Хьлазкьрьн Пʹешкʹешәкә Гәләк Мәзьн ә жь Хwәде

1, 2. (а) Тӧ кʹижан пʹешкʹеше бь qимәт һʹәсаб дьки? (б) Чьрʹа qӧрбана кӧ Йаһоwа Хwәде да, пʹешкʹешәкә жь һʹәмушка qимәттьр ә?

БЬ ТʹӘХМИНА тә кʹижан пʹешкʹеш рʹасти жи qимәт ә? Пʹешкʹеша qимәт әʹсәйи нинә wәки бьһа бә. Бь рʹастийе qимәта пʹешкʹеше тʹәви пʹәра гьредайи нинә. Һәрге тӧ бой пʹешкʹешәке гәлә ша дьби у әw пʹешкʹеш тәрʹа рʹасти жи лазьм бу, демәк әв ә пʹешкʹеша qимәт сәва тә.

² Тʹӧ пʹешкʹешәкә qимәт, нькарә бәрамбәри ве пʹешкʹеше бә, йа кӧ Йаһоwа Хwәде дайә мә. Рʹаст ә Хwәде гәләк тьштед баш мәрʹа дайә. Ле пʹешкʹеша жь һʹәмушка мәзьнтьр жь алийе Хwәдеда әв ә, кӧ әwи Кӧрʹе хwәйи тайе тʹәне кьрә qӧрбан сәва мәрийа. (Бьхунә Мәтта 20:28.) Жь ви сәри әме пебьһʹәсьн, wәки ча бь сайа ве qӧрбане мәрьв тенә хьлазкьрьне, у wәки әв рʹасти жи пʹешкʹешәкә пʹьрʹ qимәт у мәзьн ә, чьмки бь сайа ве хьлазкьрьне, һʹәму проблемед мә дькарьн сафи бьн у әʹмьре мә жи дькарә гәләк бәхтәwар бә. Хьлазкьрьн рʹасти жи һәйә нишана һʹьзкьрьна мәзьн жь алийе Хwәдеда һьндава мәрийа.

ХWӘДЕ МӘ ЖЬ ЧЬ ХЬЛАЗ ДЬКӘ?

3. (а) Бь сайа qӧрбане, Хwәде чь дьхwазә бькә? (б) Чь әм гәрәке фәʹм бькьн, wәки qайил бьн кӧ хьлазкьрьн жь Хwәде пʹешкʹешәкә пʹьрʹ qимәт ә?

³ Һәма бь сайа qӧрбане, Йаһоwа Хwәде дьхwазә мәрийа жь дилтийа гӧна у мьрьне хьлаз кә (Әфәси 1:7). Сәва кӧ һе рʹьнд фәʹмдари бә хәбәрдан дәрһәqа кʹижан хьлазкьрьне дьчә у чьрʹа әw лазьм бу, әм гәрәке диса биньнә бира хwә, дь бахче Адәнеда чь qәwьми. Һәрге әм фәʹм бькьн Адәм чь ӧнда кьр гава әwи гӧнә кьр, әме qайил бьн кӧ хьлазкьрьна Хwәде пʹешкʹешәкә пʹьрʹ qимәт ә.

4. Әʹмьре Адәме qәданди чь щурʹәйи бу?

⁴ Чахе Йаһоwа Адәм әʹфьранд, әwи Адәмрʹа тьштәки пʹьрʹ qимәт да, әв һәйә әʹмьре qәданди. Ле зани әв чь те һʹәсабе? Йаһоwа Адәм бь һʹьш у бәдәна qәданди әʹфьранд, демәк һʹьш у бәдәна бе кемаси, ләма жи Адәм гәрәке qә нәхwәш нәкʹәта, нә кал буйа, нә жи бьмьрийа. Әw мәрики беqӧсур бу, у һәләqәтийа wи тʹәви Йаһоwа гәләк баш у незик бу. Кʹьтеба Пироз дьбежә кӧ Адәм кӧрʹе Йаһоwа Хwәде бу (Луqа 3:38). Һәләqәтийа Адәм тʹәви Йаһоwа ӧса незик бу, ча бав у кӧрʹ һәврʹа баш у незик ьн. Йаһоwа тʹәви Адәм хәбәр дьда у хәбата һʹәwас дьда wи, у wирʹа шьровәдькьр кӧ әw чь гәрәке бькә у чь нәкә (Дәстпебун 1:28-30; 2:16, 17).

5. Әв чь те һʹәсабе кӧ Адәм «дьлqе Хwәдеда» һатийә әʹфьрандьне?

⁵ Адәм «дьлqе Хwәдеда» һатийә әʹфьрандьне (Дәстпебун 1:27, ПКʹМ; Аqуб 3:9). Ле әв йәк чь те һʹәсабе? Әм жь сәре пешьн пеһʹәсийан кӧ Йаһоwа Хwәде Рʹӧһʹ ә у найе дитьне, әw мина мәрьва бь бәдәне нинә (Йуһʹәнна 4:24). Ләма жи әw йәк кӧ Адәм дьлqе Хwәдеда һатә әʹфьрандьне, те һʹәсабе кӧ Адәм бь хәйсәт у һʹӧнӧред ӧса һатә әʹфьрандьн, йед кӧ щәм Йаһоwа Хwәде һәнә, мәсәлә: һʹьзкьрьн, билани, һәqиһʹьз у qәwат. Адәм диса дь тьштәкида мина Хwәде һатьбу әʹфьрандьне, азабуна wи һәбу. Мәсәлә азабуна һʹәйwана тʹӧнә, әwана нькарьн дьшьрмиш бьн у тьштәки бь хwә сафи кьн. Ле Адәм нә мина һʹәйwана һатә әʹфьрандьне. Хwәде азабун да wи, wәки әw хwәха бона жийина хwә сафи кә, рʹийа qәнщ бьжберә йан йа хьраб. Һәрге Адәм рʹийа рʹаст бьжбарта гӧрʹа Хwәде бькьра, әwи wе дь щьнәтеда у бәхтәwарийеда һʹәта-һʹәтайе бьжита.

6. Чахе Адәм гӧрʹа Хwәде нәкьр әwи чь ӧнда кьр? (б) Жь бо ве йәке чь һатә сәре зӧрʹәтед wи?

⁶ Нәгӧһдарикьрьна Адәм гәлә бьһа ль сәр wи рʹуньшт. Әwи әʹмьре хwәйи qәданди у кʹәрәмед дьн, ӧнда кьр. Ләма жи әw кал бу у хьлазийе мьр (Дәстпебун 3:17-19). Ле һе хьраб әw ә, кӧ жь бо гӧне Адәм, сәва һʹәму мәрийа әʹмьре qәданди һатә ӧндакьрьне. Дь Кʹьтеба Пирозда ӧса ньвисийә: «Аwа чаwа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12). Бәле, гӧнә жь Адәм дәрбази мә һʹәмуйа бу. Дь Кʹьтеба Пирозда те готьне, кӧ Адәм хwә у һʹәму мәри «фьрот», у кьрә диле гӧнә у мьрьне (Рʹомайи 7:14). Чьмки Адәм у Һеwа хwәха сафи кьрьн гӧрʹа Йаһоwа Хwәде нәкьн, ләма жи һʹале wан ида нькарьбу бьһата рʹасткьрьне. Ле гәло ньһа һʹале мә wе чаwа бә?

7, 8. Чь те һʹәсабе кʹьрʹин?

⁷ Чьмки әм гьшк һатьнә фьротане, ләма жи Йаһоwа Хwәде хwәст пашда мә бькʹьрʹә у хьлаз кә. Хәбәра кʹьрʹин дӧ тьшт дькарә бе һʹәсабе. Йа пешьн, кʹьрʹин те һʹәсабе, чахе кәсәк һәq дьдә wәки тьштәки йан кәсәки вәгәрʹинә. Мәсәлә ча һәрге йәк бькʹәвә кәле у кәсәк һәq бьдә, wи жь кәле аза кә. Йа дӧда жи, кʹьрʹин те һʹәсабе һәqе зьрарәке йан дәйнәки дади. Мәсәлә ча һәрге тӧ авта кәсәки лехи бьшкени у паше һәqе wе зьраре бьди хwәйе авте, wәки авта хwә чекә.

⁸ Дәйне кӧ Адәм ль сәр мә һишт гәләк мәзьн ә. Ләма жи пьрс пешда те: Чаwа әм дькарьн жь дилтийа гӧнә у мьрьне хьлаз бьн? Wәрә әм ньһа дәрһәqа кʹьрʹина жь Йаһоwа Хwәде, һе зедә хәбәр дьн, у пебьһʹәсьн әв чь те һʹәсабе сәва мә.

ХWӘДЕ ЧАWА МӘ ХЬЛАЗ ДЬКӘ?

9. Qимәта кʹьрʹине гәрәке чьqас буйа?

⁹ Чьмки әʹмьре qәданди һатә ӧндакьрьне, ләма тʹӧ мәрьве нәqәданди нькарә һәqе wе зьраре бьдә (Зәбур 49:7, 8). Мәрьве нәqәданди хwәха бьн дәйнада нә у нькарә дәйне кәсәки дьн бьдә. Ләма жи зьрар чьqас ә, гәрәке qимәте кʹьрʹине жи һаqас бә. Дь Кʹьтеба Пирозда жи qанунәкә ӧса һатийә ньвисаре: «Әʹмьр жь бәр әʹмьрва» (Qануна Дӧщари 19:21, ПКʹМ; Мәтта 5:38). Демәк дәwса әʹмьре qәданди чь лазьм бу wәки бьһата дайине? Бәле, һьлбәт әʹмьре мәрьвәки qәданди, йе кӧ wе бьбуйа «кʹьрʹина» бәрамбәри зьраре (1 Тимотʹейо 2:6).

10. Йаһоwа чь щурʹәйи әм кʹьрʹин?

¹⁰ Ле чь щурʹәйи Йаһоwа Хwәде әм кʹьрʹин? Бона кʹьрʹине әwи мьлйакʹәтәки хwә шандә әʹрде. Әв мьлйакʹәт сәва Йаһоwа мьлйакʹәтәки лапи дәлал бу, у Кӧрʹе wийи тайе тʹәне бу. (Бьхунә 1 Йуһʹәнна 4:9, 10.) Әwи гӧрʹа Баве хwә кьр, у бь рʹазибуне әʹзман һишт у һатә сәр әʹрде (Филипи 2:7). Чаwа әм ида дь ве кʹьтебеда пеһʹәсийан, Йаһоwа кʹәрәмәтәк кьр, әwи әʹмьре Кӧрʹе хwә дәрбази зьке Мәрйәме кьр. Демәк, бь сайа рʹӧһʹе пироз, Иса ча мәрики qәданди һатә буйине у әw ль бьн һʹӧкӧме гӧнә нибу (Луqа 1:35).

11. Ча мәрики дькарьбу бь милйона мәрьв хьлазкьрана?

¹¹ Ле гәло, ча мәрики дькарьбу бь милйона мәрьв хьлазкьрана? Һәла бинә бира хwә, ча һʹәму мәри гӧнәкʹар бунә? Гава Адәм гӧнә кьр әwи әʹмьре хwәйи qәданди ӧнда кьр. Ләма жи әwи нькарьбу qәдандибун дәрбази мәрийа бькьра, ле дәwсе әwи гӧнә у мьрьн дәрбази һʹәму мәрийа кьр. Дь Кʹьтеба Пирозда дәрһәqа Иса те готьне, кӧ әw «Адәме пашьн ә», әw мәрики qәданди у бе гӧнә бу (1 Корьнтʹи 15:45). Иса кʹәтә дәwса Адәм у әм жь гӧнә хьлаз кьрьн. Әwи гӧрʹа Йаһоwа Хwәде кьр у әʹмьре хwәйи qәданди сәва мәрийа да. Бь ве йәке Иса һәqе гӧне Адәм да, у гӧман да һʹәму мәрийа (Рʹомайи 5:19; 1 Корьнтʹи 15:21, 22).

12. Бь амьнийа хwә wәʹде щерʹьбандьне, Иса чь избат кьр?

¹² Дь Кʹьтеба Пирозда һур бь һур те гьликьрьне, кӧ ча пешийа мьрьне, Иса данә щәфе. Әw данә бәр qамчийа, qәрфе хwә wи кьрьн у паше жи wи дарва мьх кьрьн (Йуһʹәнна 19:1, 16-18, 30; Әʹламәтийе Зедә сәр рʹупʹела 204-206). Гәло чьрʹа лазьм бу кӧ Иса ӧса бьчәрчьрийа? Дь сәре майинда әме пебьһʹәсьн, wәки Шәйтʹан Мире-щьна пьрсәкә ӧса пешда ани, кӧ тʹӧ кәс жь qӧльхкʹаред Йаһоwа Хwәде wәʹде щерʹьбандьна, нькарә амьнийа хwә хwәй кә. Ле wәʹде щерʹьбандьн у пәйкʹәтьнед гьран жи Иса диса Хwәдерʹа амьн ма, у бь ве йәке щаба Мире-щьна да. Һьн жи Иса избат кьр, wәки Мире-щьна чь жи бькә, мәрьве qәданди дькарә беqӧсурти у амьнийа хwә хwәй кә. Дә бьдә һʹәсабе хwә Йаһоwа чьqас ша дьбу, гава Кӧрʹе wийи дәлал һʹәта хьлазийе wирʹа амьн ма (Мәтʹәлок 27:11).

13. Ча кʹьрʹин һатә дайине?

¹³ Ле ча кʹьрʹин һатә дайине? 14 Нисане, дь сала 33-да дәwрана мәда, Йаһоwа һишт wәки Кӧрʹе wийи дәлал у qәданди бькӧжьн. Иса «щарәке бона һәртʹьм», әʹмьре хwәйи qәданди сәва мәрийа да (Ибрани 10:10). Рʹожа сьсийа Йаһоwа Хwәде Иса жь мьрьне рʹакьр, ле ида әw ча кәсе рʹӧһʹани бу. Иса гӧрʹа Хwәде кьр у һʹәму тьшт һәма ӧса кьр чаwа Хwәде дьхwәст, у әw пашда вәгәрʹийа щәм Хwәде ль әʹзмана. Йаһоwа Хwәде qәбул кьр кӧ Иса әʹмьре хwә да qӧрбан, сәва хьлазкьрьна мәрийа жь гӧнә у мьрьне (Ибрани 9:24). Бь qӧрбанбуна хwә, Иса һәqе гӧне Адәм да у ньһа мәри дькарьн жь гӧнә хьлаз бьн. (Бьхунә Рʹомайи 3:23, 24.)

КʹАРА ТӘ ЖЬ КʹЬРʹИНЕ ЧЬ ЙӘ?

14, 15. Чь гәрәке әм бькьн, сәва кӧ бахшандьне бьстиньн?

¹⁴ Рʹаст ә әм мәрьвед гӧнәкʹар ьн у нәqәданди нә, ле бь сайа qӧрбанбуна Иса әм йәкә дькарьн гәләк кʹәрәма бьстиньн. Wәрә әм ньһа пебьһʹәсьн һәла чь кʹаре жь qӧрбанбуна Иса әм дькарьн бьстиньн, йе кӧ Йаһоwа Хwәде пʹешкʹеш дайә мә.

¹⁵ Бахшандьна гӧна. Жь бо гӧнәкʹарийа мә, мәрʹа чәтьн ә чь кӧ рʹаст ә әм wе бькьн, чьмки һәр кәс жь мә, ча дь хәбәрданеда, ӧса жи дь шьхӧлада тʹьме шашийа дькә. Ле бь сайа qӧрбанбуна Иса әм дькарьн «бахшандьна гӧна» бьстиньн (Колоси 1:13, 14). Сәва ве йәке лазьм ә, кӧ әм гӧнед хwә бьдьнә рʹуйе хwә у тʹобә бькьн. Хенщи ве йәке әм гәрәке бь мьлуктийе у баwәрбуне жь Йаһоwа бахшандьне бьхwазьн, wәки әw бьбахшинә мә. (Бьхунә 1 Йуһʹәнна 1:8, 9.)

16. Бь сайа чь әм дькарьн бь исафәкә тʹәмьз Хwәдерʹа qӧльх кьн, у исафа тʹәмьз чьда али мә дькә?

¹⁶ Исафа тʹәмьз ль бәр Йаһоwа Хwәде. Чьмки әм гӧнәкʹар ьн у гәлә щар хwә шаш дькьн, ләма жи исафа мә рʹьһʹәт нинә у мә дьчәрчьринә. Ле бь сайа qӧрбанбуна Иса, Йаһоwа бь һʹьзкьрьне у бь рʹәʹма дьле хwә гӧнед мә дьбахшинә у изьне дьдә, wәки мәрьвед гӧнәкʹар бь исафәкә тʹәмьз бькарьбьн wирʹа qӧльх кьн (Ибрани 9:13, 14). Демәк әм дькарьн архайин у сәрбәст Йаһоwарʹа дӧа бькьн у хwә незики wи бькьн (Ибрани 4:14-16). Һәрге әм исафа хwә тʹәмьз хwәй кьн әв йәк wе мәрʹа әʹдьлайе бинә у wе али мә бькә, wәки әм хwә баш тʹәхмин кьн у бәхтәwар бьн.

17. Әw йәк кӧ Иса Мәсиһ сәва һʹәмуйа бу qӧрбан, чь кʹәрәма дькарә мәрʹа бинә?

¹⁷ Гӧмана жийина һʹәта-һʹәтайе дь щьнәтеда. Дь кʹьтеба Рʹомайи 6:23-да ньвисар ә. «Чьмки маше гӧнә мьрьн ә, ле пʹешкʹеша Хwәде жийина һʹәта-һʹәтайе йә, бь сайа Хӧдане мә Мәсиһ Иса». Дь сәре 3-да әм пеһʹәсийан дәрһәqа кʹәрәмед кӧ дь щьнәтеда һивийа мә нә (Әʹйанти 21:3, 4). Әв һʹәму кʹәрәм, демәк әʹмьре һʹәта-һʹәтайе у сьһʹәт-qәwата баш, әʹсәйи wе бенә сери, чьмки Иса Мәсиһ сәва мә әʹмьре хwә да. Сәва кӧ әм бькарьбьн әван кʹәрәма бьстиньн, лазьм ә wәки әм рʹазибуна хwә нишан кьн жь бо ве пʹешкʹеше, йа кӧ Йаһоwа Хwәде дайә мә.

ЧА ТӦ ДЬКАРИ РʹАЗИБУНА ХWӘ НИШАН КИ?

18. Чьрʹа әм гәрәке жь бо ве пʹешкʹеша qимәт, Йаһоwарʹа рʹази бьн?

¹⁸ Чьрʹа әм гәрәке жь бо ве пʹешкʹеша qимәт Йаһоwарʹа рʹази бьн? Мәсәлә, пʹешкʹеш сәва мә wе пʹьрʹ qимәт бә, һәрге әм заньн кӧ һәвале мә сәва ве пʹешкʹеше гәлә пʹәрә, wәʹдә у qәwата хwә хәрщ кьрийә сәва кӧ әве пʹешкʹеше бьдә мә. Әв йәк кʹьфш дькә, кӧ һәвале мә бь рʹастийе жи мә һʹьз дькә. Гава әм ве пʹешкʹеше дьстиньн дьле мә һәма бь шабуне тʹьжә дьбә. Ӧса жи кʹьрʹин, әв пʹешкʹешәкә пʹьрʹ qимәт ә жь алийе Йаһоwа Хwәдеда, чьмки Йаһоwа жь хwә qӧрбанәкә мәзьн у бьһа да. Дь Йуһʹәнна 3:16-да ньвисар ә: «Чьмки Хwәде ӧса дьнйа һʹьз кьр, кӧ Кӧрʹе хwәйи тайе тʹәне бәрва да». Бь рʹастийе жи qӧрбанбуна Иса Мәсиһ әшкәрә нишан дькә, wәки Йаһоwа мә һʹьз дькә. Әв ӧса жи әʹйан дькә кӧ хwәха Иса Мәсиһ жи мә һʹьз дькә, ләма жи әw һазьр бу сәва мә әʹмьре хwә бьдә, wәки әм бькарьбьн хьлаз бьн. (Бьхунә Йуһʹәнна 15:13.) Әв пʹешкʹеша qимәт жь Хwәде, гӧмане дьдә мә, кӧ Йаһоwа у Иса Мәсиһ бь рʹастийе жи мә һәр йәке һʹьз дькьн (Галати 2:20).

19, 20. Ча тӧ дькари нишан ки, кӧ дьшекьрини пʹешкʹеша жь Йаһоwа Хwәде у wирʹа рʹази йи?

¹⁹ Ле ча тӧ дькари нишан ки wәки дьшекьрини әве пʹешкʹеша жь Йаһоwа Хwәде у жь wи рʹази йи? Йа пешьн, гәләк фәрз ә wәки әм незики Әʹфьрандаре мә Йаһоwа бьн у дәрһәqа wи пебьһʹәсьн (Йуһʹәнна 17:3). Һинбуна Кʹьтеба Пироз бь аликʹарийа ве кʹьтеба кӧ ньһа тӧ дьхуни, wе али тә бькә һе рʹьнд Йаһоwа нас ки. Һәрге тӧ пебьһʹәси дәрһәqа Йаһоwа, һʹьзкьрьна тә һьндава wи һе wе мәзьн бә. Әв һʹьзкьрьн wе али тә бькә дьле Йаһоwа Хwәде хwәш бейи у wи ша бьки (1 Йуһʹәнна 5:3).

²⁰ Баwәрийа хwә qӧрбанбуна Иса Мәсиһ бинә. Дь Кʹьтеба Пирозда ньвисар ә: «Әwе кӧ Иса баwәр дькә, жийина wийә һʹәта-һʹәтайе һәйә» (Йуһʹәнна 3:36). Ле ча тӧ дькари баwәрбуна хwә Иса бини? Баwәрбуна тә тʹәне ль сәр гьлийа гәрәке нибә, чьмки «баwәри бейи кьра мьри йә» (Аqуб 2:26). Ле бь рʹастийе баwәрбуна мә кьред у шьхӧлед мәва тʹәвгьредайи йә. Һәрге әм чʹәʹв бьдьнә Иса Мәсиһ у гьлийед wи бьqәдиньн дь әʹмьре хwәда, әме нишан кьн кӧ баwәрийа мә һәйә (Йуһʹәнна 13:15).

21, 22. (а) Чьрʹа фәрз ә wәки һәр сал әм бенә ль сәр Евара Биранина Мьрьна Иса? (б) Дь сәре майинда әме дәрһәqа чь пебьһʹәсьн?

²¹ Wәрен ль сәр Евара Биранина Мьрьна Иса Мәсиһ. Еваре 14 Нисане, дь сала 33-да Иса щәжьнәкә гәлә фәрз дәрбаз кьр, йа кӧ дь Кʹьтеба Пирозда wерʹа те готьне «шива Хӧдан» (1 Корьнтʹи 11:20; Мәтта 26:26-28). Ль сәр ве әʹйде ӧса жи дьбежьн Евара Биранина Мьрьна Иса Мәсиһ. Иса әв әʹйд дәрбаз кьр, сәва кӧ шагьртед wи у мәсиһийед рʹаст тʹьме биньнә бира хwә, кӧ Иса әʹмьре хwәйи qәданди сәва мә кьрә qӧрбан. Дәрһәqа ве йәке Иса гот: «Ве йәке бона биранина мьн бькьн» (Луqа 22:19). Дәрбазкьрьна ве әʹйде һәр сал, тинә бира мә wәки Йаһоwа у Иса Мәсиһ жь бо һʹьзкьрьне qӧрбанәкә мәзьн у бьһа дан бона мә. Һазьрбуна мә ль сәр әʹйде, шекьрандьн у рʹазибуна мә дьдә кʹьфше.a

²² Әw йәк кӧ Йаһоwа сәва мә Кӧрʹе хwәйи тайе тʹәне бәрва да, бь рʹастийе жи, жь алийе Йаһоwа Хwәдеда пʹешкʹешәкә пʹьрʹ qимәт ә (2 Корьнтʹи 9:14, 15). Әв пʹешкʹеш һәла һе дькарә али wан мәрьва жи бькә, йед кӧ мьрьн ә. Дь сәре майинда дәрһәqа ве йәке, әме һе зедә пебьһʹәсьн.