Дӧ Әндәмед Кʹома Рʹебәрийейә Тʹәзә

САЛА 2024, 5 Щотмәһе, сәр щьвата һәрсали һатә әʹламкьрьне кӧ бьред мә Щоди Щедел у Щеикоб Рамф һатьнә кʹьфшкьрьне ча әндәмед Кʹома Рʹебәрийе, йа Шәʹдед Йаһоԝа. Һәрдӧ бьра гәләк сал бь амьни Йаһоԝарʹа хьзмәт дькьн.

Бьре Щоди ль Мисурийе (Америка) һатә буйине, у де-баве ԝи Шәʹдед Йаһоԝа бун. Һәрема ԝанда мьзгинван һьндьк бун, ләма жи әԝи гәләк хушк-бьред жь щурʹә-щурʹә мьләта нас кьрьн, йед кӧ һатьнә ԝедәре ԝәки мьзгинийе тʹәви ԝан бәла кьн. Һʹәзкьрьн у йәктийа ԝан сәр дьле ԝи һʹӧкӧм кьр. Сала 1983, 15 Щотмәһе, гава әԝ һе щаһьл бу, әԝ һатә ньхӧмандьне. Әԝи шьхӧле хьзмәтийе гәләк һʹәз дькьр, у мәһа Илоне, сала 1989, паши хьлазкьрьна мәкʹтәбе, әԝ бу пешәнге һәртʹьм.

Гава бьре Щоди һе щаһьл бу, де-баве ԝи әԝ у хушка ԝи чәнд щара бьрьнә Бәйтʹәле сәр екскурсийайе. Бь сайа ван сәрледана, зарʹед ԝан хԝәрʹа нет данин кӧ Бәйтʹәледа хьзмәт кьн, у һәрдӧ жи гьһиштьнә ве нете. Бьре Щоди мәһа Илоне, сала 1990-да бу Бәйтʹәлван. Пешийе әԝи Идара Тʹәмьзкьрьнеда у паше жи ль Идара Медисини хьзмәт дькьр.

Ԝан сала һьнә щьватед сәр зьмане Испани мәзьн дьбун у һʹәԝщәтийа бьра һәбу. Ләма жи бьре Щоди чу сәр щьватәкә ԝан у дәстпекьр зьмане Испани һин бә. Һьнә ԝәхт шунда әԝи хушкәкә бь наве Дамарис нас кьр, йа кӧ ԝе һәремеда ча пешәнг хьзмәт дькьр. Паше әԝана зәԝьщин, у хушка Дамарис жи бу Бәйтʹәлван.

Сала 2005-да, лазьм бу кӧ бьре Щоди у жьна ԝи жь Бәйтʹәле һәрʹьн кӧ де-баве хԝә бьбьнә хԝәйи. Ԝе дәме ԝана ча пешәнгед һәртʹьм хьзмәт кьр. Бьре Щоди чәнд щара Мәкʹтәба бона Пешәнга дәрбаз кьр. Ӧса жи әԝ ль Комитейа Һәвкʹарийа Нәхԝәшхана у Комитейа Авакьрьне йа Һәремида хьзмәт кьр.

Сала 2013-да тʹәшкиләте ԝана бона проекта авакьрьна Ԝорԝике диса тʹәглифи Бәйтʹәле кьрьн. Жь ԝе дәме, ԝана Патерсон у Ԝолкиледа жи хьзмәт кьрийә. Бьре Щоди ль Идара Шьхӧле Авакьрьне у Идара Информасийа Нәхԝәшханада кʹар кьрийә. Мәһа Адаре, сала 2023, әԝ ча Аликʹарчийе Комитейа Хьзмәтийе һатә кʹьфшкьрьне. Дәрһәԛа кʹьфшкьрьнед хԝәйә бәре әԝ ӧса дьбежә: «Гава әм кʹьфшкьрьнед тʹәзә дьстиньн, әм щарна дьтьрсьн. Дәрәщед ӧсада, әм гәрәке бь тʹәмами итʹбарийа хԝә Йаһоԝа биньн, чьмки әԝ һәр тьшти дькарә бинә сери».

Бьре Щеикоб ль Калифорнйайе (Америка) һатә буйине. Гава әԝ зарʹ бу, дийа ԝи нәактиф бу, ле диса жи әԝе хирәт дькьр кӧ рʹастийед Кʹьтеба Пироз бькә дьле ԝи. Ӧса жи әԝ һәр сал дьчу бал пирька хԝә, йа кӧ хушкәкә амьн бу. Пирька ԝи дина ԝи дькʹьшандә сәр рʹастийе, у гава әԝ 13 сали бу, әԝи хԝәст Кʹьтеба Пироз һин бә. Сала 1992, 27 Илоне, гава әԝ һе щаһьл бу, әԝ һатә ньхӧмандьне. Ԝәʹдә шунда, дийа ԝи диса дәстпекьр Йаһоԝарʹа хьзмәт кә, у һʹәму нәфәред мала ԝи рʹӧһʹанида пешда чун у һатьнә ньхӧмандьне.

Гава бьре Щеикоб щаһьл бу, әԝи дьдит ԝәки кәсед кӧ ча пешәнг хьзмәт дькьн, чьԛас бәхтәԝар ьн. Ләма жи сала 1995, мәһа Илонеда, паши кӧ әԝи мәкʹтәб хьлаз кьр, әԝ бу пешәнг. Сала 2000-да, әԝ бона бәлакьрьна мьзгинийе чу Әкԝадоре. Ԝедәре әԝ тʹәви пешәнгәкә жь Канадайе, бь наве Инга бу нас, у паше әԝана зәԝьщин. Паши дәʹԝате, ԝана дәстпекьр бажарәки бьчʹукда ль Әкԝадоре хьзмәт кьн. Ԝи чахи ԝедәре мьзгинван һьндьк бун, ле иро щьватәкә ԛәԝи һәйә.

Ԝәхт шунда, бьре Щеикоб у хушка Инга ча пешәнгед мәхсус һатьнә кʹьфшкьрьне, у паше бьре Щеикоб ча бәрпьрсийаре мьһале һатә кʹьфшкьрьне. Сала 2011-да, ԝана тʹәглифи Мәкʹтәба Гиләде кʹома 132 кьрьн. Паши хьлазкьрьна мәкʹтәбе, ԝана пенщ ԝәлатада щурʹә-щурʹә хьзмәтийада кʹар дькьрьн, мәсәлә ча Бәйтʹәлван, мисйонер у ча бәрпьрсийаре мьһале. Ӧса жи бьре Щеикоб дәрсдаре Мәкʹтәба бона Мьзгинванед Пʹадшатийе бу.

Жь бо пандемийа COVID-19, бьре Щеикоб у хушка Инга вәгәрʹийанә Америкайе. Тʹәшкиләте ԝана тʹәглифи Бәйтʹәла Ԝолкиле кьрьн, у ԝедәре бьре Щеикоб Идара Хьзмәтийеда һатә һинкьрьне. Ԝәхт шунда, ԝана диса шандьнә филиала Әкԝадоре. Ԝедәре бьре Щеикоб ча әндәме Комитейа филиале хьзмәт дькьр. Сала 2023-да, ԝана шандьнә Ԝорԝике. Сала 2024, мәһа Чьләйе, бьре Щеикоб ча аликʹарчийе Комитейа Хьзмәтийе һатә кʹьфшкьрьне. Бьре мә дәрһәԛа хьзмәтийа хԝә ӧса дьбежә: «Кʹьфшкьрьна мә ԛимәт ә нә жь бо ве йәке кӧ әм кʹидәре хьзмәт дькьн, ле мәрьвед тʹәви кʹижана әм һәвкʹарийе дькьн, гәләк ԛимәт ьн».

Әм бь рʹасти жи шьхӧлед ԝан бьред хирәт гәләки дьшекьриньн! (Филипи 2:29)