Гәло Рʹасти Диса жи Фәрз ә?

Тӧ жи тʹәхмин дьки ԝәки иро дьһа чәтьн дьбә пебьһʹәсьн, чь йә рʹасти у чь йә дәрәԝи? Ча те кʹьфше дәԝса кӧ мәрьв сәр һʹиме рʹастийе у избатийа тьштәки баԝәр кьн, дькʹәвьнә һʹәйра емосийа у фькьред хԝә. Иро нав тʹәмамийа дьнйайеда гәләк мәрьв баԝәр накьн, кӧ рʹасти һәйә.

Ньһерʹандьна ви щурʹәйи тʹәзә нинә. Ԝәкә 2 000 сал пешда Пилатойе ԝәли бь фелбази жь Иса пьрси: «Рʹасти чь йә?» (Йуһʹәнна 18:38). Пилато һивийа щаба Иса нибу, ле пьрса ԝи фәрз бу. Кʹьтеба Пироз щаба ве пьрсе дьдә, кʹижан кӧ дькарә али тә бькә ԝәки бьзаньби чь йә рʹасти у чь йә дәрәԝи у жь бо ньһерʹандьна мәрьва нахәльфи.

Гәло рʹасти һәйә?

Бәле. Кʹьтеба Пироз хәбәра «рʹасти» дьдә хәбате, чь кӧ сәр һʹиме избатийа нә. Әԝ һин дькә ԝәки Йаһоԝаa Хԝәде, сәр кʹижани те готьне «Хԝәдайе рʹастийе» Канийа рʹастийа тʹам ә (Зәбур 31:5). Кʹьтеба Пирозда һәйә рʹастийа жь Хԝәде, у әв рʹасти бәрамбәри шәԝԛе дьбә. Әв шәԝԛ ве дьнйа хальфида дькарә рʹебәрийе мә бькә (Зәбур 43:3; Йуһʹәнна 17:17).

Тӧ чаԝа дькари рʹастийе бьвини?

Хԝәде нахԝазә ԝәки әм рʹастийа жь Кʹьтеба Пироз чʹәʹвгьрти ԛәбул кьн. Дәԝсе әԝ мә тʹәглиф дькә, ԝәки әм фәʹмкʹарийа хԝә бьдьнә хәбате сәва кӧ ве рʹастийе лекʹолин кьн у нәкʹәвьнә пәй емосийед хԝә (Рʹомайи 12:1). Әԝ дьхԝазә ԝәки әм «бь тʹәмамийа һʹьше хԝә» ԝи нас бькьн у һʹәз бькьн. У һьм жи әԝ мә һелан дькә, ԝәки әм хԝәха жи избат бьн ԝе рʹастийеда, кʹижане кӧ жь Кʹьтеба Пироз педьһʹәсьн (Мәтта 22:37, 38; Кʹаред Шандийа 17:11).

Дәрәԝи жь кʹӧ һатийә?

Кʹьтеба Пироз дьбежә ԝәки дәрәԝи жь дьжмьне Хԝәде, Шәйтʹан Мире-щьна пешда һат, сәр кʹижани Кʹьтеба Пироз дьбежә «баве дәрәԝа» (Йуһʹәнна 8:44). Әԝи мәрьвед пешьнрʹа дәрһәԛа Хԝәде дәрәԝ кьр (Дәстпебун 3:1-6, 13, 17-19; 5:5). Жь ԝи чахи Шәйтʹан бәрдәԝам дькә дәрәԝа бәла кә у рʹастийа дәрһәԛа Хԝәде вәшерә (Әʹйанти 12:9).

Чьма дәрәԝи ӧса бәлабуйи йә иро?

Рʹожед мәда, сәр кʹижани Кʹьтеба Пироз дьбежә «рʹожед ахьрийе», Шәйтʹан сәр мәрьва һʹӧкӧм дькә у һе зедә ԝана дьхальфинә. Мәрьв жи бона кʹара хԝә һәврʹа дәрәԝа дькьн (2 Тимотʹейо 3:1, 13). Дәрәԝи иро гәләк религийада жи бәлабуйи йә. Чаԝа кӧ Кʹьтеба Пироз дәрһәԛа ԝәʹде мә пʹехәмбәрти кьрийә, мәрьв хԝә ль ԝан дьгьрьн «йед кӧ тьштед ль гӧһе ԝан хԝәш те» ԝан һин дькьн у йед кӧ «гӧһе хԝә жь рʹастийе» дадьдьн (2 Тимотʹейо 4:3, 4).

Чьма рʹасти фәрз ә?

Мәрьв һʹәԝще рʹастийе нә, сәва кӧ итʹбарийа хԝә һәв биньн. Бе рʹастийе һәвалти у щьвак нькарьн ԛәԝи бьминьн. Кʹьтеба Пироз дьбежә ԝәки Хԝәде дьхԝазә, кӧ һʹәбандьна мә сәр һʹиме рʹастийе бә. Теда ньвисар ә: «Йед кӧ [Хԝәде] дьһʹәбиньн жи гәрәке бь рʹӧһʹ у рʹастийе ԝи бьһʹәбиньн» (Йуһʹәнна 4:24). Сәва кӧ пебьһʹәси ԝәки чаԝа рʹастийа жь Кʹьтеба Пироз дькарә али тә бькә ԝәки тедәрхи дәрәԝед религи у жь ԝан дәрәԝа аза би, бьхунә рʹеза готара бь наве «Дәрәԝ, жь бо Кʹижани Чәтьн Дьбә Хԝәде Һʹәз Бькьн».

Чьма Хԝәде дьхԝазә кӧ әз рʹастийе бьзаньбьм?

Хԝәде дьхԝазә ԝәки тӧ хьлаз би, ләма жи тӧ гәрәке рʹастийа дәрһәԛа ԝи бьзаньби (1 Тимотʹейо 2:4). Һәрге тӧ нормед Хԝәде дәрһәԛа рʹастийе у хьрабийе пебьһʹәси у ль гора ԝан норма бьжийи, тӧйе бьби досте ԝи (Зәбур 15:1, 2). Хԝәде кӧрʹе хԝә Иса шандә сәр әʹрде, ԝәки али мәрьва бькә сәва рʹастийе пебьһʹәсьн. Әԝ дьхԝазә әм гӧһ бьдьнә һинкьрьнед Иса (Мәтта 17:5; Йуһʹәнна 18:37).

Гәло Хԝәде ԝе дәрәԝийе бьдә һьлдане?

Бәле. Хԝәде нәфрʹәт дькә гава кәсәк бона кʹара хԝә бь дәрәԝийе йед дьн дьдә хәбате. Әԝи соз дайә ԝәки ԝе әʹрде аза кә жь ԝан мәрьва, йед бәрдәԝам дькьн дәрәԝа бькьн (Зәбур 5:6). Гава Хԝәде ве йәке бькә, әԝе ӧса жи ԝи созе хԝә бинә сери кӧ дьбежә, ԝәки зар-зьмане рʹаст ԝе һʹәта-һʹәтайе бьминә (Мәтʹәлок 12:19).