Әм Ча Дькарьн Һәваләки Амьн Бьн?

ГӘЛО ԛә ӧса ԛәԝьми йә, кӧ тӧ рʹасти проблемәке һатьбуйи у кәс тʹӧнә бу, ԝәки бе һәԝара тә? Әм рʹожед гәләк чәтьнда дьжин, ләма жи дьбәкә әм щарна дьлтәнг бьн у тʹәнебуне тʹәхмин кьн (2 Тимотʹейо 3:1). Ле бь рʹасти нәлазьм ә ԝәки әм бьфькьрьн, кӧ әм гәрәке хԝәха дәрдед хԝә бькʹьшиньн, чьмки һәнә мәрьвед ӧса, йед кӧ һазьр ьн али мә бькьн. Кʹьтеба Пироз дьбежә, кӧ «рʹожа охьрме гьран», һәвалед амьн дькарьн аликʹарийе бьдьнә мә (Мәтʹәлок 17:17).

ҺӘВАЛЕД АМЬН ЧА ДЬКАРЬН АЛИКʹАРИЙЕ БЬДЬНӘ МӘ?

Һәвалед Паԝлосе шанди, йед кӧ тʹәви ԝи рʹеԝити дькьрьн, аликʹари дьданә ԝи (Колоси 4:7-11). Гава Паԝлос кәла Рʹомеда бу, һәвалед ԝи ван шьхӧла дькьрьн, кʹижан кӧ Паԝлос нькарьбу бькьра. Мәсәлә, Епафродито тьштед кӧ хушк-бьред жь Филипйайе шандьбун, гиһандә Паԝлос (Филипи 4:18). Тьхико нәʹмед Паԝлос бьрә чәнд щьвата (Колоси 4:7). Гава Паԝлос гьртийе мале бу йан жи кәледа бу, әԝи хьзмәтийа хԝә бь аликʹарийа һәвалед хԝә дьани сери. Гәло тӧ ча дькари һәваләки амьн би?

Сәрһатийед хушк-бьред мә дьдьнә кʹьфше, кӧ һәвалед рʹаст ча дькарьн аликʹарийе бьдьнә һәв. Ԝәрә әм мәсәла хушкәкә мә шеԝьр кьн, кӧ ча әԝе али пешәнгәкә һәртʹьм дькьр, наве кʹижане Елизабет бу, йа кӧ Испанйайеда дьжи. Гава дийа ԝе бь кʹансәре нәхԝәш кʹәт, хушка мә жерʹа гәләк рʹезед Кʹьтеба Пироз шанд. Елизабет дьбежә: «Чахе мьн смс жь ве хушке станд, әз гәләк ша бум кӧ кәсәк бона мьн дьшьрмиш дьбә, у мьн ида хԝә тʹәне тʹәхмин нәдькьр» (Мәтʹәлок 18:24).

Гава әм али хушк-бьра дькьн ԝәки әԝана хьзмәт кьн, йан жи һәрʹьнә щьвата, һәвалтийа мә тʹәви ԝан дьһа ԛәԝи дьбә. Мәсәлә, гәло тӧ дькари хушк йан бьраки әʹмьрда мәзьн пе әʹрәба хԝә бьви щьвате йан жи хьзмәтийе? Һәрге тӧ бь ԝи щурʹәйи али кәсәки бьки, нә кӧ тʹәне тӧйе ԝи кәси ԛәԝи ки, ле әԝе жи тә ԛәԝи кә (Рʹомайи 1:12). Ле һьнә хушк-бьред мә нькарьн жь мал дәркʹәвьн. Гәло әм ча дькарьн бона ԝан бьбьнә һәвалед баш?

АЛИ ԜАН ХУШК-БЬРА БЬКӘ, ЙЕД КӦ НЬКАРЬН ЖЬ МАЛЕ ДӘРКʹӘВЬН

Һьнә хушк-бьред мә жь бо нәхԝәшийе йан жи мәʹнийед дьн нькарьн һәрʹьнә щьвата. Мәсәлә, ԝәрә әм дина хԝә бьдьнә сәрһатийа бьре мә Давид, кʹижан кӧ кʹансәра ԝи һәйә. Әԝи шәш мәһа зедәтьр кʹимйатерапийа дьстанд. Ԝан мәһа, Давид у кʹӧлфәта ԝи Лидийа бь сайа видеоконференсийайе дькʹәтьнә щьвате.

Гәло ԝана чаԝа жь хушк-бьра аликʹари дьстандьн? Хьлазийа һәр щьватәке, һьнә хушк-бьра, йед кӧ Ода Щьватеда бун бь сайа видеоконференсийайе тʹәви ԝан хәбәр дьдан. Ӧса жи, гава Давид у Лидийайе щаба хԝә дьдан, хушк-бьра пе смсе пʹайе ԝан дьдан. Бь сайа ве йәке, Давид у Лидийайе һʹәзкьрьна хушк-бьра сәр хԝә тʹәхмин дькьрьн.

Гәло тӧ дькари тʹәви ԝан хушк-бьра хьзмәт ки, йед кӧ нькарьн жь мале дәркʹәвьн? Һәрге тӧ планед хԝә һʹәвәки бьгӧһези, тӧ дькари бьди кʹьфше ԝәки тӧ ԝан хушк-бьра бир наки (Мәтʹәлок 3:27). Мәсәлә, тӧ дькари тʹәви ԝан нәʹмә бьньвиси йан жи пе тʹеле хьзмәт ки. Кәсед кӧ нькарьн жь мале дәркʹәвьн, дьԛәԝьмә дькарьн бь сайа интернете бькʹәвьнә щьвинед бона хьзмәтийе. Давид у Лидийайе әв мәщал гәләки һʹәз дькьрьн. Давид ӧса дьбежә: «Хәбәрданед кьн у дӧакьрьна тʹәви кʹоме ԛәԝатәкә мәзьн дьда мә». Хенщи ве йәке һәрге дәст дьдә, гәло тӧ дькари щарна хԝәндәкʹарәки хԝә бини мала хушк йан бьраки, йе кӧ нькарә жь мале дәркʹәвә, ԝәки ԝедәре һинбуна Кʹьтеба Пироз дәрбаз ки?

Гава әм ԝәʹде хԝә тʹәви ԝан хушк-бьра дәрбаз дькьн, йед кӧ нькарьн жь мале дәркʹәвьн, әм дьһа баш ԝан у хәйсәт-һʹӧнӧред ԝанә баш нас дькьн, у дьбьнә һәвалед ԝан. Мәсәлә, гава тӧ тʹәви ԝан хьзмәт дьки, тӧ дьвини кӧ әԝана Кʹьтеба Пироз чаԝа бь һостәти дьдьнә хәбате, ԝәки Хәбәра Хԝәде бьгьһиньнә дьле мәрьва. У әв йәк мәщале дьдә тә, кӧ дьһа зедә ԝана һʹәз ки. Чахе тӧ шьхӧле рʹӧһʹанида аликʹарийе дьди хушк-бьра, ӧса тӧ дьһа зедә һәвала ԛазанщ дьки (2 Корьнтʹи 6:13).

Гава Паԝлос рʹасти тәнгасийа һат, досте ԝи Тито чу сәрики ле хә, у бь сайа ве йәке Паԝлос дьлбини станд (2 Корьнтʹи 7:5-7). Мәсәла Тито нишани мә дькә, ԝәки әм нә тʹәне пе гьлийед хԝәйә дьлгәрм дькарьн бәр дьле хушк-бьрада бен, ле ӧса жи чахе тʹәви ԝан ԝәʹдә дәрбаз дькьн у али ԝан дькьн (1 Йуһʹәнна 3:18).

ԜӘʹДЕ ПӘЙКʹӘТЬНА КʹЕЛӘКА ХУШК-БЬРА БӘ

Русйайе ԝәʹде пәйкʹәтьна, хушк-бьред мә али һәв дькьн. Ԝәрә әм дина хԝә бьдьнә сәрһатийа Сергейи у кʹӧлфәта ԝи Татйанайе. Полиса мала ԝан сәробьниһәв кьрьн у әԝ бьрьнә полисхане. Пешийе, Татйана бәрʹдан. Сергейи ӧса дьбежә: «Һәма ча Татйана гьһиштә мале, хушкәкә мерхас һатә мала мә. Паше һәвалед мәйә дьн жи һатьн у али мә кьрьн мале тʹәмьз кьн».

Сергейи дьбежә: «Мәтʹәлок 17:17 тʹьме мьн хԝәш дьһат. Әв рʹез ӧса дьбежә: ‹Һәвал һәр гав һʹьз дькә, бьра буйә бона рʹожа охьрме гьран›. Ԝәʹде пәйкʹәтьна, мьн дит кӧ әв гьлинә чьԛас рʹаст ьн. Гава мьн нькарьбу тʹәне сәбьр бькьм, Йаһоԝа һәвалед мерхас шандьнә бал мьн ԝәки али мьн бькьн».a

Һʹале дьнйайе чьԛас дьчә хьраб дьбә, у әм һʹәԝще һәвале амьн ьн. У ԝәʹде тәнгасийа мәзьн, әме дьһа зедә һʹәԝще ван һәвала бьн. Ләма жи ԝәрә әм чь жь дәсте мә те бькьн, кӧ ньһада бона һәвдӧ һәвалед амьн бьн! (1 Пәтрус 4:7, 8)