Бьра Фькьред Тә Мина йед Йаһоwа бьн

1, 2. Чахе әм рʹöһʹанида пешда дьчьн, әм чь һин дьбьн? Мәсәле биньн.

БЬДЬНӘ бәр чʹәʹве хwә кәсәк пʹешкʹешәки дьдә зарʹа бьчʹук у де-баве wи дьбежьне: «Бежә зәʹф рʹази мә». Зарʹ гöрʹа де-баве хwә дькә у әwан гьлийа дьбежә. Ле чахе әw мәзьн дьбә, ида ньһерʹандьна де-бава фәʹм дькә, кö чьрʹа wана дьхwәст әw йәки шекьр бә у һьндава мәрьвада һʹәйф бә. Ахьрийеда, әw ида хwәха рʹазибуна хwә мәрьварʹа дьдә кʹьфше, чьмки öса һин буйә у жерʹа буйә хәйсәт.

² Дәрәща мә жи мина ве йәке йә. Чахе әм тʹәзә һатьнә сәр рʹийа рʹаст, әм пеһʹәсийан кö чьqас фәрз ә гöрʹа тʹәмийед сәрәкә бькьн, кö Йаһоwа дьдә мә. Ле чахе әм ида рʹöһʹанида мәзьн бун, әм һе зедә пеһʹәсийан дәрһәqа хәйсәт у фькьред Йаһоwа, мәсәлә чь wи хwәш те у чь на, у öса жи ча әw сәр щурʹә-щурʹә тьшта дьньһерʹә. Чахе әм дьһельн wәки фькьред Йаһоwа сәр сафикьрьн у кьред мә һʹöкöм кьн, әм дәстпедькьн ида мина wи бьфькьрьн.

3. Чьрʹа һеса нинә һин бьн мина Йаһоwа бьфькьрьн?

³ Мә хwәш те чахе әм дәрһәqа фькьред Йаһоwа педьһʹәсьн, ле әм гöнәкʹар ьн у ләма щара һеса нинә, wәки әм жи мина wи бьфькьрьн. Бәʹса хәбәре, әм заньн кö Йаһоwа ча дьньһерʹә сәр бенамусийе, пʹәрәһʹьзийе, шьхöле бәлакьрьна мьзгинийе, бәридайина хуне, у диса тьштед дьн. Ле дьбәкә мәрʹа чәтьн ә фәʹм кьн ньһерʹандьна wи сәр wан тьшта. Һьнге чь әм гәрәке бькьн? Чаwа әм дькарьн һин бьн мина Йаһоwа бьфькьрьн? У чаwа әw йәк али мә дькә ча ньһа öса жи ахьрийеда сафикьрьнед баш бькьн?

ЧАWА ФЬКЬРЕД ЙАҺОWА ДЬКАРЬН БЬБЬНӘ ФЬКЬРЕД МӘ

4. Чь те һʹәсабе әw гьлийед Паwлос: «Һʹьш-аqьле хwә ну кьн»?

⁴ Бьхунә Рʹомайи 12:2. Ве рʹезеда Паwлосе шанди шьровәкьр, кö чь те һʹәсабе һин бьн мина Йаһоwа бьфькьрьн. Готара пешийа ве, али мә кьр wәки әм фәʹм кьн кö әм гәрәке инкʹар кьн фькьр у ньһерʹандьнед ве дьнйайе, сәва «нәкʹәвьнә кьрасе бәнде ве дьнйайе». Ле Паwлос öса жи гот кö әм гәрәке «һʹьш-аqьле хwә ну кьн, ДТʹ». Әw те һʹәсабе, wәки әм гәрәке Хәбәра Хwәде леколин бькьн, сәва фькьред wи тедәрхьн у сәр дьшьрмиш бьн, сәва бь ньһерʹандьна Хwәде сәр тьшта бьньһерʹьн.

5. Шьровәкьн фьрqийа ортʹа хwәндьна сәрʹа-бәрʹа у леколинкьрьне.

⁵ Леколинкьрьн хwәндьна сәрʹа-бәрʹа у тʹәне кʹьфшкьрьна щабед пьрса нинә. Чахе әм леколина дькьн, әм педьһʹәсьн дәрһәqа Йаһоwа, рʹейед wи у фькьред wи. Паше, әм дьхwазьн тедәрхьн у фәʹм кьн, чьрʹа Йаһоwа фьлан тʹәмийе дьдә йан жи фьлан тьшти qәдәхә дькә. Әм öса жи дьфькьрьн, кö гәрәке әʹмьр у фькьред хwәда чь гöһастьна бькьн. Рʹаст ә wәʹде леколинкьрьне дьбәкә әме һәма щарәкерʹа нькарьбьн сәр wан һʹәму тьшта бьфькьрьн, ле йәкә әме кʹаре бьстиньн, һәрге wәʹде леколине ниве wәʹдә хәрщ кьн, сәва бьфькьрьн сәр хwәндьна хwә (Зәб. 119:97; 1 Тимтʹ. 4:15).

6. Чь дьqәwьмә гава әм дьфькьрьн сәр ньһерʹандьна Йаһоwа?

⁶ Чахе әм тʹьме сәр Хәбәра Хwәде дьфькьрьн, тьштәки мәхсус дьqәwьмә. Әм дәстпедькьн фәʹм кьн у дöдьли нәбьн, wәки фькьр у ньһерʹандьна Йаһоwа сәр тьшта беqьсур ә. Әм ида сәр тьшта пе чʹәʹве wи дьньһерʹьн у ньһерʹандьна wи qәбул дькьн. Һʹьш-аqьле мә «ну» дьбә у щурʹе фькьрандьна мә те гöһастьне. Öса һеди-һеди фькьред Йаһоwа дьбьнә фькьред мә.

ФЬКЬРЕД МӘ СӘР КЬРЕД МӘ ҺʹÖКÖМ ДЬКЬН

7, 8. а) Йаһоwа сәр дәwләтийе ча дьньһерʹә? (Бьньһерʹә шьклед әʹwльн.) б) Һәрге ньһерʹандьна мә мина йа Йаһоwа бә, wе бона мә тьште лапи фәрз чь бә?

⁷ Фькьрандьн нә тʹәне сәр һʹьш-аqьле мә һʹöкöм дькә, ле öса жи сәр кьред мә (Марq. 7:21-23; Аqуб 2:17). Сәва әм әве йәке һе рʹьнд фәʹм кьн, wәрә чәнд мәсәла шеwьр кьн. Мәсәлә, Кʹьтеба Пирозда әм зәлал дьвиньн ньһерʹандьна Йаһоwа сәр дәwләтибуне у һәбуке. Йаһоwа бона Кöрʹе хwә, де-бавәки öса бьжарт жь мәрьва, йед кö нәдәwләти бун (Qан. Кʹаһ. 12:8; Луqа 2:24). Чахе Иса һатә буйине, Мәрйәме «әw пʹечʹәкеда пʹечʹа у афьрʹда дани, чьмки меванханеда бона wан щи тʹöнәбу» (Луqа 2:7). Һәрге Йаһоwа бьхwаста, дькарьбу öса бькьра, wәки Иса щики һе башда бьһата буйине. Ле бона Йаһоwа йа лапә фәрз әw бу, wәки Кöрʹе wи малбәтәкә öсада мәзьн бә, бона кʹижана Хwәде щийе пешьн дьгьрт.

⁸ Жь сәрһатийа буйина Иса, әм педьһʹәсьн кö чаwа Йаһоwа дьньһерʹә сәр һәбуке. Һьнә де-бав зарʹед хwә һелан дькьн, wәки пәй тьштед лапи баш кʹәвьн, һәрге жи әw йәк рʹöһʹанида wанрʹа зийане бинә. Ле әшкәрә йә кö бона Йаһоwа йа лапә фәрз рʹöһʹанийа мә йә, демәк һәләqәтийа мә тʹәви wи. Ле ньһерʹандьна wә жи мина йа Йаһоwа йә? Пе кьред wә чь те кʹьфше? (Бьхунә Ибрани 13:5.)

9, 10. Чаwа әм дькарьн нишан кьн ньһерʹандьна Йаһоwа һьндава лькʹöмандьне?

⁹ Диса мәсәләкә дьн кö Йаһоwа ча дьньһерʹә сәр wан кәса кʹижан кö мәрьва дьлькʹöминьн. Иса гот: «Кʹи кö жь ван бьчʹука йәки, йе кö баwәрийа хwә мьн тинә жь рʹе дәрхә, wирʹа һе qәнщ ә, кö бәрашәк стуйе wива бе гьредане у бе авитьне нава бәʹре» (Марq. 9:42). Әшкәрә те кʹьфше, Иса сьвьк нәдьньһерʹи сәр ве йәке! Әм заньн wәки Иса бь тʹәмами хәйсәте Баве хwә әʹйан кьр, у ләма әм дöдьли набьн, wәки Йаһоwа жи öса дьньһерʹә сәр һәр кәси, кʹе кö пе кьред хwә шагьртед Иса дьлькʹöминә (Йуһʹн. 14:9).

¹⁰ Ле гәло ве йәкеда ньһерʹандьна мә жи мина йа Йаһоwа у Иса йә? Әм жи мина wан дьфькьрьн? Гәло кьред мә чь әʹйан дькьн? Бәʹса хәбәре, мә хwәш те стиләкә кʹьнщхwәкьрьне йан жи щурʹәки хәмьландьне, кʹижан кö щьватеда хушк-бьра әʹщьз дькә, йан жи нав мәрьвада тәме хьраб у фькьред хьраб пешда тинә. Гәло һʹьзкьрьна һьндава хушк-бьра wе мә һелан кә жь стилед öса хwә дур бьгьрьн? (1 Тимтʹ. 2:9, 10).

11, 12. Чаwа сәр хьрабийе мина Йаһоwа бьньһерʹьн, у хwәгьрти бьн сәва хьрабийе нәкьн?

¹¹ Мәсәла сьсийа: Хьраби бәр чʹәʹве Йаһоwа рʹәш ә (Иша. 61:8). Әw занә wәки әм гöнәкʹар ьн у ләма мәрʹа һеса нинә хwә жь хьрабийе дур бьгьрьн. Ле йәкә әw дьхwазә, wәки әм чʹәʹв бьдьнә wи, у хьрабийе нәфьрʹәт кьн. (Бьхунә Зәбур 97:10.) Чахе әм бьфькьрьн кö чьрʹа хьраби бәр чʹәʹве Йаһоwа рʹәш ә, әме жи мина wи сәр ве йәке бьньһерʹьн, у qәwате бьстиньн сәва хwә жь һәр нәрʹастийе дур бьгьрьн.

¹² Һәрге әм сәр хьрабийе пе чʹәʹве Йаһоwа бьньһерʹьн, әw йәк wе али мә бькә тедәрхьн wан тьштед нәрʹаст жи, дәрһәqа кʹижана Кʹьтеба Пирозда рʹастә-рʹаст найе готьне. Мәсәлә, иро ве дьнйайеда гәләк бәлабуйи йә рәqаса сәр чокед мәрьва, чь кö бенамуси, рʹобәти у һʹәрам ә. Һьнәк хwә һәq дәрдьхьн дьбежьн, кö нә әw һәма секс нинә.a Ле гәло Йаһоwа жи öса дьньһерʹә сәр ве йәке? На! Бәр чʹәʹве Йаһоwа һәр хьраби рʹәш ә. Ләма wәрә әм жи жь һәр хьрабийе дур бьн, хwәгьрти бьн у нәфьрʹәт кьн wан тьшта чь кö Йаһоwа хwәш найен (Рʹом. 12:9).

БЬФЬКЬРЬН ДӘРҺӘQА САФИКЬРЬНЕД АХЬРИЙЕ

13. Чьрʹа әм ньһада гәрәке бьзаньбьн дәрһәqа ньһерʹандьна Йаһоwа сәр щурʹә-щурʹә тьшта?

¹³ Чахе әм ньһерʹандьна Йаһоwа леколин дькьн, әw йәк али мә дькә ахьрийеда сафикьрьнед билан бькьн. У гава әм бькʹәвьнә дәрәщәкә öса кö әм гәрәке зузу сафикьрьне бькьн, әме ида бьзаньбьн чь у ча бькьн (Мәтʹлк. 22:3). Wәрә чәнд мәсәлед Кʹьтеба Пироз шеwьр кьн.

14. Әм чь һин дьбьн жь щаба Усьв жьна Потифаррʹа?

¹⁴ Чахе жьна Потифар дьхwәст Усьв тʹәви wе рʹазе, Усьв дәрберʹа инкʹар кьр. Бь ве йәке һатә кʹьфше, кö әw пешда дьфькьри сәр ньһерʹандьна Йаһоwа, дәрһәqа амьнийа һьндава мер у жьн. (Бьхунә Дәстпебун 39:8, 9.) Һьн жи щаба Усьв жьна Потифаррʹа дьдә кʹьфше, кö фькьред wи мина фькьред Йаһоwа бун. Әwи wерʹа гот: «Әзе чаwа ве хьрабийа мәзьн бькьм у ль бәр Хwәде гöнә бькьм?». Ле әм ча дьньһерʹьн сәр бенамусийе? Бәʹса хәбәре, һуне чь бькьн һәрге һәвалхәбатчийед wә тʹәви wә дәстпедькә флирте бькә? Йан жи һәрге кәсәк пе тʹеле гьлийед бенамуси wәрʹа дьньвисә йан жи шькла дьшинә?b Һәрге мә ньһерʹандьна Йаһоwа сәр wан тьшта пешда леколин кьрийә у әм жи пе чʹәʹве wи сәр wан тьшта дьньһерʹьн, һьнге wе мәрʹа дьһа һеса бә жерʹа амьн бьминьн.

15. Чаwа әм мина се гәде Ибрани, дькарьн Йаһоwарʹа амьн бьминьн?

¹⁵ Биньн бира хwә сәрһатийа се гәде Ибрани бь наве Шәдрак, Мәшак, у Абәднәго. Чахе Нәбукәднәсәр Пʹадша фәрман да кö сәре хwә бәр пʹуте зерʹ дайньн, wана инкʹар кьр ве йәке бькьн. Щаба wан дьдә кʹьфше, кö әwана ида пешда фькьринә кö чь гәрәке бькьн сәва Йаһоwарʹа амьн бьминьн (Дәркʹ. 20:4, 5; Дан. 3:4-6, 12, 16-18). Бьдьнә бәр чʹәʹве хwә, мәзьне хәбата wә дьбежә, wәки пʹәрә те тʹопкьрьне бона щәжьне, йа кö рʹелигийа qәлпва гьредайи йә. Һуне чь бькьн? Дәwса кö һивийе бьн кʹәнге әw дәрәщә рʹасти wә бе, һе баш ә ньһа ида пешда бьфькьрьн һәла Йаһоwа ча дьньһерʹә сәр wан тьшта. Һәрге һун öса бькьн, һьнге рʹасти чь дәрәща жи бен, ида һуне бьзаньбьн ча рʹаст бькьн у ча рʹаст бежьн, чаwа се гәде Ибрани кьрьн.

16. Чахе әм ньһерʹандьна Йаһоwа рʹьнд фәʹм дькьн, ча әw йәк али мә дькә кö пешда һазьр бьн, гава аликʹарийа һʹәкима лазьм ә?

¹⁶ Һәрге әм пешда сәр ньһерʹандьна Йаһоwа бьфькьрьн, әw йәк wе öса жи али мә бькә гава мәрʹа ләз аликʹарийа һʹәким лазьм бә. Фәʹмдари йә әм инкʹар дькьн кö хуне у чар фраксийед wе бәри хwә дьн. Ле дәрһәqа хуне һәнә дәрәщед öса жи, кö Мәсиһи гәрәке сәр һʹиме принсипед Кʹьтеба Пироз хwәха сафикьрьне бькә (Кʹар. Шанд. 15:28, 29). Сәр wан пьрса әм гәрәке нә кö нәхwәшханеда бьфькьрьн, чахе мәсәлә әм бетʹаqәт ьн у зоре мә дькьн зузу сафикьрьне бькьн. Әм ньһада ида гәрәке wәʹдә хwәрʹа бьвиньн кö леколина бькьн, документа хуне тʹьжә кьн, кʹидәре һур бь һур те готьне әм чь дьхwазьн, у тʹәви һʹәкиме хwә хәбәр дьн.c

17-19. Чьрʹа фәрз ә ида ньһада бьзаньбьн дәрһәqа ньһерʹандьна Йаһоwа сәр щурʹә-щурʹә тьшта? Мәсәле биньн кö чь дәрәщада әм гәрәке хwә пешда һазьр кьн.

¹⁷ Диса бьфькьрьн дәрһәqа щаба Иса сәр ве ширәта Пәтрус: «Һьндава хwәда qәнщ бә, Хöдан!, (ДТʹ)». Әшкәрә йә, кö Иса пешда дьфькьри сәр qьрара Хwәде һьндава хwә у сәр wан пʹехәмбәртийа, йед кö дәрһәqа әʹмьре wи сәр әʹрде у мьрьна wи бун. Әwе йәке qәwат да wи, wәки амьн бьминә Йаһоwарʹа, у бь дьл у щан әʹмьре хwә бьдә бона мәрьва. (Бьхунә Мәтта 16:21-23.)

¹⁸ Иро qьрара Хwәде һьндава щьмәʹта wи әw ә, кö достийе тʹәви wи бькьн у һʹәта wан һәйә шьхöле бәлакьрьна мьзгинийеда кʹар бькьн (Мәт. 6:33; 28:19, 20; Аqуб 4:8). Чаwа мина дәрәща Иса, иро жи мәрьв бь дьле хwәйи сах дькарьн мә жь шьхöле Хwәде дур хьн. Мәсәлә, һуне чь бькьн һәрге мәзьне хәбата wә, wәрʹа хәбата һе баш дьдә, кʹидәре һуне пʹәре мәзьн бьстиньн, ле әw хәбат wе wәʹдә жь wә бьстинә у һуне кем һәрʹьнә щьвате у хьзмәтийе? Йан жи һәрге мәкʹтәбеда wәрʹа мәщала дьдьн кö дәрбази щики дьн бьн, сәва һе зедә хwәндьне бьстиньн? Һәрге һун рʹасти дәрәщед öса бен, һьнге wе wәрʹа лазьм бә дöа бькьн, леколина бькьн, йан жи пешийа сафикьрьне тʹәви де-бава йан жи рʹуспийа хәбәр дьн. Ле һе баш нинә ида ньһада леколина бькьн, у пебьһʹәсьн Йаһоwа ча дьньһерʹә сәр wан пьрса у чʹәʹв бьдьнә ньһерʹандьна wи? Һәрге һун öса бькьн, һуне нәкʹәвьнә щерʹьбандьна гава рʹасти wан дәрәща бен, чьмки wә дьле хwәда ида пешда сафи кьрийә, кö дьхwазьн һʹьш-аqьле хwә бьдьнә сәр хьзмәтийа Йаһоwа.

¹⁹ Öса жи пешда бьфькьрьн, кö ньшкева һун дькарьн рʹасти кʹижан щерʹьбандьна бен. Рʹаст ә әм нькарьн хwә пешда һазьр кьн бона һәр дәрәща. Ле һәрге әм wәʹде леколинкьрьна шәхси дьфькьрьн дәрһәqа ньһерʹандьна Йаһоwа сәр щурʹә-щурʹә тьшта, әм чь кö һин бьн wе бе бира мә, гава әм рʹасти дәрәща бен. Әw йәк wе али мә бькә сафикьрьнед билани бькьн. Ләма wәрә әм һәр гав тедәрхьн фькьред Йаһоwа дәрһәqа тьшта, һин бьн мина wи бьфькьрьн, у дьшьрмиш бьн кö әw йәк ча дькарә һьн ньһа али мә бькә һьн жи ахьрийеда.

ФЬКЬРЕД ЙАҺОWА У АХЬРИЙА МӘ

20, 21. а) Чьрʹа дьнйа тʹәзәда әме азайа хwәрʹа ша бьн? б) Иро әм ча дькарьн шабуне бьстиньн?

²⁰ Әм гьшк гәләк һивийа дьнйа тʹәзә нә у wе һʹәчʹи зәʹф жь мә сәр әʹрде һʹәта-һʹәтайе бьжин. Бьн Пʹадшатийа Хwәдеда, дәрд-кöлед мә кö иро әм дькʹьшиньн, wе тʹöнә бьн. Ле һәла һе дьнйа тʹәзәда жи wе азайа мәйә бьжартьне һәбә. Һәр кәс жь мә wе сафикьрьна у бьжартьна öса бькә, ча дьле мә дьхwазә у ча әм бәгәм дькьн.

²¹ Ле әw найе һʹәсабе, wәки азайа мә wе бе синор бә. Дьнйа тʹәзәда чахе мәрьвед мьлук гәрәке бьжберьн рʹасти у хьрабийе, wе сәр һʹиме qанун у ньһерʹандьна Йаһоwа сафикьрьне бькьн. Әw йәк wе шабуне у әʹдьлайе бинә (Зәб. 37:11). Ле һʹәта әw wәʹдә бе, ньһада жи шабуна мә дькарә һәбә, һәрге фькьред мә мина йед Йаһоwа бьн.