Гәло ль гора Зандарийе, Кʹьтеба Пироз Рʹаст ә?
Щаба Кʹьтеба Пироз
Бәле. Рʹаст ә Кʹьтеба Пироз кʹьтеба зандарийе нинә, ле чахе әԝ дәрһәԛа тьштед зандарийе дьбежә, әԝ бь тʹәмами рʹаст ә. Ԝәрен әм чәнд мәсәла шеԝьр кьн, йед кӧ избат дькьн, ԝәки Кʹьтеба Пироз алийе зандарийеда рʹаст ә у ԝәки теда избатийед зандарийейә ӧса һәнә, кʹижан кӧ гәләк щӧдә дьбьн жь баԝәрийа мәрьвед бәре.
Дәстпека гәрдуне һәбу (Дәстпебун 1:1). Ле гәләк чʹирокед бәреда те готьне, ԝәки бь рʹасти дәстпека гәрдуне тʹӧнә у әԝ жь тьштәки ӧса пешда һат, чь кӧ ида һәбу. Бабилонийа баԝәр дькьрьн, ԝәки хӧданед кӧ дәстпек данә гәрдуне, жь дӧ окйануса дәркʹәтьн. Чʹирокед дьн жи дьбежьн, ԝәки Гәрдун, жь һека тәʹрьки пешда һат.
Гәрдун бь ԛанунед тʹәбийәте рʹебәри дьбә, нә кӧ бь хӧданед жь ԝан чʹирока (Ибо 38:33; Йерәмйа 33:25). Чʹирокед һәр мьләтәки һин дькьн, ԝәки һьмбәри ԝан хӧдана, кʹижан кӧ кьред беходети у әʹщеб дькьн, жь ԛәԝата мәрийа дәр ә тьштәки бькьн.
Әʹрд тьштәкива дардакьри нинә (Ибо 26:7). Гәләк мьләтед бәре баԝәр дькьрьн, ԝәки әʹрд пәʹн ә у сәр деԝәки йә, йане тәрәԝьләки ча гамеш у кʹуси.
Гол у чʹәм бь ԝе аве тʹьжә дьбьн, йа кӧ сәр рʹуйе окйанусе у канийед дьн, дьбә һьлм у дькʹәвә һәԝайе. Паше ә7ԝ бь щурʹе баран, бәрф у тәйроке пашда дькʹәвә сәр рʹуйе әʹрде (Ибо 36:27, 28; Ԝаиз 1:7; Ишайа 55:10; Амос 9:6). Йунанийед бәре дьфькьрин, ԝәки гол у чʹәм бь сайа авед окейанусе тʹьжә дьбьн, кʹижан кӧ бьне әʹрдеда ньн. Әв ньһерʹандьн һʹәта ԛьрʹна 18 бәла бьбу.
Чʹийайед иройин ԝәхтәки бьн окейануседа бун (Зәбур 104:6, 8). Ле ль гора һьнә чʹирока, чʹийа нәһатьнә гӧһастьне, чьмки ча серида хӧдан ԝана әʹфьрандьн, әԝ ӧса жи манә.
Хԝәйкьрьна тʹәмзайе, сьһʹәт-ԛәԝате хԝәй дькә. Ль гора ԛануна бәре кӧ Хԝәде дабу щьмәʹта Исраеле, бәндә гәрәке хԝә бьшушта паши ԝе йәке, ча дәсте хԝә бьда щьнйаз. Хенщи ԝе йәке әв ԛанун дьгот, ԝәки мәрьв гәрәке әʹдәба хԝә чʹәл кьрьна у мәрьвед кӧ гьран нәхԝәш дькʹәтьн гәрәке щӧдә кьрана, ԝәки йед дьн нәхԝәш нәкʹәтана (Ԛануна Кʹаһинтийе 11:28; 13:1-5; Ԛануна Дӧщари 23:13). Ле ԝи чахи Мьсьреда методәкә ԛәнщкьрьнейә дьн дьданә хәбате. Мәсәлә, бьринед вәкьри әԝана бь мәлһәмәкә ӧса ԛәнщ дькьрьн, нава кʹижанада әʹдәбед мәрьва дькʹәтьн.
Гәло Алийе Зандарийеда Кʹьтеба Пирозда Шаши Һәнә?
Ль гора леколинәкә кʹур һатә кʹьфше, ԝәки Кʹьтеба Пирозда шаши тʹӧнә. Жере те готьне дәрһәԛа ньһерʹандьна нәрʹаст, кӧ рʹастийа Кʹьтеба Пирозва гьредайи нә:
Чʹирок: Кʹьтеба Пироз дьбежә, ԝәки гәрдун нава 6 рʹожада һатьбу әʹфьрандьне.
Рʹасти: Кʹьтеба Пирозда найе готьне, кӧ гәрдун чь чах һатә әʹфьрандьне (Дәстпебун 1:1). Рʹожед әʹфьрандьне, дәрһәԛа кʹижана Дәстпебун сәре 1-да те готьне, дьреж дькʹьшандьн у конкрет найе готьне кӧ әԝ ԝәʹдә чьԛас бу. Хенщи ԝе йәке, әԝ ԝәʹдә чахе әʹрд у әʹзман һатьбун әʹфьрандьне, те навкьрьне «рʹож» (Дәстпебун 2:4).
Чʹирок: Кʹьтеба Пироз дьбежә, ԝәки пешийе Хԝәде шинкайи чекьрьн у паше ида тәʹв, бей кʹижани кӧ фотосинтез набә (Дәстпебун 1:11, 16).
Рʹасти: Ль гора Кʹьтеба Пироз, тәʹв йәк жь гәләк стәйрка нә, кʹижан кӧ пʹара әʹзмана нә у пешийа һәр шинкайа һатьбу әʹфьрандьне (Дәстпебун 1:1). Ԝәʹде «рʹожа» пешьн, йане ԝәхте әʹфьрандьне, шәԝԛ нәзәлал дькʹәтә сәр рʹуйе әʹрде. Ле незики рʹожа сьсийайә әʹфьрандьне, атмосфера зәлал бу у епʹещә шәԝԛ кʹәтә сәр әʹрде. Һьнге протсеса фотосинтезе дәстпебу (Дәстпебун 1:3-5, 12, 13). Һьнә ԝәхт шунда, жь рʹуйе әʹрде тәʹв ида рʹьнд дьһатә кʹьфше (Дәстпебун 1:16).
Чʹирок: Кʹьтеба Пирозда те готьне, ԝәки тәʹв дора әʹрде дьзьвьрә.
Рʹасти: Ԝаиз 1:5-да те готьне: «Рʹож дьһьле у дьчә ава дьчә у баз дьдә щиһе хԝә, щиһе кӧ ле дьһьле». Әв гьли-готьн щигӧһастьна тʹәве, ль гора ньһерʹандьна мәрьв шьровәдькә. Рʹаст ә әм заньн, ԝәки бь рʹасти әʹрд дора тʹәве дьзьвьрә, ле диса жи щарна әм дьбежьн «рʹо дьчә ава» у «рʹо һьле».
Чʹирок: Кʹьтеба Пирозда те готьне, ԝәки әʹрд пәʹн ә.
Рʹасти: Чахе Кʹьтеба Пироз дәрһәԛа щийед дур дьбежә, әв дьдә хәбате гьли-готьна ӧса ча «һʹәта сәре дьне». Әв гьли найенә һʹәсабе, ԝәки әʹрд пәʹн ә у синора хьлазийа ԝе һәйә (Кʹаред Шандийа 1:8). Анәгори ве йәке, әв гьли «чар ԛӧлбед дьнйайе» әв метафора йә кӧ тʹәмамийа дьнйайе әʹйан дькә; иро жи әм гьли-готьна ви щурʹәйи дьдьнә хәбате: «Чар алийед әʹрде» (Әʹйанти 7:1).