Меванһʹьзи Qимәт ә у Гәләк Лазьм ә!

1. Мәсиһийед qьрʹна йәке рʹасти чь һатьн?

ПӘТРУСЕ шанди ортʹа сала 62 һʹәта 64 Д.М., нәʹмә ньвиси Мәсиһийарʹа йед кö «ль wәлатед Понтосе, Галатйайе, Кәпәдокйайе, Асйайе у Битенйайеда хәриб бәлабуйи» бун (1 Пәт. 1:1). Әw хушк-бьра кö жь щурʹә-щурʹә щийа бун, кʹәтьнә «алава тәнгасийе», демәк рʹасти пәйкʹәтьна һатьн у һьн жи наве хьраб пәй wан хьстьн. Әwана wәʹдәки гәләк чәтьнда дьжитьн. Пәтрус wанрʹа ньвиси кö «ахьрийа һәр тьшти незик буйә». Бәле, һьнге 10 сала кемтьр мабу кö Оршәлим wеран буйа. Гәло чь дькарьбу али wан һʹәму Мәсиһийа бькьра, wәʹде wи зәмане гьран? (1 Пәт. 4:4, 7, 12).

2, 3. Чьрʹа Пәтрус Мәсиһи ширәт кьрьн, wәки меванһʹьз бьн? (Бьньһерʹә шькле әʹwльн.)

² Пәтрус ширәт да wан хушк-бьра: «Һьндава һәвда меванһʹьз бьн» (1 Пәт. 4:9). Хәбәра «меванһʹьз» сәр зьмане Йунани рʹастә-рʹаст те һʹәсабе «һʹьзкьрьн, йан жи qәнщи һьндава хәриба». Ле дина хwә бьдьне, Пәтрус ве рʹезеда дәрһәqа хушк-бьра дьгот кö «һьндава һәвда» меванһʹьз бьн, демәк тʹәви wан кʹижана әwана ида нас дькьн у һәвалтийе дькьн. Ле меванһʹьзийе wе чьда али wан Мәсиһийа бькьра?

³ Әwана wе һе незики һәв буна. Һәла бьфькьрьн, чахе кәсәки һун тʹәглифи мала хwә кьрьн, һун гәләк ша бун, öса нинә? Дьбәкә әw рʹож һе бира wәда йә. Йан жи чахе wә жь щьвате кәсәк тʹәглифи мала хwә кьр, һун һе незики һәв бун, рʹаст ә? Чахе әм меванһʹьзийе дьдьнә кʹьфше, әм хушк-бьра һе рʹьнд нас дькьн. Мәсиһийед кö wәʹде Пәтрус дьжитьн, гәрәке һе зедә тʹьфаq буна, чьмки һьнге һʹал хьраб дьбу. Иро жи әм гәрәке öса бькьн, чьмки әм дьжин «рʹожед ахьрийеда» (2 Тимтʹ. 3:1).

4. Ве готареда әме кʹижан пьрса шеwьр кьн?

⁴ Ле ча әм дькарьн «һьндава һәвда» меванһʹьз бьн? Чь бькьн сәва тьштәк рʹе мә нәгьрә меванһʹьз бьн? Ча әм хwәха дькарьн бьбьнә меванед баш?

МӘЩАЛЕД МЕВАНҺʹЬЗИЙЕ

5. Щьватеда әм ча дькарьн меванһʹьз бьн?

⁵ Щьватеда: Йаһоwа у тʹәшкиләта wи мә тʹәглифи щьвате дькьн. У әм һʹәму мевана qәбул дькьн йед кö тенә щьвате (Рʹом. 15:7). Чахе йед тʹәзә тенә сәр щьвате, әм гәрәке wана бь дьл у щан qәбул кьн, чьмки әwана жи меванед Хwәде нә. Бәʹса хәбәре, чахе меван те щьвате, фьрqи тʹöнә әw ча хwәкьри йә йан жи хәмьланди йә, әм гәрәке незики wи бьн у бь дьл у әшq wи сьлав кьн (Аqуб 2:1-4). Һәрге әw меван тʹәне һатийә, һун дькарьн wи тʹәглиф кьн кʹеләка wә рʹуне. Әw wе ша бә һәрге һун али wи бькьн, wәки әw бәрнама щьвате фәʹм кә, йан жи рʹеза бьвинә кʹижан сәр щьвате тенә хwәндьне. Әw мәщаләкә гәләк баш ә, wәки әм «пәй меванһʹьзийе бьн» (Рʹом. 12:13).

6. Бәре әʹwльн әм гәрәке һьндава кʹе меванһʹьз бьн?

⁶ Сәр нанхwарьне: Wәʹде бәре, мәрьва меванһʹьзи нишан дькьрьн, мәсәлә мевана тʹәглифи мала хwә дькьрьн сәр нанхwарьне (Дәстп. 18:1-8; Һʹакьм. 13:15; Луqа 24:28-30). Бь ве йәке wана нишан дькьр, wәки дьхwазьн һәвалти у әʹдьлайи һәбә ортʹа wанда. Ле әм бәре әʹwльн гәрәке һьндава кʹе меванһʹьз бьн? Һьндава хушк-бьред щьвата хwә. Зәманед гьран һивийа мә нә, у әме һәврʹа гәләк лазьм бьн. Бәле, лазьм ә ортʹа мә һʹәму хушк-бьрада һәвалтийа амьн у әʹдьлайи һәбә. Кʹома Рʹебәрийе сала 2011 сафи кьр, wәки Бәйтʹәла Амәрикайеда wәʹде Һинбуна «Бьрща Qәрәwьлийе» бьгöһезьн, дәwса сьһʹәта 18:45, дәстпебә сьһʹәта 18:15. Чьрʹа wана öса сафи кьр? Чахе әw йәк әʹлам кьрьн, öса жи шьровәкьрьн wәки wәʹдә һатә гöһастьне, сәва дәрәнг нибә бона хьзмәткʹаред Бәйтʹәле меванһʹьзийе бьдьнә кʹьфше һьндава һәвда. Филиалед дьн жи öса кьрьн. Әwе сафикьрьне бь рʹасти хушк-бьред Бәйтʹәледа гәләк незики һәв кьрьн.

7, 8. Чаwа әм дькарьн меванһʹьзийе нишан кьн һьндава готарванед тʹәглифкьри?

⁷ Чахе готарванед тʹәглифкьри тенә щьвата мә, йан бәрпьрсийаред мьһале, йан жи чахе wәкʹилед филиале тʹәсәлийа щьвата мә дькьн, әw йәк мәщале дьдьн мә сәва әм меванһʹьзийе нишан кьн һьндава wан. (Бьхунә 3 Йуһʹәнна 5-8.) Бәʹса хәбәре, әм дькарьн wана тʹәглифи мала хwә кьн сәр ширьнайи йан жи сәр нанхwарьне.

⁸ Хушкәкә мә жь Амәрикайе тинә бира хwә: «Бь сала әз тʹәви малхе хwә, готарвана у жьнед wан тʹәглифи мала хwә дькьн. Һәр щар әм wәʹдәки хwәш дәрбаз дькьн, у йа лапә фәрз әw ә кö әм алийе рʹöһʹанида гәләк кʹаре дьстиньн. Әм тʹö щар пʹошман набьн кö әм öса дькьн».

9, 10. а) Һьндава кʹе дьбәкә лазьм бе кö меванһʹьзийе бьдьнә кʹьфше? б) Әwед кö мала wан бьчʹук у нәдәwләти йә, ча дькарьн ве йәкеда аликʹарийе бьдьн? Мәсәле биньн.

⁹ Меванед кö сәр гәләк wәхт дьминьн: Wәʹде бәре меванһʹьзи öса жи әw бу кö щи дьданә мевана сәва бьминьн (Иб. 31:32; Фьльмн. 22). Иро жи мәщала мә һәйә кö wи щурʹәйи меванһʹьзийе нишан кьн. Бәʹса хәбәре, чахе бәрпьрсийаред мьһале тʹәсәлийа щьвата дькьн, гәләк щар wанрʹа лазьм ә щики бьминьн. Öса жи бона wан хушк-бьред кö тʹәшкиләта мәда щурʹә-щурʹә мәкʹтәбада һин дьбьн, йан жи әwед кö бь рʹәзәдьли авакьрьнада дьхәбьтьн, щара wанрʹа жи лазьм ә щи сәва бьминьн. Öса жи чахе тʹәшqәлед тʹәбийәте дьqәwьмьн у хушк-бьра бе мал дьминьн, һʹәта әwана мала хwә чекьн, лазьм ә wәʹдәлу щики бьминьн. Әм гәрәке нәфькьрьн кö тʹәне мала кʹижана мәзьн ә у баш ә, әwана дькарьн мевана qәбул кьн сәва бьминьн. Әwана дьбәкә ида гәләк щар әw йәк кьрьнә. Һәрге жи мала wә бьчʹук ә у нәдәwләти йә, йәкә һун дькарьн меванһʹьзийе нишан кьн, wана мала хwәда qәбул кьн.

¹⁰ Бьрак жь Корейа Башуре тинә бира хwә wи wәʹдәйи, чахе шагьртед жь мәкʹтәбед тʹәшкиләта мә, мала wида дьман. Әwи ньвиси: «Пешийе мьн һьнәки шәрм дькьр, чьмки әз тʹәзә зәwьщибум у мала мә бьчʹук бу. Ле чахе әwана мала мәда дьман, мә шабунәкә мәзьн дьстанд. Чаwа йед тʹәзә зәwьщи, мә дит кö мер у жьн ча дькарьн бәхтәwар бьн чахе Йаһоwарʹа хьзмәт дькьн у тʹәвайи нетед хwәйә рʹöһʹани тиньн сери».

11. Чьрʹа лазьм ә wанрʹа меванһʹьзийе бьдьнә кʹьфше, йед кö тʹәзә дәрбази щьвата wә бунә?

¹¹ Хушк-бьред тʹәзә щьватеда: Дьбәкә кәсәк йан жи малбәтәк дәрбази мьһала wә буйә. Һьнәк дьбәкә дәрбаз бунә, чьмки һʹәwщәти һәйә. Дьqәwьмә щьвата wәда пешәнг һатьнә кʹьфшкьрьне, сәва аликʹарийе бьдьнә щьвата wә. Дькарьн бежьн бона wан һʹәмуйа әw йәк гöһастьнәкә мәзьн ә. Мәсәлә, әwана гәрәке һини ви щийи у щьвата тʹәзә бьн, у дьqәwьмә һәла һе зьмане тʹәзә жи һин бьн у һини әʹдәтед тʹәзә бьн. Чахе һун wана тʹәглифи мала хwә кьн, мәсәлә сәр нанхwарьне, бь ве йәке һуне али wан бькьн, wәки һәвалед тʹәзә хwәрʹа qазанщ кьн у зу һини гöһастьна бьн.

12. Кʹижан мәсәлә дьдә кʹьфше wәки бона меванһʹьзийе гәләк тьшт нәлазьм ә?

¹² Чахе әм гази мевана дькьн, әʹсәйи нинә әм гәләк тьшт һазьр кьн. (Бьхунә Луqа 10:41, 42.) Бьраки мә гьли кьр кö чь qәwьми чахе әw жьна хwәва тʹәзә бунә мисйонер. Әw дьбежә: «Һьнге әм щаһьл бун, мә гәләк тьшт ньзаньбу у мә зәʹф бира мала хwә дькьр. Щарәке еваре жьна мьн гәләк бәрхwә дькʹәт, чьмки бира мале дькьр. Мьн ле дьлгәрм дькьр, йәкә әw диса бәрхwә дькʹәт. Ле паше, ве еваре незики сьһʹәта ниве һʹәйшта, кәсәки дәре мә хьст. Әw жьнькәк бу кö Кʹьтеба Пироз һин дьбу. Әw һатә мала мә тʹәви мә бьбә нас, чьмки әм мисйонеред тʹәзә бун. Әwе тʹәви хwә се пʹортоqәл анибу. Мә әw тʹәглифи мала хwә кьр у шәлбькә ав да wе, паше жи мә тʹәвайи чай у шоколада гәрм вәхwар. Мә зьмане wе Сwаһили ньзаньбу, у әwе жи зьмане Инглизи ньзаньбу. Ле йәкә һатьна wе мә гәләк ша кьр, у али мә кьр кö һәвалед тʹәзә хwәрʹа бьвиньн wе мьһаледа».

МЕВАНҺʹЬЗИЙЕДА ХWӘ ПАШ НӘХЬН

13. Чь кʹар ә һәрге әм меванһʹьз ьн?

¹³ Qә öса qәwьмийә кö wә хwә паш хьстийә гази мевана кьн? Һәрге әре, дьбәкә wә әw мәщал бәрʹда кö wәʹде хwәш дәрбаз кьн у һәвалед баш qазанщ кьн. Бь рʹасти чахе әм меванһʹьз ьн, әw ча дәрман ә мьqабьли ве йәке чахе хwә тʹәне тʹәхмин дькьн. Ле гәло чьрʹа һьнәк хwә дьгьрьн кö гази мевана кьн? Wәрә әм чәнд мәʹнийа шеwьр кьн.

14. Әм чь дькарьн бькьн һәрге гәләк wәʹдә у qәwата мә тʹöнә, сәва гази мевана кьн йан жи хwәха меванти һәрʹьн?

¹⁴ Wәʹдә у qәwат: Хьзмәткʹаред Йаһоwа бәтал ниньн у гәләк щабдарийед wан һәнә. Ләма жи һьнәк дьфькьрьн кö бона меванһʹьзийе wәʹдә у qәwата wан тʹöнә. Һәрге һун öса дьфькьрьн, дьqәwьмә wәрʹа лазьм ә тьштәки бьгöһезьн сәва wәʹде wә бьминә кö гази мевана кьн, йан жи хwәха меванти һәрʹьн. Әw йәк фәрз ә, чьмки Кʹьтеба Пироз мәрʹа дьбежә, wәки әм гәрәке меванһʹьз бьн (Ибрн. 13:2). Демәк меванһʹьзи әw тьштәки рʹаст ә, ләма жи сәва ве йәке дьбәкә лазьм ә тьштед нәфәрз бьдьнә алики.

15. Чьрʹа һьнәк хwә дьгьрьн, wәки гази мевана кьн?

¹⁵ Фькьред тә: Дьqәwьмә wә гәләк дьхwәст мевана тʹәглиф кьн, ле дьфькьрин wәки һун нькарьн ве йәке бькьн. Мәсәлә, һьнәк шәрм дькьн у дьтьрсьн wәки меванарʹа wе һʹәwас нибә. Һьнәк жи бәрхwә дькʹәвьн, чьмки дәсте wанда тʹöнә у дьфькьрьн wәки wе нькарьбьн һаqас тьшт бькьн чьqас йед дьн щьватеда дькьн. Бир нәкьн, wәки фәрз нинә кö мал гәләк бәдәw у дәwләти бә, ле фәрз әw ә кö щиwар у тʹәмьз бә, öса жи әм меванһʹьз бьн.

16, 17. Һун чь дькарьн бькьн һәрге һун бәрхwә дькʹәвьн чахе гази мевана дькьн?

¹⁶ Һәрге һун бәрхwә дькʹәвьн сәва гази мевана кьн, һун тʹәне ниньн. Рʹуспик жь Британйайе дьбежә: «Мәрьв чахе гази мевана дькә, дьбәкә һьнәки бәрхwә дькʹәвә. Ле . . . әw бәрхwәкʹәтьн qә тьштәк нинә бәр ве кʹаре у шабуне кö әм жь меванһʹьзийе дьстиньн. Һәма сәр qаwә вәхwарьнәке жи тʹәви мевана хәбәр дьм мьнрʹа гәләк шабуне тинә». Әw йәк баш ә чахе әм дәрһәqа меванед хwә дьфькьрьн, кö ча wана ша кьн (Фили. 2:4). Гәләка хwәш те хәбәр дьн дәрһәqа qәwьмандьнед хwә әʹмьрда у әм дькарьн wан qәwьмандьна бьбьһен, һәрге тʹәвайи тʹоп бьн. Рʹуспики дьн жи ньвиси: «Чахе әз һәвалед жь щьвате тʹәглифи мала хwә дькьм, әw йәк али мьн дькә кö wана һе рʹьнд фәʹм кьм у нас кьм, илаһи пебьһʹәсьм кö әwана ча һатьнә сәр рʹийа рʹаст». Һәрге һун бона меванед хwә хәм бькьн, әwана wе гәләк ша бьн у wе һʹәwаса wан бе.

¹⁷ Хушкәкә мәйә пешәнг, йа кö шагьртед жь щурʹә-щурʹә мәкʹтәба мала хwәда qәбул дькьр, гот: «Пешийе мьн шәрм дькьр, чьмки мала мьнда гәләк тьшт тʹöнә нә у навмал жи йед хәбьтанди нә. Ле жьна бьраки мәйи кö мәкʹтәб дәрбаз дькьр, дьле мьн рʹьһʹәт кьр. Әwе готә мьн, wәки чахе әw мере хwәва шьхöле бәрпьрсийартида хьзмәт дькьн, бона wан һʹәфтийа лапә баш әw ә чахе мала мәрьве рʹöһʹанида дьминьн. Әw мәрьв дьбәкә дәwләти нинә, ле һʹьш-аqьле wи сәр хьзмәтийа Йаһоwа йә у әw пе әʹмьре сьвьк дьжи. Әw гьлийед wе анинә бира мьн гьлийед дийа мьн чахе әз бьчʹук бум. Әwе тʹьме дьгот: ‹Qәнщ ә хwарьна пʹьнщаре бь һʹьзкьрьне›» (Мәтʹлк. 15:17). Бәле, чахе һʹьзкьрьн wә һелан дькә кö меванһʹьзийе нишан кьн, дәрһәqа тьштед дьн ида бәрхwә нәкʹәвьн.

18, 19. Чаwа меванһʹьзи али мә дькә wәки сәр тʹö кәси бина хwә тәнг нәкьн?

¹⁸ Һун чь дьфькьрьн дәрһәqа мәрьвед дьн: Дьбәкә щьватеда кәсәк wә әʹщьз дькә. Һәрге һун сәр ве йәке нәхәбьтьн wәки сәр wи әʹщьз нәбьн, чьqас дьреж бькʹьшинә wе һаqас wәрʹа чәтьн бә. Щара әм нахwазьн кәсәк тʹәглифи мала хwә кьн, чьмки хәйсәте wи мә хwәш найе. Йан жи дьqәwьмә зудава фьланкәси дьле wә ешандийә, у wәрʹа чәтьн ә ве йәке бир кьн, ләма wи тʹәглифи мала хwә накьн.

¹⁹ Кʹьтеба Пироз дьбежә меванһʹьзи дькарә һәләqәтийа мә тʹәви мәрьва баш кә, у һәла һе тʹәви дьжмьна жи. (Бьхунә Мәтʹәлок 25:21, 22.) Меванһʹьзи дькарә дьле wә нәрм кә һьндава wи мәрьви, кʹижан wә хwәш найе у һуне ида һьндава wида бина хwә тәнг нәкьн. Wи щурʹәйи һуне бькарьбьн нав wи мәрьвида һʹöнöред баш бьвиньн, кʹижан кö Йаһоwа нав wида дит у wи ани сәр рʹийа рʹаст (Йуһʹн. 6:44). Öса жи чахе һун бь һʹьзкьрьне кәсәки тʹәглифи мала хwә дькьн у әw нә жи һивийе бу, әw йәк дькарә бьбә дәстпека һәвалтийа баш. Ле ча һун дькарьн тедәрхьн wәки һʹьзкьрьн wә һелан дькә ве йәке бькьн? Мәсәлә, бьдьнә хәбате ширәта жь Филипи 2:3: «Жь wә һәр йәк бь мьлуктийе һәвале хwә сәр хwәрʹа бьгьрә». Бәле, әм гәрәке хушк-бьра сәр хwәрʹа бьгьрьн ве йәкеда кö һʹöнöред wанә öса бьвиньн йед кö жь һʹöнöред мә баштьр ьн, мәсәлә баwәрийа wанә qәwи, сәбьр, мерхаси йан жи һʹöнöред дьнә баш. Әw йәк wе һʹьзкьрьна мә һьндава wан qәwи кә у рʹе вәкә, wәки бь дьл у щан һьндава wанда меванһʹьз бьн.

МЕВАНЕ БАШ БӘ

20. Чьрʹа у чаwа әм гәрәке qәдьре wан бьгьрьн кʹе мә меванти тʹәглиф дькә?

²⁰ Даwьде Зәбурбеж пьрсәкә öса да: «Йа Хöдан, кʹи wе бьбә меван ль коне тә?» (Зәб. 15:1, ИМ). Паши ве пьрсе әw бәʹса чәнд һʹöнöра дькә, кʹижана Йаһоwа дьхwазә кö бал меванед wи һәбә. Йәк жь wан һʹöнöра әwи öса шьровәкьр: «Һәгәр жь бо зийана хwә бә жи, тʹö щаран жь сонда хwә вәнагәрә» (Зәб. 15:4, ДО). Һәрге кәсәк мә тʹәглиф дькә у әм соз дьдьн кö әме һәрʹьн, әм гәрәке бе мәʹнийа фәрз жь созе хwә вәнәгәрʹьн. Әwе кö мә тʹәглиф кьрийә, дьбәкә ида тьшт һазьр кьрийә бона һатьна мә, у әw һʹәму щәфе wи дькарә бош-бәтал бә һәрге әм нәчьн (Мәт. 5:37). Һьнәк соз дьдьн кö wе мевани һәрʹьн, ле чахе wана тʹәглифи щики дьн жи дькьн әwана жь созе хwәйи пешийе вәдьгәрʹьн, чьмки һʹәсаб дькьн кö щийе дьн һе баш бә. Ле гәло әw йәк бь һʹьзкьрьн у qәдьр ә? Бь рʹасти әм гәрәке бь дьл у щан тʹәглифкьрьне qәбул кьн, у бьшекьриньн чь жи әwана бона мә дькьн (Луqа 10:7). Ле фәʹмдари йә, һәрге ньшкева тьштәк qәwьми у әм нькарьн һәрʹьн, wе бь һʹьзкьрьн бә һәрге әм чьqас дькарьн зу дәрһәqа ве йәке wанрʹа бежьн.

21. Чаwа әʹдәтед мьһале дькарьн али мә бькьн бьбьнә меванед баш?

²¹ Öса жи гәләк фәрз ә әʹдәте мьһала хwә һьлдьн һʹәсаб. Нава һьнә мьләтада меван кö ньшкева тен әw тьштәки нормал ә, ле һәнә щийед öса жи кʹидәре лазьм ә пешда бежьн, wәки тенә меван. Һьнә щийа, чьqас дәсте wан те хwарьна баш датиньн бәр мевана, һьнә щийа жи һьн меван һьн жи нәфәр хwарьнәке дьхwьн. Öса жи һьнә щийа әʹдәт ә дәствала нәйен, ле һәнә щи жи кö әwед тʹәглиф дькьн ша дьбьн чахе меван тʹәви хwә тьштәки найньн. Öса жи һьнә щийа qәйдә йә тʹәглифкьрьна пешьн у йа дöда qәбул нәкьн; ле щийед дьнда әw нә бь qәдьр ә. Wәрә әм алийе хwәда һәр тьшти бькьн сәва әwед кö мә тʹәглиф дькьн, һатьна мәрʹа ша бьн.

22. Чьрʹа гәләк фәрз ә «һьндава һәвда меванһʹьз бьн»?

²² Илаһи иро «ахьрийа һәр тьшти незик буйә» (1 Пәт. 4:7). Зутьрәке әме рʹасти тәнгасийа öса бен кö дьнйайе тʹö щар нәдитьбу. Әме һе зедә һʹәwще һʹьзкьрьна хушк-бьра бьн. Ләма жи wәрә әм әве ширәта Пәтрус бьдьнә хәбате у «һьндава һәвда меванһʹьз бьн» (1 Пәт. 4:9).