«Әз Рʹастийа Тәда Һәрʹьм»

1-3. а) Әм гәрәке чаwа бьн һьндава рʹастийа Кʹьтеба Пироз? Мәсәле биньн. (Бьньһерʹьн шьклед әʹwльн.) б) Кʹижан пьрса әме wе готареда шеwьр кьн?

ИРО чахе мәрьв дькʹанеда тьштәки дькʹьрʹьн, бе проблем дькарьн пашда вәгәрʹиньн. Ль гора һʹәсаба, һьнә wәлатада мәрьв тьштед кö дькʹьрьн, wәкә 9 сәләф пашда вәдьгәрʹиньн. Ле һе зәʹф мәрьв вәдьгәрʹиньн wан тьшта, кʹижан кö пе интернете дькʹьрʹьн. Һьнәк тьшта пашда вәдьгәрʹиньн, чьмки wана тʹьре кö әw тьшт wе щурʹәки майин буйа, йан жи хьраб ә, йан жи чьмки әwана бәгәм накьн. Ләма әwана wан тьшта тʹәви тьштәки дьн дьгöһезьн, йан жи дәʹwа дькьн, wәки пʹәре хwә пашда һьлдьн.

² Ле фәʹмдари йә тʹö кәс жь мә нахwазә рʹастийа кö әм пеһʹәсийанә, пашда вәгәрʹиньн йан жи бьфьрошьн. (Бьхунә Мәтʹәлок 23:23; 1 Тимтʹ. 2:4). Чаwа мә готара пешийа веда шеwьр кьр, әм рʹастийе qазанщ дькьн бь ве йәке кö wәʹде хwә хәрщ дькьн, сәва һе зедә пебьһʹәсьн. Хенщи ве йәке, сәва рʹастийе бькʹьрʹьн дьбәкә әм тʹәрька дәwләтибуне дьдьн, һәләqәтийа хwә тʹәви мәрьва, ньһерʹандьн у рʹабун-рʹуньштьна хwә дьгöһезьн, йан жи тʹәрька әʹдәт у шьхöлед öса дькьн, кʹижан кö Хwәде хwәш найен. Ле әм дöдьли ниньн wәки мә чь жи бона рʹастийе öнда кьрийә, нә жи бәрамбәри wан кʹәрәма дьбә, кö әм дьстиньн чахе рʹастийе qазанщ дькьн.

³ Иса мәсәлә ани дәрһәqа мәрьвәки базьрган, кʹижан кö дöрʹед рʹьнд дьгәрʹийа. Әwи мәрьви щарәке дöрʹәки гәләк qимәт дит, дәрберʹа һʹәму һәбука хwә фьрот у әw дöрʹ кʹьрʹи. Иса әw мәсәлә ани сәва бьдә кʹьфше, кö рʹастийа Пʹадшатийа Хwәде гәрәке чьqас qимәт бә бона wан, йед кö әw рʹасти дитьнә (Мәт. 13:45, 46). Бәле, әм жи чахе рʹастийа дәрһәqа Пʹадшатийа Хwәде у диса рʹастийед дьнә qимәт пеһʹәсийан, мә öса qимәт кьр, кö әм һазьр бун тʹәрка һәр тьшти бьдьн, тʹәне сәва рʹастийе qазанщ кьн. Әм гәрәке тʹьме әwе рʹастийе qимәт кьн у мьqати хwә бьн, wәки тʹö щар нәфьрошьн. Йазьх, ле һьнә хьзмәткʹаред Хwәде нәшекьрандьн у һәла һе жи пьшта хwә данә рʹастийе. Бьра әw йәк тʹö щар тʹәви мә нәqәwьмә! Бона wе йәке әм гәрәке бь дьл у щан рʹастийе qимәт кьн у рʹастийеда һәрʹьн. (Бьхунә 3 Йуһʹәнна 2-4.) Рʹастийеда һәрʹьн әw те һʹәсабе кö әм гәрәке әве рʹастийе дайньн сәр щийе пешьн у анәгори wе йәке бьжин. Wәрә әм ве готареда әван се пьрса шеwьр кьн: «Һьнәк чьрʹа у ча рʹастийе дьфьрошьн? Әм ча дькарьн әве шашийе нәкьн? У ча бәрдәwам кьн рʹастийеда бьжин?».

ҺЬНӘК ЧЬРʹА У ЧА РʹАСТИЙЕ ДЬФЬРОШЬН?

4. Qьрʹна йәкеда чьрʹа һьнәка рʹасти фьротьн?

⁴ Qьрʹна йәкеда һьнә мәрьвед кö һинкьрьнед Иса qәбул кьрьн, паше ида рʹастийеда нәдьчун у рʹасти фьротьн. Мәсәлә, чахе щарәке Иса бь кʹәрәмәт әʹлаләтәкә мәзьн тʹер кьр, әw әʹлаләт паше пәй wи чу һʹәта алийе дьнә йа Бәʹра Щәлиле. Wедәре Иса тьштәки öса гот, кö әwана мәтʹал ман. Әwи гот: «Һʹәта кö һун бәдәна Кöрʹе Инсан нәхwьн у хуна wи вәнәхwьн, жийине нава wәда тʹöнәбә». Wана дәwса кö жь Иса бьпьрсийана, кö бь wан гьлийа әwи чь дьхwәст бьгота, әwана жь бо гьлийед wи лькʹöмин у готьн: «Әв чь хәбәрнә гьран ьн! Кʹи дькарә гöһдарийа готьнед wи бькә?». Ахьрийеда, «шагьртед wи гәләк пашда чун у иди тʹәви wи нәдьгәрʹийан» (Йуһʹн. 6:53-66).

5, 6. а) Wан пашwәхтийада чьрʹа һьнәка пьшта хwә данә рʹастийе? б) Ча мәрьв дькарә һеди-һеди рʹастийе бьһелә?

⁵ Сәд һʹәйф иро һьнә мәрьва пьшта хwә данә рʹастийе. Һьнәк лькʹöмин чахе фәʹмкьрьна һьнә рʹезед Кʹьтеба Пироз һатьнә гöһастьне, йан жи хәйдин жь бьраки навдар, сәва гьли йан кьре wи. Ле һьнәк жи хәйдин, чьмки wанрʹа ширәт сәр һʹиме Кʹьтеба Пироз һатә дайине, йан жи әwана жь рʹастийе чун, чьмки щьватеда ортʹа wан у кәсәкида дәʹw-доз пешда һат. Һьнәка жи алийе рʹабәра гьртьн, йан жи пьшта wан гьртьн йед кö мьqабьли рʹастийе нә. Ахьрийа ве йәке әw бу, кö һьнәка жь wан, һʹәмде хwә пьшта хwә данә Йаһоwа у щьвате (Ибрн. 3:12-14). Ле wе чьqас баш буйа, һәрге wана мина Пәтрус баwәрийа хwә хwәй кьрана у итʹбарийа хwә Иса бьанйана. Чахе Иса шандийа пьрси кö һәла әwана дьхwазьн мина wан мәрьва wи бьһельн, Пәтрус щаба wи да у гот: «Хöдан, әме һәрʹьнә щәм кʹе? Готьнед жийина һʹәта-һʹәтайе щәм тә нә» (Йуһʹн. 6:67-69).

⁶ Һьнәк жи һеди-һеди жь рʹастийе чун у һаш жь хwә жи тʹöнәбун кö әw йәк ча qәwьми. Әw мәрьве кö öса жь рʹастийе дур дькʹәвә, мина wе qәйьке йә, кö һеди-һеди жь бәр дәве чʹем дур дькʹәвә. Кʹьтеба Пироз әwе дуркʹәтьне, нав дькә ча хальфандьн (Ибрн. 2:1). Мәрьве кö һеди-һеди жь рʹастийе дур дькʹәвә, әwе йәке һʹәмде хwә накә, ле йәкә әw мәрьв һәләqәтийа хwә тʹәви Йаһоwа сьст дькә у ахьрийеда дькарә öнда кә жи. Ле ча әм дькарьн хwә хwәй кьн, сәва әw йәк тʹәви мә нәqәwьмә?

ЧЬ ӘМ ГӘРӘКЕ БЬКЬН СӘВА ТʹÖ ЩАР РʹАСТИЙЕ НӘФЬРОШЬН?

7. Кʹижан гава пешьн wе али мә бькә рʹастийе нәфьрошьн?

⁷ Сәва рʹастийеда һәрʹьн, әм гәрәке һʹәму готьнед Йаһоwа qәбул кьн у һәр тьштида гöрʹа wи бькьн. Әʹмьре мәда рʹасти гәрәке сәр щийе пешьн бә у әм гәрәке анәгори принсипед Кʹьтеба Пироз бьжин. Даwьд пʹадша дöада Йаһоwарʹа соз да: «Әз рʹастийа Тәда һәрʹьм» (Зәб. 86:11). Даwьд дьле хwәда сафи кьр тʹьме рʹийа рʹастийеда һәрʹә, әм жи гәрәке wе йәкеда чʹәʹв бьдьнә wи. Һәрге әм öса нәкьн, әме дәстпекьн бьфькьрьн дәрһәqа wан тьшта, кʹижан мә бона рʹастийе тʹәрькандийә у дьбәкә жи бьхwазьн wан тьшта пашда вәгәрʹиньн. Дәwса wе йәке әм гәрәке бь тʹәмами хwә ль рʹастийе бьгьрьн. Әм öса жи гәрәке фәʹм кьн, кö әм нькарьн тʹәне һьнә рʹастийа qәбул кьн, һьнәка жи пьшт гöһе хwәва бавежьн. Әм гәрәке бь тʹәмами нава рʹастийеда бьн (Йуһʹн. 16:13). Ләма wәрә ньһа әм диса шеwьр кьн дәрһәqа wан 5 тьшта, кʹижан дьбәкә мә бона рʹастийе тʹәрк дайә, у пебьһʹәсьн чаwа пашда пәй wан тьшта нәкʹәвьн. Әw йәк wе али мә бькә, wәки бәрдәwам кьн рʹастийеда бьжин (Мәт. 6:19).

8. Чаwа Мәсиһи жь рʹастийе дур дькʹәвә, гава wәʹде хwә нәаqьлайи хәрщ дькә? Мәсәле биньн.

⁸ Wәʹдә. Сәва жь рʹастийе дур нәкʹәвьн, әм гәрәке wәʹде хwә бь билани хәрщ кьн. Һәрге әм ве йәкеда фәсал нибьн, әме дәстпекьн гәләк wәʹде хwә хәрщ кьн сәр һесабуне, сәр шьхöлед кö әм һʹьз дькьн, бәр интернете йан жи бәр телевизоре. Рʹаст ә wан тьштада тьштәки хьраб тʹöнә, ле йәкә әw тьшт дькарьн wәʹдә жь мә бьстиньн, кʹижан кö әм гәрәке хәрщ кьн сәр леколинкьрьна шәхси у шьхöлед рʹöһʹанийә дьн. Дина хwә бьдьнә сәрһатийа хушкәке бь наве Ема.a Жь бьчʹуктайеда әwе һʹьз дькьр һәспе сийар бә у бажо. Гава кö әwе wәʹдә дьдит, дәрберʹа дьчу һәспе сийар дьбу. Wәʹдә шунда, әw бәрхwә кʹәт, чьмки тедәрхьст, wәки гәләк wәʹде хwә сәр ве йәке хәрщ дькә. Ләма әwе сафи кьр гöһастьна бькә у ахьрийеда һесабун дани сәр щийе дöда. Әw öса жи жь сәрһатийа хушкәкә бь наве Кори Wелс һин бу, йа кö бәре ажотьна һәспада чемпион бу.b Ема ньһа гәләк ша йә, чьмки wәʹде хwә һе зедә сәр шьхöлед рʹöһʹани хәрщ дькә у öса жи wәʹде wе дьминә кö тʹәви нәфәр у һәвалед хwә дәрбаз кә. Әw һе незики Йаһоwа бу, у дьле wе рʹьһʹәт ә, чьмки занә кö әw wәʹде хwә бь билани хәрщ дькә.

9. Чахе мәрьв пәй һәбуке дькʹәвә, чаwа әw дькарә жь рʹастийе дур кʹәвә?

⁹ Һәбук. Һәрге әм дьхwазьн тʹьме рʹастийеда һәрʹьн, пʹәрә у һәбук бона мә гәрәке щийе пешьн нәгьрьн. Чахе әм тʹәзә рʹастийе пеһʹәсийан, мә фәʹм кьр, wәки нетед рʹöһʹани һе qимәт ьн, нә кö һәбук у пʹәрә. У әм бәхтәwар бун чахе мә тьштед материали, бона рʹастийе qöрбан кьр. Ле wәʹдә дәрбаз дьбә, у әм дьвиньн wәки мәрьвед дьн хwәрʹа тьштед әләктроник йед тʹәзә дькʹьрʹьн йан жи пʹәре хwә сәр тьштед майин хәрщ дькьн. Һьнге әм дькарьн бькʹәвьнә тʹәльке, чьмки дьбәкә бьфькьрьн, wәки әм тьшта жь хwә кем дькьн. Паши ве йәке, әме ида рʹази нәбьн wан тьштава кö бал мә һәнә, әме öса жи нетед рʹöһʹани бьдьнә алики дьн у пәй пʹәра у һәбуке кʹәвьн. Әw йәк тʹәви Димас qәwьми. Әwи «дьнйа һʹьз кьр» у бона ве йәке пьшта хwә да хьзмәтийа тʹәви Паwлосе шанди (2 Тимтʹ. 4:10). Ле чьрʹа әwи Паwлос һишт? Рʹаст ә Кʹьтеба Пироз навежә, ле дьбәкә әwи һәбук йан пʹәрә һе зәʹф һʹьз кьр, нә кö шьхöлед рʹöһʹани, йан жи дьбәкә әwи ида нәдьхwәст хwә бьдә щәфе сәва тʹәви Паwлос хьзмәт кә. Әм жь сәрһатийа wи дәрсе хwәрʹа һин дьбьн. Әм тʹö щар гәрәке диса пәй һәбуке нәкʹәвьн у нәһельн, wәки әw йәк һʹьзкьрьна мә һьндава рʹастийе сар кә.

10. Сәва бәрдәwам кьн рʹастийеда һәрʹьн, әм гәрәке чьда фәсал бьн?

¹⁰ Һәләqәти тʹәви мәрьва. Сәва рʹийа рʹастийеда бьминьн, әм гәрәке нәкʹәвьнә бәр байе мәрьва. Чахе мә тʹәзә дәстпекьр рʹастийеда һәрʹьн, һәләqәтийа мә тʹәви нә Шәʹдед Йаһоwа у нәфәред мә һатә гöһастьне. Һьнәка qәдьре баwәрийа мә гьртьн, һьнәк жи мьqабьли мә дәркʹәтьн (1 Пәт. 4:4). Рʹаст ә әм дьхwазьн һәләqәтийа мә тʹәви нәфәред мә баш бә, у әм wанрʹа тʹьме һʹәйф бьн, ле әм öса жи гәрәке фәсал бьн, wәки бона хатре wан, принсипед Йаһоwа нәтʹәрьбиньн. Әм жь 1 Корьнтʹи 15:33 һин дьбьн, wәки һәләqәти у һәвалтийа мәйә незик гәрәке тʹәне тʹәви wан һәбә, йед кö Йаһоwа һʹьз дькьн.

11. Ча әм дькарьн нәкʹәвьнә бәр байе фькьр у рʹабун-рʹуньштьна ве дьнйайе?

¹¹ Ньһерʹандьн у рʹабун-рʹуньштьна кö Хwәде хwәш найе. Һәр кәс кö рʹийа рʹастийеда дьчә, гәрәке пироз бә. (Иша. 35:8; бьхунә 1 Пәтрус 1:14-16.) Чахе әм һатьнә сәр рʹийа рʹаст, мә гьшка гöһастьн кьр, сәва ль гора принсипед Кʹьтеба Пироз бьжин. Һьнәка жь мә гöһастьнед мәзьн кьрьн. Чь жи һәбә, әм гәрәке тʹьме мьqати хwә бьн, wәки әw жийина пироз у тʹәмьз, тʹәви һʹәрами у бенамусийа ве дьнйайе нәгöһезьн. Ле чаwа хwә жь бенамусийе хwәй кьн? Кʹур бьфькьрьн, кö Йаһоwа һәqе чьqас мәзьн у qимәт да, сәва әм бәр чʹәʹве wи пироз бьн. Әw һәq, хуна Кöрʹе wийи тайе тʹәне бу, йа Иса Мәсиһ (1 Пәт. 1:18, 19). Сәва әм бәр чʹәʹве Йаһоwа тʹәмьз бьминьн, qöрбана Иса гәрәке һʹьш у дьле мәда гәләк qимәт у фәрз бә.

12, 13. а) Чьрʹа фәрз ә кö пе ньһерʹандьна Йаһоwа сәр щәжьна бьньһерʹьн? б) Әме ньһа дәрһәqа чь шеwьр кьн?

¹² Әʹдәт у шьхöле кö Хwәде хwәш найен. Нәфәред мә, һәвалхәбатчийед мә, у һәвалдәрсханед мә дьбәкә мә тʹәглиф дькьн сәр щурʹә-щурʹә щәжьна. Ле чаwа әм нәкʹәвьнә бәр байе wан, у тʹәви wан әʹдәт у щәжьна нәбьн, кʹижан кö Йаһоwа һöрмәт накьн? Әм гәрәке тʹö щар бир нәкьн ньһерʹандьна Йаһоwа сәр wан тьшта. Бона ве йәке лазьм ә, әм әʹдәбйәтед мәда леколина бькьн у пебьһʹәсьн, кö әw щәжьн жь кʹидәре һатьнә. Чахе әм дькьнә бира хwә wан мәʹнийед сәр һʹиме Кʹьтеба Пироз, wәки чьрʹа әм wан щәжьна дәрбаз накьн, әм дöдьли набьн кö әм ве рʹеда дьчьн, кʹижан «Хöдан хwәш те» (Әфәс. 5:10). Һәрге әм итʹбарийа хwә Йаһоwа у Хәбәра wи тиньн, «тьрса мерьв» wе сәр мә тʹöнә бә (Мәтʹлк. 29:25).

¹³ Әм гәрәке һʹәта-һʹәтайе рʹастийеда һәрʹьн. Ле чь wе али мә бькә һе зедә хwә ль ве рʹе бьгьрьн у дур нәкʹәвьн? Wәрә се тьшта шеwьр кьн, кʹижан кö дькарьн ве йәкеда али мә бькьн.

ТʹЬМЕ ХWӘ QӘWИ ЛЬ РʹИЙА РʹАСТИЙЕ БЬГЬРЬН

14. а) Леколинкьрьна Кʹьтеба Пироз чаwа али мә дькә, wәки әм тʹö щар рʹастийе нәһельн? б) Чьрʹа сәрwахти, ширәт, у фәʹмкʹари гәләк фәрз ьн?

¹⁴ Йа пешьн, бәрдәwам кьн Хәбәра Хwәдеда рʹастийед qимәт леколин бькьн у сәр бьфькьрьн. Бона ве йәке тʹьме wәʹдә хwәрʹа башqә кьн. Wи щурʹәйи һуне һе зәʹф рʹастийе qимәт кьн у дьле хwәда сафи кьн, wәки тʹö щар рʹастийе нәфьрошьн. Хенщи кʹьрʹина рʹастийе, Мәтʹәлок 23:23-да те готьне, wәки әм гәрәке öса жи «сәрwахтийе, ширәта у фәʹмкʹарийе, (ДТʹ)» бькʹьрʹьн. Бәле, тʹәне занәбун бәс нинә. Әм гәрәке рʹастийе әʹмьре хwәда биньн сери. Фәʹмкʹари али мә дькә, wәки тедәрхьн һәр готьнед Йаһоwа. Сәрwахти али мә дькә, кö ль гора занәбуне бьжин. Щара рʹасти мә ширәт дькә, сәва кö чьда әм гәрәке хwә бьгöһезьн. Әм гәрәке тʹьме гöһ бьдьнә wан ширәта, чьмки әw жь зив qимәттьр ьн (Мәтʹлк. 8:10).

15. Кʹәмбәра рʹастийе чьда мә хwәй дькә?

¹⁵ Йа дöда, әм гәрәке һәр рʹож ль гора рʹастийе бьжин. Әм ве рʹастийе гәрәке мина кʹәмбәре ль пьшта хwәва гьредьн (Әфәс. 6:14). Бәре кʹәмбәра кö әскәр хwәва дькьр, wәʹде шәрʹ пьшта wи хwәй дькьр. Ле сәва кʹәмбәр рʹьнд wи хwәй кә, әw гәрәке qайим wива гьредайи бә. Кʹәмбәра кö сьст гьредайи бу, кем кери wи дьһат. Ле гәло кʹәмбәра рʹöһʹанийә рʹастийе, ча мә хwәй дькә? Һәрге әм qайим әwе кʹәмбәре хwәва гьредьдьн, әw wе мә жь фькьред нәрʹаст хwәй кә у али мә бькә сафикьрьнед аqьлайи бькьн. Һьн жи чахе әм рʹасти щерʹьбандьна у тәнгасийа бен, рʹастийа Кʹьтеба Пироз wе дьл бьдә мә, сәва әм тьштед рʹаст бькьн. Чаwа кö әскәр wе тʹö щар бей кʹәмбәре нәчә шәрʹ, әм жи гәрәке тʹö щар кʹәмбәра рʹастийе сьст нәкьн у жь хwә нәехьн. Дәwсе әм гәрәке һәр тьшти бькьн, сәва әв qайим бәдәна мәва гьредайи бә, демәк ль гора рʹастийе бьжин. Wәʹде бәре, әскәр öса жи кʹәмбәра хwәва шур гьредьда. Әме ньһа шеwьр кьн, кö әм жи ча дькарьн тьштәки мина ве йәке бькьн.

16. Чахе әм мәрьва рʹастийе һин дькьн, әw йәк чьда али мә дькә?

¹⁶ Йа сьсийа, чьqас дәсте wә те мәрьвед дьн рʹастийа Кʹьтеба Пироз һин кьн. Wи щурʹәйи, шурʹе рʹöһʹани, демәк «хәбәра Хwәде» wе qайим wәва бә (Әфәс. 6:17). Һәр кәс жь мә гәрәке чаwа дәрсдар пешда һәрʹә, кö «хәбәра рʹастийе» рʹаст шьровәкә (2 Тимтʹ. 2:15). Чахе әм али мәрьва дькьн, wәки рʹастийе бькʹьрʹьн у тьштед qәлп инкʹар кьн, һьнге гьлийед Хwәде кʹур һʹьш у дьле мәда рʹудьнен. Әw йәк мә һелан дькә кö бәрдәwам кьн рʹастийеда һәрʹьн.

17. Чьрʹа һун рʹастийе qимәт дькьн?

¹⁷ Йаһоwа пʹешкʹешәкә гәләк qимәт дайә мә, әw һәйә рʹасти. Бь сайа ве пʹешкʹеше, һәбунәкә мәзьн бал мә һәйә, әw һәйә һәләqәтийа мә тʹәви Баве мәйи әʹзмана. Чь жи әw һʹәта ньһа мә һин дькә, әw тʹәне дәстпебун ә. Хwәде соз дьдә, wәки әме һʹәта-һʹәтайе жь wи тьшта һин бьн. Ләма жи wәрә әм рʹастийе мина дöрʹәкә рʹьнд qимәт кьн. Бәрдәwам кьн рʹастийе бькʹьрʹьн у тʹö щар нәфьрошьн. Öса һуне жи мина Даwьд бьжин, анәгори wи сози кö wә дайә Йаһоwа: «Әз рʹастийа тәда һәрʹьм» (Зәб. 86:11, ДТʹ).