ҺʹЬШЙАР БЬМИНЬН!

Религийа у Шәрʹе Украинеда; Гәло Кʹьтеба Пироз Дәрһәԛа Ве Йәке Чь Дьбежә?

Дина хԝә бьдьнә һьнә әʹламәтийед пашԝәхтийе дәрһәԛа сәрԝеред религийә нав у дәнг у шәрʹе Украинеда:

«Сәре Дера Ортодоксе йа Русйайе, кʹәшише мәзьн Кирил, дәрһәԛа һʹьщумкьрьна Русйайе ԛә тьштәки нәгот. . . . Пропаганда Дера ԝи дәрһәԛа Украине [те хәбьтандьне], ԝәки шәрʹе кӧ Путин дәстпекьр, һәԛ дәрхә» (EUobserver 7 Адар, 2022).
«Кʹәшише мәзьн, Кирил . . . избатикә мәзьн ани, йа кӧ һʹьщумкьрьна Русйайе сәр Украине һәԛ дәрдьхә, у гот кӧ әԝ шәрʹ һәйә мәщаләк ԝәки мьԛабьли гӧнә шәрʹ кьн» (AP News, 8 Адар, 2022).
«Сәрԝере Дера Ортодоксе йе Украине, Метрополитен Епифани I, йе Киеве, Дӧшәме щьмәʹта хԝә кʹәрәм кьр, ԝәки ‹мьԛабьли әскәред Русйайе шәрʹ бькьн› . . . [Әԝи] ӧса жи гот ԝәки кӧштьна әскәред Русйайе гӧнә нинә» (Jerusalem Post, 16 Адар, 2022).
«Әм [UCCRO] пьштгьрийа ордийа Украине у һʹәмуйед кӧ ле дьпарезьн, дькьн, әм ԝана кʹәрәм дькьн, чьмки әԝана Украине жь дьжмьна хԝәй дькьн, у әм бона ԝан дӧа дькьн» (UCCROa Statement, 24 Сьбат, 2022).

Гәло бь тʹәхмина ԝә, религийед кӧ дьбежьн ԝәки пәй Иса Мәсиһ дьчьн, гәрәке әндәмед хԝә һелан кьн кӧ һәрʹьнә шәрʹ? Гәло Кʹьтеба Пироз чь дьбежә?

Тʹәрихийа религийа нава шәрʹада

Тʹәрихи нишан дькә ԝәки религийа гәләк щар бәрбь шәрʹа һелан дькә, дьбежә ԝәки әԝ рʹаст ә кӧ һәрʹьнә шәрʹ, у һәла һе дьбежә жи ԝәки гәрәке һәрʹьнә шәрʹ, ле хԝә ӧса датинә йанчь дьхԝазә әʹдьлайе пешда бинә. Бь дәһа сала Шәʹдед Йаһоԝа әв дӧрʹутийа религийа әшкәрә дькьн. Дина хԝә бьдьн кӧ ван әʹдәбйәтед мәда чь һатийә готьне.

Готара бь наве «Рʹеԝитийа Хачʹпареза; ‹Хәйала Дәрд-Кӧл›», нишан дькә ԝәки Дера Католики йа Рʹомайи нәһәԛ ә ве йәкеда, кӧ хуна гәләк мәрьва рʹет, йанчь бона наве Хԝәде у Мәсиһ.
Готара бь наве «Дера Католики Африкайеда», мәсәләке гьли дькә, йа кӧ нишан дькә, ԝәки чаԝа религийа нькарьбу шәрʹе нава бәрәкада, һәла һе геносиде жи бьдә сәкьнандьне.
Готаред бь наве «Гәло Религийа Нәһәԛ ә?», «Рола Религийа Нава Шәрʹед Мәрьвада» у «Религийа Һәрдӧ Алийа Дьгьрә», шьровәдькьн кӧ чаԝа кʹәшишед Католики, Ортодоксе, у Протестанта нава гәләк шәрʹада дӧ алийа дьгьртьн.

Гәло Мәсиһи гәрәке пьштгьрийа шәрʹ бькьн?

Иса һин кьр: «Һәвале хԝә ԝәкә хԝә һʹьз бькә» (Мәтта 22:39). «Дьжмьнед хԝә һʹьз бькьн» (Мәтта 5:44-47).

Бьфькьрьн: Гәло религийа дькарә бежә, ԝәки әԝ гӧрʹа тʹәмийед Иса дькә кӧ мәрьва һʹьз бькьн, у һьм жи әндәмед хԝә һелан кә, ԝәки мәрьвед дьн шәрʹда бькӧжьн? Бона щаба ве пьрсе, бьхуньн готаред бь наве «Мәсиһийед Рʹаст у Шәрʹ» у «Гәло Дьбә ԝәки Дьжмьнед Хԝә Һʹьз Бькьн?»

Иса гот: «Пʹадшатийа мьн нә жь ве дьнйайе йә. Һәгәр пʹадшатийа мьн жь ве дьнйайе буйа, бәрдәстийед мьне шәрʹ кьрана» (Йуһʹәнна 18:36). «Кʹи кӧ шур һьлтинә, әԝе бь шур һәрʹә» (Мәтта 26:47-52).

Бьфькьрьн: Һәрге Мәсиһи бона кӧ Иса бьпарезьн гәрәке шур һьлнәдана, гәло гәрәке әԝана бона мәʹнийед дьн чʹәк һьлдьнә дәсте хԝә? Бьхуньн готар бь наве «Гәло Мәсиһи Дькарьн Бькʹәвьнә нава Шәрʹ?», сәва кӧ пебьһʹәсьн ԝәки Мәсиһийед пешьн бь амьни чʹәʹв дьданә Иса у һинкьрьнед ԝи.

Чь ԝе бьԛәԝьмә тʹәви религийед кӧ пьштгьрийа шәрʹа дькьн?

Кʹьтеба Пироз һин дькә, ԝәки Хԝәде ԛәбул накә ван религийа, йед кӧ дьбежьн ԝәки шагьртед Иса нә, ле һинкьрьнед ԝи пьшт гӧһе хԝәва давежьн (Мәтта 7:21-23; Тито 1:16).

Кʹьтеба Әʹйанти нишан дькә, ԝәки Хԝәде ԝе жь религийед кӧ бона «хуна ԝан һʹәмуйа кӧ ль сәр рʹуйе әʹрде һатьнә рʹетьне», щабе бьхԝазә (Әʹйанти 18:21, 24). Сәва кӧ пебьһʹәсьн чьрʹа, бьхуньн готара бь наве «Бабилона Мәзьн Чь йә?»
Иса да кʹьфше ԝәки һʹәму религийед кӧ Хԝәде ԛәбул накә, ԝе бона кьред хԝә бенә ԛьрʹкьрьне, мина дара хьраб кӧ «те бьрʹин у авитьне нава агьр», чьмки бәред хьраб дьдә (Мәтта 7:15-20). Бьхуньн готар бь наве «Кʹӧтабуна Религийа Ԛәлп Незик ә!», сәва кӧ пебьһʹәсьн әԝ йәк ԝе ча бьԛәԝьмә.

Шәʹдед Йаһоԝа Щӧдә нә

Шәʹдед Йаһоԝа чаԝа Русйа у Украинеда, ӧса жи нав тʹәмамийа дьнйайе гӧрʹа тʹәмийа Иса дькьн, кӧ накʹәвьнә нава политике у начьнә шәрʹ. Ләма жи, әм тʹӧ щар пьштгьрийа тʹӧ шәрʹи накьн. Жь бо ве йәке кӧ әм хԝә ль принсипед Кʹьтеба Пироз дьгьрьн, һьнә Шәʹдед Йаһоԝа тенә зерандьне (Йуһʹәнна 15:19, 20; 2 Тимотʹейо 3:12). Мәсәлә, дәԝләта Русйайе гәләк Шәʹдед Йаһоԝа кьрә кәле у һьнәка һәла һе берʹәʹмти чәрчьрандьн жи. Щийед мә бона һʹәбандьне жи жь мә стандьн. Бона һе зедә әʹламәти, текʹәвьнә малпәра www.jw-russia.org.

Бьньһерʹьн видеойа 4 дәԛә бь наве «Шәʹдед Йаһоԝа жь Иркутске Нава Пәйкʹәтьн у Зерандьнада Хԝәдерʹа Амьн Дьминьн», сәва кӧ пебьһʹәсьн ԝәки Шәʹдед Йаһоԝа Русйайеда чаԝа бона баԝәрийа хԝә тенә зерандьне.
Шәʹдед Йаһоԝа ида гәләк ԝәхт ә бь ве йәке әʹйан ьн, кӧ тʹәвнәбуйине хԝәй дькьн. Бьньһерʹьн видео бь наве «Ԝәʹде Пәйкʹәтьна Ԛәԝи нә», сәва бьвиньн кӧ чаԝа ԝана тʹәвнәбуйин хԝәй кьрьн нава зерандьна ԝәʹде Натсиста Алманйайе у Йәктийа Совйәте йа бәре.

Жь кʹәрәма хԝә малпәра мә леколин бькьн, сәва кӧ һе зедә дәрһәԛа баԝәрийа мә пебьһʹәсьн, у ӧса жи дәрһәԛа созед жь Кʹьтеба Пироз кӧ ахьрийеда шәрʹ ԝе ида тʹӧнә бьн (Ишайа 2:4; Йерәмйа 29:11). Әм ԝә тʹәглиф дькьн кӧ тʹәви мә текли бьн у һе зедә информасийайе бьстиньн.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO әԝ һәйә Щьвака Дер у Тʹәшкиләтед Религи йед Украине, нава ԝеда ньн 15 дер, демәк йед Ортодокс, Католикед Йунани у Рʹомайи, Протестант, йед Евангелиста у ӧса жи Щьһуйа у Мьсьлмана.