пирозда найе готьне кӧ әм әʹсә гәрәке пешәнг бьн. Әм дькарьн пешәнг нибьн, ле бәрдәwам кьн Йаһоwарʹа бь амьни хьзмәт кьн. Ле Иса гот кӧ һәрге әм бона Пʹадшатийе qӧрбана дькьн, әме гәләк кʹәрәма бьстиньн. (Бьхунә Луqа 18:29, 30.) Хенщи ве йәке, Кʹьтеба Пирозда те готьне, кӧ чахе әм «пәсне жь дьл» дьдьнә Йаһоwа, у бь дьл у щан wирʹа хьзмәт дькьн, дьле wи гәләк ша дьбә (Зәб. 119:108, ИМ; 2 Корн. 9:7). Бәле, һәрге әм бьфькьрьн сәр wан рʹеза, у Йаһоwарʹа дӧа бькьн кӧ рʹебәрийа мә бькә, әме фәʹм бькьн qьрара wи. Бь сайа ве йәке, әме бькарьбьн сафикьрьна баш бькьн, кʹижан кӧ бона мә керһати бә у Йаһоwа wе мә кʹәрәм кә.
14. Тӧ ча дькари тедәрхи, һәла стила кʹьнщхwәкьрьна тә, Йаһоwа хwәш те йан на?
14 Wәрә мәсәле дьн шеwьр кьн: Бьдә бәр чʹәʹве хwә кӧ стиләкә кʹьнщхwәкьрьне тә хwәш те, кʹижан кӧ дьбәкә һьнә хушк-бьред щьватеда дькарә әʹщьз кә. Ле тӧ зани wәки Кʹьтеба Пирозда тʹәмийа конкрет тʹӧнә, кʹижан кӧ qәдәхә дькә әwе стила кʹьнщхwәкьрьне. Ле ча тӧ дькари тедәрхи ньһерʹандьна Йаһоwа дәрһәqа ве йәке? Кʹьтеба Пироз мәрʹа дьбежә: «Бьра кʹӧлфәт бь кʹьнщед лайиq, шәрме у бәрбьһерийе хwә бьхәмьлиньн, нә кӧ бь гӧли-гӧжанга, йан зерʹ, йан бь дӧрʹа, йан жи бь кʹьнщед бьһа, ле бь кьред qәнщ, чаwа ль wан кʹӧлфәта дькʹәвә, йед кӧ наве хwәденасийе һьлданә сәр хwә» (1 Тимтʹ. 2:9, 10). Бәле, әw ширәт бона һʹәму хьзмәткʹаред Йаһоwа йә, демәк бона кʹӧлфәта, у ӧса жи бона мера. Чахе әм сафи дькьн кʹижан кʹьнща хwә кьн у ча хwә бьхәмьлиньн, әм гәрәке нә кӧ тʹәне бона хwә дьшьрмиш бьн, ле ӧса жи бьфькьрьн кӧ чаwа кʹьнщхwәкьрьн у хәмьландьна мә wе сәр йед дьн һʹӧкӧм бә. Мьлукти у һʹьзкьрьн мә һелан дькьн кӧ ньһерʹандьна хушк-бьред хwә һьлдьнә һʹәсаб, сәва wана әʹщьз нәкьн йан wана нәхәйидиньн (1 Корн. 10:23, 24; Фили. 3:17). Әм дькарьн дәрһәqа ве йәке ньһерʹандьна Йаһоwа фәʹм бькьн, һәгәр әм бьфькьрьн сәр рʹезед жь Кʹьтеба Пироз. Ӧса әме бькарьбьн сафикьрьнед рʹаст бькьн, кʹижан кӧ wе Хwәде хwәш бен.
15, 16. а) Йаһоwа ча дьньһерʹә сәр ве йәке, һәрге әм дәрһәqа тьштед бенамуси дьфькьрьн? б) Чахе әм сафи дькьн кӧ ча wәʹде хwә дәрбаз кьн, әм ча дькарьн бьзаньбьн кӧ wе Йаһоwа чь хwәш бе? в) Сафикьрьнед фәрз әм ча гәрәке бькьн?
15 Жь Кʹьтеба Пироз әм педьһʹәсьн кӧ дьле Йаһоwа дешә чахе мәрьв кьред хьраб дькьн у фькьред дьле wан жи хьраб ьн. (Бьхунә Дәстпебун 6:5, 6.) Жь ве йәке әм фәʹм дькьн, һәрге әм дәрһәqа тьштед бенамуси бьфькьрьн, әw йәк wе Йаһоwа хwәш нәйе. Чьмки әw йәк дькарә мә бәрбь гӧне мәзьн бьвә. Йаһоwа дьхwазә wәки фькьред мә тʹәмьз бьн. Аqуб ньвиси: «Сәрwахтийа жорьн, бәре пешьн паqьж ә, паше әʹдьл ә, мьлук у бәрбьһер ә, бь рʹәʹме у бәред qәнщийева тʹьжи йә, бе тʹагер у бе һʹьләкʹари йә» (Аqуб 3:17). Демәк, әм гәрәке wәʹдәрбазкьрьна ӧса нәжберьн, кʹижан кӧ фькьред нәтʹәмьз пешда тиньн. У һәрге әм рʹьнд заньн кӧ Йаһоwа чь һʹьз дькә у чь нәфрʹәт дькә, әме һеса тедәрхьн кӧ wәʹдәдәрбазкьрьна чь щурʹәйи бьжберьн, мәсәлә кʹижан кʹьтеб бьхуньн, филм бьньһерʹьн, йан кʹижан листьк бьлизьн. Мәсиһийе сәрwахтрʹа, нәлазьм ә жь кәсәки бьпьрсә кӧ чь бьжберә, чьмки дәрһәqа wан тьшта, фькьред Йаһоwа Хәбәра wида зәлал ьн.
16 Әм дькарьн сафикьрьна бь щурʹә-щурʹә бькьн, у һәр щурʹе сафикьрьне Йаһоwа дькарә qәбул кә. Ле чахе мәрʹа лазьм ә сафикьрьнәкә фәрз бькьн, wе керһати бә һәрге әм жь рʹуспийа йан жь хушк-бьред щерʹьбанди ширәта һьлдьн (Тито 2:3-5; Аqуб 5:13-15). Ле бәле, әw найе һʹәсабе кӧ әм жь wана бьхwазьн, wәки дәwса мә сафи кьн. Чьмки әм гәрәке һин бьн хwәха тедәрхьн, кʹижан сафикьрьн wе рʹаст бьн у кʹижан на (Ибрн. 5:14). Паwлосе шанди гот: «Чьмки һәр кәсе хӧрща хwә һьлгьрә» (Галт. 6:5).
17. Әме чь кʹаре бьстиньн, һәрге сафикьрьнед ӧса дькьн, кʹижан кӧ Йаһоwа хwәш тен?
17 Чахе әм wәʹде сафикьрьна, ньһерʹандьна Йаһоwа һьлдьдьнә һʹәсаб, әм һе незики wи дьбьн (Аqуб 4:8). Ӧса әм дьле wи ша дькьн у кʹәрәмед wи дьстиньн. Әw йәк баwәрийа мә һе qәwи дькә һьндава Баве мәйи әʹзмана. Ләма, wәрә әм тʹьме ӧса бькьн кӧ qанун у принсипед Кʹьтеба Пироз рʹебәрийа мә бькьн, чьмки ӧса әме һе рʹьнд ньһерʹандьна Йаһоwа бьзаньбьн. Бәле, әме тʹьме һе зедә дәрһәqа Йаһоwа пебьһʹәсьн (Иб. 26:14). Әм һәла һе ньһа жи дькарьн билани, занәбун, у сәрwахтийе qазанщ кьн, чьмки әw мәрʹа лазьм ьн сәва сафикьрьнед рʹаст бькьн (Мәтʹлк. 2:1- 5). Фькьред у нетед мәрьвед гӧнәкʹар тʹьме тенә гӧһастьне. Ле зәбурбеж гот: «Шеwра Хӧдан һәр у һәр ә, фькьра дьле wи, дь дәма тʹӧ ньфшида [ньслида] нагӧһәрә» (Зәб. 33:11, ИМ). Әʹйан ә, кӧ әм дькарьн сафикьрьнед лапи баш бькьн, чахе әм рʹьнд ньһерʹандьна Йаһоwа бьзаньбьн у кьред ӧса бькьн кӧ wи хwәш тен.