Итʹбарийа Хwә Йаһоwа Бинә у Жийине Бьстинә

1. Чьрʹа мә гьшкарʹа бәрдьли лазьм ә?

ҺӘР кәс жь мә һʹәwще бәрдьлийе йә. Дьбәкә әм бона тьштәки бәрхwә дькʹәвьн, дьлшькәсти нә, йан жи дьлтәнг ьн. Мәсәлә, дьqәwьмә әм нәхwәш кʹәтьнә, кал-пир дьбьн, йан жи мәрьве мәйи незик мьрийә. Һьнәк жь мә жи рʹасти нәһәqийа тен. Хенщи ве йәке, мәрьвед дор бәре мә һе хьраб у зöлм дьбьн. Бәле, әw «зәманед хьраб» әшкәрә дьдьнә кʹьфше, wәки әм «рʹожед ахьрийеда» дьжин у рʹож бь рʹож һе незики дьнйа тʹәзә дьбьн (2 Тимтʹ. 3:1). Ле дьбәкә ида гәләк wәхт ә әм һивийа созед Йаһоwа нә, у чәтьнайед мә һе зедә у зедә дьбьн. Гәло кʹидәре әм дькарьн бәрдьлийе бьстиньн?

2, 3. а) Дәрһәqа кʹьтеба Һәбаqуq әм чь заньн? б) Чьрʹа әме кʹьтеба Һәбаqуq шеwьр кьн?

² Сәва щаба ве пьрсе бьстиньн, wәрә әм кʹьтеба Һәбаqуq леколин бькьн. Рʹаст ә Кʹьтеба Пирозда дәрһәqа әʹмьр у шьхöлед Һәбаqуq һур бь һур найе готьне, ле йәкә әw кʹьтеб дькарә бәрдьликә мәзьн бьдә мә. Наве Һәбаqуq дьqәwьмә те һʹәсабе «Һʹәмеза бь Дьл». Әw нав нишан дькә, wәки Йаһоwа чь щурʹә бәр дьле мәда те, әw ча бежи мә бь дьл у щан һʹәмез дькә. Йан жи әw дьдә кʹьфше кö хьзмәткʹаред wи ча хwә незики wи дьгьрьн. Һәбаqуq тʹәви Хwәде хәбәр дьда у һьнә пьрс дьда wи. Пьрсед öса дькарьн бал мә жи пешда бен, ләма жи Йаһоwа рʹебәри кьр, wәки Һәбаqуq әве хәбәрдане бьньвисә (Һәбq. 2:2).

³ Кʹьтеба Пирозда хенщи ве хәбәрдана Һәбаqуq тʹәви Хwәде, дәрһәqа wи тьштәк найе готьне. Кʹьтеба wи пʹарәкә ве йәке йә, «чь кö пешда кʹьтебада һатә ньвисаре» у Хәбәра Хwәдеда һатә хwәйкьрьне, «wәки әм бь сәбьре у wан готьнед ньвисарада кö бине дьдьнә бәр мә», хwәйиһеви бьн (Рʹом. 15:4). Ле ча һәр кәс жь мә дькарә жь кʹьтеба Һәбаqуq кʹаре бьстинә? Әв кʹьтеб али мә дькә, wәки әм фәʹм кьн, чь те һʹәсабе итʹбарийа хwә Йаһоwа биньн. Һьн жи, пʹехәмбәртийа Һәбаqуq, дьл дьдә мә кö чаwа wәʹде тәнгасийа у чәтьнайа дьлрʹьһʹәт бьминьн. Ләма жи wәрә ньһа әм һур бь һур кʹьтеба Һәбаqуq шеwьр кьн.

ЙАҺОWАРʹА ДÖА БЬКЬН

4. Чьрʹа Һәбаqуq дьлшькәсти бу?

⁴ Бьхунә Һәбаqуq 1:2, 3. Һәбаqуq wәʹдәки гәләк чәтьнда дьжит. Дор бәре wи мәрьв гәләк хьраб у зöлм бун, у сәва ве йәке әw гәләк бәрхwә дькʹәт. Бал wи пьрс пешда дьһат: «Кʹәнге әв хьраби wе кʹöта бә? Чьрʹа Йаһоwа һаqас wәхт тьштәки накә?» Әwи пе чʹәʹве хwә дьдит кö мьләте wи ча берʹәʹм ьн у нәһәqийе дькьн. Әwи хwә тʹәне у беаликʹари тʹәхмин дькьр. Ләма әwи лавайа Йаһоwа дькьр, wәки әw тьштәки бькә. Һәбаqуq дькарьбу бьфькьрийа, wәки хәма Йаһоwа нинә кö чь дьqәwьмә, у нә жи те кʹьфше кö әw wе тьштәки бькә. Ле qә wә хwә мина wи öса тʹәхмин кьрийә?

5. Кʹижан дәрсәкә фәрз әм жь кʹьтеба Һәбаqуq һин дьбьн? (Бьньһерʹьн шькле әʹwльн.)

⁵ Гәло Һәбаqуq баwәрийа хwә һьндава Йаһоwа у созед wи öнда кьрьбу, ләма пьрсед öса бал wи пешда дьһатьн? Тʹö щар на! Рʹаст ә әw чәтьнайада бу у бинтәнг бу, ле йәкә әwи хwә бечʹарә һʹәсаб нәкьр, чьмки хәмед хwә да дәсте Йаһоwа, нә кö мәрьва. Ча те кʹьфше Һәбаqуq бәрхwә дькʹәт, чьмки фәʹм нәдькьр кö чьрʹа Йаһоwа һе тьштәки накә у дьһелә, wәки әw бьчәрчьрә. Йаһоwа Һәбаqуqрʹа гот, wәки дәрһәqа ве тәнгасийа хwә бьньвисә, чьмки бь ве йәке Йаһоwа дьхwаст мә һин кә, әве дәрса фәрз: Әм гәрәке нәтьрсьн дәрһәqа хәмед хwә у дöдьлибуна хwә Жерʹа гьли кьн. Бь рʹасти Йаһоwа хwәха мә тʹәглиф дькә, кö дöада дьле хwә жерʹа вәкьн (Зәб. 50:15; 62:8). Мәтʹәлок 3:5, (ДТʹ), жи дьл дьдә мә wәки әм «бь тʹәмамийа дьле хwә баwәрийа хwә Йаһоwа» биньн, у «итʹбарийа хwә һʹьше хwә» нәйньн. Һьлбәт, Һәбаqуq жи әw гьли заньбу у әʹмьре хwәда дьда хәбате.

6. Чьрʹа дöа гәләк фәрз ә?

⁶ Һәбаqуq итʹбарийа хwә Йаһоwа дьани, чаwа Дост у Баве хwә у незики wи дьбу. Әw нәдькʹәтә һәма тʹәне дәрде хwә у нә жи итʹбарийа хwә һʹьше хwә дьани. Дәwсе, әwи дәрд-кöла хwә дöада Хwәдерʹа гьли кьр, у ве йәкеда әwи мәсәла баш мәрʹа һиштийә. Йаһоwа, йе кö дöа дьбьһе, дьхwазә, wәки әм итʹбарийа хwә wи биньн у дöада хәмед хwә жерʹа гьли кьн (Зәб. 65:2). Һәрге әм öса бькьн, әме бьвиньн чаwа Йаһоwа щаба дöайед мә дьдә. Öса әме хwә һʹәмеза wида тʹәхмин кьн, кö әw ча бәр дьле мәда те у рʹебәрийе дьдә мә (Зәб. 73:23, 24). Фьрqи тʹöнә әм кʹижан чәтьнайеда бьн жи, әw wе али мә бькә кö әм фәʹм кьн, wәки әw ча дьньһерʹә сәр дәрәща мә. Гава әм бь дьл Йаһоwарʹа дöа дькьн, бь ве йәке әм нишан дькьн, wәки баwәрийа хwә wи тиньн.

ГÖҺ БЬДЬНӘ ЙАҺОWА

7. Йаһоwа ча хwә да кʹьфше, һьндава Һәбаqуq?

⁷ Бьхунә Һәбаqуq 1:5-7. Паши ве йәке кö Һәбаqуq хәм у дәрдед хwә да дәсте Йаһоwа, дьбәкә әw дьфькьри кö Йаһоwа ньһа wе чь бькә. Чаwа Баве дьлшәwат, Йаһоwа wи сущдар нәкьр бона ахә-аха wи. Әwи фәʹм дькьр кö Һәбаqуq жь еша дьле хwә дьчәрчьрә у дьлтәнг ә, ләма аликʹарийе жь wи дьхwазә. Ле Йаһоwа готә wи, wәки әw wе ахьрийеда чь бькә һьндава Щьһуйед нәамьн. Дьqәwьмә, Һәбаqуq мәрьве пешьн бу, кʹижанирʹа Йаһоwа әʹйан кьр кö зутьрәке wе wан мәрьвед зöлм щәза бькә.

8. Чьрʹа щаба Йаһоwа сәр дöайе Һәбаqуq, öса нибу чаwа Һәбаqуq һивийе бу?

⁸ Йаһоwа Һәбаqуqрʹа да кʹьфше, wәки әw һазьр ә ида тьштәки бькә. Щәзакьрьна ве рʹькʹьнийата зöлм у хьраб, ида незик бу. Чахе Йаһоwа гот wәки «рʹоже wәда» әw йәк wе бьбә, да кʹьфше кö wе wәʹде жийина Һәбаqуqда бьqәwьмә, йан жи wәʹде wан Исраелийа кö һьнге дьжитьн. Бәле, щаба Йаһоwа öса нибу чаwа Һәбаqуq дьфькьри. Чь кö Йаһоwа жерʹа гот, дьһатә һʹәсабе wәки щьмәʹта Щьһуда wе бе щәзакьрьне. Кʹьлдани (Бабилони), жь щьмәʹта Һәбаqуq кö дәрһәqа qанунед Йаһоwа заньбун, зöлмтьр у берʹәʹмтьр бун. Ле гәло чьрʹа Йаһоwа әw мьләте пʹутпʹарьст да хәбате, сәва щьмәʹта хwә щәза кә? Ле һуне чь бьфькьрийана, һәрге дәwса Һәбаqуq буна?

9. Дьбәкә бал Һәбаqуq кʹижан пьрс пешда дьһатьн?

⁹ Бьхунә Һәбаqуq 1:12-14, 17. Һәбаqуq фәʹм кьр, wәки Йаһоwа wе бь сайа Бабилонийа wан мәрьвед хьрабә дор бәре wи щәза бькә. Рʹаст ә һьнә тьшт диса жи Һәбаqуqрʹа нәфәʹмдари бун, ле әwи бь мьлукти готә Йаһоwа, wәки йәкә диса жи Әw бона wи «Qәйа» йә (Qан. Дщр. 32:4; Иша. 26:4). Һәбаqуq бь сәбьр бәрдәwам дькьр баwәрийа хwә һʹьзкьрьн у qәнщийа Йаһоwа бинә. Әве йәке qәwат да wи у әw нәтьрсийа диса дьле хwә Йаһоwарʹа вәкьр. Ле йәкә дьбәкә пьрсед öса бал wи пешда дьһатьн: Чьрʹа Йаһоwа дьһелә, wәки һʹале Щьһуда һе хьраб бә? Чьрʹа әw дәрберʹа тьштәки накә? Чьрʹа йе Һьмзор һе зедә хьрабийе сәбьр дькә? Чьрʹа әw хwә кәр дькә? Нә әw Пироз ә, у «жь дитьна хьрабийе чʹәʹве wи паqьж» ьн?

10. Ча әм щара дькарьн хwә мина Һәбаqуq тʹәхмин кьн?

¹⁰ Щара әм жи хwә мина Һәбаqуq тʹәхмин дькьн. Әм гöһ дьдьнә Йаһоwа, итʹбарийа хwә wи тиньн, Хәбәра wи дьхуньн у леколин дькьн у öса баwәрийеда дьшьдьн. Әм öса жи дәрһәqа созед wи дьбьһен, чахе гöһ дьдьнә рʹебәрийед кö тʹәшкиләта wи дьдә мә. Ле диса жи әм дьбәкә дьфькьрьн: «Гәло wе кʹәнге дәрд-кöлед мә хьлаз бьн?» Wәрә әм пебьһʹәсьн Һәбаqуq чь кьр, у чь әм дькарьн жь wи һин бьн.

ҺИВИЙА ЙАҺОWА БЬН

11. Һәбаqуq паши хәбәрдана хwә тʹәви Йаһоwа, ча хwә тʹәхмин дькьр?

¹¹ Бьхунә Һәбаqуq 2:1. Дьле Һәбаqуq рʹьһʹәт бу, чахе әwи тʹәви Йаһоwа хәбәр да. Әwи хwәрʹа сафи кьр, wәки бь сәбьр һивийе бә, һʹәта Йаһоwа тьштәки бькә. Һәбаqуq нә кö һәма дәмәке öса хwә да кʹьфше, ле әwи гот кö әwе «бь бедәнгийе ль бәнда . . . рʹожа тәнгасийе» бә (Һәбq. 3:16). Хьзмәткʹаред амьнә майин жи бь сәбьр һивийа Йаһоwа бун, у мәсәла wан дьл дьдә мә, кö әм жи öса бькьн (Мих. 7:7; Аqуб 5:7, 8).

12. Чь һьнә дәрс әм жь Һәбаqуq һин дьбьн?

¹² Гәло жь ньһерʹандьна Һәбаqуq әм чь һин дьбьн? Йа пешьн, фьрqи тʹöнә әм чь тәнгасийада ньн, әм гәрәке һәр гав Йаһоwарʹа дöа бькьн. Йа дöда, әм гәрәке гöһ бьдьнә гьлийед Йаһоwа, кʹижан әw бь сайа Хәбәра хwә у тʹәшкиләта хwә мәрʹа дьбежә. Йа сьсийа, әм гәрәке бь сәбьр һивийа Йаһоwа бьн, у бь тʹәмами итʹбарийа хwә wи биньн, кö әw wе wәʹдәда дәрде мә дәрман кә. Һәрге әм тʹьме тʹәви Йаһоwа хәбәр дьн у мина Һәбаqуq бь дьл һивийа wи бьн, әме жи дьлрʹьһʹәтийе бьстиньн, кʹижан кö wе али мә бькә сәбьр кьн. Баwәри һьндава Хwәде, wе qәwате бьдә мә wәки тәйах кьн, у әw йәк wе али мә бькә wәʹде чәтьнайа шабуна хwә öнда нәкьн. Бәле, баwәри дьл дьдә мә кö Баве мәйи әʹзмана wе әʹсә чʹарәке бькә (Рʹом. 12:12).

13. Чаwа Йаһоwа Һәбаqуq дьлрʹьһʹәт кьр?

¹³ Бьхунә Һәбаqуq 2:3. Һәбаqуq сафи кьр кö wе һивийа Йаһоwа бә, әw йәк һьлбәт дьле Йаһоwа хwәш һатийә. Йе Һьмзор һаш тәнгасийед Һәбаqуq һәбу, ләма жи әw бь һʹьзкьрьн бәр дьле wида һат, у нәрм wирʹа гот, кö әw wе әʹсә щаба пьрсед хwә бьстинә у жь дәрдед хwә аза бә. Ча бежи Хwәде жерʹа öса гот: «Бь сәбьр бә у итʹбарийа хwә мьн бинә. Әзе әʹсә щаба дöайе тә бьдьм, һәрге жи тәрʹа бе кʹьфше кö дәрәнги дькʹәвә!». Йаһоwа ани бира wи, wәки Әwи wәʹдә ида кʹьфш кьрийә, кö кʹәнге созед хwә бинә сери. Әwи дьл да Һәбаqуq, wәки бәрдәwам кә һивийе бә. Wи щурʹәйи, әw пʹехәмбәр ида wе дьлшькәсти нибуйа.

14. Wәʹде тәнгасийа әм гәрәке чь бькьн?

¹⁴ Әм жи гәрәке бь сәбьр һивийа Йаһоwа бьн у гöһ бьдьнә wи. Әw йәк wе али мә бькә wида дöдьли нибьн у wәʹде чәтьнайи у кöл-дәрда, дьлрʹьһʹәт бьн. Иса мәрʹа да кʹьфше кö әм гәрәке һʹьш-аqьле хwә данәйньнә сәр «wәхт у зәмана», кʹижан кö Хwәде мәрʹа әʹйан нәкьрийә (Кʹар. Шанд. 1:7). Ләма жи wәрә әм тʹö щар дәстед хwә сьст нәкьн, ле дәwсе бь мьлукти, баwәри у сәбьре һивийа wи бьн. Wи wәʹдәйи öса жи әм гәрәке wәʹде хwә бь аqьлайи хәрщ кьн у чьqас дәсте мә те Йаһоwарʹа хьзмәт кьн (Марq. 13:35-37; Галт. 6:9).

ИТʹБАРИ ҺЬНДАВА ЙАҺОWА ЖИЙИН У АХЬРИЙА БАШ ТИНӘ

15, 16. а) Кʹьтеба Һәбаqуqда, әм дәрһәqа кʹижан соза дьхуньн? б) Әw соз чь мә һин дькьн?

¹⁵ Йаһоwа соз дьдә wан мәрьвед рʹаст кö итʹбарийа хwә wи тиньн: «Йе сальһ [йе рʹаст], бь баwәрийа хwә бьжи» у «гәрдун жи öса бь мәзьнти у занийарийа Хöданва тʹьжи бьбә» (Һәбq. 2:4, 14). Бәле, әwед кö бь сәбьр һивийа Йаһоwа нә у чʹәʹве wан сәр wи йә, wе бь әʹмьре һʹәта-һʹәтайе бенә кʹәрәмкьрьне.

¹⁶ Бьфькьрьн дәрһәqа созе жь кʹьтеба Һәбаqуq 2:4. Әw соз öса фәрз ә, кö Паwлосе шанди нәʹмед хwәда се щара бәʹса ве рʹезе кьр (Рʹом. 1:17; Галт. 3:11; Ибрн. 10:38). Чь тәнгаси жи рʹасти мә бен, һәрге әм баwәрийа хwә Йаһоwа биньн у жерʹа амьн бьминьн, әме бьвиньн ча созед Йаһоwа тенә сери. Йаһоwа дьхwазә wәки чʹәʹве мә сәр ве ахьрийа баш бә, кö һивийа мә йә.

17. Кʹьтеба Һәбаqуq чьда дьл дьдә мә?

¹⁷ Әм рʹожед ахьрийеда дьжин, у кʹьтеба Һәбаqуq дәрсәкә qәwи дьдә мә. Йаһоwа жийина һʹәта-һʹәтайе соз дьдә һәр мәрьвәки рʹаст, йе кö итʹбарийа хwә wи тинә. Wәрә әм бәрдәwам кьн һәр щурʹә чәтьнайи у тәнгасийеда, баwәри у итʹбарийа хwә һьндава Хwәде qәwи кьн. Йаһоwа бь сайа кʹьтеба Һәбаqуq мәрʹа дьбежә, wәки Әw wе али мә бькә у мә хьлаз кә. Әw бь нәрми һиви мә дькә, wәки әм бь сәбьр һивийа wәʹде wийи кʹьфшкьри бьн, гава тʹәмамийа әʹрде бьн Пʹадшатийа wида, бь хьзмәткʹаред бәхтәwар у мьлук тʹьжи бә (Мәт. 5:5; Ибрн. 10:36-39).

БЬ ШАБУНЕ ИТʹБАРИЙА ХWӘ ЙАҺОWА БИНЬН

18. Чаwа гьлийед Йаһоwа сәр Һәбаqуq һʹöкöм бун?

¹⁸ Бьхунә Һәбаqуq 3:16-19. Гьлийед Йаһоwа сәр Һәбаqуq гәләк qайим һʹöкöм бун. Әw кʹур фькьри сәр кьред Йаһоwайи мәзьн, кö әwи бәре бона щьмәʹта хwә кьрьбу. У паши ве йәке Һәбаqуq гәш бу у итʹбарийа wи һьндава Йаһоwа диса зедә бу. Әwи заньбу кö wе Йаһоwа зутьрәке тьштәки бькә! Әwе йәке дьле Һәбаqуq рʹьһʹәт кьр, ле wи wәʹдәйи әwи öса жи фәʹм дькьр, wәки кöл-дәрде wи, wе диса һьнә wәʹдә бькʹьшинә. Ида шьк дьле Һәбаqуqда тʹöнә бу, дәwсе әwи бь тʹәмами итʹбарийа хwә Йаһоwа ани, кö Хwәде wе wи хьлаз кә. Рʹеза 18-да жь гьлийед Һәбаqуq те кʹьфше, кö әw пʹехәмбәр йәк жь wан мәрьва йә, кʹижана баwәрикә гәләк мәзьн данә кʹьфше. Һьнә зандар дьфькьрьн, wәки рʹеза 18 рʹастә-рʹаст öса те һʹәсабе: «Әзе шабуна Хöданда банздьм; Әзе шабуна Хwәдеда бьрәqьсьм». Рʹасти жи жь гьлийед Һәбаqуq әм гәләк qәwи дьбьн! Йаһоwа нә кö тʹәне созед баш дайә мә, ле әw мә дьдә баwәркьрьне, wәки әw ньһада кʹаре хwә дькә, сәва qьрара хwә бинә сери.

19. Чаwа әм жи дькарьн мина Һәбаqуq бәрдьлийе бьстиньн?

¹⁹ Дәрсәкә гәләк фәрз кö әм жь Һәбаqуq һин дьбьн, әw ә кö тʹö щар Йаһоwада дöдьли нәбьн (Һәбq. 2:4). Һәрге һәләqәтийа мә тʹәви Йаһоwа qәwи бә, әме итʹбарийа хwә һьндава wи öнда нәкьн. Сәва ве йәке әм гәрәке 1) бона һʹәму хәм у шькед хwә, һәр гав Йаһоwарʹа дöа бькьн, 2) гöһ бьдьнә Хәбәра Йаһоwа у һʹәму рʹебәрийед кö әм жь тʹәшкиләта wи дьстиньн, у 3) бь амьни у бь сәбьр һивийа Йаһоwа бьн. Һәбаqуq һәма öса жи дькьр. Рʹаст ә әwи кʹьтеба хwә бь ахинийе дәстпекьр, ле хьлазийеда бь баwәрийа qәwи у шабуне хьлаз кьр. Wәрә әм жи чʹәʹв бьдьнә Һәбаqуq у хwә һʹәмеза Баве хwә Йаһоwада тʹәхмин кьн! Ве дьнйа хьрабда, бәрдьликә öса мәзьн, әм тʹö щики нькарьн бьвиньн!