Гәло Тӧ Һин Буйи кӧ Йәки Шекьрдар би?

1. Рʹазибун чь те һʹәсабе у чь найе һʹәсабе?

ГӘЛО тӧ жь һʹале хԝә рʹази йи? Мәрьве кӧ жь һʹале хԝә рʹази йә, жь ԝан кʹәрәмед кӧ щәм ԝи һәнә шабуне дьстинә у дьле ԝи рʹьһʹәт ә. Әԝ хәмгин набә у һерс накʹәвә чахе тьштәк жь ԝи кем ә. Гава кәсәк жь һʹале хԝә рʹази йә, әв йәк найе һʹәсабе кӧ әԝ йәки бетʹалаш ә. Мәсәлә, әԝ мәщала дьгәрʹә сәва кӧ һе зедә Йаһоԝарʹа хьзмәт кә (Рʹомайи 12:1; 1 Тимотʹейо 3:1). Диса жи, һәрге әԝ хьзмәтийеда щабдарийа зу настинә, әԝ шабуна хԝә ӧнда накә.

2. Чьма гәләк хоф ә гава кәсәк жь һʹале хԝә рʹази нинә?

² Мәрьве кӧ жь һʹале хԝә рʹази нинә, дькарә гавед нәбаш бавежә. Мәсәлә, дьбәкә әԝ гәләк сьһʹәта бьхәбьтә сәва кӧ тьштед ӧса бькʹьрʹә, йед кӧ бь рʹасти жерʹа ԛә нәлазьм ьн жи. Сәд һʹәйф кӧ һьнә Мәсиһийа һәла һе пʹәрә у тьштед дьн дьзи нә. Дьԛәԝьмә ԝана хԝә ӧса һәԛ дәрхьстьбу: «Әз һежайи ви тьшти мә», «Әз гәләк ԝәʹдә һʹьзрәта ви тьшти бум» йан «Әзе паше ван пʹәра әʹсәйи вәгәрʹиньм». Ле Йаһоԝа һʹәму щурʹә дьзийе нәфрʹәт дькә, у дьзи ләкʹе тинә сәр наве ԝи (Мәтʹәлок 30:9). Һьнә кәс жи жь бо ве йәке кӧ щьватеда щабдарик нәстандьнә, һаԛас хәмгин бунә ԝәки тʹәрка хьзмәтийа Йаһоԝарʹа данә (Галати 6:9). Тьштәки ӧса ча дькарә бе һʹьше хьзмәткʹаре Йаһоԝа? Проблем дьбәкә ве йәкеда нә, кӧ әԝ ида жь һʹале хԝә рʹази нинә.

3. Әм дькарьн жь Филипи 4:11, 12 чь дәрсе һин бьн?

³ Әм гьшк дькарьн һин бьн кӧ жь һʹале хԝә рʹази бьн. Паԝлосе шанди ӧса ньвиси: «Әз һин бумә кӧ һʹәму һʹалида бь тьштед кӧ дәсте мьнда һәнә рʹази бьм» (Бьхунә Филипи 4:11, 12). Гава әԝи ԝан хәбәра дьньвиси, әԝ гьрти бу. Диса жи әԝи шабуна хԝә ӧнда нәкьрьбу, чьмки «сӧрʹе» рʹазибуне ‹һин бьбу›. Һәрге мәрʹа чәтьн ә кӧ жь һʹале хԝә рʹази бьн, гьли у сәрһатийед Паԝлосе шанди дькарьн мә бьдьнә баԝәркьрьне, ԝәки әм дькарьн ви һʹӧнӧри нав хԝәда пешда биньн. Әм гәрәке нәфькьрьн кӧ әм дькарьн һеса хԝә бь хԝә жь һʹале хԝә рʹази бьн. Лазьм ә кӧ әм ве йәкә һин бьн. Гәло ча? Ԝәрә әм дина хԝә бьдьнә һьнә һʹӧнӧра, йед кӧ дькарьн али мә бькьн сӧрʹе рʹазибуне һин бьн.

ШЕКЬРДАР БӘ

4. Шекьрдари ча дькарә али мә бькә, кӧ әм жь һʹале хԝә рʹази бьн? (1 Тʹесалоники 5:18)

⁴ Мәрьве шекьрдар жь һʹале хԝә рʹази йә (Бьхунә 1 Тʹесалоники 5:18). Мәсәлә, һәрге әм рʹази нә бона тьштед сәрәкә кӧ щәм мә һәнә, әме бь зедәйи бәр хԝә нәкʹәвьн бона тьштед кӧ әм дьхԝазьн, ле нькарьн дәстхьн. Һәрге әм бона щабдарийед кӧ мә щьватеда стандьнә, рʹази бьн, әме хирәт бькьн кӧ ван щабдарийа бь щурʹе лапи баш биньн сери, у әме тʹьме нәфькьрьн кӧ әм ча дькарьн щабдарикә тʹәзә бьстиньн. Ләма жи Кʹьтеба Пироз дьбежә, ԝәки әм дӧайед хԝәда Йаһоԝарʹа бежьн кӧ әм чьԛас жь ԝи рʹази нә. Һәрге әм шекьрдар бьн, әв йәк дькарә али мә бькә кӧ «әʹдьлайа Хԝәде, йа кӧ сәр фәʹмкьрьна мәрьварʹа йә» бькʹәвә дьле мә (Филипи 4:6, 7).

5. Чь мәʹнийед Исраелийа һәбу кӧ шекьрдар буна? (Бьньһерʹә ӧса жи шькьл.)

⁵ Ԝәрә әм дина хԝә бьдьнә һʹале Исраелийед бәре. Ԝана чәнд щара нәрʹазибуна хԝә Йаһоԝарʹа данә кʹьфше, чьмки ԝана бира хԝарьнед Мьсьре дькьр (Жьмар 11:4-6). Һәмьки әʹмьре бәрʹийеда һеса нибу, ле чь дькарьбу али ԝан бькьра, кӧ жь һʹале хԝә рʹази бьн? Ԝана гәрәке бь рʹазибуне сәр тьштед кӧ Йаһоԝа бона ԝан кьрьбу, бьфькьрийана. Мьсьреда әԝана хӧлам бун, ԝана дьзерандьн у дьданә щәфе, ләма жи Йаһоԝа 10 бәла анин сәр ԝәлате Мьсьре. Чахе Исраели аза бун, ԝана «мьсьри тʹалан кьрьн», зерʹ, зив у кʹьнщ жь ԝан хԝәстьн (Дәркʹәтьн 12:35, 36). Гава Исраели жь ордийа Мьсьре рʹәвийан у һатьнә бәр Бәʹра Сор, Йаһоԝа ава бәʹре бь кʹәрәмәти вәкьр. Паше, гава әԝана бәрʹийеда бун, әԝи һәр рʹож мана дьда ԝан. Ле гәло проблема ԝан чьда бу? Әԝана жь һʹале хԝә рʹази нибун, нә кӧ чьмки әԝана бьрʹчи мабун, ле чьмки бона тьштед кӧ бал ԝан һәбун, рʹази нибун.

6. Чь дькарә али мә бькә шекьрдар бьн?

⁶ Чь дькарә али тә бькә шекьрдар би? Йа пешьн, һәр рʹож ԝәʹдә бьвинә ԝәки бьфькьри кӧ чь тьштед баш бал тә һәнә. Дьԛәԝьмә тӧ дькари дӧ-се тьшта, бона чь жи рʹази йи, хԝәрʹа бьньвиси (Луринед Йерәмйа 3:22, 23). Йа дӧда, рʹазибуна хԝә әʹйан кә. Гава мәрьв бона тә тьштәки дькьн, рʹазибуна хԝә ԝанрʹа бьдә кʹьфше. У йа лапә фәрз, һәр рʹож рʹазибуна хԝә Йаһоԝарʹа бьдә кʹьфше (Зәбур 75:1). Йа сьсийа, тʹәви кәсед шекьрдар һәвалтийе бькә. Һәвалед ӧса ԝе баш сәр мә һʹӧкӧм кьн у әме жи бьбьнә кәсед шекьрдар. Ле һәрге һәвалед мә мәрьвнә бешекьр ьн, әԝ йәк дькарә сәр мә жи хьраб һʹӧкӧм кә (Ԛануна Дӧщари 1:26-28; 2 Тимотʹейо 3:1, 2, 5). Һәрге әм мәщала дьгәрʹьн ԝәки рʹазибуна хԝә бьдьнә кʹьфше, әме дьһа кем дина хԝә бьдьнә чәтьнайед хԝә у бәр хԝә нәкʹәвьн бона ван тьшта, чь кӧ щәм мә тʹӧнә нә.

7. Хушка мә шекьрдарийа хԝә ча зедә кьр у әве йәке чь кʹар жерʹа ани?

⁷ Ԝәрә әм дина хԝә бьдьнә сәрһатийа хушка мә Ачи, йа кӧ ль Әндонәзийайе дьжи. Әԝ дьбежә: «Ԝәʹде пандемийа COVID-19, мьн дәстпекьр һʹале хԝә бәрамбәри һʹале хушк-бьред дьн бькьм. Ахьрийеда, әз жь һʹале хԝә рʹази нибум» (Галати 6:4). Гәло чь али ԝе кьр ньһерʹандьна хԝә бьгӧһезә? Әԝ дьбежә: «Мьн дәстпекьр кʹәрәмед кӧ мьн һәр рʹож дьстанд, бьжмерьм у бьфькьрьм сәр тьштед баш, чь кӧ бал мьн һәнә, жь бо ве йәке кӧ әз пʹара малбәта Хԝәде мә. Паше, мьн рʹазибуна хԝә Йаһоԝарʹа да кʹьфше. Бь сайа ве йәке, әз ида жь һʹале хԝә рʹази бум». Һәрге тӧ жи жь һʹале хԝә рʹази нини, гәло тӧ дькари гавед ӧса бавежи, кӧ бьби йәки шекьрдар?

НЬҺЕРʹАНДЬНА РʹАСТ ХԜӘЙ КӘ У МЬЛУК БӘ

8. Барук бона чь дьлтәнг бу?

⁸ Барук, бәргьре Йерәмйа, сәр ԝәхтәки дьлтәнг бу у жь һʹале хԝә рʹази нибу. Щабдарийа ԝи һеса нибу. Әԝи гәрәке али Йерәмйа бькьра, йе кӧ әʹламәтийа сәрт дьгиһандә мьләтәки бешекьр. Рʹожәке, Барук ньһерʹандьна рʹаст ӧнда кьр. Дәԝса кӧ дина хԝә бьдә хԝәстьна Йаһоԝа, әԝи бь зедәйи дина хԝә дьда хԝә у нетед хԝә. Бь сайа Йерәмйа, Йаһоԝа ӧса готә Барук: «Ԛәй тӧ ль пәй тьштед мәзьн и? Нәдә пәй ван тьшта!» (Йерәмйа 45:3-5, ИМ). Йаһоԝа ча бежи готә ԝи: «Жь һʹале хԝәйи ньһа рʹази бә». Барук гӧһ да ширәта Йаһоԝа у ԛәбулкьрьна ԝи ӧнда нәкьр.

9. Ль гора 1 Корьнтʹи 4:6, 7, әм гәрәке бь мьлукти чь ԛәбул кьн? (Бьньһерʹә ӧса жи шькьл.)

⁹ Щарна дьбәкә кәсәк бьфькьрә кӧ һежайи фьлан щабдарийе йә. Дьԛәԝьмә әԝ йәки хирәт у щерʹьбанди йә. Ле диса жи, дьбәкә щабдарийа кӧ әԝ дьхԝазә бьстинә, кәсәки дьнрʹа бе дайине. Гәло чь дькарә али ԝи бькә һерс нәкʹәвә? Мәсәлә, әԝ дькарә сәр гьлийед Паԝлосе шанди бьфькьрә жь 1 Корьнтʹи 4:6, 7 (бьхунә). Һʹәму щабдарийед кӧ әм дьстиньн у һʹәму фәрәсәтед мә жь Йаһоԝа нә. Гава мәрʹа щабдари те дайине, әв йәк найе һʹәсабе кӧ әм һежайи ве йәке нә у жь кәсед дьн четьр ьн. Йаһоԝа әв һәр тьшт дьдә мә, чьмки әԝ рʹәʹм ә у мә һʹәз дькә (Рʹомайи 12:3, 6; Әфәси 2:8, 9).

10. Чь дькарә али мә бькә мьлук бьн?

¹⁰ Һәрге әм сәр мәсәла Иса Мәсиһ кʹур бьфькьрьн, әв йәк дькарә али мә бькә мьлуктийе нав хԝәда пешда биньн. Дина хԝә бьдьне, ԝәки шәва кӧ Иса ньгед шандийед хԝә шуштьн, чь ԛәԝьми. Йуһʹәннайе шанди ӧса ньвиси: «Иса, кӧ заньбу [1] Бав һәр тьшт дайә дәсте ԝи, у [2] кӧ әԝ жь Хԝәде һатийә у [3] дьчә щәм Хԝәде, . . . дәстпекьр ньгед шагьртед хԝә бьшо» (Йуһʹәнна 13:3-5). Иса дькарьбу бьфькьрә, кӧ шанди гәрәке ньгед ԝи бьшон. Ле гава әԝ сәр әʹрде бу, тʹӧ щара нәдьфькьри кӧ әԝ һежайи әʹмьрәки рʹьһʹәт, һәбуке у маләкә баш ә (Луԛа 9:58). Иса йәки мьлук бу у жь һʹале хԝә рʹази бу. Әԝи мәрʹа мәсәләкә беԛьсур һиштийә (Йуһʹәнна 13:15).

11. Мьлукти ча али Денис дькә жь һʹале хԝә рʹази бә?

¹¹ Бьре мә Денис, йе кӧ ль Нидерландайе дьжи, хирәт дькә кӧ чʹәʹв бьдә мьлуктийа Иса, ле әв йәк щарна һеса нинә. Әԝ дьбежә: «Мәсәлә гава кәсәки дьнрʹа щабдари те дайине, йа кӧ мьн дьхԝәст бьстанда, щарна ԛӧрʹәти дькʹәвә дьле мьн йан жи әз дьлтәнг дьбьм. Дәрәщед ӧсада әз тʹемед дәрһәԛа мьлуктийе лекʹолин дькьм. Програма JW Library^®-да, мьн һьнә рʹезед дәрһәԛа мьлуктийе кʹьфш кьрьнә, ԝәки бькарьбьм зу бьвиньм у диса бьхуньм. Ӧса жи мьн һьнә готаред дәрһәԛа мьлуктийе тʹела хԝәда данә кʹьшандьне у гәләк щар гӧһ дьдьмә ԝан.a Мьн фәʹм кьр, ԝәки бона һʹәму шьхӧлед кӧ әм дькьн, нә кӧ әм һежайи пʹайа нә, ле Йаһоԝа Хԝәде. Һәр йәк жь мә пеканина ԛьрара Йаһоԝада роләкә бьчʹук дьлизә». Һәрге тӧ дьлтәнг дьби кӧ фьлан щабдари тәрʹа нәһатийә дайине, сәр хԝә бьхәбьтә ԝәки дьһа зедә мьлук би. Әв йәк ԝе достийа тә тʹәви Йаһоԝа дьһа ԛәԝи кә у али тә бькә жь һʹале хԝә рʹази би (Аԛуб 4:6, 8).

ДӘРҺӘԚА ГӦМАНА ХԜӘ КʹУР БЬФЬКЬРӘ

12. Гӧмана мә чь йә у ча әв али мә дькә? (Ишайа 65:21-25)

¹² Сәва кӧ әм дьһа зедә жь һʹале хԝә рʹази бьн, ԝәрә әм сәр гӧмана хԝәйә дәрһәԛа ахьрийа хԝәш, кʹур бьфькьрьн. Кʹьтеба Ишайада, Йаһоԝа дьбежә ԝәки әԝ рʹьнд фәʹм дькә кӧ әʹмьре мә чьԛас чәтьн ә у соз дьдә кӧ ԝе һʹәму проблемед мә кʹӧта кә (Бьхунә Ишайа 65:21-25). Әме малед хԝәш у рʹьһʹәтда бьжин. Әме хәбатәкә һʹәԝас бькьн у хԝарьна хԝәш у керһати бьхԝьн. Ԝи ԝәʹдәйи, әме ида нәтьрсьн кӧ тьштәки хьраб бе сәре мә йан сәре зарʹед мә (Ишайа 32:17, 18; Һәзәԛел 34:25). Әм дькарьн сәд сәләфи баԝәр бьн ԝәки рʹожед гәләк хԝәш пешийа мә нә.

13. Илаһи кʹәнге лазьм ә кӧ әм дина хԝә бьдьнә гӧмана хԝә?

¹³ Иро гәләк фәрз ә кӧ әм дина хԝә бьдьнә гӧмана хԝә. Гәло чьма? Чьмки әм рʹожед пашьнда дьжин у проблемед һәр кәси һәнә (2 Тимотʹейо 3:1). Сәва кӧ әм бькарьбьн тәйах кьн, Йаһоԝа һәр рʹож рʹебәри, ԛәԝат у аликʹарийе дьдә мә (Зәбур 145:14). Ӧса жи, рʹожед чәтьнда гӧмана мә дькарә ԛәԝате бьдә мә. Дьԛәԝьмә тәрʹа чәтьн ә әʹбура малбәта хԝә бьки. Гәло әв йәк те һʹәсабе кӧ тӧйе тʹьме ви һʹалида би? На! Йаһоԝа соз дайә кӧ Щьнәтеда, әԝе һәр тьшти, чь кӧ тәрʹа лазьм ә, бьдә тә (Зәбур 9:18; 72:12-14). Дьԛәԝьмә нәхԝәшикә ӧса кӧ ԛәнщ набә, депресийа йан нәхԝәшикә дьн бал тә һәйә. Гәло бь рʹасти әв йәк баре тә йә, у ԝе тʹӧ щара дәрбаз нәбә? На! Дьнйа тʹәзәда, нәхԝәши у мьрьн ԝе тʹӧнә бьн (Әʹйанти 21:3, 4). Әв гӧман иро али мә дькә, ԝәки әм жь һʹале хԝә рʹази бьн у бона ԝан тьшта чь кӧ те сәре мә, дьлтәнг нәбьн у һерс нәкʹәвьн. Гава әм рʹасти нәһәԛийе тен, йан гава мәрьве мәйи һʹәзкьри дьмьрә, йан гава тьштәки хьраб те сәре мә, әм диса жи дькарьн жь һʹале хԝә рʹази бьн. Гәло чьма? Чьмки тәнгасийед мә чьԛас гьран бьн жи, әм заньн кӧ әԝе тʹәне «ԝәʹдәки кьн» бькʹьшиньн. Ԝәхтәкә незикда, дьнйа тʹәзәда әме бь тʹәмами жь ԝан кӧл-дәрда хьлаз бьн (2 Корьнтʹи 4:17, 18).

14. Әм ча дькарьн гӧмана хԝә дьһа ԛәԝи кьн?

¹⁴ Гӧман гәләк фәрз ә бона ве йәке, кӧ әм жь һʹале хԝә рʹази бьн, ле гәло ча әм дькарьн гӧмана хԝә дьһа ԛәԝи кьн? Чаԝа кӧ һьнә мәрьв гәрәке бәрчʹәʹвка бьдьнә хәбате сәва кӧ тьштед дур бь зәлали бьвиньн, дьԛәԝьмә лазьм ә кӧ әм тьштәки бькьн ԝәки гӧмана хԝә дьһа ԛәԝи кьн, у Щьнәта кӧ пешийа мә йә, дьһа зәлал бьвиньн. Гава әм бона һʹале хԝәйи материйали бәр хԝә дькʹәвьн, ԝәрә әм бьдьнә бәр чʹәʹве хԝә кӧ әʹмьре бе пʹәрә, бе дәйн у бе кʹәсибийе ԝе чь щурʹәйи бә. Һәрге әм хәмгин дьбьн кӧ мә щабдарик щьватеда һе нәстандийә, ԝәрә әм биньн бира хԝә кӧ гава әм бьгьһижьнә беԛьсуртийе у бь һʹәзара сала Йаһоԝарʹа хьзмәт кьн, хәмед ӧса ԝе мәрʹа чьԛас бадиһәԝа бенә кʹьфше (1 Тимотʹейо 6:19). Серида дьбәкә мәрʹа чәтьн бә дәрһәԛа ахьрийе кʹур бьфькьрьн у бона иро хәм нәкьн, ле ԝәхт шунда ԝе мәрʹа дьһа һеса бә дина хԝә бьдьнә созед Йаһоԝа.

15. Тӧ жь гьлийед Кристайе чь һин дьби?

¹⁵ Дина хԝә бьдьнә мәсәла хушка мә, йа кӧ жь гӧмана хԝә ԛәԝате дьстинә. Наве ԝе Криста йә, әԝ кʹӧлфәта Денис ә, бәʹса кʹижани кӧ мә жоре кьр. Әԝ дьбежә: «Дәст нәхԝәшийа хԝәйә гьран, әз мәщбур ьм кӧ кʹӧрсийа сәԛәта бьдьмә хәбате у һʹәчʹи зәʹф нав ньвинада бьм. Әз һәр рʹож еше дькʹьшиньм. Дохдьр готийә кӧ гӧман тʹӧнә йә. Ле мьн хԝәрʹа гот: ‹Әԝ сәр ахьрийе ӧса наньһерʹә чаԝа әз›. Әз дина хԝә дьдьмә гӧмана хԝә, ләма жи дьле мьнда әʹдьлайи йә. Ве дьнеда чьԛас чәтьнайед мьн һәбьн жи, әзе жь әʹмьре дьнйа тʹәзәда шабунәкә гәләк мәзьн бьстиньм!»

ӘԜЕД КӦ ЙАҺОԜА ДЬГӘРʹЬН ԜЕ КЕМАСИЙА ТʹӦ ԚӘНЩИЙЕ НӘВИНЬН

16. Даԝьд Пʹадша чьма гот, ԝәки «әԝед кӧ Йаһоԝа дьгәрʹьн ԝе кемасийа тʹӧ ԛәнщийе нәвиньн»?

¹⁶ Хьзмәткʹаре Йаһоԝа чьԛас жь һʹале хԝә рʹази бә жи, йәкә әԝ дькарә рʹасти тәнгасийа бе. Мәсәлә, Даԝьд Пʹадша һәри кем се зарʹед хԝә ӧнда кьр. Бӧхдан авитьнә ԝи, нәмамийа ԝи кьрьн у бь сала әԝ мәщбур бу бьрʹәвә хԝә вәшерә. Диса жи, гава әԝ рʹасти чәтьнайикә гьран һат, әԝи дәрһәԛа Йаһоԝа гот, ԝәки «әԝед кӧ Йаһоԝа дьгәрʹьн ԝе кемасийа тʹӧ ԛәнщийе нәвиньн» (Зәбур 34:9, 10, ДТʹ). Гәло әԝи чьрʹа ӧса гот? Рʹаст ә әм Йаһоԝарʹа хьзмәт дькьн, ле әм һивийе ниньн кӧ әʹмьре мә ԝе сьвьк у рʹьһʹәт бә. Ле чьԛас кӧл-дәрдед мә һәбьн жи, әм заньн ԝәки Йаһоԝа ԝе мә нәһелә бейи ԝан тьшта, чьда әм бь рʹасти һʹәԝщә нә (Зәбур 145:16). Әм дькарьн баԝәр бьн кӧ һʹәму тәнгасийед мәда, Йаһоԝа ԝе бе һәԝара мә. Ләма жи әм дькарьн жь һʹале хԝә рʹази бьн.

17. Тӧ чьма дьхԝази һин би кӧ бьби йәки шекьрдар?

¹⁷ Йаһоԝа дьхԝазә ԝәки тӧ жь һʹале хԝә рʹази би (Зәбур 131:1, 2). Ләма жи ԛәԝате бьдә хәбате, кӧ бьби йәки шекьрдар. Һәрге тӧ шекьрдар би, ньһерʹандьна рʹаст хԝәй ки, мьлук бьмини у дина хԝә бьди гӧмана хԝә, тӧйе бькарьби мина Паԝлосе шанди бежи: «Әз һин бумә кӧ һʹәму һʹалида бь тьштед кӧ дәсте мьнда һәнә рʹази бьм» (Филипи 4:11).