Пьрсед Хԝәндәвана

Ньвискʹаре Мәтʹәлок 30:18, 19 гот ԝәки «рʹийа мерайә бәрбь ԛиза» фәʹм накә. Гәло әв йәк чь те һʹәсабе?

Гәләк мәрьв у һьнә зандар жи мәʹнийа ван рʹеза фәʹм накьн. Бь тʹәмами ван рʹезада ӧса ньвиси йә: «Се тьшт һәнә кӧ әз те һьлнайем у чар тьшт кӧ әз ԝан фәʹм накьм: Рʹийа тәйрайә һәԝеда, рʹийа мәʹрайә ԛәйада, рʹийа гәмийайә нава бәʹрада у рʹийа мерайә бәрбь ԛиза» (Мәтʹәлок 30:18, 19).

Бәре әм дьфькьрин кӧ әв гьли-готьн, «рʹийа мерайә бәрбь ԛиза», тьштәкә негатив те һʹәсабе, чьмки рʹезед пешийа ве бәʹса тьштед негатив дькьн, йед кӧ тʹӧ щара тʹер набьн у навежьн «бәс ә» (Мәтʹәлок 30:15, 16). Ӧса жи, рʹеза 20 бәʹса жьна ԛав дькә, йа кӧ дьбежә: «Мьн тʹӧ хьраби нәкьрийә». Ләма жи әм дьфькьрин, кӧ чаԝа рʹийа тәйр әʹзманада, рʹийа мәʹр ԛәйада у рʹийа гәми бәʹреда пәй хԝә тьштәки наһелә, һәма ӧса жи тʹӧ кәс ԝе нькарьбә тедәрхә кӧ мерәки дьзикава чь кьрьбу. Сәр һʹиме ве фәʹмкьрьне, әм дьфькьрин кӧ готьна «рʹийа мерайә бәрбь ԛиза» бәʹса хортәки дькә, кӧ кәчʹькәке дьхапинә, ԝәки сәре хԝә перʹа дайнә.

Ле ньһа әм фәʹм дькьн кӧ рʹез бәʹса тьштәки хьраб накә. Ньвискʹар тʹәне бәʹса се тьшта дькьр, йед кӧ бәр чʹәʹве ԝи әʹщеб бун.

Гьлийед Ибрани, йед кӧ ве рʹезеда тенә хәбьтандьне, бь щурʹе позитив тенә фәʹмкьрьне. Ль гора канике, гьлийед Ибрани, йед кӧ Мәтʹәлок 30:18-да ча «фәʹм накьм» һатьнә ԝәлгәрʹандьне «тенә һʹәсабе тьштәки кӧ кәсәк . . . әʹщеб һʹәсаб дькә, жь бо чь жи әԝ һʹәйр-һʹӧжмәкʹар дьминә» (Theological Lexicon of the Old Testament).

Ӧса жи, професорәк жь Заньнгәһа Һарварде, Краԝфорд Һ. Той, гот ԝәки ль гора ньһерʹандьна ԝи, әв рʹез бәʹса тьштәки негатив накә, ле тʹәне бәʹса тьштед кӧ бәр чʹәʹве ньвискʹар әʹщеб ьн, дькә.

Ләма жи, әм фәʹм дькьн кӧ Мәтʹәлок 30:18, 19 бәʹса тьштед әʹщеб дькә, йед кӧ һәла һе жь фәʹмкьрьна мә дәр ә, у әм жь ԝан тьшта һʹӧжмәкʹар дьминьн. Мина ньвискʹаре Кʹьтеба Пироз, әм жи әʹщебмайи дьминьн кӧ тәйр ча дьфьрʹьн, мәʹр ча сәр ԛәйа дьмәшьн, гәмийед гьран ча бәʹреда дьчьн у ԛиз у хорт ча һәвдӧ һʹәз дькьн у тʹәвайи бәхтәԝар дьжин.