Тӧ Ча Дькари Хԝәрʹа Һәвалзәԝащәки Лайиԛ Бьвини?

1-2. (а) Пешийа кӧ кәсәк бьзәԝьщә, әԝ гәрәке дәрһәԛа чь бьфькьрә? (б) Ве готареда, һәвалтийа бь нета зәԝаще чь те һʹәсабе? (Бьньһерʹә «Хәбәра Шьровәкьри».)

ГӘЛО нета тә һәйә кӧ бьзәԝьщи? Рʹаст ә, сәва кӧ мәрьв бәхтәԝар бә, зәԝащ әʹсәйи нинә, ле диса жи гәләк хушк-бьред щаһьл у мәзьн дьхԝазьн бьзәԝьщьн. Һәмьки, пешийа һәвнаскьрьне достийа тә тʹәви Йаһоԝа гәрәке ԛәԝи бә. Тӧ гәрәке рʹӧһʹанида у емосийалида һазьр би у ӧса жи бькарьби әʹбура малбәта хԝә бькиa (1 Корьнтʹи 7:36). Бона зәԝаща бәхтәԝар, әв йәк гәләк фәрз ә.

² Щара һеса нинә һәвалзәԝащәки лайиԛ хԝәрʹа бьвиньн (Мәтʹәлок 31:10). Ле һәрге тӧ кәсәки бәгәм дьки, диса жи щара һеса нинә ве йәке жерʹа әʹйан ки у дьһа незик ԝи мәрьви нас киb. Ве готареда әме бьвиньн, кӧ гава кәсәк дьхԝазә бьзәԝьщә, әԝ ча дькарә хԝәрʹа һәваләки ль гора дьле хԝә бьвинә. Әме ӧса жи шеԝьр кьн, кӧ хушк-бьред дьн ча дькарьн аликʹарийе бьдьнә кәсед кӧ дьхԝазьн бьзәԝьщьн.

ТӦ ЧА ДЬКАРИ ХԜӘРʹА ҺӘВАЛӘКИ ЛАЙИԚ БЬВИНИ?

3. Кәсед азәп гәрәке дина хԝә бьдьнә чь, гава хԝәрʹа һәвалзәԝащ дьгәрʹьн?

³ Пешийа кӧ тӧ бь нета зәԝаще кәсәки нас ки, тӧ гәрәке пешда бьзаньби, кӧ тӧ дьхԝази һәвалзәԝаще тә йәки ча бә. Һәрге тӧ ӧса нәки, тӧ дькари мәщаләкә баш жь дәсте хԝә бәрʹди, йан жи дьбәкә дина хԝә бьди ԝи кәси, йе кӧ лайиԛи тә нинә. Һәмьки, әԝ мәрьв, тʹәви кʹижани тӧ дьхԝази бьби нас, гәрәке ньхӧманди бә (1 Корьнтʹи 7:39). Ле диса жи әв йәк бона зәԝаща бәхтәԝар бәс нинә. Ләма пьрсед ӧса бьдә хԝә: «Нетед мьн чь нә? Һәвалзәԝаще мьн гәрәке хԝәйе кʹижан һʹӧнӧра бә? Гәло дәʹԝакьрьнед мьн бь билани нә?»

4. Һьнә хушк-бьра бона чь дӧа дькьн?

⁴ Һәрге нета тә һәйә бьзәԝьщи йан мер ки, бе шьк тә дӧа кьрийә, ԝәки хԝәрʹа һәвалзәԝащәки лайиԛ бьвини (Филипи 4:6). Рʹаст ә Йаһоԝа соз надә, кӧ Әԝе һәвалзәԝащ бьдә тә, ле Әԝ һәст у һʹәԝщед тә һьлдьдә һʹәсаб. Ләма жи гава тӧ һәваләки лайиԛ хԝәрʹа дьгәрʹи, Әԝ дькарә али тә бькә. Бәрдәԝам кә Йаһоԝарʹа дәрһәԛа хԝәстьн у һәстед хԝә дӧа бькә (Зәбур 62:8). Рʹәща кә, кӧ Әԝ сәбьр у биланийе бьдә тә (Аԛуб 1:5). Бьраки азәп бь наве Щонc, йе кӧ ль Америкайе дьжи, дьбежә кӧ әԝ ча дӧа дькә: «Әз Йаһоԝарʹа дьбежьм, кӧ әз һәвалзәԝащәкә ча дьхԝазьм хԝәрʹа бьвиньм. Әз дӧа дькьм, ԝәки хушкәкә лайиԛ бьвиньм. Ӧса жи әз жь Йаһоԝа аликʹарийе дьхԝазьм, ԝәки һʹӧнӧред баш нав хԝәда пешда биньм, кӧ бьбьмә мерәки баш». Хушкәкә бь наве Танйа, йа кӧ Шри Ланкайеда дьжи, ӧса дьбежә: «Әз жь Йаһоԝа аликʹарийе дьхԝазьм, ԝәки амьн у бәхтәԝар бьминьм, һʹәта кӧ әз хԝәрʹа малхеки баш бьвиньм». Ле һәрге тәрʹа һеса нинә хԝәрʹа һәваләки ль гора дьле хԝә бьвини, баԝәр бә кӧ һʹәта тӧ хԝәрʹа кәсәки лайиԛ бьвини, Йаһоԝа ԝе бь дьловани бона һʹәԝщед тәйә физики у емосийали хәм бькә (Зәбур 55:22).

5. Хушк-бьред азәп ча дькарьн хԝәрʹа һәвалзәԝащәки лайиԛ бьвиньн? 1 Корьнтʹи 15:58) (Бьньһерʹә ӧса жи шькьл.)

⁵ Кʹьтеба Пирозда те готьне, кӧ әм «шьхӧле Хӧданда пешда һәрʹьн» (Бьхунә 1 Корьнтʹи 15:58). Чьԛас һе зедә тӧ хьзмәтийеда тʹәви хушк-бьра кʹар бьки у тʹәви ԝан ԝәʹдә дәрбаз ки, һаԛас мәщала тә ԝе һәбә кәсед азәп нас бьки, йед кӧ мина тә бь дьл у щан Йаһоԝарʹа хьзмәт дькьн. Ӧса жи тӧ чьԛас хирәт бьки, кӧ дьле Йаһоԝа ша ки, һаԛас тӧйе бәхтәԝар би.

6. Хушк-бьред азәп гәрәке чь бир нәкьн?

⁶ Фәсал бә, ԝәки әʹмьре тәда щийе лапә фәрз әв нибә, кӧ хԝәрʹа һәвалзәԝащәки лайиԛ бьвини (Филипи 1:10). Тьште кӧ мә бь рʹасти бәхтәԝар дькә, әв һәйә достийа мә тʹәви Йаһоԝа, нә кӧ әм зәԝьщи нә йан на (Мәтта 5:3). Ӧса жи, һʹәта тӧ азәп и, дьһа зедә ԝәʹдә у мәщала тә бона хьзмәтийе һәйә (1 Корьнтʹи 7:32, 33). Ләма жи ԝәʹде хԝә бь щурʹе баш бьдә хәбате. Дина хԝә бьдә мәсәла хушкәкә бь наве Щесика, йа кӧ ль Америкайе дьжи. Чахе әԝе мер кьр, әԝ ԝәкә 40 сали бу. Әԝ дьбежә: «Мьн дьхԝәст мер кьм, ле диса жи мьн һаԛас хьзмәтийеда кʹар дькьр, кӧ әз жь һʹале хԝә рʹази бум».

ДӘРҺӘԚА МӘРЬВ ПЕБЬҺʹӘСӘ

7. Пешийа кӧ тӧ тʹәви кәсәки һәвалтийа незик дәстпеки, тӧ гәрәке чь бьки? (Мәтʹәлок 13:16)

⁷ Дьбәкә тӧ дәрһәԛа кәсәки дьфькьри кӧ әве бона тә бьбә һәвалзәԝащәки лайиԛ. Гәло ԝе баш бә кӧ тӧ дәрберʹа жерʹа бьди кʹьфше, ԝәки тӧ ле бәгәм дьки? Кʹьтеба Пироз дьбежә, кӧ мәрьве билан пешийе дьфькьрә, паше һәрәкʹәт дькә (Бьхунә Мәтʹәлок 13:16). Ләма жи һәрге тӧ дьхԝази кәсәки дьһа незик нас бьки, пешийе рʹьнд дина хԝә бьдә рʹабун-рʹуньштьна ԝи. Бьраки бь наве Ешԝин, йе кӧ ль Нидерланде дьжи, ӧса дьбежә: «Һәстед мәрьва ча зу гӧрʹ дьбьн, ӧса жи зу дьтәмьрьн. Ләма жи дәстпенәкә сәр һʹиме емосийа тʹәви кәсәки бьби нас, ле дәԝсе пешда дәрһәԛа ԝи мәрьви пебьһʹәсә. Ԝәʹдә шунда, дьбәкә тӧ тедәрхи, ԝәки кәсе кӧ тә бәгәм дькьр, ԝе бона тә нәбә һәвалзәԝащәки баш.

8. Кәсе азәп ча дькарә дина хԝә бьдә ԝи мәрьви, кʹижани кӧ дьхԝазә нас кә? (Бьньһерʹә ӧса жи шькьл.)

⁸ Гәло тӧ ча дькари дурва дина хԝә бьди рʹабун-рʹуньштьна кәсәки? Мәсәлә, сәр щьвата йан жи гава хушк-бьра тʹәвайи ԝәʹдә дәрбаз дькьн, дина хԝә бьдә рʹабун-рʹуньштьна ԝи. Гәло әԝ рʹӧһʹанида гьһишти йә? Гәло әԝ тʹәви кʹе һәвалтийе дькә у хәбәрдана ԝи дәрһәԛа чь йә? (Луԛа 6:45) Гәло нетед ԝә мина һәв ьн? Тӧ дькари жь рʹуспийед щьвата ԝи, йан жь хушк-бьред щерʹьбанди, йед кӧ ԝи рʹьнд нас дькьн, дәрһәԛа ԝи пебьһʹәси (Мәтʹәлок 20:18). Мәсәлә, тӧ дькари бьпьрси һәла әԝ мәрьвәки чаԝа нә у хԝәйе чь нави йә (Рʹутʹ 2:11). Ле гава тӧ дина хԝә дьди ԝи, фәсал бә ԝәки әԝ жь бо ве йәке хԝә нәрʹьһʹәт тʹәхмин нәкә. Ԛәдьре һәстед ԝи бьгьрә у бь зедәйи дәрһәԛа әʹмьре ԝийи шәхси пьрса нәдә кәсед дьн.

9. Пешийа кӧ тӧ кәсәкирʹа бежи, ԝәки һун һәвдӧ нас кьн, гәрәке тӧ чьда баԝәр би?

⁹ Чьԛас ԝәʹдә гәрәке тӧ дина хԝә бьди ԝи мәрьви, пешийа кӧ һун дәстпекьн һәвдӧ нас кьн? Һәрге тӧ ләз кʹәви у жерʹа бежи кӧ тӧ ԝи бәгәм дьки, дьԛәԝьмә әԝ дьшьрмиш бә, ԝәки тӧ рʹьнд нафькьри пешийа кӧ сафикьрьнәке бьки у ве йәке сәр һʹиме емосийа дьки (Мәтʹәлок 29:20). Жь алийе дьнва жи, һәрге тӧ ве йәке гәләк дәрәнги хи, илаһи һәрге әԝ ида пеһʹәсийа йә, кӧ чʹәʹве тә ле йә, дьԛәԝьмә әԝ бьфькьрә, ԝәки тӧ хԝәха ньзани чь дьхԝази (Ԝаиз 11:4). Бир нәкә кӧ һәрге тӧ кәсәкирʹа бежи, ԝәки һун һәвдӧ нас бькьн, әв йәк найе һʹәсабе ԝәки һун сәд сәләфи гәрәке һәв бьстиньн. Ле диса жи, тӧ гәрәке баԝәр би, ԝәки тӧ бона зәԝаще һазьр и у кӧ әԝ кәс дькарә бона тә бьбә һәвалзәԝащәки баш.

10. Һәрге тӧ пебьһʹәси, кӧ кәсәк дьхԝазә тә нас бькә, ле тӧ нахԝази, тӧ гәрәке чь бьки?

¹⁰ Һәрге тӧ пебьһʹәси, кӧ кәсәк дьхԝазә дьһа незик тʹәви тә бьбә нас тӧ гәрәке чь бьки? Һәрге тӧ нахԝази ԝи мәрьви бьстини, пе кьред хԝә жерʹа бьдә кʹьфше, кӧ әԝ фәʹм бькә, ԝәки һәстед тә һьндава ԝида тʹӧнә нә (1 Корьнтʹи 10:24; Әфәси 4:25).

11. Пешийа кӧ тӧ али кәсед азәп бьки, ԝәки һәвдӧ нас кьн, тӧ гәрәке дина хԝә бьди чь?

¹¹ Һьнә ԝәлатада, де-бав йан жи кәсед дьн һәвалзәԝащ щаһьларʹа дьжберьн. Һьнә дәра жи, кәсед азәп һәвдӧ бь аликʹарийа мәрьв йан жи һәвалед хԝә нас дькьн. Паше, әԝана хԝәха сафи дькьн, кӧ һәвдӧ незик нас кьн, йан на. Һәрге тәрʹа бежьн, ԝәки тӧ али кәсәки бьки, кӧ әԝ бьзәԝьщә, хԝәстьн у һʹәԝщед ԝан һьлдә һʹәсаб. Чахе тӧ жерʹа һәвалзәԝащәки баш бьвини, тедәрхә һәла әԝ мәрьв хԝәйе чь хәйсәт-һʹӧнӧри йә у һәләԛәтийа ԝи тʹәви Йаһоԝа чаԝа йә. Достийа тʹәви Йаһоԝа дьһа ԛимәт ә, нә кӧ мал у мьлкʹ, һинбуна бьльнд у һʹале мәрьв. Ӧса жи бир нәкьн, ԝәки әԝана гәрәке хԝәха сафи кьн һәв бьстиньн йан на (Галати 6:5).

ДӘСТПЕКЬРЬНА ҺӘВДӦНАСКЬРЬНЕ

12. Һәрге тӧ дьхԝази бь нета зәԝаще тʹәви кәсәки һәвалтийе бьки, тӧ ча дькари ве йәке жерʹа бежи?

¹² Һәрге тӧ дьхԝази бь нета зәԝаще тʹәви кәсәки һәвалтийе бьки, гәло тӧ ча дькари ве йәке жерʹа бьди кʹьфшеd? Мәсәлә, тӧ дькари щики ӧса тʹәви ԝи хәбәр ди, кʹидәре кӧ мәрьв һәнә, йан жи пе тʹеле. Нета хԝә зәлал жерʹа бежә (1 Корьнтʹи 14:9). Һәрге лазьм бә, мәщале бьде, кӧ әԝ дәрһәԛа ве йәке бьфькьрә (Мәтʹәлок 15:28). У һәрге әԝ нахԝазә, зоре ле нәкә.

13. Һәрге кәсәк дьхԝазә бь нета зәԝаще тʹәви тә һәвалтийе бькә, тӧ гәрәке чь бьки? (Колоси 4:6)

¹³ Һәрге кәсәк тәрʹа бежә, кӧ әԝ тә бәгәм дькә, гәрәке тӧ чь бьки? Дьԛәԝьмә жерʹа нә һеса бу ве йәке тәрʹа бежә, ләма жи бь нәрми у бь ԛәдьр щаба ԝи бьдә (Бьхунә Колоси 4:6). Һәрге тәрʹа ԝәʹдә лазьм бә, ԝәки дәрһәԛа ве йәке бьфькьри, жерʹа бежә. Ле ве йәке дәрәнги нәхә (Мәтʹәлок 13:12). Һәрге тӧ нахԝази жерʹа һәвалтийе бьки, әшкәрә у бь ԛәдьр жерʹа бежә. Дина хԝә бьде бьраки бь наве Һанс, йе кӧ ль Австрйайе дьжи, чаԝа щаба хушкәке да, йа кӧ дьхԝәст жерʹа һәвалтийе бькә: «Мьн сафикьрьна хԝә бь нәрми у зәлал жерʹа гот. Мьн нәдьхԝәст, ԝәки гӧмана ԝе һәбә, ләма жи мьн дәрберʹа дәрһәԛа ве йәке жерʹа гот. Паши ве йәке, мьн рʹьнд дина хԝә дьда готьн у рʹабун-рʹуньштьна хԝә, ԝәки әԝ нәфькьрә, кӧ мьн ньһерʹандьна хԝә гӧһастийә». Жь алийе дьнва жи, һәрге тӧ жи дьхԝази жерʹа һәвалтийе бьки, тʹәви ԝи хәбәр дә, кӧ һуне чь бькьн, ԝәки дьһа незик һәвдӧ нас кьн. Жь бо култур йан дәрәщед дьн, дьбәкә һьнә фькьр у хԝәстьнед ԝә жь һәв щӧдә бьн.

КӘСЕД ДЬН ЧА ДЬКАРЬН АЛИ ХУШК У БЬРЕД АЗӘП БЬКЬН?

14. Әм ча дькарьн пе гьлийед хԝә пьштгьрийа хушк-бьред азәп бькьн?

¹⁴ Гәло әм чаԝа дькарьн али ԝан хушк у бьра бькьн, йед кӧ дьхԝазьн бьзәԝьщьн? Тьштәки фәрз әв ә, кӧ әм мьԛати гьлийед хԝә бьн (Әфәси 4:29). Жь хԝә бьпьрсә: «Гәло әз ԛәрфед хԝә кәсед азәп дькьм? Гава әз дьвиньм кӧ хушкәкә азәп тʹәви бьраки азәп хәбәр дьдә, гәло әз дәрберʹа дьфькьрьм, кӧ ортʹа ԝанда тьштәк һәйә?» (1 Тимотʹейо 5:13). Ӧса жи әм гәрәке нәбьн сәбәб, кӧ хушк у бьред азәп хԝә беԛимәт тʹәхмин кьн. Бьре мә Һанс ӧса дьбежә: «Һьнә хушк у бьра дьпьрсьн: ‹Тӧ чьрʹа назәԝьщи? Тӧ ида щаһьл нини›. Гьлийед ӧса дькарьн бьбьнә мәʹни, ԝәки кәсед азәп хԝә беԛимәт тʹәхмин кьн у һʹәсаб кьн, ԝәки әԝана борщдар ьн бьзәԝьщьн». Гәло дьһа баш нинә, кӧ әм мәщала бьгәрʹьн, ԝәки пʹайе хушк-бьред азәп бьдьн? (1 Тʹесалоники 5:11)

15. (а) Пешийа кӧ әм али кәсәки бькьн, ԝәки әԝ хԝәрʹа һәваләки бона зәԝаще бьвинә, әм гәрәке сәр чь бьфькьрьн? (Рʹомайи 15:2) (Бьньһерʹә ӧса жи шькьл.) (б) Тә видеойеда чь дәрсед керһати бона хԝә дит? (Бьньһерʹә ӧса жи спартьн.)

¹⁵ Әм гәрәке чь бькьн гава дьфькьрьн, ԝәки фьлан хушк у бьра гәләк һәвдӧ тен? Кʹьтеба Пирозда те готьне, кӧ әм гәрәке һәстед кәсед дьн һьлдьн һʹәсаб (Бьхунә Рʹомайи 15:2). Гәләк кәсед азәп нахԝазьн, ԝәки кәсәки дьн ԝанрʹа һәвалзәԝащ бьгәрʹә (2 Тʹесалоники 3:11). Ле һьнә хушк-бьред азәп бона аликʹарийа кәсед дьн рʹази нә, ле диса жи, әм гәрәке бе изьна ԝан нәкʹәвьнә нава шьхӧлед ԝанe (Мәтʹәлок 3:27). Һьнә хушк-бьред азәп нахԝазьн, ԝәки ԝана рʹастә-рʹаст тʹәви кәсәки бьдьнә наскьрьне. Хушкәкә азәп бь наве Лидйа, йа кӧ ль Алманйайе дьжи, дьбежә: «Чахе тӧ гази хушк-бьра дьки, тӧ дькари гази кәсед азәп жи бьки. Мәщале чекә, ԝәки әԝана һәвдӧ бьвиньн, паше бьһелә, ԝәки әԝана хԝәха сафи кьн, кӧ чь бькьн».

16. Хушк у бьред азәп гәрәке чь бир нәкьн?

¹⁶ Фьрԛи тʹӧнә әм азәп ьн йан зәԝьщи нә, әм гьшк жи дькарьн бәхтәԝар бьн (Зәбур 128:1). Ләма жи, һәрге тӧ дьхԝази бьзәԝьщи, ле һʹәта ньһа тә хԝәрʹа һәваләки лайиԛ нәдитийә, дина хԝә бь тʹәмами бьдә сәр хьзмәтийе. Хушкәкә бь наве Син Йи, йа кӧ ль Макаойе дьжи, дьбежә: «Щьнәтеда, тӧйе бькарьби һʹәта-һʹәтайе тʹәви һәвалзәԝаще хԝә бьжийи. Әʹмьре азәп бь рʹасти жи кьн ә. Ве йәке ԛимәт кә у бь щурʹе баш бьдә хәбате». Ле һәрге тә ида хԝәрʹа һәваләк дитийә у һун рʹасти һәв тен, ԝәки незик һәвдӧ нас кьн, тӧ гәрәке чь бьки? Готара дьнда әме щаба ве пьрсе бьстиньн.