Йаһоԝа Ча Һʹьзкьрьна Хԝә Һьндава Мә Әʹйан Дькә?
«Бьньһерʹьн, Баве әм чаԝа һʹьз кьрьн» (1 ЙУҺʹӘННА 3:1).
1. Йуһʹәннайе шанди әм һелан кьрьн кӧ бона чь бьфькьрьн, у чьрʹа?
ЙУҺʹӘННАЙЕ ШАНДИ әм һелан кьрьн, кӧ әм кʹур бьфькьрьн сәр һʹьзкьрьна Йаһоԝайә гьринг һьндава мә. Дь Йуһʹәнна 3:1-да әм дьхуньн: «Бьньһерʹьн, Баве әм чаԝа һʹьз кьрьн». Чахе әм дьфькьрьн кӧ Йаһоԝа чьԛас зәʹф мә һʹьз дькә у ча әԝ һʹьзкьрьна хԝә мәрʹа әʹйан дькә, әм незики ԝи дьбьн у һе зәʹф ԝи һʹьз дькьн.
2. Чьрʹа һьнә мәрьварʹа чәтьн ә баԝәр кьн кӧ Хԝәде ԝана һʹьз дькә?
2 Ле йазьх, һьнә мәрьв нькарьн баԝәр кьн, кӧ Хԝәде ԝана һʹьз дькә. Әԝана дьфькьрьн кӧ Хԝәде дәрһәԛа мәрьва хәм накә. Әԝана баԝәр дькьн кӧ Хԝәде тʹәне ԛануна дьдә у щәза дькә йед кӧ гӧрʹа ԝи накьн. Һьнәк мәрьв бо һинкьрьнед ԛәлп һәла һе ӧса жи дьфькьрьн, кӧ Хԝәде берʹәʹм ә у набә кӧ ԝи һʹьз кьн. Һьнәк жи дьфькьрьн кӧ Хԝәде һʹәму мәрьва һʹьз дькә у ԝирʹа фьрԛи тʹӧнә кӧ әԝана чь дькьн. Ле һинбуна Кʹьтеба Пироз али мә кьр, кӧ дәрһәԛа Йаһоԝа рʹастийе бьзаньбьн. Әм заньн кӧ һʹьзкьрьн һʹӧнӧрәки ԝийи лапи гьринг ә у кӧ әԝи Кӧрʹе хԝә кьрә ԛӧрбан бона мә (Йуһʹәнна 3:16; 1 Йуһʹәнна 4:8). Ле жь бо ԛәԝьмандьнед дь әʹмьре мәда, дькарә мәрʹа чәтьн бә баԝәр кьн, кӧ Йаһоԝа чьԛас гәләк мә һʹьз дькә.
3. Чь дькарә али мә бькә кӧ әм фәʹм кьн ԝәки Йаһоԝа мә һʹьз дькә?
3 Сәва кӧ әм фәʹм кьн ԝәки Йаһоԝа мә һʹьз дькә, бәре әʹԝльн әм гәрәке фәʹм кьн, кӧ әԝи әм әʹфьрандьнә. Демәк Йаһоԝа әʹмьр дайә мә. (Бьхунә Зәбур 100:3-5.) Ләма жи Кʹьтеба Пироз сәр мәрьве пешьн дьбежә «кӧрʹе Хԝәде» (Луԛа 3:38, ИМ). У Иса әм һин кьрьн, кӧ Йаһоԝарʹа бежьн «Баве мәйи әʹзмана» (Мәтта 6:9). Демәк Йаһоԝа Баве мә йә, у әԝ мә һʹьз дькә, чаԝа кӧ баве баш зарʹед хԝә һʹьз дькә.
4. а) Йаһоԝа Баве чь щурʹәйи йә? б) Әме ве тʹемайеда у тʹема дьнда дәрһәԛа чь шеԝьр кьн?
4 Һьнәкарʹа чәтьн ә кӧ баԝәр кьн ԝәки бав әԝ һәйә кәсе бь һʹьзкьрьн. Дьбәкә әԝана дьлтәнг дьбьн чахе бьчʹуктайа ԝан дькʹәвә бира ԝан, кӧ баве ԝан һьндава ԝанда чьԛас берʹәʹм буйә. Йаһоԝа ԝе тʹӧ щар тʹәви зарʹед хԝә ӧса нибә, чьмки Йаһоԝа Баве лапи баш ә (Зәбур 27:10). Әԝ мә гәләк һʹьз дькә у бона мә гәләк хәм дькә. Әм чьԛас зәʹф тʹәхмин кьн һʹьзкьрьна Йаһоԝа һьндава хԝә, һаԛас зәʹф әме ԝи һʹьз кьн (Аԛуб 4:8). Дь ве тʹемайеда әме шеԝьр кьн дәрһәԛа чар тьшта, бь кʹижана Йаһоԝа һʹьзкьрьна хԝә һьндава мә әʹйан дькә. Ле дь тʹема дьнда, әме шеԝьр кьн дәрһәԛа чар тьштед дьн, бь кʹижана кӧ әм дькарьн һʹьзкьрьна хԝә Йаһоԝарʹа әʹйан кьн.
ЙАҺОԜА БЬ ҺʹЬЗКЬРЬН Ә У МӘРʹД Ә
5. Йаһоԝа чь дьдә һʹәму мәрьва?
5 Чахе Паԝлос дь Йунаньстанеда, Атʹинайеда бу, әԝи дина хԝә дайе кӧ ль ԝедәре гәләк пʹут ьн у мәрьв баԝәр дькьн кӧ әԝан хӧданед ԝан әʹмьр данә ԝан. У Паԝлос ԝанрʹа гьли кьр дәрһәԛа «Хԝәдейе кӧ әв дьнйа у һʹәмуйед нава ԝеда әʹфьрандийә. Әԝи ԝанрʹа гот кӧ Хԝәде «хԝәха әʹмьр, бине у һәр тьшти дьдә һʹәмуйа» у кӧ «әм бь ԝи дьжин, дьмәшьн у һәнә» (Кʹаред Шандийа 17:24, 25, 28). Йаһоԝа һʹәму тьшт дайә сәва кӧ әм бьжин у жь жийина хԝә ләзәте бьвиньн. Бьфькьрә дәрһәԛа һьнә ԝан тьшта, кӧ әԝи дайә мә чьмки мә һʹьз дькә.
6. Йаһоԝа маләкә чь щурʹәйи дайә мә? (Бьньһерʹә шькьле әʹԝльн.)
6 Мәсәлә, Йаһоԝа маләкә гәләк бәдәԝ бона мә чекьрийә (Зәбур 115:15, 16). Әʹрд һьмбәри һʹәму планетед кӧ Йаһоԝа әʹфьрандийә, планетәкә лаптә башԛә йә. Рʹаст ә зандар гәрдуне леколин дькьн у гәләк планет дитьнә, ле йәкә нькарьбунә планетәкә ӧса бьвиньн, кʹидәре кӧ һʹәму тьшт һәйә сәва кӧ мәрьв бьжин. Йаһоԝа нә кӧ тʹәне һʹәму тьшт дайә мә сәва кӧ әм сах бьминьн, ле әԝи әʹрд ӧса баш у бәдәԝ чекьрийә, кӧ әм дькарьн әʹмьре хԝәрʹа ша бьн у ча бежи маләкә бехофда бьн (Ишайа 45:18). Чахе әм дьфькьрьн дәрһәԛа әве мале, кӧ Баве мә Йаһоԝа дайә мә, әм рʹасти жи тʹәхмин дькьн кӧ әԝ мә чьԛас зәʹф һʹьз дькә. (Бьхунә Ибо 38:4, 7; Зәбур 8:3-5.)
7. Йаһоԝа әм чь щурʹәйи әʹфьрандьнә, у әв йәк ча мәрʹа дьдә кʹьфше кӧ әԝ бь рʹастийе жи мә һʹьз дькә?
7 Һʹьзкьрьна Йаһоԝа һьндава мә әʹйан дьбә диса бь ԝе йәке, кӧ әԝи әм бь фәрәсәте ӧса әʹфьрандьнә, кӧ әм дькарьн чʹәʹв бьдьнә ԝи (Дәстпебун 1:27). Әԝ те һʹәсабе кӧ әм дькарьн һʹьзкьрьна ԝи һьндава хԝә тʹәхмин кьн, у паше әм жи һʹьзкьрьна хԝә һьндава ԝи әʹйан кьн. Әԝ занә кӧ әԝ йәк бь рʹастийе мә бәхтәԝар дькә. Зарʹ бәхтәԝар ьн чахе тʹәхмин дькьн, кӧ де-баве ԝан ԝана һʹьз дькьн. У бькә бира хԝә, кӧ Иса гот ԝәки әме бәхтәԝар бьн, һәрге әм тʹәви Баве хԝә Йаһоԝа незик бьн (Мәтта 5:3). Әԝ һʹәму тьшти дьдә мә «ԝәки әм мьраз пе бькьн». Әʹйан ә кӧ Йаһоԝа гәләк мәрʹд ә у мә гәләк һʹьз дькә (1 Тимотʹейо 6:17; Зәбур 145:16).
ЙАҺОԜА МӘ РʹАСТИЙЕ ҺИН ДЬКӘ
8. Әм чьрʹа дьхԝазьн кӧ Йаһоԝа мә һин кә?
8 Бав зарʹед хԝә һʹьз дькә у нахԝазә кӧ әԝана бенә хапандьн йан хальфандьне. Ле гәләк де-бав иро принсипед Кʹьтеба Пироз дәрһәԛа рʹастийе у нәрʹастийе ԛәбул накьн. У әԝана нькарьн ча лазьм ә зарʹед хԝә хԝәй кьн, у ләма жи ахьрийеда зарʹед ԝан бебәхт дьбьн у дьхальфьн (Мәтʹәлок 14:12). Ле Йаһоԝа зарʹед хԝәрʹа рʹебәрийа лапә баш дьдә, чьмки әԝ «Хԝәдайе рʹастийе» йә (Зәбур 31:5, ИМ). Әԝ гәләк дьхԝазә мә рʹастийе һин кә дәрһәԛа хԝә. Әԝ ӧса жи мә һин дькә кӧ чаԝа ԝирʹа ԛӧльх кьн у чаԝа бь жийина лапә баш бьжин. (Бьхунә Зәбур 43:3.) Ле әԝи мәрʹа чь әʹйан кьрийә у бь ԝе йәке ча мәрʹа дайә кʹьфше кӧ мә зәʹф һʹьз дькә?
Малхед кӧ мәсиһи нә чʹәʹв дьдьнә Йаһоԝа чахе зарʹед хԝә рʹастийе һин дькьн, у али ԝан дькьн кӧ һәләԛәтийа ԝан тʹәви Баве ԝани әʹзмана һәбә (Бьньһерʹә абзаса 8-10)
9, 10. а) Чьрʹа Йаһоԝа дәрһәԛа хԝә мәрʹа гьли дькә? б) Йаһоԝа чь мә һин дькә дәрһәԛа ԛьрара хԝәйә сәва мә?
9 Йа әʹԝльн Йаһоԝа мәрʹа дәрһәԛа хԝә гьли дькә. Әԝ дьхԝазә кӧ әм ԝи нас кьн (Аԛуб 4:8). У ләма әԝ мәрʹа наве хԝә әʹйан дькә. Рʹасти жи, наве ԝи дь Кʹьтеба Пирозда жь һʹәму навед дьн зәʹфтьр ньвисар ә. Йаһоԝа ӧса жи мәрʹа гьли дькә кӧ әԝ Кәсәки ча нә. Чахе әм сәр әʹфьринед ԝи дьньһерʹьн, әм фәʹм дькьн кӧ әԝ чьԛас гәләк ԛәԝат ә у билан ә (Рʹомайи 1:20). У чахе әм Кʹьтеба Пироз дьхуньн, әм педьһʹәсьн кӧ әԝ һәԛ ә у кӧ әԝ мә чьԛас зәʹф һʹьз дькә. Чахе әм педьһʹәсьн кӧ Йаһоԝа чьԛас баш ә, әм һе незики ԝи дьбьн.
Чахе әм Йаһоԝа дьһа баш нас дькьн, әм хԝә дьһа незики ԝи тʹәхмин дькьн.
10 Йаһоԝа ӧса жи мәрʹа әʹйан кьр, кӧ ԛьрара ԝи чь йә. Әԝ мәрʹа гьли дькә кӧ әм пʹарәк жь малбәта ԝи нә. Әԝ ӧса жи мәрʹа шьровәдькә кӧ әԝ жь мә һивийа чь йә, у бь ԝе йәке әм дькарьн дь малбәта ԝида тʹәви һәр кәси йәктийеда у әʹдьлайеда бьн. Кʹьтеба Пироз мәрʹа әʹйан дькә, кӧ Хԝәде әм бь ԝе изьне нә әʹфьрандьнә, ԝәки әм хԝәха хԝәрʹа сафи кьн кӧ чь йә баш у чь йә хьраб (Йерәмйа 10:23). Чьмки Йаһоԝа занә бона мә чь һе баш ә. Һәрге әм фәʹм кьн кӧ һʹӧкӧмти тʹәне Хԝәдерʹа дькʹәвә у гӧрʹа ԝи бькьн, әме бькарьбьн әʹдьлайеда бьжин у ләзәте бьвиньн жь жийина хԝә. Йаһоԝа рʹастийа фәрз мәрʹа әʹйан кьрийә, чьмки әԝ мә һʹьз дькә.
11. Баве мәйи бь һʹьзкьрьн дәрһәԛа ахьрийе мәрʹа чь әʹйан кьрийә?
11 Баве бь һʹьзкьрьн дәрһәԛа ахьрийа зарʹед хԝә хәм дькә. Әԝ дьхԝазә кӧ әԝана бәхтәԝар бьн. Йазьх, иро һʹәчʹи зәʹф мәрьв бәрхԝәдькʹәвьн кӧ ахьри ԝе ча бә, у гәләк жи тʹәмамийа әʹмьре хԝә, тʹәне дьхәбьтьн бона ԝан тьшта чь кӧ ԝәʹдәлу нә (Зәбур 90:10). Әм чьԛас жь Йаһоԝа Баве хԝә рʹази нә, кӧ әԝ нә кӧ тʹәне мә һин дькә кӧ әм чаԝа ньһа жь әʹмьре хԝә ләзәте бьвиньн, ле ӧса жи соз дайә бона ахьрийа пʹьрʹ баш!
ЙАҺОԜА РʹЕБӘРИЙЕ ДЬДӘ ЗАРʹЕД ХԜӘ У ԜАНА ШИРӘТ ДЬКӘ
12. Йаһоԝа ча дьхԝаст али Ԛайин у Барук бькә?
12 Чахе Йаһоԝа дит кӧ Ԛайин бәр тʹәлькәкә ӧса нә, кӧ ԝе тьштәки гәләк хьраб бькә, әԝи хԝаст али Ԛайин бькә у жь ԝи пьрси: «Тӧ чьма һерс кʹәтийи? У тә чьма сәре хԝә бәржер кьрийә? Һәгәр тӧ рʹастийе бьки, гәло те сәре хԝә бьльнд нәки?» (Дәстпебун 4:6, 7, ПКʹМ). Ԛайин аликʹарийа Йаһоԝа инкʹар кьр, у әԝи бәред хьраб чьни (Дәстпебун 4:11-13). Щарәке жи, Йаһоԝа дит кӧ ньһерʹандьна Барукә нәрʹаст ӧса сәр Барук һʹӧкӧм дьбә, кӧ әԝ дьԝәстә у дьлтәнг дьбә. У ләма Йаһоԝа готә Барук кӧ ньһерʹандьна хԝәйә нәрʹаст бьгӧһезә. Барук гӧһ да ширәткьрьна Йаһоԝа, у бь ԝе йәке әԝ сах ма (Йерәмйа 45:2-5).
13. Ԛӧльхкʹаред Йаһоԝайи амьн чь һин бунә жь чәтьнайа?
13 Йаһоԝа рʹебәрийе дьдә мә у мә рʹаст дькә, чьмки әԝ мә һʹьз дькә. Әԝ нә кӧ тʹәне мә рʹаст дькә чахе лазьм ә, ле ӧса жи мә һин дькә (Ибрани 12:6). Дь Кʹьтеба Пирозда әм дьхуньн дәрһәԛа ԛӧльхкʹаред амьн, кʹижан кӧ жь Йаһоԝа һатьнә һинкьрьн кӧ бьбьнә мәрьвед һе баш. Мәсәлә, Усьв, Муса, у Даԝьд гәләк щерʹьбандьнед чәтьн дәрбаз кьрьнә. Ле ԝәʹде ԝан щерʹьбандьна, Йаһоԝа тʹәви ԝан бу. Дь ԝан щерʹьбандьнада әԝана чь кӧ һин бун, али ԝан кьр чахе Йаһоԝа щабдарийед мәзьн да ԝан. Чахе әм Кʹьтеба Пирозда дьхуньн кӧ Йаһоԝа чаԝа али щьмәʹта хԝә дькә у һин дькә, әм тʹәхмин дькьн кӧ Йаһоԝа бь рʹастийе жи мә һʹьз дькә. (Бьхунә Мәтʹәлок 3:11, 12.)
14. Һәрге әм тьштәки нәрʹаст дькьн, Йаһоԝа ча һʹьзкьрьна хԝә һьндава мә әʹйан дькә?
14 Һәла һе һәрге әм тьштәки нәрʹаст жи дькьн, Йаһоԝа бәрдәԝам дькә мә һʹьз дькә. Һәрге әм рʹасткьрьна ԝи ԛәбул дькьн у гӧне хԝә тиньн рʹуйе хԝә, әԝ ԝе мә «бь зедәйи» бьбахшинә (Ишайа 55:7). Әԝ чь те һʹәсабе? Гьлийед Даԝьд дәрһәԛа бахшандьна Йаһоԝа мәрʹа дьдьнә кʹьфше, кӧ Бавәки мәйи чьԛас рʹәʹм һәйә. Даԝьд гот: «Йе кӧ һʹәму сущед тә дьбахшинә, йе кӧ жь һʹәму нәхԝәшийед тәрʹа шифайе [ԛәнщкьрьне] тинә. Йе кӧ щане тә жь горе дәртинә, йе кӧ тʹаща кʹәрәм у дьлованийе ль тә дькә. Рʹожһьлат жь рʹожава чьԛас дур бә, ԝи гӧнед мә һаԛас жь мә дур кьр» (Зәбур 103:3, 4, 12, ИМ). Йаһоԝа мә рʹаст дькә у рʹебәрийе дьдә мә бь гәләк щурʹа. Ле тӧ дәрберʹа хԝә дьгӧһези, чахе Йаһоԝа тә рʹаст дькә? Тʹьме бира хԝәда хԝәй кә кӧ Йаһоԝа мә рʹаст дькә, чьмки мә һʹьз дькә (Зәбур 30:5).
ЙАҺОԜА МӘ ХԜӘЙ ДЬКӘ
15. Чь щурʹәйи Йаһоԝа һʹьзкьрьне һьндава мә дьдә кʹьфше?
15 Баве һʹьзкьри малбәта хԝә жь ԛәзийа хԝәй дькә. Ӧса жи Йаһоԝа ча Баве һʹьзкьри мә хԝәй дькә. Зәбурбеж дәрһәԛа Йаһоԝа гот: «Щанед дьлсозед хԝә әԝ дьпарезә [хԝәй дькә], әԝ ԝан аза дькә жь дәстед хьраб» (Зәбур 97:10, ИМ). Чаԝа кӧ тӧ чʹәʹве хԝә хԝәй дьки чьмки ԛимәт дьки, ӧса жи Йаһоԝа щьмәʹта хԝә хԝәй дькә, чьмки ԝана гәләк ԛимәт дькә. (Бьхунә Зәкәрйа 2:8.)
Йаһоԝа тʹьме һазьр ә хьзмәткʹаред хԝә бьпʹарезә, чьмки әԝана бона ԝи ԛимәт ьн.
16, 17. Йаһоԝа ча щьмәʹта хԝә хԝәй дькьр бәре у рʹожа иро?
16 Йаһоԝа диса бь щурʹәки дьн жи щьмәʹта хԝә хԝәй дькә. Ча бәре ӧса жи иро әԝ бь мьлйакʹәта щьмәʹта хԝә хԝәй дькә (Зәбур 91:11). Мьлйакʹәтәки Хԝәде 185 000 әскәред Ашуре нава шәвәкеда кӧшт у щьмәʹта Йаһоԝа хьлаз кьр (2 Пʹадшати 19:35). Ԛьрʹна йәкеда жи мьлйакʹәта жь кәле хьлаз кьрьн Пәтрус, Паԝлос у гьртийед дьн (Кʹаред Шандийа 5:18-20; 12:6-11). Ԝан пашԝәхтийа шәрʹәки гьран дәстпебу дь ԝәлате Африкайеда. Ԝи ԝәлатида хаос бу жь бо һәвкʹӧтане, дьзийе, һәвкӧштьне, у дәсте зоре жьн хьраб дькьрьн. Рʹаст ә бьре мә тʹӧ кәс нәһатә кӧштьне, ле йазьх жь ԝан гәләка һʹәму һәбуна хԝә ӧнда кьрьн. Ле ԝана һʹьзкьрьна Йаһоԝа тʹәхмин дькьрьн у заньбун кӧ Йаһоԝа бона ԝан хәм дькә. Чьԛас чәтьнайе ԝан жи һәбун, ле йәкә әԝана бәхтәԝар бун. Чахе ԝәкʹиле Кʹома Рʹебәрийе чу бал ԝан у жь ԝан пьрси кӧ һʹале ԝан ча нә, ԝана гот: «Һʹәму тьшт баш ә, әм гәләк жь Йаһоԝа рʹази нә!».
17 Һьлбәт һьнә жь ԛӧльхкʹаре Йаһоԝа, мәсәлә Стәйфан у йед майин мьрьн чьмки амьн бун. Йаһоԝа һәр гав һәр ԛӧльхкʹарәки хԝә хԝәй накә кӧ әԝ йәк нәйе сәре ԝан, ле әԝ бь тʹәмами щьмәʹта хԝә хԝәй дькә, бь ԝе йәке кӧ пешда ԝанрʹа дьбежә дәрһәԛа тʹәлькед Шәйтʹан (Әфәси 6:10-12). Дәрһәԛа ԝан тʹәлька әм педьһʹәсьн жь Кʹьтеба Пироз у ӧса жи жь әʹдәбйәтед кӧ тʹәшкиләта Йаһоԝа дьдә мә. Мәсәлә, әм педьһʹәсьн дәрһәԛа хофийа интернете, пʹәрәһʹьзийе, ӧса жи филм, кʹьтеб у листькед кӧ бь бенамусийе у зорбәтийе нә. Әʹйан ә, кӧ Йаһоԝа мә һʹьз дькә у дьхԝазә мә хԝәй кә жь тʹәлькед Шәйтʹан.
ԚӘДЬРӘКИ МӘЗЬН
18. Тӧ чь тʹәхмин дьки дәрһәԛа һʹьзкьрьна Йаһоԝа?
18 Чахе Муса дьфькьри дәрһәԛа ԝан салед кӧ әԝи Йаһоԝарʹа ԛӧльх дькьр, әԝ баԝәр бу кӧ Йаһоԝа ԝи һʹьз дькә. Муса гьлийе ӧса гот: «Сәре сьбе мә бь кʹәрәма хԝә тʹер бькә, да кӧ әм дь һʹәму рʹожед хԝәда ша у дьлгәш бьн» (Зәбур 90:14, ИМ). Әв йәк кʹәрәм ә кӧ әм дькарьн фәʹм кьн у тʹәхмин кьн һʹьзкьрьна Йаһоԝа һьндава хԝә. Ԛәдьрәки чьԛас мәзьн ә кӧ Йаһоԝа мә һʹьз дькә! Әм жи ӧса тʹәхмин дькьн чаԝа Йуһʹәннайе шанди, кʹижани кӧ гот: «Бьньһерʹьн, Баве әм чаԝа һʹьз кьрьн» (1 Йуһʹәнна 3:1).