Кʹе сәр Һʹьш-Аqьле Тә Һʹöкöм Дькә?

1, 2. а) Иса ча щаба Пәтрус да, чахе әwи гот кö «һьндава хwәда qәнщ бә»? (Бьньһерʹә шькле әʹwльн.) б) Чьрʹа Иса öса щаба wи да?

ШАГЬРТЕД Иса нькарьбун баwәр кьрана чь кö әwана жь wи бьһистьн. Wана тʹьре кö Иса гәрәке пʹадшатийа Исраелийа вәгәрʹанда, ле әwи wанрʹа гот кö гәрәке зутьрәке бьчәрчьрә у бьмьрә. Пәтрус дәрберʹа wи бьрә алики у жерʹа гот: «Һьндава хwәда qәнщ бә, Хöдан! Әw тьшт wе тʹö щар нәйе сәре тә!». Ле Иса wи вәгәрʹанд у гот: «Дури мьн һәрʹә, Шәйтʹан! Тö кәвьр и пешийа мьн, чьмки әw фькьред тә нә жь Хwәде нә, ле жь мәрьва нә» (Мәт. 16:21-23, ДТʹ; Кʹар. Шанд. 1:6).

² Бь wан гьлийа Иса да кʹьфше фьрqийа ортʹа фькьред кö жь Хwәде тен у фькьред кö жь ве дьнйа Шәйтʹан тен (1 Йуһʹн. 5:19). Пәтрус һьнге ньһерʹандьна ве дьнйайе да кʹьфше, кʹижан кö мәрьва һелан дькә тʹәне бона хwә бьфькьрьн у хwә нәдьнә щәфе. Ле Иса заньбу wәки Баве wи щурʹәки майин дьфькьрә. Әwи заньбу wәки Хwәде дьхwәст, кö әw һʹьш-аqьле хwә дайнә сәр тьштед кö пешийа wи бун, демәк чәрчьрандьн у мьрьн. Иса пе щаба хwә Пәтрусрʹа, әшкәрә да кʹьфше wәки әw ньһерʹандьна Йаһоwа qәбул дькә, ле ньһерʹандьна ве дьнйайе инкʹар дькә.

3. Чьрʹа чәтьн ә мина Йаһоwа бьфькьрьн?

³ Ле дәрһәqа хwә әм чь дькарьн бежьн? Гәло фькьред мә мина йед Хwәде нә, йан мина ве дьнйайе? Фәʹмдари йә, әм һәр тьшти дькьн сәва пе шьхöлед хwә дьле Хwәде ша кьн. Ле дәрһәqа фькьред хwә әм чь дькарьн бежьн? Гәло әм фькьр у ньһерʹандьна хwә дькьнә анәгори йед Йаһоwа? Бона ве йәке лазьм ә әм гәләк сәр хwә бьхәбьтьн. Бь рʹасти мәрьв һеса дькарә мина ве дьнйайе бьфькьрә, чьмки рʹöһʹе ве дьнйайе дор бәре мә йә (Әфәс. 2:2). Һьн жи, рʹöһʹе ве дьнйайе мәрьва һелан дькә кö хwәһʹьз бьн, ләма жи әw фькьр дькарьн дьле гәләка бен. Бәле, чәтьн ә мина Йаһоwа бьфькьрьн, ле гәләк һеса йә мина мәрьвед ве дьнйайе бьфькьрьн.

4. а) Чь wе бьqәwьмә һәрге әм бькʹәвьнә бәр байе фькьред ве дьнйайе? б) Әw готар чьда wе али мә бькә?

⁴ Ле һәрге әм бьһельн, кö әв дьнйа һʹöкöми сәр фькьред мә кә, әме бьбьнә хwәһʹьз у бьхwазьн хwә сәри хwә бьн, кö хwәха сафи кьн чь рʹаст у чь хьраб ә (Марq. 7:21, 22). Ләма жи гәләк фәрз ә кö «фькьред» мә мина йед Хwәде бьн, нә кö йед мәрьва. Ве йәкеда әw готар wе али мә бькә. Әме шеwьр кьн, кö һәрге фькьред мә мина йед Йаһоwа бьн, әw нә кö wе мә бькә синора, ле кʹаре бинә. Öса жи әw готар wе нишан кә, чаwа нәкʹәвьнә бәр байе фькьред ве дьнйайе. Ле готара дьнда, әме шеwьр кьн кö чаwа сәр щурʹә-щурʹә тьшта мина Йаһоwа бьфькьрьн у фькьред wи бькьнә йед хwә.

ФЬКЬРЕД ЙАҺОWА КʹАРЕ МӘРʹА ТИНЬН

5. Чьрʹа һьнәка хwәш найе, wәки кәсәки сәр фькьрандьна wан һʹöкöм кә?

⁵ Һьнә мәрьва хwәш найе, wәки кәсәк сәр фькьрандьн у ньһерʹандьна wан һʹöкöм кә. Әwана дьбежьн: «Әва ише мьн ә, әз хwә сәри хwә мә». Бь wи щурʹәйи әwана дьбәкә нишан дькьн, кö дьхwазьн хwәха сафикьрьнед хwә бькьн, у бь рʹасти әw йәк гәрәке öса бә. Әw мәрьв нахwазьн кәсәк wана контрол кә, йан жи зоре бькә кö мина мәрьвед дор бәре хwә бьн.a

6. а) Йаһоwа чь азайи дайә мә? б) Гәло әw азайи бесинор ә?

⁶ Ле һәрге әм мина Йаһоwа бьфькьрьн, әw найе һʹәсабе wәки фькьред мәйә шәхси тʹöнә у әм нькарьн бь һʹьше хwә дьшьрмиш бьн. Әм 2 Корьнтʹи 3:17-да дьхуньн: «Хöдан ль кʹö дәре бә, ль wе дәре жи азайи һәйә». Бәле, азайа мә һәйә кö бьбьнә мәрьве öса, чаwа әм дьхwазьн. Бал мә һәнә тьштед öса кö мә хwәш тен у мәрʹа һʹәwас ьн. Бь рʹасти Йаһоwа мә бь ве азайе әʹфьранд. Ле йәкә ве азайеда синор һәнә. (Бьхунә 1 Пәтрус 2:16.) Чахе әм гәрәке бьжберьн кö чь рʹаст у чь нәрʹаст ә, әм гәрәке пе рʹебәрийа Хәбәра wи һәрʹьн, кʹидәре Хwәде мәрʹа дәрһәqа фькьред хwә әʹйан дькә. Ле гәло әw те һʹәсабе wәки Йаһоwа һьндава мәда сәрт ә, йан әw кʹара мә дьхwазә?

7, 8. Һәрге әм сәр тьшта мина Йаһоwа дьфькьрьн, чьрʹа әв йәк мә накә синора? Мәсәле биньн.

⁷ Бьфькьрьн дәрһәqа ве мәсәле. Де-бав чахе зарʹед хwә мәзьн дькьн, тьштед qәнщ һин дькьн у ширәт дькьн. Әwана зарʹед хwә һин дькьн кö һʹәлал бьн, хәбатһʹьз бьн у бона мәрьвед дьн хәм бькьн. Әw йәк алийе wанда сәрт нинә, дәwсе, бь ве йәке де-бав wана һазьр дькьн сәва зарʹ ахьрийеда бәхтәwар бьжин. Чахе зарʹ мәзьн дьбьн у башqә дьбьн, әwана ида аза нә у хwәха сафикьрьна дькьн. Һәрге әwана бьжин öса чаwа де-бав әwана һинкьрьнә, wе әʹмьре хwәда сафикьрьнед öса бькьн, кö паше пʹошман нәбьн. Wи щурʹәйи зарʹ wе хwә жь гәләк проблема у дьлтәнгбуне хwәй кьн.

⁸ Мина бавәки qәнщ, Йаһоwа дьхwазә wәки зарʹед wи бь әʹмьрәки бәхтәwар бьжин (Иша. 48:17, 18). Бона ве йәке, әwи принсипед дәрһәqа намусийе у рʹабун-рʹуньштьне дайә мә у öса жи ширәт кö ча бьн һьндава мәрьва. Әw дьхwазә wәки әм сәр wан тьшта мина wи бьфькьрьн у анәгори ве йәке бьжин. Әв йәк мә нә кö дькә синора, ле мә аqьл дькә, һин дькә рʹаст бьфькьрьн у тьшта бьщерʹьбиньн (Зәб. 92:5; Мәтʹлк. 2:1-5; Иша. 55:9). Әw йәк wе али мә бькә сафикьрьнед öса бькьн, кʹижан кö wе мә бәхтәwар кьн у хәйсәт-һʹöнöред мә баш кьн (Зәб. 1:2, 3). Бәле, чахе әм мина Йаһоwа дьфькьрьн, әм гәләк тьштада кʹаре дьстиньн.

ФЬКЬРЕД ЙАҺОWА ҺӘРИ БЬЛЬНД ЬН

9, 10. Чьда фькьред Йаһоwа жь фькьред ве дьнйайе бьльндтьр ьн?

⁹ Диса мәʹник һәйә кö чьрʹа хьзмәткʹаред Йаһоwа дьхwазьн, wәки фькьрандьна wан мина йа Хwәде бә. Фькьред Йаһоwа жь фькьред ве дьнйайе бьльндтьр ьн. Рʹаст ә әв дьнйа ширәта дьдә кö рʹабун-рʹуньштьн гәрәке ча бә, чаwа малбәтеда бәхтәwар бьн, ча хәбата баш бьжберьн, у диса тьштед дьн, ле һʹәчʹи зәʹф әw ширәт жь фькьред Йаһоwа лап щöдә дьбьн. Мәсәлә, әв дьнйа мәрьва һелан дькә тʹәне кʹара хwә бьгәрʹьн у бона хwә бьфькьрьн. Һьн жи әw мәрьва дьдә баwәркьрьне, wәки бенамусийеда тьштәки хьраб тʹöнәйә. Öса жи әw дьнйа фькьред öса бәла дькә, кö мер у жьн дькарьн бона һәр мәʹни жи башqә бьжин йан жи һәв бьqәтьн, һәрге әw йәк wана һе бәхтәwар кә. Әw һʹәму ширәт у ньһерʹандьн бь тʹәмами мьqабьли һинкьрьнед Кʹьтеба Пироз ьн. Ле гәло дькарә öса бә кö һьнә ширәтед ве дьнйайе иро һе керһати бьн, нә кö ширәтед Кʹьтеба Пироз?

¹⁰ Иса гот: «Сәрwахти бь әʹмәлед хwә кʹьфш дьбә» (Мәт. 11:19). Әw дьнйа алийе техноложида гәләк пешда чуйә, ле йәкә әw нькарә проблемед мәзьн сафи кә, сәва мәрьв бәхтәwар бьжин, мәсәлә шәрʹ, расизм у зорбәтийе нькарә бьдә һьлдане. Хенщи ве йәке, әw дьнйа бенамусийе qәбул дькә. Гәләк мәрьв фәʹм дькьн, wәки бенамуси нәфәра жь һәв дьqәтинә, нәхwәшийа пешда тинә у диса тьштед хьраб. Ле Йаһоwа wан тьштада чь ширәта дьдә? Мәсиһийед кö мина Йаһоwа сәр wан тьшта дьньһерʹьн, малбәтеда бәхтәwар ьн, сьһʹәт-qәwата wан һе баш ә, чьмки нав-намус дьжин, у нава бьратийа һʹәмдьнйайеда әʹдьлайи жи һәйә (Иша. 2:4; Кʹар. Шанд. 10:34, 35; 1 Корн. 6:9-11). Бәле, әw йәк әшкәрә дьдә кʹьфше, wәки фькьред Йаһоwа жь фькьред ве дьнйайе гәләк бьльндтьр ьн.

11. Кʹе фькьрандьна Муса дьгöһаст, у ахьрийа ве йәке чь бу?

¹¹ Хьзмәткʹаред Йаһоwайи бәре, заньбун wәки фькьред Йаһоwа чьqас бьльнд ьн. Мәсәлә, Муса кö «тʹәмамийа сәрwахтийа мьсьрийа» һин бу, жь Хwәде хwәст wәки «дьләки сәрwахт» жерʹа бьдә (Кʹар. Шанд. 7:22; Зәб. 90:12). Әwи öса жи жь Йаһоwа һиви кьр: «Рʹийед хwә ль бәр мьн вәкә» (Дәркʹ. 33:13). Муса хwәст wәки Йаһоwа фькьрандьна wи бьгöһезә, ләма жи Йаһоwа wи да хәбате сәва qьрара Wи бинә сери. Һьн жи Йаһоwа qәдьрәки öса да wи, кö Кʹьтеба Пироз Муса ча мәрьвәки бь баwәрийа qәwи әʹйан дькә (Ибрн. 11:24-27).

12. Фькьрандьна Паwлос сәр һʹиме чь бу?

¹² Паwлосе шанди мәрьвәки аqьл у хwәнди бу, кʹижан кö лап кем сәр 2 зьмана хәбәр дьда (Кʹар. Шанд. 5:34; 21:37, 39; 22:2, 3). Ле чахе әwи гәрәке бьжбарта чь рʹаст ә у чь на, әwи нә кö фькьред ве дьнйайе һьлдьда һʹәсаб, ле фькьред wи сәр һʹиме Хәбәра Хwәде бун. (Бьхунә Кʹаред Шандийа 17:2; 1 Корьнтʹи 2:6, 7, 13.) Бь сайа ве йәке, Паwлос хьзмәтийеда гәләк пешдачуйи бу у хәлата жийина һʹәта-һʹәтайе станд (2 Тимтʹ. 4:8).

13. Кʹе щабдар ә сәва фькьрандьна мә ль гора фькьрандьна Йаһоwа бьгöһезә?

¹³ Әшкәрә йә, фькьред Йаһоwа жь йа ве дьнйайе бьльндтьр ьн. Һәрге әм анәгори фькьрандьна wи бьжин, әме бәхтәwар у пешдачуйи бьн. Ле Йаһоwа тʹö щар зоре мә накә, wәки мина wи бьфькьрьн. Нә «хöламе амьн у сәрwахт» у нә жи рʹуспи, фькьред мә контрол накьн (Мәт. 24:45; 2 Корн. 1:24). Һәр кәс жь мә щабдар ә, wәки фькьрандьна хwә ль гора фькьрандьна Хwәде бьгöһезә. Ле ча әм дькарьн ве йәке бькьн?

НӘҺЕЛЬН ӘВ ДЬНЙА ФЬКЬРАНДЬНА WӘ БЬГÖҺЕЗӘ

14, 15. а) Сәва кö мина Йаһоwа бьфькьрьн, әм гәрәке һʹьше хwә бь чь тʹьжә кьн? б) Ль гора Рʹомайи 12:2, чьрʹа әм гәрәке хwә жь фькьред ве дьнйайе дур бьгьрьн? Мәсәле биньн.

¹⁴ Рʹомайи 12:2-да те готьне: «Нәкʹәвьнә кьрасе бәнде ве дьнйайе, ле һʹьш-аqьле хwә ну кьн у бь ве йәке wәрьн гöһастьн, сәва фәʹм кьн чь йә qьрара Хwәде, кö qәнщи, хwәши у кʹамьли йә, (ДТʹ)». Әw рʹез нишан дькә, кö һәрге жи фькьрандьна мә нәрʹаст бу пешийа кö әм рʹастийе пеһʹәсийан, йәкә әм дькарьн фькьрандьна хwә бьгöһезьн, бькьн мина йа Хwәде. Öса жи рʹаст ә генетика мә у öса жи qәwьмандьнед әʹмьре мәда һьнәк сәр фькьрандьна мә һʹöкöм бунә, йәкә әм дькарьн һʹьше хwә бьгöһезьн. Әм чь жи дькьнә һʹьше хwә у сәр чь жи гәләк дьфькьрьн, әw йәк һʹьше мә дьгöһезә. Демәк, һәрге әм кʹур дьфькьрьн дәрһәqа фькьред Йаһоwа, әме фәʹм кьн wәки ньһерʹандьна wи тʹьме рʹаст ә. Паше ида әме хwәха бьхwазьн сәр тьшта мина wи бьньһерʹьн.

¹⁵ Дина хwә бьдьне, кö сәва фькьрандьна мә мина йа Йаһоwа бә, әм гәрәке «нәкʹәвьнә кьрасе бәнде ве дьнйайе». Әм гәрәке нәһельн, wәки фькьр йан жи ньһерʹандьна кö Хwәде qәбул накә, бькʹәвьнә һʹьше мә. Wәрә пе мәсәле бьвиньн, кö чьрʹа әw йәк гәләк фәрз ә. Бәʹса хәбәре, кәсәк дьхwазә wәки сьһʹәт-qәwата хwә баш кә, у ләма сафи дькә тʹәне хwарьна баш у керһати бьхwә. Ле һәрге әw һьн жи тʹьме хwарьна нәтʹәмьз бьхwә, әw йәк wе жерʹа кʹаре нәйнә. Һәрге әм жи һʹьше хwә пе фькьред Йаһоwа тʹьжә дькьн у wи wәʹдәйи öса жи дьһельн wәки әw дьнйа сәр фькьрандьна мә һʹöкöм кә, әме тʹö кʹаре нәстиньн.

16. Жь чь әм гәрәке хwә хwәй кьн?

¹⁶ Ле гәло әм бь тʹәмами дькарьн хwә жь ве дьнйайе дур бьгьрьн? На, әм нькарьн хwә жь ве дьнйайе бь тʹәмами бьqәтиньн, йан жи лап дәркʹәвьн (1 Корн. 5:9, 10). Әм нькарьн хwә жь ве йәке хwәй кьн илаһи wәʹде хьзмәтийе, чьмки дьхwази нахwази әм фькьред нәрʹаст у һинкьрьнед qәлп дьбьһен. Рʹаст ә әм нькарьн хwә жь wан тьшта бь тʹәмами хwәй кьн, ле әм гәрәке әw фькьред кö Хwәде хwәш найен, qәбул нәкьн у сәр дьшьрмиш нәбьн. Мина Иса, әм гәрәке дәрберʹа инкʹар кьн wан фькьра, кʹижан жь Шәйтʹан ньн. Öса әме нәкʹәвьнә бәр байе фькьред ве дьнйайе. (Бьхунә Мәтʹәлок 4:23.)

17. Әм чь щурʹәйи дькарьн нәкʹәвьнә бәр байе фькьред ве дьнйайе?

¹⁷ Мәсәлә, әм гәрәке фәсал бьн кö тʹәви кʹе әм һәвалтийе дькьн. Кʹьтеба Пироз пешда ширәте дьдә мә, wәки тʹәви wан мәрьва һәвалтийе нәкьн, йед кö Йаһоwарʹа хьзмәт накьн, чьмки фькьред wан wе дәрбази мә бьн (Мәтʹлк. 13:20; 1 Корн. 15:12, 32, 33). Әм öса жи wәʹдәдәрбазкьрьна гәрәке фәсал бьжберьн. Һәрге әм инкʹар дькьн wан wәʹдәдәрбазкьрьна, кʹидәре теорийа еволусйайе, зорбәти, йан жи бенамуси һәйә, әме пе wан фькьред кö «мьqабьли занәбуна Хwәде» нә, һʹьше хwә жәʹрдадайи нәкьн (2 Корн. 10:5).

18, 19. а) Чьрʹа әм гәрәке фәсал бьн чахе әшкәрә фькьред ве дьнйайе навиньн? б) Кʹижан пьрса әм гәрәке бьдьнә хwә у чьрʹа?

¹⁸ Öса жи фәрз ә кö әм тедәрхьн у инкʹар кьн фькьред ве дьнйайе һьнге жи, гава әw фькьр әшкәрә найенә кʹьфше. Мәсәлә, нучада тьштед öса дьбежьн, чь кö пьштгьрийа ньһерʹандьна политика дькә. Йан жи һәнә сәрһатийед öса, кö бәрбь нетед ве дьнйайе һелан дькьн. Һьнә филм у кʹьтеб жи әве ньһерʹандьне бәла дькьн кö мәрьв хwәһʹьз бьн, у малбәта хwә сәр һәр тьштирʹа бьгьрьн. Гәләк мәрьв дьфькьрьн, wәки әw йәк аqьлайи йә, баш ә у рʹаст ә жи. Ле Кʹьтеба Пироз һин дькә, wәки мәрьв гәрәке һʹьзкьрьна Йаһоwа сәр һʹәму тьштирʹа бьгьрә, у тʹәне һьнге әw у малбәта wи бь рʹасти дькарә бәхтәwар бә (Мәт. 22:36-39). Öса жи һьнә сәрһатийед бона зарʹа, мәсәлә филмада йан жи кʹьтебада, кö гәләк мәрьв qәбул дькьн, дькарьн зарʹа һелан кьн, wәки рʹабун-рʹуньштьна бенамуси qәбул кьн.

¹⁹ Ле әв һʹәму тьшт найе һʹәсабе, wәки нәрʹаст ә һәрге әм wәʹдәдәрбазкьрьна баш qәбул кьн. Йәкә әм гәрәке пьрсед öса бьдьнә хwә: «Гәло әз дәрберʹа һинкьрьнед ве дьнйайе тедәрдьхьм, һәла һе йед кö әшкәрә найен кʹьфше? Гәло әз хwә у зарʹа хwә хwәй дькьм, wәки хwә дур бьгьрьн жь телевисйона йан жи хwәндьна wан тьшта, кö фькьред ве дьнйайе бәла дькьн? Гәло әм инкʹар дькьн фькьред ве дьнйайе кö әм дьбьһен, у али зарʹед хwә дькьн, wәки мина Йаһоwа бьньһерʹьн сәр тьшта?». Һәрге әм тедәрдьхьн фьрqийа ортʹа фькьред Хwәде у йед ве дьнйайе, әме «нәкʹәвьнә кьрасе бәнде ве дьнйайе».

КʹЕ НЬҺА ФЬКЬР У НЬҺЕРʹАНДЬНА ТӘ ДЬГÖҺЕЗӘ?

20. Чаwа фәʹм кьн кö кʹе фькьред мә дьгöһезә?

²⁰ Бир нәкьн wәки һәнә дö канийед информасийе, әw һәйә йа Йаһоwа у йа дьнйа Шәйтʹан. Ле кʹижан кани сәр мә һʹöкöм дькә? Щаб әw ә, кö әм жь кʹидәре информасийе дьстиньн. Һәрге әм фькьред ве дьнйайе qәбул дькьн, әв дьнйа wә һʹьш-аqьле мә бьгöһезә, у әме мина мәрьвед ве дьнйайе бьфькьрьн у рʹабун-рʹуньштьна мә жи мина йед wан бә. Ләма жи гәләк фәрз ә әм мьqати хwә бьн кö нәһельн фькьр у ньһерʹадьна ве дьнйайе бькʹәвә һʹьше мә.

21. Дәрһәqа чь тьште фәрз әме готара дьнда шеwьр кьн?

²¹ Чаwа мә жоре шеwьр кьр, сәва әм мина Йаһоwа бьфькьрьн, бәс нинә тʹәне һʹьше хwә жь һʹöкöме хьраб хwәй кьн. Әм öса жи гәрәке һʹьше хwә бь фькьред Хwәде тʹьжә кьн, сәва мина wи бьфькьрьн. Готара дьнда әме шеwьр кьн кö чаwа әм дькарьн ве йәке бькьн.