Гәло Һун ԝәкә Мәсиһ Гьһишти нә?

1, 2. Нета һʹәму Мәсиһийа чь йә? Мәсәле бинә.

МӘРЬВ дина хԝә дьдә сәр чь, чахе дькʹанеда емиш дьжберә сәва кӧ бькʹьрʹә? Һьлбәт әԝ ԝе дина хԝә нәдә сәр мәзьнбуне йан баһе ԝе. Дәԝсе, әԝ дьжберә ԝан емиша, кʹижан кӧ бина ԝан хԝәш ә, сьламәт ә, тʹәзә йә у бона хԝарьне һазьр ә, демәк гьһишти йә.

² Чахе мәрьв дәрһәԛа Йаһоԝа педьһʹәсә у сафи дькә хԝә бьньхӧминә, паши ве йәке һәләԛәтийа ԝи тʹәви Хԝәде һе зедә дьбә. Нета ԝи әԝ ә кӧ бьбә Мәсиһийе гьһишти. Гьһиштибун найе һʹәсабе чахе мәрьв әʹмьрда мәзьн ә. Гьһиштибун әԝ ә, кӧ мәрьв рʹӧһʹанида мәзьн ә, демәк һәләԛәтийа ԝи тʹәви Йаһоԝа незик ә. Паԝлосе шанди дьхԝаст кӧ Мәсиһийед дь Әфәседа гьһишти бьн. Әԝи әԝана һелан кьрьн кӧ баԝәрийеда йәк бьн у бәрдәԝам кьн пебьһʹәсьн дәрһәԛа Иса, сәва кӧ «бьбьнә мәрьвед гьһишти, хут ԝәкә бәжьн-бала Мәсиһ» (Әфәси 4:13).

3. Әм ча дькарьн щьвата Әфәси бәрамбәр кьн тʹәви щьмәʹта Йаһоԝайә иро?

³ Чахе Паԝлос щьвата Әфәсирʹа нәʹмә ньвиси, ида чәнд сал бу кӧ әԝ щьват һәбу. Дь ве щьватеда гәләк Мәсиһи щерʹьбанди бун, демәк гьһишти, ле һәбун мәрьвед ӧса жи, кʹижанарʹа лазьм бу һәләԛәтийа хԝә тʹәви Йаһоԝа һе ԛәԝи кьн. Иро жи ӧса нә. Гәләк хушк-бьред мә гәләк ԝәхт ә кӧ Йаһоԝарʹа ԛӧльх дькьн у бунә Мәсиһийед гьһишти. Ле ӧса жи щьватеда һәнә йед нәгьһишти. Мәсәлә, һәр сал бь һʹәзара мәрьв тенә ньхӧмандьне, ләма һьнәкарʹа һе лазьм ә кӧ бьгьһижьн (Колоси 2:6, 7).

МӘСИҺИ ЧАԜА ДЬКАРӘ РʹӦҺʹАНИДА МӘЗЬН БӘ?

4, 5. Мәсиһийе гьһишти чаԝа дькарьн жь һәв щӧдә бьн, ле әԝана чьда йәк ьн? (Бьньһерʹә шькьле әʹԝльн.)

⁴ Чахе тӧ дькʹанеда емише гьһишти дьжбери, тӧ дьвини кӧ әԝана ԝәкә һәв ниньн. Ле те кʹьфше кӧ тʹәмам гьһишти нә. Ӧса жи Мәсиһийед гьһишти. Әԝана ԝәкә һәв ниньн. Әԝана жь ԝәлат у мьләтед щурʹә-щурʹә нә. Әԝана әʹмьрда жи щурʹәщурʹә нә. Ле йәкә хәйсәт-һʹӧнӧред һʹәму Мәсиһийед гьһишти йәк ьн, чь кӧ дьдә кʹьфше кӧ әԝана гьһишти нә. Ле кʹижан ьн һьнәк жь ԝан һʹӧнӧра?

⁵ Мәсиһийе гьһишти чʹәʹв дьдә Иса у «пʹегәһа» ԝида дьчә (1 Пәтрус 2:21). Иса гот гәләк фәрз ә кӧ мәрьв Йаһоԝа бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә һʹьз бькә, у ӧса жи һәвале хԝә ԝәкә хԝә һʹьз бькә (Мәтта 22:37-39). Мәсиһийе гьһишти гәләк дьхәбьтә сәва кӧ әԝе тʹәмийе бьԛәдинә. Әԝ бь щурʹе жийина хԝә избат дькә, кӧ һәләԛәтийа ԝи тʹәви Йаһоԝа у һʹьзкьрьна ԝи һьндава мәрьва лапә фәрз ә бона ԝи.

6, 7. а) Мәсиһийед гьһишти диса һьнә чь һʹӧнӧр әʹйан дькьн? б) Әм чь гәрәке жь хԝә бьпьрсьн?

⁶ Һʹьзкьрьн әԝ тʹәне йәк ә жь гәләк һʹӧнӧра, кʹижан кӧ Мәсиһийе гьһишти дьдә кʹьфше (Галати 5:22, 23). Әԝ ӧса жи мьлукти, сәбьркьрьн, у хԝәгьртьне дьдә кʹьфше. Әԝ һʹӧнӧр али Мәсиһийе гьһишти дькьн, кӧ дәрәщед чәтьнда тәйах кә у бәрхԝәнәкʹәвә, ӧса жи гӧмана хԝә ӧнда накә чахе жь бо тьштәки дьлтәнг дьбә. Мәсиһийе гьһишти дь һинбуна хԝәйә шәхсида принсипед Кʹьтеба Пироз дьгәрʹә, кʹижан кӧ али ԝи дькьн бьзаньбә чь йә рʹаст у чь йә нәрʹаст. Паше чахе исафа ԝи бь Кʹьтеба Пироз һинкьри бә, әԝе бькарьбә сафикьрьна бь билани бькә. Мәсиһийе гьһишти шкәсти йә, у ләма әԝ баԝәр дькә кӧ рʹебәри у принсипед Йаһоԝа тʹьме һе баш ьн нә кӧ йед ԝи.a (Бьньһерʹә спартьн.) Әԝ мьзгинийа хере бь хирәт даннасин дькә у чьԛас дькарә аликʹарийе дьдә сәва кӧ щьват йәктийеда бьминә.

⁷ Фьрԛи тʹӧнә әм чьԛас ԝәхт Йаһоԝарʹа ԛӧльх дькьн, һәр кәс жь мә дькарә пьрсе бьдә хԝә: «Гәло әз дькарьм тьштәки бьгӧһезьм сәва кӧ һе рʹьнд чʹәʹв бьдьмә Иса? Гәло әз чьда дькарьм пешда һәрʹьм?»

«ХԜАРЬНА ГЬРАН БОНА МӘРЬВЕД ГЬҺИШТИ ЙӘ»

8. Иса Кʹьтеба Пироз ча заньбу у ча фәʹм дькьр?

⁸ Иса Ньвисаред Пироз рʹьнд заньбу у фәʹм дькьр. Әԝ һәла һе 12 сали бу Ньвисаре Пироз дьда хәбате, чахе тʹәви дәрсдара дь пʹарьстгәһеда хәбәрдьда. «Һʹәмуйед кӧ хәбәрдана ԝи дьбьһистьн, сәр занәбун у щабед ԝи зәндәгьрти дьман» (Луԛа 2:46, 47). Паше, чахе әԝи даннасин дькьр, әԝи Хәбәра Хԝәде рʹьнд дьда хәбате, сәва кӧ дьжмьнед хԝә бьдә кәрʹкьрьне (Мәтта 22:41-46).

9. а) Кʹижан бәрнама һинбуне һәйә щәм Мәсиһийе гьһишти? б) Әм чьрʹа Кʹьтеба Пироз һин дьбьн?

⁹ Әԝ мәрьве кӧ дьхԝазә бьбә Мәсиһийе гьһишти, чʹәʹв дьдә мәсәла Иса у дьхԝазә Кʹьтеба Пироз чьԛас дькарә рʹьнд фәʹм кә. Әԝ тʹьме Кʹьтеба Пирозда рʹастийед кʹур дьгәрʹә, чьмки занә кӧ әԝ «хԝарьна гьран бона мәрьвед гьһишти йә» (Ибрани 5:14). Мәсиһийе гьһишти дьхԝазә кӧ жь Кʹьтеба Пироз занәбуна рʹаст бьстинә (Әфәси 4:13). Ләма пьрса бьдә хԝә: «Әз һәр рʹож Кʹьтеба Пироз дьхуньм? Щәм мьн һәйә бәрнамә бона һинбуна шәхси? Әз һәр һʹәфти ԛӧльхкьрьна тʹәви малбәте дәрбаз дькьм?» Чахе тӧ Кʹьтеба Пироз леколин дьки, принсипед ӧса бьгәрʹә, кʹижан кӧ ԝе али тә бькьн пебьһʹәси кӧ Йаһоԝа ча дьфькьрә у чь тʹәхмин дькә. Паше әԝан принсипа бьдә хәбате, чахе сафикьрьна дьки. Әԝ йәк ԝе али тә бькә кӧ тʹәви Йаһоԝа һе незик би.

10. Мәсиһийе гьһишти ча дьньһерʹә сәр ширәт у принсипед Хԝәде?

¹⁰ Мәсиһийе гьһишти, нә кӧ тʹәне гәрәке бьзаньбә Кʹьтеба Пироз чь дьбежә. Әԝ гәрәке һʹьз бькә ширәт у принсипед Хԝәде. Әԝ әԝе һʹьзкьрьне дьдә кʹьфше чахе ԛьрара Йаһоԝа дьԛәдинә, нә кӧ ча дьхԝазә ӧса дькә. Әԝ һәла һе әʹмьре хԝә жи, фькьр, у шьхӧлед хԝә жи дьгӧһезә. Мәсәлә, әԝ чʹәʹв дьдә Иса у дьбә мәрьве ну, кʹижан кӧ «бь рʹастийе у һʹәлалийе бе ԛәлпи хӧльԛи йә». (Бьхунә Әфәси 4:22-24.) Гәләк фәрз ә кӧ мәрьв бира хԝәда хԝәй кә, кӧ Хԝәде рʹӧһʹе хԝәйи пироз дайә хәбате, бона рʹебәрийе бьдә ньвискʹаред Кʹьтеба Пироз. Демәк чахе Мәсиһи Кʹьтеба Пироз леколин дькә, рʹӧһʹе Хԝәдейи пироз али ԝи дькә, кӧ занәбуна хԝә һе зедә кә, һʹьзкьрьнеда һе мәзьн бә, у һәләԛәтийа хԝә тʹәви Йаһоԝа һе ԛәԝи кә.

ЙӘКТИЙЕ ХԜӘЙ КЬН

11. Иса чахе сәр әʹрде бу әԝи чь сәр хԝә тʹәхмин дькьр?

¹¹ Иса чахе сәр әʹрде ча мәрьве ԛәданди бу, дор бәре ԝи мәрьвед нәԛәданди бун. Де-баве ԝи у хушк-бьред ԝи, гьшк жи нәԛәданди бун. Һәла һе шагьртед Исайи незик жи һʹӧнӧред ӧса данә кʹьфше чаԝа бабахи у хԝәһʹьзи. Мәсәлә, шәв пешийа мьрьна ԝи, шагьртед ԝи дькʹәтьнә дәʹԝе кӧ «нав ԝанда кʹижан ԝе йе һәри мәзьн бе һʹәсабе» (Луԛа 22:24). Рʹаст ә әԝана нәрʹаст дьфькьрин жь бо нәԛәдандибуна хԝә, ле Иса заньбу кӧ пәйчуйед ԝи зутьрәке ԝе бьбьнә Мәсиһийед гьһишти у щьвате саз кьн, кʹижан кӧ ԝе йәктийеда бә. Ԝе шәве, Иса бона ԝан дӧа кьр, сәва кӧ әԝана йәктийеда бьн. Әԝи жь Баве хԝә һиви кьр кӧ әԝана бьбьнә йәк, у гот: «Баво, чаԝа тӧ нава мьнда йи у әз нава тәда мә, әм йәк ьн». Әԝи зедә кьр: «Ԝәки әԝ бьбьн йәк, чаԝа әз у тӧ йәк ьн» (Йуһʹәнна 17:21, 22).

12, 13. а) Әм чаԝа Мәсиһи, нета мә чь йә? б) Бьрак ча һин бу кӧ тʹьваԛе хԝәй кә?

¹² Мәсиһийе гьһишти тʹьфаԛе дькә нава щьвате. (Бьхунә Әфәси 4:1-6, 15, 16.) Чаԝа Мәсиһи, нета мә әԝ ә «һәвва гьредайи» бьн, демәк тʹәви һәв йәктийеда шьхӧлкʹарийе бькьн. Сәва кӧ Мәсиһи бь ви щурʹәйи йәктийеда бә, әԝ гәрәке мьлук бә. Чахе Мәсиһийе гьһишти рʹасти нәԛәдандибуна кәсәки дьн те, әԝ һʹәта ԝи һәйә дьхәбьтә сәва кӧ дь щьватеда йәктийе хԝәй кә. Ләма жи пьрсе бьдә хԝә: «Әз ча хԝә дьдьмә кʹьфше чахе хушк йан бьра шашийа дькьн? Әз чь тʹәхмин дькьм чахе кәсәк дьле мьн дешинә? Әз тʹәви ԝи мәрьви ида хәбәрнадьм? Йан әз дьхәбьтьм кӧ һәләԛәтийа хԝә тʹәви ԝи мәрьви баш кьм?» Мәсиһийе гьһишти дьхԝазә кӧ проблема сафи кә, дәԝса кӧ бона мәрьвед дьн бьбә проблем.

¹³ Ԝәрә әм бьньһерʹьн мәсәла Уԝә. Бәре, әԝ тʹьме дьлтәнг дьбу жь бо шашийед хушк у бьра, кӧ жь нәԛәдандибуне дькьрьн. Паше әԝи сафи кьр, кӧ бь Кʹьтеба Пироз у кʹьтеба «Фәʹмкьрьна Ньвисаре», жийина Даԝьд леколин бькә. Ле чьрʹа хут Даԝьд? Чьмки Даԝьд жи дьлтәнг дьбу, чахе проблемед ԝи тʹәви һьнә ԛӧльхкʹаред Хԝәде һәбу. Мәсәлә, Пʹадша Шаԝул дьхԝәст Даԝьд бькӧжә, һьнә мәрьва дьхԝәстьн ԝи бьдьнә бәр кәвьра, у һәла һе жьна ԝи жи ԛәрфе хԝә ԝи дькьр (1 Самуйел 19:9-11; 30:1-6; 2 Самуйел 6:14-22). Мәрьва һьндава Даԝьд чь жи дькьрьн, ле Даԝьд йәкә Йаһоԝа һʹьз дькьр у итʹбарийа хԝә ԝи дьани. Һьн жи әԝи рʹәʹмти нишан дькьр. Уԝә фәʹм кьр кӧ ԝирʹа жи лазьм ә ӧса бькә, чаԝа Даԝьд. Бь сайа леколинкьрьна Кʹьтеба Пироз, әԝ пеһʹәсийа кӧ ԝирʹа лазьм ә ньһерʹандьна хԝә һьндава нәԛәдандибуна хушк у бьра бьгӧһезә. Ԝирʹа лазьм бу кӧ бира хԝәда хԝәй нәкә шашийед ԝан, у йәктийе хԝәй кә щьватеда. Гәло әԝ йәк хԝәстьна тә йә жи?

ХԜӘРʹА ҺӘВАЛА ЖЬ ԜАН БЬЖБЕРӘ ЙЕД КӦ ԚЬРАРА ХԜӘДЕ ДЬԚӘДИНЬН

14. Иса ча хԝәрʹа һәвал дьжбартьн?

¹⁴ Иса Мәсиһ һьндава һʹәму мәрьва баш бу. Жьн у мер, щаһьл у мәзьн, у һәла һе зарʹа жи, тʹәви ԝи хԝә рʹьнд тʹәхмин дькьрьн. Ле әԝи фәсал хԝәрʹа һәвалед незик дьжбартьн. Әԝи готә шандийед хԝә: «Һун достед мьн ьн, һәгәр һун ԝан тʹәмийед кӧ әз дьдьмә ԝә хԝәй дькьн» (Йуһʹәнна 15:14). Иса хԝәрʹа һәвалед ӧса дьжбарт, йед кӧ бь амьни пәй ԝи дьчун у ӧса жи Йаһоԝа һʹьз дькьрьн у ԝирʹа ԛӧльх дькьрьн. Гәло тӧ жи хԝәрʹа һәвалед ӧса дьжбери, йед кӧ Йаһоԝа бь тʹәмамийа дьле хԝә һʹьз дькьн? Чьрʹа әԝ йәк фәрз ә?

15. Щаһьл жь һәвалтийа тʹәви Мәсиһийед гьһишти, чь кʹаре дькарьн бьстиньн?

¹⁵ Емиш һʹәчʹи зәʹф ль ԝе дәре дьгьһижә, кʹидәре кӧ шәԝԛа тәʹве йә у гәрм ә. Ӧса жи һʹьзкьрьна хушк у бьред мә дькарә али тә бькә кӧ рʹӧһʹанида бьгьһижи. Һәрге тӧ щаһьл и, у дьфькьри кӧ әʹмьре хԝә ча дәрбаз ки, ԝе бь билани бә кӧ тӧ хԝәрʹа һәвалед ӧса бьжбери, йед кӧ гәләк ԝәхт Йаһоԝарʹа ԛӧльх дькьн у щьватеда йәктийе хԝәй дькьн. У ԝәʹде ԛӧльхкьрьне дьбәкә проблемед ԝан жи һәбунә, у бәр чәтьнайа жи тәйах кьрьнә. Йед ӧса дькарьн али тә бькьн, сәва кӧ жийина лапә баш бьжбери. Чахе тӧ тʹәви ԝан мәрьва ԝәʹдә дәрбаз ки, әԝана ԝе бькарьбьн али тә бькьн кӧ сафикьрьнед рʹаст бьки у чаԝа Мәсиһи рʹӧһʹанида мәзьн би. (Бьхунә Ибрани 5:14.)

16. Чаԝа Мәсиһийед гьһишти али хушкәке кьрьн, чахе әԝ щаһьл бу?

¹⁶ Һелга тинә бира хԝә кӧ чахе әԝе ида мәкʹтәба хԝә хьлаз дькьр, гәләк жь шагьрта хәбәрдьдан дәрһәԛа нетед хԝәйә бона ахьрийе. Һʹәчʹи зәʹф дьхԝәстьн хԝәндьна бьльнд бьстиньн, сәва кӧ карйера ԝан һәбә. Ле Һелгайе хәбәрдьда тʹәви һәвалед хԝәйә дь щьватеда, йед кӧ гьһишти бун. Әԝ гьли дькә: «Гәләк һәвалед мьн, жь мьн мәзьнтьр бун, у ԝана гәләк али мьн кьр. Ԝана әз һелан дькьрьм сәва кӧ әз чаԝа ԛӧльхкʹаре һәртʹьм ԛӧльх бькьм. У ахьрийе жи мьн карьбу пенщ сала чаԝа пешәнге һәртʹьм ԛӧльх кьм. Ньһа ида сал дәрбаз бунә, у әз гәләк ша мә кӧ ԝәʹде щаһьлтийе, мьн дьһа зәʹф һʹьш-аԛьле хԝә дабу сәр ԝе йәке кӧ Йаһоԝарʹа ԛӧльх кьм. У тʹӧ мәʹни тʹӧнә кӧ әз пʹошман бьм кӧ мьн ӧса кьр».

17, 18. Әм ча дькарьн һе баш Йаһоԝарʹа ԛӧльх бькьн?

¹⁷ Һәрге әм чʹәʹв бьдьнә Иса, әме мәзьн бьн у бьбьнә Мәсиһийед гьһишти. Әме незики Йаһоԝа бьн, у хԝәстьна мә кӧ ԝирʹа ԛӧльх бькьн ԝе һе мәзьн бә. Мәрьв һе баш Йаһоԝарʹа ԛӧльх дькә чахе әԝ гьһишти йә. Иса пәйчуйед хԝә һелан кьр: «Ӧса жи бьра рʹонайа ԝә бәр мәрьва шәԝԛ бьдә, кӧ әԝана кьрьнед ԝәйә ԛәнщ бьбиньн у пәсьне Баве ԝәйи әʹзмана бьдьн» (Мәтта 5:16).

¹⁸ Дь ве тʹемайеда әм пеһʹәсийан, кӧ чаԝа Мәсиһийе гьһишти дькарә аликʹарийа мәзьн бьдә щьвате. Мәсиһи ӧса жи дьдә кʹьфше кӧ гьһишти йә, чахе исафа хԝә рʹаст дьдә хәбате. Гәло исафа мә ча дькарә али мә бькә, кӧ сафикьрьна бь билани бькьн? У әм ча дькарьн ԛәдьр бьдьнә кʹьфше һьндава исафа мәрьвед дьн? Дь тʹема дьнда щаба ԝан пьрса әме пебьһʹәсьн.