Бьред Щабдар; Чʹәʹв Бьдьнә Тимотʹейо
САЛА пар, нав тʹәмамийа дьнйайеда, бь һʹәзара бьра һатьнә кʹьфшкьрьне ча рʹуспи у бәрдәстийед щьвате. Һәрге тö йәк жь wан бьра йи, бешьк тö ша дьби бона wи qәдьрәки тʹәзә.
Ле фәʹмдари йә тö öса жи һьнәки бәрхwә дькʹәви. Щейсон, рʹуспики щаһьл, гьли дькә: «Чахе әз ча рʹуспи һатьмә кʹьфшкьрьне, әз һьнәки бәрхwә кʹәтьм кö щабдарийед мьнә тʹәзә һәнә». Муса у Йерәмйа жи дьфькьрин, wәки wе нькарьбьн шьхöле кö Йаһоwа дабу wан, биньн сери (Дәркʹ. 4:10; Йерәм. 1:6). Һәрге тö жи öса дьфькьри, ча тö дькари әwе шьке жь дьле хwә дәрхи у пешда һәрʹи? Дина хwә бьдә мәсәла Тимотʹейо (Кʹар. Шанд. 16:1-3).
ЧʹӘʹВ БЬДӘ МӘСӘЛА ТИМОТʹЕЙО
Ча те кʹьфше Тимотʹейо wәкә 20 сали бу чахе Паwлосе шанди wи тʹәглиф кьр кö бьбә һәвалрʹеwийе wи. Пешийе, дьqәwьмә Тимотʹейо хwәда баwәр нибу у һьнәки дьтьрсийа кö wе щабдарийа хwәйә тʹәзә ча бинә сери (1 Тимтʹ. 4:11, 12; 2 Тимтʹ. 1:1, 2, 7). Ле йәкә, паши чәнд сала, Паwлос дәрһәqа Тимотʹейо щьвата Филипирʹа ньвиси: «Ищар һевийа мьн жь Хöдан Иса һәйә кö әз дь дәмәкә незикда Тимотʹейос бьшиньм ба wә . . . Чьмки тö кәсе мьн йе кö мина wи бь дьл у щан ль сәр wә бьфькьрә . . . тʹöнә» (Фили. 2:19, 20, ИМ).
Гәло чьрʹа Тимотʹейо рʹуспики öса баш бу? Wәрә әм шәш тьшта шеwьр кьн, кö чьда тö дькари чʹәʹв бьди wи.
1. Әwи бь дьл бона мәрьва хәм дькьр. Паwлос готә бьред Филипи: «[Тимотʹейо] жь бо һал у рәwша wә хәме бьхwә» (Фили. 2:20, ИМ). Бәле, Тимотʹейо мәрьв һʹьз дькьрьн. Әwи бь дьл у щан бона һʹалхwәшийа wанә рʹöһʹани хәм дькьр, у һʹәйфа хwә qәwат у wәʹде хwә нәдьани бона wан.
Нәбә мина ажоване отобусе, кʹижанирʹа дьһа фәрз ә wәʹдәда бьгьһижә сәр һәр сәкьнандьна отобусе, нә кö wәки мәрьв бькʹәвьнә отобусе. Wилиам кö 20 сала зедәтьр ча рʹуспи хьзмәт дькә, ширәте дьдә бьред кö тʹәзә щабдарийе дьстиньн: «Хушк-бьра һʹьз бькьн. Дина хwә бьдьнә һʹәwщед wан, нә кö qәйдед организасийоне кö чь у ча гәрәке бьбә».
2. Әwи тьштед рʹöһʹани датани щийе пешьн. Чахе Паwлос мәсәла Тимотʹейо бәрамбәри йед дьн кьр, әwи гот: «Йед майин һәр кәс ль пәй кʹара хwә кʹәтийә, нә кö йа Иса Мәсиһ» (Фили. 2:21). Чахе Паwлос Рʹомеда бу, әwи дина хwә дайе wәки хушк-бьред wедәре, пәй хwәстьнед хwә дькʹәтьн у шьхöле Хwәдеда хирәт нибун. Ле Тимотʹейо мәрьвәки öса нибу. Чахе мәщал чедьбун кö мьзгинийе бәла кә, ньһерʹандьна wи мина йа Ишайа бу, йе кö гот: «А вай әз, мьн бьшинә!» (Иша. 6:8).
Ле тö ча дькари рʹаст шьхöлед хwә у борщдарийед хwәйә рʹöһʹани бини сери? Пешийе, тьштед фәрз дайнә сәр щийе пешьн. Паwлос гот: «Кʹижан һәрә qәнщ ә, һун wе бьбьжерьн» (Фили. 1:10). Чь кö чʹәʹве Хwәдеда фәрз ә, бона тә жи бьра фәрз бә. Йа дöда, әʹмьре хwә сьвьк кә. Wәʹдә у qәwата хwә сәр тьштед нәлазьм хәрщ нәкә. Паwлос ширәт да Тимотʹейо: «Жь дьлхwәстьнед щаһьлтийе бьрʹәвә, хwә ль рʹастийе, баwәрийе, һʹьзкьрьне, әʹдьлайийе бьгьрә» (2 Тимтʹ. 2:22).
3. Әw гәләк хирәт бу хьзмәтийа пирозда. Паwлос ани бира Филипийа: «Һун хwәха заньн кö [Тимотʹейо] йәки чаwайи щерʹьбанди йә у хwәха тʹәви мьн Мьзгинидайинерʹа öса хьзмәти кьр, чаwа кöрʹ баверʹа» (Фили. 2:22). Тимотʹейо йәки тʹәмбәл нибу. Әw тʹәви Паwлос гьран дьхәбьти у әw йәк һʹьзкьрьна wан һьндава һәвдö qәwи кьр.
Иро тʹәшкиләта Хwәдеда шьхöл тʹьме һәйә, у әw шьхöл бь рʹасти шабуне тинә у дькарә хушк-бьра һе незики һәв кә. Ләма жи хwәрʹа бькә нет, wәки һәр гав «шьхöле Хöданда пешда» һәрʹи (1 Корн. 15:58).
4. Әwи ширәт qәбул дькьрьн у һин дьбу. Паwлос Тимотʹейорʹа ньвиси: «Тә насийа хwә дайә һинкьрьн, рʹабун-рʹуньштьн у нет-мәрәме мьн, баwәри, сәбьр у һʹьзкьрьна мьн, бинфьрәйи» (2 Тимтʹ. 3:10). Тимотʹейо чь жи һин дьбу дьда хәбате, ләма һазьр бу кö щабдарийед мәзьн бинә сери (1 Корн. 4:17).
Ле бона тә һәйә мәрьвәки öса кö дьхwази чʹәʹв бьди wи? Һәрге на, бьжберʹә кәсәки йе кö дькарә тәрʹа бьбә мәсәла баш. Том, кö ида гәләк сал рʹуспи йә, тинә бира хwә: «Рʹуспики щерʹьбанди мьн кьрә бьн пʹәрʹе хwә у әwи рʹьнд мьн һин дькьр у ширәт дькьр. Мьн тʹьме жь wи ширәт дьхwәстьн у мьн әw ширәт дьданә хәбате. Әwе йәке али мьн кьр wәки хwәда һе баwәр бьм».
5. Әwи бәрдәwам дькьр хwәха һин дьбу. Паwлос Тимотʹейо ширәт дькьр: «Хwә хwәденасийеда һиндар кә» (1 Тимтʹ. 4:7). Дәрсдаре һәр спортсменәки һәйә кö wи һин дькә, ле әв спортсмен öса жи гәрәке хwәха һин бә. Паwлос готә Тимотʹейо: «Хwә бьдә wе йәке, кö щьмәʹтерʹа ньвисаред пироз бьхуни, ширәт ки, һин ки . . . Гöһе тә сәр wан тьшта бә у нава wанда бьминә, wәки пешдачуйина тә һʹәмуйава әʹйан бә» (1 Тимтʹ. 4:13-15).
Тö жи гәрәке фәрәсәтед хwә һе баш ки. Алийе рʹöһʹанида тʹьме пешда һәрʹә у дина хwә бьдә рʹебәрийед тʹәзә кö щьватеда дьстини. Хенщи ве йәке, чьqас жи щерʹьбанди би, бь тʹәмами итʹбарийа хwә хwә нәйнә у нәфькьрә, wәки занәбуна тә wе бей рʹебәри у ширәтед жь әʹдәбйәта һәр дәрәщада али тә бькә. Чʹәʹв бьдә Тимотʹейо у «һаш жь хwә у һинкьрьна хwә һәбә» (1 Тимтʹ. 4:16).
6. Әwи итʹбарийа хwә рʹöһʹе Йаһоwайи пироз дьани. Чахе Паwлос дәрһәqа хьзмәтийа Тимотʹейо дьфькьри, әwи ани бира Тимотʹейо: «Әw тьштед qәнщә кö ль тә һатьнә спартьне бь wи рʹöһʹе пирози нава мәда хwәй кә» (2 Тимтʹ. 1:14). Сәва Тимотʹейо хьзмәтийа хwә хwәй кьра, wирʹа лазьм бу итʹбарийа хwә рʹöһʹе Хwәдейи пироз бинә.
Доналд, кö ида бь дәһа сала рʹуспи йә, дьбежә: «Бьред щабдар гәрәке һәләqәтийа хwә тʹәви Йаһоwа qимәт кьн. Wи щурʹәйи әwана wе ‹һе qәwат› бьн. Һәрге әwана дöа бькьн бона рʹöһʹе Хwәдейи пироз у бәре рʹöһʹе пироз нав хwәда пешда биньн, әwана wе бь рʹасти бона хушк-бьра кʹәрәм бьн» (Зәб. 84:7; 1 Пәт. 4:11).
ЩАБДАРИЙА ХWӘ БЬШЕКЬРИНӘ
Әм ша дьбьн кö гәләк бьра щабдарийед тʹәзә стандьнә, у рʹöһʹанида пешда дьчьн. Щейсон, бәʹса кʹижани мә жоре кьр, дьбежә: «Чахе әз бумә рʹуспи, әз гәләк тьшт пеһʹәсийам у әз һе хwәда баwәр бумә. Ньһа әз бь рʹасти ләзәте дьстиньм жь щабдарийа хwә у әw бона мьн qәдьрәки гәләк мәзьн ә!»
Ле тöйе бәрдәwам ки рʹöһʹанида пешда һәрʹи? Бьра нета тә әw бә кö чʹәʹв бьди Тимотʹейо, у һьнге тöйе бона щьмәʹта Хwәде бьби кʹәрәм.