Гәло Һʹәму Религийа Йәк ьн? Гәло Һʹәму Религийа Мә Незики Хԝәде Дькьн?

Щаба Кʹьтеба Пироз

На, нә һʹәму религийа йәк ьн. Кʹьтеба Пироз гәләк щар бәʹса ԝан религийа дькә, кʹижан кӧ Хԝәде хԝәш найен. Ԝан религийа әм дькарьн сәр дӧ щурʹед сәрәкә пʹарәвәкьн.

Щурʹе пешьн: Һʹәбандьна хӧданед ԛәлп

Чахе Кʹьтеба Пироз бәʹса һʹәбандьна хӧданед ԛәлп дькә, хәбәред ӧса тенә хәбьтандьне ча «вала», «пʹучʹ» у «беԛимәт» (Йерәмйа 10:​3-5; 16:19, 20). Йаһоԝаa Хԝәде тʹәми да Исраелийа: «Пештьри мьн хԝәдейед тәйә майин тʹӧнә бьн» (Дәркʹәтьн 20:3, 23; 23:24). Чахе Исраели сәре хԝә бәр хӧданед ԛәлп данин, һерса Йаһоԝа сәр ԝана рʹабу (Жьмар 25:3; Ԛануна Кʹаһинтийе 20:2; Һʹакьмти 2:13, 14).

Иро жи ӧса нә, ньһерʹандьна Хԝәде сәр һʹәбандьна хӧданед ԛәлп нәһатийә гӧһастьне (1 Корьнтʹи 8:5, 6; Галати 4:8). Ван мәрьварʹа, йед кӧ дьхԝазьн Хԝәдерʹа хьзмәт кьн, Әԝ тʹәми дьдә ԝәки һәләԛәтийа хԝә тʹәви ԝан мәрьва бьԛәтиньн, йед кӧ пьштгьрийа һʹәбандьна ԛәлп дькьн. Хԝәде дьбежә: «Жь нава ԝан дәрен, щӧдә бьн» (2 Корьнтʹи 6:14-17). Ле һәрге һʹәму религийа йәк ьн, чьма Хԝәде әв тʹәми да?

Щурʹе дӧда: Гава мәрьв бь щурʹе нәрʹаст Хԝәде дьһʹәбиньн

Щара Исраелийа әʹйд-ԛәйд у баԝәрийед пʹутпʹарьста тʹәви һʹәбандьна рʹаст һәвдьхьстьн, ле Йаһоԝа һʹәбандьна ӧса ԛәбул нәдькьр (Дәркʹәтьн 32:8; Ԛануна Дӧщари 12:2-4). Иса сәрԝеред религи сущдар дькьр жь бо ве йәке, кӧ ԝана чь щурʹәйи Хԝәде дьһʹәбандьн. Рʹува бәр мәрьва, әԝана те бежи Хԝәдехоф бун, ле бь рʹасти дӧрʹу бун, чьмки «аԝа готи һәԛийе, рʹәʹме у баԝәрийе» давитьнә пьшт гӧһе хԝә (Мәтта 23:23).

Иро жи ӧса нә, тʹәне әԝ религийа мәрийа незики Хԝәде дькә, кʹижан кӧ сәр һʹиме рʹастийа жь Кʹьтеба Пироз ә (Йуһʹәнна 4:24; 17:17; 2 Тимотʹейо 3:16, 17). Ле религийед кӧ мьԛабьли Кʹьтеба Пироз ьн, мәрьва жь Хԝәде дур дьхьн. Гәләк һинкьрьнед кӧ бь ньһерʹандьна мәрьва сәр һʹиме Кʹьтеба Пироз ьн, мәсәлә сейәканә, рʹӧһʹе нәмьри, у чәрчьрандьна һʹәта-һʹәтайе, бь рʹасти сәр һʹиме һинкьрьнед пʹутпʹарьста йә. Һʹәбандьна ӧса пʹучʹ у бекер ә, чьмки дәԝса ԛанун у принсипед Хԝәде һин кә, әʹйд-ԛәйдед религи һин дькә (Марԛос 7:7, 8).

Хԝәде дӧрʹутийа религи нәфрʹәт дькә (Тито 1:16). Сәва кӧ религийа али мәрьва бькә ԝәки незики Хԝәде бьн, әԝ гәрәке сәр әʹмьре ԝанә һәррʹожи һʹӧкӧм кә, нә кӧ тʹәне әʹдәт у әʹйд-ԛәйда һин кә. Мәсәлә, Кʹьтеба Пирозда те готьне: «Һәгәр йәк хԝә хԝәденас һʹәсаб дькә у зьмане хԝә нькарә, әԝ хԝәха хԝә дьхапинә, хԝәденасийа ԝи пʹучʹ ә. Ль бәр Бав Хԝәдейе мә хԝәденасийа рʹаст у беԛьсур әв ә: Тәʹли-тәнгийада дәст бавежьнә сеԝийа у жьнәбийа у һʹәвза хԝә жи жь ләкʹед дьне бькә» (Аԛуб 1:26, 27). «Ԝәлгәрʹандьна Аԛубе Пʹадшада» (The King James Version) сәр гьли хԝәденасийа рʹаст кʹижанида дӧрʹути тʹӧнә, те готьне «һʹәбандьна тʹәмьз».