Wә Заньбу?
Чь тьштед әʹщеб нава рʹабун-рʹуньштандьна Исада һәбу, һьндава мәрьвед кʹоти
Щьһуйед бәре гәләк дьтьрсийан wан мәрийа йед кö бь кʹотибуне нәхwәш бун. Әв нәхwаший хоф, дькарьбу нервед мәрийа зәфт кьра у мәрийа зийан у әлават дькьр. Тʹö qәнщкьрьна ве нәхwашийа кʹотибуне тʹöнә бу. Сәва кö мәрьвед дьн жь wана нәхwәш нәкʹәвьн, мәрьвед кʹоти борщдар бун wәки йед дьненарʹа дәрһәqа нәхwәшийа хwә әʹлам кьн. Ләма жи wана жь гьшка щöдә дькьрьн (Qануна Кʹаһинтийе 13:45, 46)
Сәрwеред дине религийа qәйдә дәрһәqа кʹотийа кʹьфш кьрьн, йе кö нә ль сәр һʹиме Ньвисаред Пироз бун. У öса жийина кʹотийед бәлангаз һе чәтьн дькьрьн. Мәсәлә, ль гора qәйдньвисандьна равина, мәрийарʹа qәдәхәкьри бу кö әwана ль сәр 2 метра незики кʹотийа буна. Һьнә мәрьвед Талмудван, дʹәwакьрьнед Ньвисаред Пироз дәрһәqа жийина жь «зоме дәр» öса шьроwәдькьрьн, wәки йан чь мәрьвед кʹоти гәрәке жь шәһәре дәр бьжитана. Жь бо ве йәке чахе равинәк мәрьве кʹоте дь шәһәреда дит, әw кәwьр авитьнә wи у гот: «Бьщәмә щийе хwә, у мәрьвед дьн нәхwәш нәкә».
Ле ньһерʹандьна Иса гәләк щöдә дьбу! Дәwса кö кʹотийа бәридә, әw бь һазьрбун дәсте хwә да wан у һәла һе qәнщ кьр жи (Мәтта 8:3).
Ль сәр чь һʹими сәрwеред дине Щьһуйа жьнед хwә бәрдьдан?
Документа жьнбәрдане йа 71/72 Д.М.
Дь qьрна йәкеда Д.М-да, тʹема дәрһәqа жьнбәрдане гәләк шәрʹ-дәw пешда дьани ортʹа сәрwеред религийа. Жь бо wе йәке, һьнә Фарьсийа хwәстьн Иса бьщерʹьбиньн бь ве пьрсе: «Гәло ль гора Qануне рʹаст ә, кö бона һәр мәʹнике мер жьна хwә бәрʹдә?» (Мәтта 19:3).
Ль гора Qануна Муса, qәдәхәкьри бу wәки мер, жьна хwә бәрʹдә һәрге әw «сәр wе кемасике бьбинә» (Qануна Дöщари 24:1). Wәʹде Иса, дö мәкʹтәбед равина һәбун, йед кö әв qанун пашопе шьроwәдькьрьн. Шамай мәкʹтәбәкә һе сәрт бу. Wе дәре дьһатә шьроwәкьрьне, wәки мәʹникә сәрәкә сәва кö мер жьна хwә бәрʹдә, әw ә һәрге жьн һьндава мере хwәда нәһʹәлал бә, демәк һәрге qавийе бькә. Ле Мәкʹтәба Һиләл хwә ль wе нете дьгьрт, кö ль гора qануне, мер дькарә һәла һе сәва тьштед бьчʹук жи, жь жьна хwә бьqәтә. Ле ль гора мәкʹтәбед дьн жи, мер дькарьбу тʹәви жьна хwә һьнге бьqәтийа, һәрге әwе хwарьн хьраб кьра, йан жи һәрге мер ида йәкә дьне бәгәм кьра.
Ле гәло Иса чь щаб да Фарьсийа? Әwи зәлал гот: «Кʹи кö бе сәбәбийа qавийе жьна хwә бәрʹдә у йәкә дьн бьстинә, әw зьнекʹарийе дькә» (Мәтта 19:6, 9).