Һин Дьбьн жь Ԛӧльхкʹаред Щерʹьбанди
Әм бь рʹасти ԛимәт дькьн ԛӧльхкʹаред щерʹьбанди, йед кӧ дь щьвата мәда ньн. Һьнәка жь ԝана ида гәләк сал ә, ча бь амьни Йаһоԝарʹа ԛӧльх дькьн. Йед дьнена жи, ԝан пашԝәхтийа дь ԛӧльхкьрьнеда фәрәсәтед баш ԛазанщ кьрьн. Әԝ ԛӧльхкʹар хԝәха дитьн кӧ чаԝа Иса ван рʹожед ахьрийеда рʹебәрийа Щьвата Мәсиһийа дькьр, кӧ шьхӧле даннасинкьрьне у һинкьрьне һе пешда һәрʹә (Мәт. 28:19, 20). Әԝана дь ԛӧльхкьрьнеда кʹар дькьн у «зорайийа ԛәԝате» дьстиньн, чахе рʹасти проблемед шәхси у пәйкʹәтьна тен (2 Корн. 4:7). Бь рʹасти жи чьԛас тьшт әм дькарьн жь ԝан ԛӧльхкʹаред щерʹьбанди һин бьн. Чахе мәщала ԝан һәйә йед дьнена һин кьн, әԝана бь шабун мәрийарʹа әԝе йәке гьли дькьн, чь кӧ хԝәха һин бунә (Зәб. 71:18). Ләма жи әм гәрәке мәщала бьгәрʹьн кӧ жь ван ԛӧльхкʹара һин бьн. Ле ча әм дькарьн әве йәке бькьн?
Дь Ԛӧльхкьрьнеда: Сәва кӧ йед тʹәзә у йед нәщерʹьбанди дь ԛӧльхкьрьнеда хирәт бьн, әԝана гәрәке һин бьн. Аликʹарикә мәзьн әԝ ә, кӧ тʹәви ԛӧльхкʹаред щерʹьбанди дәрен даннасинкьрьне у бьвиньн һәла чаԝа әԝана хԝә кʹьфш дькьн. (Бьньһерʹә готаре жь «Бьрща Ԛәрәԝьлийе», 15 Сьбате, сала 2015 бь наве «Бәрдәԝан кьн бь Хирәт Даннасин кьн», абзаса сьсийа паши бьнсәрийа «Али йед Нәщерʹьбанди Бькә».) Тә чь кʹар станд жь ԛӧльхкʹаред щерʹьбанди, чахе тʹәви ԝана даннасин дькьр?
Тӧ дькари тʹәви ԛӧльхкʹаре щерʹьбанди хәбәрди кӧ тʹәви ԝи дәркʹәви ль даннасинкьрне? Һәрге әԝ сьһʹәт-ԛәԝатеда сьст ә, һьнге дькари щар-щара һинкьрьнәкә хԝә дь мала ԝида дәрбаз ки. Паши һинкьрьне, бежә ԛӧльхкʹаре щерʹьбанди, кӧ тәрʹа гьли кә, һәла әԝи дина хԝә да чь у чь ширәт дькарә бьдә тә.
Ԝәʹдә сәва Ԝан Бьвинә: Һе рʹьнд ԛӧльхкʹаред щерʹьбанди нас кә у ԝәʹдә тʹәви ԝан дәрбаз кә. Йәки жь ԝана тʹәглиф кә ль сәр ԛӧльхкьрьна хԝәйә тʹәви малбәте у ԛьсәкьрьне һьлдә. Һәрге ԛӧльхкʹар сьһʹәт-ԛәԝатеда сьст ә, һьнге дькари сафи ки, ԝәки ԛӧльхкьрьна тʹәви малбәте дь мала ԝида дәрбаз ки. Пебьһʹәсә кӧ чаԝа әԝ һатә ль сәр рʹийа рʹастийе. Әԝ чь кʹәрәм стандьн? Әԝ дь ԛӧльхкьрьнеда чь пешдачуйин дитьбу? Жь ԛӧльхкьрьна Йаһоԝарʹа, әԝи чь шабун станд?
Әм гәрәке ԝана фәʹм бькьн. Анәгори һәр кәси жь мә, щәм ԛӧльхкʹаред кӧ гәләк сал дь рʹастийеда нә, фәрәсәтед щурʹә-щурʹә һәнә (Рʹом. 12:6-8). Хенщи ԝе йәке һьнәка жь ԝана ида салийед хԝәда мәзьн ьн, ләма жь бо ве йәке әԝана ԝе нькарьбьн ида гәләк ԝәхт тʹәви мә ԛӧльх кьн. Чь жи һәбә, әм йәкә дькарьн жь ԝана гәләк тьшт һин бьн, чьмки әԝана дь ԛӧльхкьрьнеда щерʹьбанди нә.