Чаԝа бь Аликʹарийа Тʹәхтед Әʹдәбйата, Шәʹдәти Бьдьн

Шәʹдәтикьрьн пе стенда у тәхтед щигӧһастьне, метода зәʹф баш ә, сәва кӧ рʹастийе бьгьһиньн дьле мәрьвед һʹәлал (Йуһʹн. 6:44). Ләма жи рʹуспи һелан дьбьн ԝәки шәʹдәтикьрьна ԝи щурʹәйи саз кьн, ль ԝе тʹериторийа щьвата хԝә, кʹидәре кӧ гәләк мәрьв тʹоп дьбьн. Рʹаст ә стендед мә йед щигӧһастьне нә, у щийе сәкьнандьна ԝан те гӧһастьне, әʹсәйи нинә сәва ԝе йәке жь һʹӧкӧмәта изьне бьхԝазьн. Дь ве йәкеда кʹи дькарә кʹар бькә? Әԝ ԛӧльхкʹар, йед кӧ шьхӧлед хԝәда тʹәрбәт ьн, мәʹрифәт ьн у бь фәрәсәтед хәбәрданейә баш ьн. Жере һьнә рʹебәри те дайине кӧ чь гәрәке бькьн у чь на. Әԝ рʹебәри ԝе али ԛӧльхкʹара бькә, ԝәки һе сәрфьраз бьн.

Бькә:

Һʹәвалһʹьз бә, бьра бәшәра тә хԝәш бә, у һазьр бә аликʹарийе бьди мәрьвед кӧ бәр стенде дәрбаз дьбьн. Һьнә ԛӧльхкʹар бь бәшәрә хԝәш мәрийа дьньһерʹьн, у бь һʹәвалһʹьзи мәрийа сьлав дькьн. Һәрге кәсәк бәр стенде дәрбаз дьбә у дьсәкьне, һьнге дькари бежи, «Һәрге һьнә әʹдәбйәт ԝә хԝәш тен, һун дькарьн һьлдьн».
Бәр стенде ӧса бьсәкьнә, чаԝа кӧ лазьм ә. Мәсәлә һьнә щийада, ԛӧльхкʹар һьнге даһа сәрфьраз ьн, чахе жь стенде һьнә дур сәкьни нә. Йед майин дьвиньн, ԝәки әв метод аликʹарийе дьдә мәрьвед кӧ дәрбаз дьбьн, ԝәки әԝана һеса незики стенде бьн. Ләма жи ԛӧльхкʹар жь стенде һьнәк дур дьсәкьньн у һивийе нә, һʹәта кӧ кәсәк незик бә. Чахе мәрьв незики стенде дьбә, дькари пьрсәкә ӧса бьди ԝи, кӧ бькарьби хәбәрдане дәстпеки. Мәсәлә дькари бежи, «Һун ԛә дәрһәԛа ве пьрсе дьшьрмиш бунә?»
Чьԛас кӧ дәст дьдә, тʹьме Кʹьтеба Пироз бьдә хәбате.
Һәрге кәсәк һьлдьдә әʹдәбйәтед мәйә сәва һинбуне, мәсәлә пʹьртука «Чь Һин Дькә Кʹьтеба Пироз?», һьнге дькари ԝирʹа шьровәки, кӧ чаԝа һинкьрьна Кʹьтеба Пироз дәрбаз дьбә. Бь һʹащәта әләктроник дькари ԝирʹа вехи видеойа, «Чьрʹа Һин бьн Кʹьтеба Пироз?».
Чахе дьвини ԝәки һʹәԝаса кәсәки те, һьнге дькари навнишан йан жи һʹәжмара тʹела ԝи һьлди. Һәрге мәрьв дь територийа тәда нажи, дькари тʹьжә ки бланка лазьм (S-43), у ԝе баш бә кӧ перʹа-перʹа бьди секретаре щьвата хԝә.

Нәкә:

Бәр стенде чаԝа нобәдар, һерс у мәдәкьри нәсәкьнә.
Һʹәсаб нәкә ԝәки әв метода бәлакьрьна әʹдәбйәта, нә жи ӧса керһати йә. Чахе әм дәрдькʹәвьн ль даннасинкьрьне, нета мә әԝ ә ԝәки һинкьрьна Кʹьтеба Пироз тʹәви мәрийа дәстпекьн. Ләма жи әм гәрәке бьхәбьтьн кӧ тʹәви мәрийа хәбәрдане дәстпекьн.
Бәр стенде ӧса нәсәкьнә, ԝәки әԝ нәйе кʹьфше у нә жи бькʹәвә хәбәрдане тʹәви һʹәвал-хьзмәткʹаре хԝә. Һәрге тәрʹа тʹеле дьхьн йан жи тӧ гәрәке тʹеле хи, һьнге ԝе баш бә кӧ жь стенде һьнәк дур һәрʹи.
Һәрге кәсәк сәр шәрʹа йә, тʹәви ԝи шәрʹа нәкә. Һәрге әв мәрьв гәләк һерс дькʹәвә у тә беһӧрмәт дькә, һьнге ԝе баш бә кӧ дәрбази щийе дьн би.