Дьбәкә тә жи дьхwәст дәстпеки Кʹьтеба Пироз бьхуни, ле жь бо фькьред öса тә хwә жь ве йәке дур дьгьрт. Гәләк мәрьв ча бежи дьтьрсьн Кʹьтеба Пироз бьхуньн. Ле йед дьн пеһʹәсийан wәки Кʹьтеба Пироз али wан дькә бь жийинәкә бәхтәwар бьжин. Әwана öса жи пеһʹәсийан кö һәйә методәкә öса йа кö дькарә хwәндьна Кʹьтеба Пироз һʹәwас кә. Ле тәйе бьхwәста Кʹьтеба Пироз бьхwәнда сәва кö пебьһʹәси, һәла әв чь дьбежә?

Wәрен әм хәбәр дьн дәрһәqа wан мәрийа йед кö тедәрхьстьнә, wәки хwәндьна Кʹьтеба Пироз бь рʹасти жи кʹаре тинә.

Һәзәqел йе кö wәкә 20 сали йә, дьбежә: «Бәре әз мина wи мәрьви бум, йе кö бе нет авте дажо у ньзанә һәрʹә кʹидәре. Ле чахе мьн дәстпекьр Кʹьтеба Пироз бьхуньм әве йәке али мьн кьр нета жийине бьвиньм. Ве кʹьтебеда ширәтед керһати һәнә, кʹижан кö әз дькарьм һәр рʹож бьдьмә хәбате».

Фреда, йе кö 20 сали зедәтьр ә, дьбежә: «Мьн тʹьме бь критики сәр һʹәму тьшти дьньһерʹи. Ле чахе мьн дәстпекьр Кʹьтеба Пироз бьхуньм, әз һин бум хwә бьгьрьм. Паше ида мәрийарʹа һеса бу тʹәви мьн һәвалтийе бькьн у ньһа ида гәләк һәвалед мьн һәнә».

Кʹöлфәта бь наве Йунәс кö 50 сали зедәтьр ә, дәрһәqа Кʹьтеба Пироз тьште öса дьбежә: «Әв кʹьтеб али мьн кьр бьбьмә мәрьвәки даһа баш у хәйсәте хwәйә нәбаш бьгöһезьм».

Анәгори wан хwәндәвана, бь милйона мәрьвед дьн жи тедәрхьстьн кö хwәндьна Кʹьтеба Пироз дькарә аликʹарийе бьдә, сәва кö жийина хwә бәхтәwар кьн (Ишайа 48:17, 18). Хенщи wе йәке әw дькарә али тә бькә (1) сафикьрьнед баш бьки, (2) һәвалед баш бьвини, (3) нәкʹәви бьн стресе, у (4) йа лапә баш әw ә, кö тö рʹасти дәрһәqа Хwәде пебьһʹәси. Ширәтед Кʹьтеба Пироз жь Хwәде нә, ләма жи һәрге тö хwә ль wан бьгьри, тöйе тʹö щар шаш нәби. Чьмки Хwәде тʹö щар ширәтед хьраб надә.

Ле гава пешьн әw ә, кö гәрәке дәстпеки әве кʹьтебе бьхуни. Ле чь wе али тә бькә кö хwәндьна Кʹьтеба Пироз тәрʹа һеса у һʹәwас бә?

Чь wе али тә бькә, кö хwәндьна Кʹьтеба Пироз тәрʹа һʹәwас бә у wәки гәләк кʹаре бьстини? Дина хwә бьдә wан пенщ тьшта, чь кö али гәләка кьрьн.

Щики рʹьһʹәт бьвинә. Щики бедәнг хwәрʹа бьвинә. Демәк wедәре гәрәке тьштед öса тʹöнә бьн, жь бо чь жи те нькарьби педа һʹьше хwә бьди сәр хwәндьне. Рʹонайа баш у һәва тʹәмьз дькарә али тә бькә, кö жь хwәндьне кʹаре бьвини.

Ньһерʹандьна рʹаст хwәй кә. Кʹьтеба Пироз жь Баве мәйи әʹзмана йә, ләма жи әме бькарьбьн кʹаре бьвиньн һәрге ньһерʹандьна мә мина йа зарʹа бә. Йане әм гәрәке мина зарʹа һазьр бьн һин бьн. Һәрге ньһерʹандьна wә һьндава Кʹьтеба Пироз нәрʹаст ә йан жи бь критики йә, бьхәбьтьн кö әве йәке жь хwә дур хьн, сәва кö Хwәде бькарьбә wә һин кә (Зәбур 25:4).

Пешийа хwәндьне дöа бькә. Дь Кʹьтеба Пирозда фькьред Хwәде нә, ләма жи мәрʹа аликʹарийа wи лазьм ә сәва кö әве кʹьтебе фәʹм бькьн. Хwәде соз дьдә, кö wе рʹöһʹе пироз «бьдә әwед кö жь wи дьхwазьн» (Луqа 11:13). Рʹöһʹе пироз дькарә али wә бькә фькьред Хwәде фәʹм бькьн. Һьнә wәʹдә шунда һуне бькарьбьн һәла һе «нет-мәрәмед Хwәдейә кʹур жи» фәʹм бькьн (1 Корьнтʹи 2:10).

Бьхунә кö фәʹм бьки. Нета тә гәрәке әw нибә кö хwәндьне зу хьлаз ки. Ле кʹур бьфькьрә сәр тьштед хwәнди. Пьрсед öса бьдә хwә: ‹Чь хәйсәт-һʹöнöр әз дьвиньм щәм wи мәрьви, дәрһәqа кʹижани кö дьхуньм? Чаwа әз дькарьм әве йәке жийина хwәда бьдьмә хәбате?›

Һьнә нета бьдә пешийа хwә. Сәва кö кʹаре бьстини жь хwәндьна Кʹьтеба Пироз, бьхәбьтә кö тьштәки һин би, чь кö бь рʹасти дькарә жийина тә бәхтәwар кә. Мәсәлә, тö дькари нетед öса дайни пешийа хwә: ‹Әз дьхwазьм дәрһәqа Хwәде һе зедә пебьһʹәсьм›. ‹Әз дьхwазьм бьбьмә мәрьвәки баш, йан мерәки баш йан жи жьнәкә баш›. Паше жь Кʹьтеба Пироз сәрһатийед öса бьжберә, йед кö wе али тә бькьн бьгьһижи wан нета.a

Әв пенщ ширәт wе али тә бькьн кö дәстпеки Кʹьтеба Пироз бьхуни. Ле чь тö дькари бьки, сәва кö хwәндьна Кʹьтеба Пироз тәрʹа һе һʹәwас бә? Готара майинда дәрһәqа ве йәке һьнә ширәт тенә дайине.

Нә һʹәwас ә? Йан һʹәwас ә? Хwәндьна Кʹьтеба Пироз сәва тә ча нә? Гәләк гьредайә ве йәкева һәла чаwа тö дьньһери сәр хwәндьне. Wәрен әм бьньһерьн, wәки чь лазьмә бькьн сәва кö һʹәwаса мә пешда бе.

Бьжберә wәлгәрандьна рʹаст у модерн. Һәрге тö дьхуни кʹьтебе кидәре кö гәләк хәбәред чәтьн у кәвьн һәнә, һәмьки wе тәрʹа нәһʹәwас бә бьхуни. Ләма жи бьжберә wәлгәрʹандьна Кʹьтеба Пирозә öса, йа кö бь зьмане һеса һатийә ньвисандьне у wе дьле тә бьгьрә. Хенщи wе йәке әw wәлгәрандьн гәрәке ль гора орижинале рʹаст бә.a

Техноложийа модерн бьдә хәбате. Иро Кʹьтеба Пироз нә кö тʹәне бь щуре нәшьркьри һәйә. Һьнә Кʹьтебед Пироз дькарьн бь онлайн бьхуньн йан жи сәр компотәре, таблете у сәр тʹелед мобил хwәрʹа бьдьнә кʹьшандьне. Һәрге тö пе wан формата Кʹьтеба Пироз бьхуни, мәщала тә wе һәбә, кö перʹа-перʹа рʹезед дьн жи бьньһерʹи, йед кö wе тʹемайева гьредайи нә, йан жи тö дькари wана бәрамбәри wәлгәрʹадьнед дьн бьки. Һәрге тö нахwази Кьтеба Пироз бьхуни ле хwәндьне бьбьһейи, һьнге тö дькари бь аудио хwәрʹа вехи. Гәләкарʹа хwәш те хwандьна Кʹьтеба Пироз бьбьһен чахе әwана транспортеда ньн, шьхöле мале дькьн йан жи тʹьштед дьнва мьжул ьн. Һун дькарьн һьнә жь wан метода бьдьнә хәбате, йед кö wәрʹа хwәш тен.

Һащәтед Кʹьтеба Пирозә сәва һинбуне. Әв һащәт дькарьн али тә бькьн, кö жь хwәндьне һе зедә кʹаре бьстини. Щәм мә һәйә хәритә йа Кʹьтеба Пироз, чь кö wе али тә бькә бьвини у бьди бәр чʹәʹве хwә әwан щийа у qәwьмандьна дәрһәqа кʹижана кö тö дьхуни. Готаред wи щурʹәй чаwа кö дь ве журналеда һәнә, öса жи дь ве пʹареда «Һинкьрьнед Кʹьтеба Пироз» йа кö ль сәр малпәра jw.org һәнә, дькарьн али тә бькьн мәʹна Кʹьтеба Пироз фәʹм ки.

Метода Хwәндьне Бьгöһезә. Һәрге тәрʹа чәтьн ә хwәндьне дәстпеки у һʹәта хьлазийе бәрдәwам ки, тö дькари һьнә пʹаред жь Кʹьтеба Пироз бьжбери кʹижан хут тәрʹа лазьм ьн у wана бьхуни. Әw wе һʹәwаса тә пешда бинә. Һерге тö дьхwази дәрһәqа мәрьвед навдар жь Кʹьтеба Пироз пебьһʹәси, тö дькари дәрһәqа wан бьхуни. Сәва ве йәке бьдә хәбате чаргошә «Һе Зедә Пебьһʹәсә Дәрһәqа Мәрьвед жь Кʹьтеба Пироз, у öса Хwәндьна Хwә Һʹәwас кә». Йан дьбәкә тö дьхwази Кʹьтеба Пироз тʹема пәй тʹема, йан qәwьмандьн пәй qәwьмандьна бьхуни. Тö дькари йәк жь wан метода бьжбери.

Кʹьтеба Пироз нә мина һʹәму кʹьтеба йә. Дь ве кʹьтебеда ширәт тенә дайине, йед кö жь Әʹфьрандаре мә нә (2 Тимотʹейо 3:16). Әʹламәтийа wе кʹьтебе дькарә qайим ль сәр мә һʹöкöм бә. Кʹьтеба Пироз дьбежә: «Хәбәра Хwәде сах у зор ә» (Ибрани 4:12). Qәwата wе кʹьтебе һәйә кö жийина мә бәхтәwар кә. Мәсәлә, әw ида ньһа рʹебәрийе дьдә мә сәва жийина мәйә һәррʹожи, у али мә дькә һе рʹьнд бьзаньбьн дәрһәqа Хwәде у созед wи (1 Тимотʹейо 4:8; Аqуб 4:8).

Ида ньһа жийина тә бәхтәwар дькә. Кʹьтеба Пироз дькарә алькʹарийе бьдә һәла һе пьрсед шехсида жи. Әw ширәтед керһати дьдә дәрһәqа:

• Һәләqәтийа мә тʹәви йед дьнена (Әфәси 4:31, 32; 5:22, 25, 28, 33).

• Сьһʹәт-qәwата мәйә емосийали у физики (Зәбур 37:8; Мәтʹәлок 17:22).

• Нав-намусийе (1 Корьнтʹи 6:9, 10).

• Аборийе (Мәтʹәлок 10:4; 28:19; Әфәси 4:28).a

Щоте зәwьщи жь Асйайе гәләк qимәт кьрьн ширәта Кʹьтеба Пироз. Әwана анәгори гәләк щотед тʹәзә зәwьщи, дьхәбьтин кö хәйсәт-һöнöред һәв рʹаст кьн. У сәва wе йәке wана тʹьме дьле хwә һәврʹа вәдькьр. Wана дәстпекьр бьдьнә хәбате әw, чь кö жь Кʹьтеба Пироз дьхwәндьн. Әwе йәке чь кʹар ани? Әw мере жь Асйайе, бь наве Висент дьбежә: «Чь кö мьн жь Кʹьтеба Пироз дьхwанд али мьн кьр чәтьнайед зәwаще бь һʹьзкьрьн сафи кьм. Хәбьтандьна принсипед Кʹьтеба Пироз али мә кьрьн кö тʹәвай бәхтәwарийеда бьжин». Жьна wи Аналоу дьбежә: «Хwәндьна мәсәлед жь Кʹьтеба Пироз али мә кьрьн. Ньһа әз бәхтәwар ьм у ләзәте дьстиньм ча жь зәwаща хwә öса жи жь wан нета кö мә данийә пешийа хwә».

Хwәде һе рʹьнд нас бьки. Дәрһәqа зәwаща хwә Висәнт зедә дькә: «Ньһа чахе Кʹьтеба Пироз дьхуньм, әз тʹәхмин дькьм кö чаwа әз һе незики Йаһоwа дьбьм». Жь гьлийе Висәнт тьштәки фәрз һатә кʹьфше. Демәк Кʹьтеба Пироз дькарә али тә бькә, кö Хwәде һе рʹьнд нас бьки. Чахе Кʹьтеба Пироз дьхуни, нә кö тʹәне кʹаре дьстини жь ширәтед wе, ле öса жи тʹәхмин дьки wәки Хwәде тәрʹа дьбә дост. У те бьвини wәки Кʹьтеба Пироз һәла һе тьштед һур бь һур жи дәрһәqа ахьрийа баш әʹйан дькә. Әв бь рʹасти жи ахьрийа баш ә, кʹидәре кö тöйе ләзәте бьвини жь «жийина кö рʹасти жийин ә» у йе кö wе һәрһәйи бькʹьшинә (1 Тимотʹейо 6:19). Тʹö кʹьтебәкә дьн ахьрикә öса баш соз надә.

Һәрге тö дәстпеки Кʹьтеба Пироз бьхуни у ль гора принсипед wе бьжийи, те ида ньһа кʹаре бьстини, жийина хwә бәхтәwар ки у Хwәде һе рʹьнд нас ки. Һәмьки чахе тö Кʹьтеба Пироз бьхуни, дьбәкә һьнә пьрс щәм тә пешда бен. Ле тʹьме бира хwәда хwәй кә мәсәла баш йе wәзире Әтйупйе, йе кö 2 000 сал пешда дьжит. Гәләк пьрсед wи һәбун Ньвисаред Пирозва гьредайи. Чахе жь wи пьрсин һәла әw фәʹм дькә әwе йәке чь кö дьхунә, әwи гот: «Әзе чаwа бькарьбьм фәʹм бькьм, һәгәр йәк мьнрʹа шьровәнәкә?»b Паше әwи бь дьл у щан qәбул кьр аликʹарийе жь мәрьве кö дәрсдаре Ньвисаред Пирозә щерʹьбанди бу. Наве wи Филипо бу у әw шагьрте Иса бу (Кʹаред Шандийа 8:30, 31, 34). Һәрге тö жи дьхwази һе зедә дәрһәqа Кʹьтеба Пироз пебьһʹәси әм тә тʹәглиф дькьн бькʹәви малпәра www.jw.org. Ль сәр ве малпәре те бькарьби хwәстьна хwә бь купоне тʹьжә ки йан жи бьньвиси сәр адреса кö дь ве журналеда ньвисар ьн. Тö öса жи дькари тʹәви Шәʹдед Йаһоwа текли би йан жи һәрʹи Ода Щьвата wан. Ида ньһа һинбуна Кʹьтеба Пироз дәстпекә у бьһелә кö әw рʹебәрийа тә бькә у жийина тә бәхтәwар кә.