Йаһоԝа Һесьред Чʹәʹвед Тә Дьвинә

1-2. Дьбәкә жь бо чь әм һесьра бьбариньн?

ҺӘР кәс жь мә һесьр барандийә. Щарна дьбәкә жь шабуне һесьр чʹәʹве мә тен. Гава әʹмьре мәда тьштәки фәрз йан мәхсус дьԛәԝьмә, мәсәлә зарʹ мәрʹа те буйине, йан жи гәләк сал шунда әм рʹасти һәваләки хԝәйи дәлал тен, дьԛәԝьмә һесьр чʹәʹве мә тен.

² Ле һʹәчʹи зәʹф әм жь бо дәрдед хԝә дьгьрин. Мәсәлә, гава кәсәк дьле мә дешинә, дьбәкә һесьред мә бен. Ӧса жи һәрге әм гьран нәхԝәш дькʹәвьн у еше дькʹьшиньн, йан жи һәрге дост йан мәрьвәки мәйи һʹәзкьри дьмьрә, әм дьгьрин. Гава бажаре Оршәлиме бь дәсте Бабилонийа һатә ԝеранкьрьне, һʹале Йерәмйа пʹехәмбәр жи ӧса бу. Әԝи ӧса гот: «Чʹәʹвед мьн, һесьред лейа дьрʹьжиньн . . . Бесәкьнандьн, берʹаԝәстьн, чʹәʹве мьн һесьра дьрʹьжиньн» (Луринед Йерәмйа 3:48, 49).

3. Йаһоԝа ча сәр дәрдед хьзмәткʹаред хԝә дьньһерʹә? (Ишайа 63:9)

³ Йаһоԝа рʹьнд занә ԝәки жь бо дәрдед хԝә мә чьԛас һесьр барандийә. Кʹьтеба Пироз дьбежә кӧ әԝ һʹәму дәрдед хьзмәткʹаред хԝә дьвинә, у гава әм һәԝара хԝә ԝи дадьхьн, әԝ дәнге мә дьбьһе (Зәбур 34:15). Ле Йаһоԝа нә кӧ тʹәне мә дьвинә у дьбьһе, ле ча бавәки дьлован әԝ гәләки мә һʹәз дькә, у гава әм жь бо дәрде хԝә дьгьрин, дьле ԝи дешә у әԝ дьхԝазә али мә бькә (Бьхунә Ишайа 63:9).

4. Ве готареда әме чь шеԝьр кьн?

⁴ Кʹьтеба Пироз нишани мә дькә, кӧ гава хьзмәткʹаред Хԝәде дьгьрийан, әԝи ча али ԝан дькьр. Ве готареда әме дина хԝә бьдьнә мәсәла Һаннайе, Даԝьд Пʹадша у Һьзԛийа Пʹадша. Гәло әԝана чьрʹа дьгьрийан? Йаһоԝа ча щаба һәԝаргазийа ԝан дьда? Гәло сәрһатийед ԝан ча дькарьн али мә бькьн, гава әм жь бо дәрд, нәмами йан бечʹарәтийе һесьра дьбариньн?

ҺЕСЬРЕД ХӘМГИНИЙЕ

5. Һʹале Һаннайе чаԝа бу?

⁵ Һанна жь бо һʹале хԝә хәмгин бу у гәләк дьгьрийа. Проблемәкә ԝе әв бу, кӧ һәԝийа ԝе, Пенинайе, пе гьлийа ле ньмьз дькьр. Сәрда жи, чәнд зарʹед Пенинайе һәбун, ле Һаннайерʹа зарʹ нәдьбун (1 Самуйел 1:1, 2). Ләма жи Пенинайе бәрдәԝам дькьр ԛәрфед хԝә Һаннайе бькә. Гәло һʹаләки ӧсада тәйе чь бькьра? Һанна ӧса дьлтәнг бьбу, кӧ «бь дьле шәԝат» дьгьрийа у хԝарьн жи нәдьхԝар (1 Самуйел 1:6, 7, 10, ИМ).

6. Һаннайе чь кьр сәва кӧ дьлбинийе бьстинә?

⁶ Гәло Һаннайе ча бәрдьли станд? Әԝ бона һʹәбандьне чу коне Йаһоԝа. Ԝедәре дьԛәԝьмә гава Һанна бона һʹәбандьне чу кон, әԝ «бь дьле шәԝат гьрийа у лавайи Хӧдан кьр», у жь Ԝи рʹәща кьр, ԝәки ле бир нәкә (1 Самуйел 1:10б, 11, ИМ). Һаннайе дӧада дьле хԝә Йаһоԝарʹа вәкьр. У дьле Йаһоԝа жи жь бо һесьред ԝе ешийа, у әԝ һазьр бу дьле ԝе рʹьһʹәт кә, чьмки әԝ бона ԝи ча ԛизәкә дәлал бу!

7. Чахе Һаннайе дьле хԝә Йаһоԝарʹа вәкьр, әԝе чь тʹәхмин кьр?

⁷ Чахе Һаннайе дьле хԝә Йаһоԝарʹа вәкьр у Кʹаһине Мәзьн, Әли, жерʹа гот кӧ Йаһоԝа ԝе щаба дӧайе ԝе бьдә, Һаннайе чь тʹәхмин кьр? Кʹьтеба Пироз дәрһәԛа ԝе ӧса дьбежә: «Паше рʹабу нан хԝар у бәшәра ԝе жи хԝәш бу» (1 Самуйел 1:17, 18, ИМ). Рʹаст ә проблема Һаннайе һе сафи нәбьбу, ле дьле ԝе ида рʹьһʹәт бу. Әԝе баре хԝә да дәсте Йаһоԝа. Йаһоԝа һәԝаргазийа ԝе бьһист у ле кʹәрәм кьр. Ԝәхт шунда Һаннайерʹа чәнд зарʹ һатьнә буйине (1 Самуйел 1:19, 20; 2:21).

8-9. Ль гора Ибрани 10:24, 25 чьрʹа фәрз ә, ԝәки әм һәрʹьнә щьвата? (Бьньһерʹә ӧса жи шькьл.)

⁸ Дәрс бона мә: Дьбәкә тӧ жи бона һьнә проблема бәр хԝә дькʹәви. Дьԛәԝьмә һәвал йан мәрьвәки тәйә һʹәзкьри мьрийә у дьле тә гәләк дешә. Гава тьштед ӧса дьԛәԝьмьн, мәрьв щарна дьхԝазә тʹәне бьминә. Ле биньн бира хԝә, кӧ гава Һанна бона һʹәбандьне чу коне Хԝәде, әԝе бәрдьликә мәзьн станд. Мина Һаннайе, һәрге тӧ ԝәстийа йи йан дьлтәнг и, диса жи бәрдәԝам кә һәрә щьвата, чьмки ԝедәре тӧ дькари дьлрʹьһʹәтийе бьстини (Бьхунә Ибрани 10:24, 25). Йаһоԝа дькарә бь сайа хәбәред жь Кʹьтеба Пироз, йед кӧ әм сәр щьвата дьбьһен, али мә бькә, ԝәки әм дьлбинийе бьстиньн у фькьред негатив жь һʹьше хԝә дәрхьн. Ӧса әм дькарьн емосийед хԝә контрол кьн, һәрге жи проблемед мә дәрберʹа сафи набьн.

⁹ Хенщи ве йәке, әм сәр щьвата тʹәви хушк-бьред дьлован ԝәʹдә дәрбаз дькьн. Бәрдьли у һʹәзкьрьна ԝан дькарә ԛәԝате бьдә мә (1 Тʹесалоники 5:11, 14). Ԝәрә әм дина хԝә бьдьне, кӧ пешәнгәки мәхсус, жьна кʹижани кӧ мьрийә, чь дьбежә: «Әз һʹәта рʹожа иро һесьра дьбариньм. Щара әз тʹәне рʹудьнем у дьгьрим. Ле щьватед мә бәрдьликә мәзьн дьдьнә мьн. Хушк-бьра бь гьлийед ширьн у дьлгәрм бәр дьле мьнда тен. Пешийа щьвате әз чьԛас хәмгин бьм жи, паши щьвате әз хԝә тʹьме дьһа баш тʹәхмин дькьм». Бәле, гава әм дьчьнә щьвата, Йаһоԝа дькарә бь сайа хушк-бьра али мә бькә.

10. Гава әм рʹасти кӧл-дәрда тен, әм ча дькарьн чʹәʹв бьдьнә Һаннайе?

¹⁰ Һаннайе ӧса жи бәрдьли станд, гава дӧада дьле хԝә Йаһоԝарʹа вәкьр. Әм жи дькарьн «һʹәму хәмед хԝә бавежьнә сәр [Йаһоԝа]» у баԝәр бьн, кӧ әԝе дәнге мә бьбьһе (1 Пәтрус 5:7). Хушкәке кӧ мере ԝе жь алийе ԛачахада һатә кӧштьне, ӧса дьбежә: «Әз ӧса дьлтәнг бьбум, кӧ мьн тʹьре әзе ида тʹӧ щар ша нәбьм. Ле чахе мьн Баве хԝәйи дьлован, Йаһоԝарʹа дӧа дькьр, мьн дьлбини у дьлрʹьһʹәти дьстанд. Щарна мьн ньзаньбу чь жерʹа бежьм, ле әԝи диса жи әз фәʹм дькьрьм. Гава мьн хԝә гәләк хьраб тʹәхмин дькьр, мьн жь Йаһоԝа әʹдьлайи дьхԝәст. Һьнге дьле мьн рʹьһʹәт дьбу у мьн ида дькарьбу шьхӧле хԝә бькьра». Гава тӧ дьле хԝә Йаһоԝарʹа вәдьки, әԝ һесьред чʹәʹвед тә дьвинә у еша дьле тә фәʹм дькә. Һәрге проблема тә дәрбаз нәбә жи, Йаһоԝа дькарә дьле тә рʹьһʹәт кә у әʹдьлайе бьдә тә (Зәбур 94:19; Филипи 4:6, 7). Әԝ дьвинә тӧ чь дьки ԝәки жерʹа амьн бьмини у әԝе сәбьра тә кʹәрәм кә (Ибрани 11:6).

ҺЕСЬРЕД ЖЬ БО НӘМАМИЙЕ

11. Проблемед Даԝьд ча сәр ԝи һʹӧкӧм дькьрьн?

¹¹ Даԝьд Пʹадша әʹмьре хԝәда чәнд щара рʹасти проблемед мәзьн һат, йед кӧ бунә сәбәбед һесьред ԝи. Гәләк мәрьв ԝи нәфрʹәт дькьрьн у һәла һе һьнә һәвал у нәфәред мала ԝи жи нәмамийа ԝи кьрьн (1 Самуйел 19:10, 11; 2 Самуйел 15:10-14, 30). Ԝәʹде гәләк чәтьнда Даԝьд ӧса ньвиси: «Жь нәʹлинийе әз ԝастийа мә, һәр шәв дьшом дошәка хԝә, бь һесьра шьл дькьм ньвина хԝә». Ле чьрʹа Даԝьд хԝә ӧса тʹәхмин дькьр? Әԝи гот кӧ һесьред ԝи «рʹуйе һʹәму дьжмьнада» дьбарийан (Зәбур 6:6, 7). Бәле, Даԝьд жь бо нәһәԛийа кӧ кәсед дьн ль ԝи дькьрьн, гәләк дьгьрийа.

12. Ль гора Зәбур 56:8, Даԝьд чьда баԝәр бу?

¹² Нава ԝан проблемада жи Даԝьд баԝәр бу, кӧ Йаһоԝа ԝи һʹәз дькә. Әԝи ӧса ньвиси: «Хӧдан бьһист гьрийе мьн» (Зәбур 6:8). Дәрәщәкә дьнда Даԝьд гьлийед һʹәԝас ньвиси, йед кӧ әм Зәбур 56:8-да дьхуньн (Бьхунә). Гьлийед жь ве рʹезе дьдьнә кʹьфше, кӧ Йаһоԝа мә чьԛас һʹәз дькә. Даԝьд хԝә ӧса тʹәхмин дькьр, те бежи Йаһоԝа һесьред ԝи дәрданәкеда тʹоп дькьр, йан кʹьтебәкеда дьньвиси. Әԝ баԝәр бу кӧ Йаһоԝа еша дьле ԝи дьвинә у бир накә. Даԝьд дӧдьли нәдьбу, ԝәки Баве ԝийи дьлован һьм заньбу кӧ чь дьһатә сәре ԝи, һьм жи дьдит кӧ дәрдед ԝи ча сәр ԝи һʹӧкӧм дькьрьн.

13. Гава кәсед дьн дьле мә дешиньн, әм ча дькарьн дьлбинийе бьстиньн? (Бьньһерʹә ӧса жи шькьл.)

¹³ Дәрс бона мә: Гәло тӧ хәмгин и жь бо ве йәке, кӧ кәсәки дьле тә ешандийә, йан нәмамийа тә кьрийә? Дьбәкә дьле тә дешә, чьмки дәргисти йан һәвалзәԝаще тә, тӧ һишти. Йан жи дьбәкә һәвал йан мәрьвәки тә жь Йаһоԝа дур кʹәтийә. Бьраки мә, жьна кʹижани кӧ бенамуси кьр у ле һишт, ӧса дьбежә: «Мьн баԝәр нәдькьр, кӧ тьштәки ӧса һатә сәре мьн. Мьн хԝә бекер тʹәхмин дькьр, әз хәмгин у һерс бум». Һәрге кәсәки нәмамийа тә кьрийә, йан жи тӧ дьлшкәсти йи, баԝәр бә кӧ Йаһоԝа ԝе тә тʹӧ щар тʹәне нәһелә. Әԝи бьрайи ӧса гот: «Мьн фәʹм кьр, кӧ мәрьв щарна дькарьн нәамьн бьн, ле Йаһоԝа тʹьме амьн ә. Чь жи һәбә, әԝ һәр гав кʹеләка мә йә. Әԝ тʹӧ щар амьнед хԝә наһелә» (Зәбур 37:28). Ӧса жи бир нәкә, кӧ һʹәзкьрьна Йаһоԝа Хԝәде жь һʹәзкьрьна мәрьва дьһа мәзьн ә у ԛәԝи йә. Һәрге кәсәк пьшта хԝә бьдә мә жи, Йаһоԝа мә тʹәне наһелә (Рʹомайи 8:38, 39). Фьрԛи тʹӧнә мәрьв һьндава тәда чаԝа ньн, йәкә тьштәк ԝе тʹӧ щар нәйе гӧһастьне, Баве тәйи әʹзмана тә гәләки һʹәз дькә.

14. Зәбур 34:18 дәрһәԛа Йаһоԝа чь дьбежә?

¹⁴ Ӧса жи гава әм рʹасти нәмамийе тен, гьлийед Даԝьд жь Зәбур 34:18, дькарьн дьле мә рʹьһʹәт кьн (Бьхунә). Кʹьтебәкеда те готьне, ԝәки ве рʹезеда «мәʹрьм-бәләнгаз» әԝ мәрьв ьн, «йед кӧ һивийа тьштәки баш ниньн». Ле гәло Йаһоԝа сәр ԝан мәрьва, йед кӧ жь бо кьред кәсед дьн дьлшкәсти нә, ча дьньһерʹә? Мина де йан бавәки кӧ зарʹа хԝә һьлдьдә һʹәмеза хԝә, Йаһоԝа жи бь ви щурʹәйи «незики» мә йә. Гава әм жь бо нәмамийа кәсәки хԝә бечʹарә тʹәхмин дькьн, дьле ԝи сәр мә дьшәԝьтә у әԝ һазьр ә бе һәԝара мә. Чахе әм «дьлшкәсти» нә, әԝ дьхԝазә дьле мә дәрман кә у еша мә сьвьк кә. Бь сайа созед кӧ әԝи дайә мә, әм һʹьзрәта ԝәʹдәки хԝәш ьн, у әԝ йәк али мә дькә, кӧ бәр тәнгасийед иройин сәбьр кьн (Ишайа 65:17).

ҺЕСЬРЕД БЕЧʹАРӘТИЙЕ

15. Чь һатә сәре Һьзԛийа Пʹадша?

¹⁵ Гава Һьзԛийа Пʹадша 39 сали бу, әԝ гьран нәхԝәш кʹәт. Бь сайа Ишайа пʹехәмбәр, Йаһоԝа жерʹа гот кӧ әԝе жь ве нәхԝәшийе бьмьрә (2 Пʹадшати 20:1). Һʹале Һьзԛийа бечʹарә дьһатә кʹьфше. Жь бо ве хәбәре, Һьзԛийа гәләк гьрийа у әԝи жь дьл Йаһоԝарʹа дӧа кьр (2 Пʹадшати 20:2, 3).

16. Йаһоԝа чаԝа щаба дӧайе Һьзԛийа Пʹадша да?

¹⁶ Дьле Йаһоԝа сәр Һьзԛийа шәԝьти у әԝи жерʹа гот: «Мьн дӧайа тә бьһист, мьн һесьред чʹәʹвед тә дитьн». Бь сайа Ишайа пʹехәмбәр Йаһоԝа соз да, ԝәки әԝе әʹмьре ԝи дьреж кә у ԝи жь дәсте ордийа Асуре хьлаз кә (2 Пʹадшати 20:4-6, ИМ).

17. Гава әм гьран нәхԝәш дькʹәвьн, Йаһоԝа ча али мә дькә? (Зәбур 41:3) (Бьньһерʹә ӧса жи шькьл.)

¹⁷ Дәрс бона мә: Һәрге әм гьран нәхԝәш кʹәвьн, ԝәрә әм дӧада дьле хԝә Йаһоԝарʹа вәкьн, у һәла һе бь һесьра жи. Кʹьтеба Пироз дьбежә ԝәки «Баве дьлшәԝатийе у Хԝәдейе һʹәму бәрдьлийе» ԝе һʹәму тәнгасийед мәда бәрдьлийе бьдә мә (2 Корьнтʹи 1:3, 4). Әм заньн кӧ иро Йаһоԝа ԝе мә жь һʹәму дәрда аза нәкә, ле диса жи әԝе али мә бькә (Бьхунә Зәбур 41:3). Сәва кӧ әм бькарьбьн бәр тәнгасийа сәбьр кьн, Йаһоԝа бь сайа рʹӧһʹе пироз ԛәԝат, билани у дьлрʹьһʹәтийе дьдә мә (Мәтʹәлок 18:14; Филипи 4:13). Ӧса жи әԝ соз дьдә, кӧ ахьрийеда ԝе һʹәму нәхԝәшийа кʹӧта кә (Ишайа 33:24).

18. Гава тӧ рʹасти тәнгасийед гьран тейи, илаһи кʹижан рʹез дьле тә рʹьһʹәт дькә? (Бьньһерʹә чаргошә «Һьнә Гьлийед кӧ Дькарьн Дьле Мә Рʹьһʹәт кьн».)

¹⁸ Гьлийед Йаһоԝа дьле Һьзԛийа рʹьһʹәт кьрьн. Чахе әм рʹасти тәнгасийа тен, хәбәред Йаһоԝа, йед кӧ Кʹьтеба Пирозда ньвисар ьн, дькарьн дьле мә жи рʹьһʹәт кьн (Рʹомайи 15:4). Гава хушкәкә жь Африкайа Рʹоавайе пеһʹәсийа, кӧ кʹансәра ԝе һәйә, әԝ гәләк щар дьгьрийа. Әԝ дьбежә: «Әз илаһи жь Ишайа 26:3 дьлбинийе дьстиньм. Гәләк щар нава тәнгасийада әм тьштәки нькарьн бькьн, ле әв рʹез нишани мьн дькә, ԝәки Йаһоԝа дькарә дьлрʹьһʹәтийе бьдә мә, кӧ әм бәр тәнгасийа сәбьр кьн». Гава тӧ рʹасти тәнгасийед гьран тейи, тӧ илаһи жь кʹижан рʹезе дьлбинийе дьстини?

19. Йаһоԝа чь соз дайә мә?

¹⁹ Чьԛас әм незики хьлазийа ве дьнйа хьраб дьбьн, һаԛас дәрдед мә у һесьред мә дькарьн һе зедә бьн. Ле чаԝа мә жь мәсәла Һаннайе, Даԝьд Пʹадша у Һьзԛийа Пʹадша дит, Йаһоԝа һесьред мә дьвинә, у дьле ԝи сәр мә дьшәԝьтә. Ләма жи гава әм рʹасти тәнгасийа тен, ԝәрә әм дьле хԝә ԝирʹа вәкьн. Тʹӧ щар хԝә башԛә нәкьн у жь хушк-бьра дур нәкʹәвьн у ӧса жи жь рʹезед Кʹьтеба Пироз дьлбинийе бьстиньн. Һәрге әм бь амьни сәбьр кьн, Йаһоԝа ԝе мә хәлат кә. Әԝи соз дайә, кӧ рʹожәке әԝе һʹәму һесьред мә паԛьж кә, йед кӧ әм жь бо дәрд, нәмами, йан бечʹарәтийе дьбариньн (Әʹйанти 21:4). Һьнге ида әме тʹәне һесьред шабуне бьбариньн!