2 | «Готьнед Ньвисарада кӧ Бине Дьдьнә Бәр Мә»

КЬТЕБА ПИРОЗ ДЬБЕЖӘ: «Чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн» (РʹОМАЙИ 15:4).

Әв Чь Те Һʹәсабе

Ширәтед жь Кʹьтеба Пироз бәрдьлийе у ԛәԝате дьдьнә мә у али мә дькьн, чахе фькьред негатив дькʹәвьнә һʹьше мә. Ӧса жи Хәбәра Хԝәде һевийе дьдә мә, ԝәки зутьрәке нәхԝәшийед емосийали ԝе ида тʹӧнә бьн.

Әв Йәк Ча Дькарә Аликʹарийе Бьдә

Әм һʹәму жи щарна хәмгин дьбьн; ле әԝ мәрьвед кӧ депресийеда ньн у һәртʹьм бәрхԝә дькʹәвьн, әԝана һәррʹож һьмбәри фькьред негатив шәрʹ дькьн. Чаԝа Кʹьтеба Пироз дькарә али ԝан бькә?

Кʹьтеба Пирозда гәләк фькьред позитив у дьлгәрм һәнә (Филипи 4:8). Әԝ фькьр дькарьн бәрдьлийе бьдьнә мә у али мә бькьн емосийед хԝә контрол кьн (Зәбур 94:18, 19).
Кʹьтеба Пироз дькарә ӧса жи али мә бькә, ԝәки әм нәфькьрьн кӧ әм бекер ьн (Луԛа 12:6, 7).
Гәләк рʹезед жь Кʹьтеба Пироз мә дьдьнә баԝәркьрьне, кӧ әм тʹәне ниньн у ԝәки Хԝәде, Әʹфьрандаре мә, бь тʹәмами һәстед фәʹм дькә (Зәбур 34:18; 1 Йуһʹәнна 3:19, 20).
Кʹьтеба Пирозда те готьне, ԝәки Хԝәде ԝе биранинед кӧ мәрʹа еше тиньн, кʹӧта кә (Ишайа 65:17; Әʹйанти 21:4). Һәрге әм рʹийе фькьр у емосийед хԝәда дьчәрчьрьн, әв һеви ԝе ԛәԝате бьдә мә кӧ тәйах кьн.

Кʹьтеба Пироз Чаԝа Аликʹарийе Дьдә Щесика

Чаԝа Депресийа сәр Мьн Һʹӧкӧм Дькә

«Чахе әз 25 сали бум әз кʹәтьмә депресийа гьран. Әз дьчәрчьрим жь бо щурʹә-щурʹә фькьр у биранина. Һʹәким мьнрʹа готьн, кӧ депресийа мьн гьредайи йә тʹәви фькьред негатив йед кӧ пешда һатьбун жь бо дәрәще гьран, кʹижан кӧ әʹмьре мьнда ԛәԝьми бун. Хенщи дәрмана мьнрʹа ӧса жи щурʹе ԛәнщкьрьна дьн лазьм бу, йа кӧ ԝе али мьн бькьра фькьред нәрʹаст жь һʹьше хԝә дәрхьста».

Кʹьтеба Пироз Чаԝа Али Мьн Дькә

«Рʹожед ӧса чахе депресийа мьн гьран дьбә, щәм мьн реаксйонед паники пешда тен, әз бь зедәйи бәрхԝә дькʹәвьм у хәԝ накʹәвә чʹәʹве мьн. Шәв гәләк щар фькьред ӧса мьн әʹщьз дькьн, йед кӧ әз нькарьм контрол кьм. Зәбура 94:19-да те готьне ԝәки Хԝәде дькарә бәрдьлийе бьдә мә, гава әм бь зедәйи бәрхԝә дькʹәвьн. Ләма жи мьн Кʹьтеба Пироз у дәфтʹәра хԝә кʹижанеда мьн рʹез дьньвисин, датани кʹеләка ньвине хԝә. У чахе хәԝ нәдькʹәтә чʹәʹве мьн, мьн чәнд рʹезед жь Кʹьтеба Пироз дьхԝәнд, йед кӧ бәрдьлийе дьданә мьн.

«Кʹьтеба Пироз мә һелан дькә фькьред ӧса жь һʹьше хԝә дәрхьн, йед кӧ һьмбәри ве йәке нә, чь кӧ әм дәрһәԛа Хԝәде заньн. Бәре әз баԝәр бум, кӧ әз бекер ьм у тʹӧ кәс мьн һʹьз накә. Ле әз пеһʹәсийам кӧ ньһерʹандьна ԝи щурʹәйи һьмбәри Кʹьтеба Пироз ә, чьмки Йаһоԝа бавәки дьлшәԝат ә у бь һʹьзкьрьне бона һәр кәси жь мә хәм дькә. Әз һеди-һеди һин бун фькьред хԝә контрол кьм. Әз һин бун сәр хԝә ӧса бьньһерʹьм, чаԝа Йаһоԝа сәр мьн дьньһерʹә. Әԝ йәк али мьн кьр фькьред хԝәйә негатив һьндава хԝә жь хԝә дур хьм.

«Әз гәләк һивийа ԝи ԝәʹдәйи мә, чахе һʹәму биранинед кӧ еше тиньн, ԝе бенә биркьрьне. Занәбуна ве йәке кӧ нәхԝәшийед емосийали ԝе ида тʹӧнә бьн, ԛәԝате дьдә мьн тәйах кьм у һивийа ԝе рʹоже бьм, гава депресийа мьн ԝе ида тʹӧнә бә».