3 | Кʹаре Бьстиньн жь Мәсәлед Кʹьтеба Пироз

КʹЬТЕБА ПИРОЗДА ТЕ ШЬРОВӘКЬРЬНЕ . . . Кәсед амьн йед кӧ «мина мә» бун (АԚУБ 5:17).

Әв Чь Те Һʹәсабе

Кʹьтеба Пирозда һәнә сәрһатийед мәрьвед амьн, йед кӧ щурʹә-щурʹә емосийа сәр хԝә тʹәхмин дькьрьн. Ԝәʹде хԝәндьна Кʹьтеба Пироз әм дькарьн пебьһʹәсьн, кӧ һәстед ԝан жи мина йед мә нә.

Әв Йәк Ча Дькарә Аликʹарийе Бьдә

Әм һʹәму жи һʹәԝще ве йәке нә, кӧ мә фәʹм бькьн. Ле илаһи ԝи чахи гава әм жь бо нәхԝәшийа емосийали дьчәрчьрьн. Чахе әм сәрһатийед хьзмәткʹаред ԝәʹде бәре дьхуньн, әм дькарьн бьвиньн, кӧ һәст у фькьред ԝан жи мина йед мә нә. Ве дәме әм фәʹм дькьн, кӧ нә тʹәне әм һьмбәри бәрхԝәкʹәтьне у емосийа шәрʹ дькьн.

Кʹьтеба Пирозда ньвисар ә гьлийед ԝан мәрьва, йед кӧ хԝә тʹәне у бечʹарә тʹәхмин дькьрьн. Тә ԛә мина Муса, Елйас у Даԝьд хԝә тʹәхмин кьрийә, кӧ готийә: «Әз ида нькарьм тәйах кьм»? (Жьмар 11:14; 1 Пʹадшати 19:4; Зәбур 55:4).
Кʹьтеба Пирозда те готьне дәрһәԛа кʹӧлфәтәкә бь наве Һанна. «Еша дьле» ԝе гәләк гьран бу, чьмки әԝ безӧрʹәт бу у һәԝийа ԝе пе дькʹәнийа (1 Самуйел 1:6, 10).
Кʹьтеба Пирозда те гьликьрьне дәрһәԛа мерәки бь наве Ибо. Рʹаст ә баԝәрийа ԝи ԛәԝи бу, ле диса жи әԝ алийе емосийалида ӧса дьчәрчьри, кӧ гот: «Әз жь жийана хԝәва дькʹәрьһьм: һʹәта-һʹәтайе жийане нахԝазьм» (Ибо 7:16).

Чахе әм педьһʹәсьн, кӧ чаԝа хьзмәткʹаред ԝәʹде бәре дькарьбун һьмбәри фькьред хԝәйә негатив шәрʹ кьн, әԝ йәк мә дьдә баԝәркьрьне, кӧ әм жи дькарьн ԝәʹде стресе тәйах кьн.

Кʹьтеба Пироз Чаԝа Аликʹарийе Дьдә Кевин

Чаԝа Нәхԝәшийа Биполйари Сәр Мьн Һʹӧкӧм Дькә

«Чахе әз ԝәкә пенщи сали бум, щәм мьн нәхԝәшийа биполйари пешда һат. Щарна әз дьфькьрьм, кӧ әз дькарьм һʹәму проблемед хԝә сафи кьм. Ле щарна жи әʹмьре мьн бәр чʹәʹве мьн рʹәш дьбә».

Кʹьтеба Пироз Чаԝа Али Мьн Дькә

«Сәрһатийа Пәтрус тʹьме дьле мьн дьгьрә, чьмки әв сәрһати мьнрʹа гәләк нас ә. Жь бо шашийед хԝә әԝи хԝә бекер һʹәсаб дькьр. Ле дәԝса кӧ хәмгин бә у ԝи һʹалида бьминә, Пәтрус хԝә дьспартә һәвалед ӧса, йед кӧ бона ԝи хәм дькьрьн. Чахе жь бо дәрде нәхԝәшийа хԝә әз дькʹәвьмә һʹаләки нәбаш, әз дәстпедькьм сәва кемасийед хԝә бьфькьрьм у хԝә бекер тʹәхмин кьм. Мина Пәтрус, әз жи һин бум хԝә незики һәвалед ӧса бьгьрьм, йед кӧ дькарьн али мьн бькьн сьст нәбьм.

«Сәрһатийа дьн йа кӧ бәрдьлийе дьдә мьн, әԝ мәсәла Даԝьд Пʹадша йә. Әԝ гәләк щар жь бо дәрәща хԝә у шашийед хԝәйә бәре, дькʹәтә депресийайе у гәләк пʹошман дьбу. Һәстед ԝи мьнрʹа гәләк нас ьн, чьмки әз жи гәләк тьштед ӧса дьбежьм йан дькьм жь бо чь жи паше пʹошман дьбьм. Хәбәред Даԝьд жь Зәбура 51 бәрдьлийе дьдьнә мьн. Рʹеза 3-да әԝ дьбежә: ‹Беолитийед хԝә әз нас дькьм у гӧнәйе мьн тʹьме ль бәр мьн ә›. Һәма ӧса әз хԝә тʹәхмин дькьм чахе жь бо депресийайе у һʹале хԝәйә гьран, мьнрʹа чәтьн ә сәр хԝә позитив бьфькьрьм. Ӧса жи, хәбәред Даԝьд жь рʹеза 10 мьнрʹа нас ьн, кʹидәре те готьне: ‹Хԝәде, дьләки паԛьж нав мьнда бьәʹфьринә у рʹӧһʹәки рʹаст нав мьнда сәр һәвда бинә›. Әз һәма бь ԝи щурʹәйи Йаһоԝарʹа дӧа дькьм, кӧ әԝ али мьн бькә сәр хԝә позитив бьфькьрьм. Хәбәред жь рʹеза 17 жи бәрдьлийе дьдьнә мьн, кʹидәре те готьне: ‹Әй Хԝәде, тӧ дьле шьканди у тʹобәкʹар бьчʹук набини, ИМ›. Әв рʹез мьн дьдә баԝәркьрьне, кӧ Хԝәде мьн һʹьз дькә.

«Чахе әз дина хԝә дьдьмә сәр мәсәлед жь Кʹьтеба Пироз у дәрһәԛа ве йәке кӧ Хԝәде ньһа чь дьдә мьн, әԝ йәк һевийа мьн һьндава ахьрийе ԛәԝи дькә. Әз созед Кʹьтеба Пирозда дӧдьли набьм, чьмки әԝ реали нә у али мьн дькьн сьст нәбьм».