«Тö Мьн жь Wан Зедәтьр Һʹьз дьки?»

1, 2. Чахе Пәтрус тʹәмамийа шәве мәʹси дьгьртьн, әw чь дәрсе һин бу?

ҺʹӘФТ шагьртед Иса тʹәмамийа шәве тʹорʹ авитьбунә Бәʹра Щәлиле, ле qә тʹö мәʹси нәгьртьн. Бәрбанге Исайе сахкьри жь дәве голе дина хwә дьда wан. Паше әwи wанрʹа гот: «‹Тʹорʹе бавежьнә алийе qәйькейи рʹасте һуне бьгьрьн›. Wана жи тʹорʹ авите у жь дәст гәләкбуна мәʹсийа нькарьбун кö тʹорʹ бькʹьшандана» (Йуһʹн. 21:1-6).

² Паши тәʹште кö Иса wанрʹа һазьр кьр, әwи Пәтрус ньһерʹи у готе: «Шьмһʹуне кöрʹе Йуһʹәнна, тö мьн жь wан зедәтьр һʹьз дьки?, ДТʹ». Гәло чьрʹа Иса әw пьрс да wи? Те кʹьфше Иса дьхwәст жь Пәтрус бьпьрсийа, һәла әw Иса у һинкьрьнед wи дьһа һʹьз дькә, йан хәбата хwә ча нечʹирван. Ле Пәтрус щаба wи да: «Бәле Хöдан, тö зани кö әз тә һʹьз дькьм» (Йуһʹн. 21:15). Жь wи wәʹдәйи Пәтрус бь жийина хwә избат кьр, кö әw Иса Мәсиһ һʹьз дькә. Әwи шьхöле бәлакьрьна мьзгинийеда гәләк тьшт дькьр, у паше бу стуна щьвата Мәсиһти qьрʹна йәкеда.

3. Мәсиһи гәрәке хwә жь чь хофе хwәй кьн?

³ Әм чь дәрсе һин дьбьн жь гьлийед Иса кö әwи Пәтрусрʹа гот? Әм гәрәке фәсал бьн, wәки һʹьзкьрьна мә һьндава Иса сьст нәбә у шьхöлед Пʹадшатийе паш нәхьн. Иса заньбу wәки ве дьнйайеда мәрьв wе гәләк кöл-дәрда бькʹьшиньн у рʹасти чәтьнайа бен. Чахе Иса мәсәла тʹохьмрʹәш ани, әwи гот кö wе һьнәк «хәбәра Пʹадшатийе» qәбул кьн у пешда һәрʹьн, ле «хәмед ве дьнйайе» у «дәwләтийе» дәрәw wе «хәбәре» бьхәньqиньн (Мәт. 13:19-22; Марq. 4:19). Рʹасти жи öса нә, һәрге әм фәсал нибьн, хәмед мәйи һәррʹожи дькарьн дьле мә бькʹьшиньн сәр хwә у рʹöһʹанида мә сьст кьн. Ләма жи Иса шагьртед хwә пешда ширәт кьр: «Мьqати хwә бьн, нәбә кö дьле wә хwарьн, вәхwарьне у хәмед ве дьнйайева гьредайи бә» (Луqа 21:34).

4. Әм ча дькарьн хwә бьщерʹьбиньн һәла әм Иса qайим һʹьз дькьн йан на? (Бьньһерʹә шькле әʹwьлн.)

⁴ Әм жи мина Пәтрус дькарьн һʹьзкьрьна хwә Исарʹа бьдьнә кʹьфше, һәрге шьхöле кö әwи дабу шагьртед хwә дайньн щийе пешьн. Гәло әм ча дькарьн әве йәке бькьн? Щара лазьм ә пьрсе бьдьнә хwә: «Гәло әз бь рʹастийе чь һʹьз дькьм? Гәло әз шабуне дьһа зәʹф чьда дьвиньм, хьзмәтийа Хwәдеда йан шьхöлед ве дьнйайеда?» Wәрә әм дәрһәqа се тьшта шеwьр кьн, кʹижан кö дькарьн һʹьзкьрьна мә һьндава Иса бьтәмьриньн, әw һәйә хәбат, һесабун, у тьштед материали.

ХӘБАТ БЬРА ЩИЙЕ ХWӘ БӘ

5. Чь борщдарийа малхед мале һәйә?

⁵ Бона Пәтрус нечʹирвани тʹәне мьжулбун нибу, ле әw пәʹри-нане wи бу, чьмки әwи бь ве йәке әʹбура хwә дькьр. Малхед мале фәʹм дькьн, wәки әwана борщдар ьн нәфәред хwә хwәй кьн (1 Тимтʹ. 5:8). У әwана гәрәке бьхәбьтьн сәва әве борщдарийе биньн сери. Ле wан рʹожед ахьрийеда щара хәбат дькарә хәма һе зедә кә.

6. Хәбатада мәрьв рʹасти чь чәтьнайа тен?

⁶ Иро чәтьн ә хәбате бьвиньн, чьмки мәрьвед кö хәбате дьгәрʹьн зәʹф ьн, ле хәбат һаqас тʹöнә. У гәләк мәрьв мәщбур ьн бь сьһʹәта зедә жи бьхәбьтьн у щара бь һәqе лап кем. Чьмки гәләк компанийа дьхwазьн гәләк хәбат бькьн, ле нахwәзьн һаqас хәбатчийед wан һәбьн чьqас кö лазьм ә. Әwана öса дькьн сәва хәрще wан кем бә. У ләма һʹале хәбатчийа һьн физикида һьн жи емосийалида хьраб дьбә. Хәбатчийед кö рʹази набьн öса бьхәбьтьн, бәрхwә дькʹәвьн чьмки дькарьн хәбата хwә öнда кьн.

7, 8. а) Кʹерʹа әм гәрәке бь тʹәмами амьн бьн? б) Бьраки жь Тайланде чь дәрсәкә фәрз һин бу жь хәбата хwә?

⁷ Әм гәрәке бь тʹәмами Йаһоwа Хwәдерʹа амьн бьн, нә кö мәзьне хәбата хwәрʹа (Луqа 10:27). Хәбат мәрʹа лазьм ә кö әʹбура хwә бькьн у бькарьбьн хьзмәт кьн. Һәрге әм фәсал ниньн, хәбат дькарә зийане бьдә хьзмәтийа мә. Дина хwә бьдьнә сәрһатийа бьраки жь Тайланде. Әw гьли дькә: «Хәбата мьн әw бу кö мьн компотәр чедькьрьн. Мьн хәбата хwә һʹьз дькьр, ле гәләк wәʹдә лазьм бу сәва ве хәбате. Ахьрийеда, qә wәʹде мьн нәдьма бона шьхöлед рʹöһʹани. Ле wәʹдә дәрбаз бу, мьн фәʹм кьр wәки әз гәрәке хәбата хwә бьгöһезьм, сәва кö шьхöлед Пʹадшатийе әʹмьре мьнда сәр щийе пешийе бә». Гәло әwи бьрайи чь кьр?

⁸ Әw шьровәдькә: «Паши wәкә саләке, мьн хәбата хwә һишт у дәстпекьр дәрва гöлмаста бьфьрошьм. Пешийе, алийе пʹәрада мьнрʹа чәтьн бу у әз дьлтәнг дьбум. Чахе әз рʹасти һәвалхәбатчийед хwәйә бәре дьһатьм, әwана мьн дькʹәнийан у дьготьн кö чьрʹа бона мьн дәрва фьротана гöлмаста жь чекьрьна компотәра четьр ә, кʹидәре кö кондисйонер һәбун. Мьн Йаһоwарʹа дöа дькьр wәки ве чәтьнайеда али мьн бькә, сәва әз нета хwә биньм сери кö һе зедә wәʹдә бона шьхöле Хwәде хәрщ кьм. Һеди-һеди һʹәму тьшт алийе башда һатә гöһастьне. Әз һин бум гöлмаста чекьм ча бькʹьрчийа хwәш дьһат, у wәʹдә шунда чекьрьна гöлмастада әз бумә һостә. Зутьрәке һәр рʹож мьн гöлмастед хwә гьшк дьфьрот. Бь рʹастийе бежьм, мьн һе зедә пʹәра чедькьр, нә кö чахе әз сәр компотәра дьхәбьтим. Әз дьһа бәхтәwар бумә, у әз накʹәвьмә стресе у нә жи бәрхwә дькʹәвьм чаwа сәр хәбата хwәйә бәре. Ле лапә фәрз әw ә, кö әз ньһа һе незики Йаһоwа бумә». (Бьхунә Мәтта 5:3, 6.)

9. Әм гәрәке ча бьн һьндава хәбатеда?

⁹ Йаһоwа мәрьвед хәбатһʹьз qимәт дькә у хәбата wанә гьран кʹәрәм дькә (Мәтʹлк. 12:14). Ле йәкә хәбата мә гәрәке щийе хwә бьгьрә. Иса гот: «Бәре пешьн ль Пʹадшатийа Хwәде бьгәрʹьн у бькьн кö рʹастийа wи бьqәдиньн у әw һʹәмуйе wәрʹа бенә дайине» (Мәт. 6:33). Сәва кö тедәрхьн һәла әм рʹаст дьньһерʹьн сәр хәбата хwә йан на, пьрсәкә öса бьдьнә хwә: «Гәло дьбә кö хәбат бона мьн һе һʹәwас ә у һе мьн хwәш те, ле хьзмәтийа мьн Хwәдерʹа бона мьн баргьрани йә?» Чахе әм кʹур бьфькьрьн сәр ве пьрсе, әме тедәрхьн кö әм чь һе зәʹф һʹьз дькьн.

10. Иса чь дәрсәкә qимәт да?

¹⁰ Иса мәрʹа дәрс һишт кö жийина мәда щийе пешьн гәрәке чь бьгьрә. Щарәке, Иса чу мала Мәрйәме у Мәртʹайе. Мәртʹа хwарьнеда кʹәтьбу, ле Мәрйәм бәр ньге Иса рʹуньштьбу, сәва гöһ бьдә wи. Гава Мәртʹайе сәр Мәрйәме кьрә котә-кот wәки әw али wе накә, Иса готә Мәртʹайе: «Әw пʹара qәнщ жи Мәрйәме хwәрʹа бьжарт у жь wе найе стандьне» (Луqа 10:38-42). Бәле, Иса дәрсәкә qимәт да Мәртʹайе у әw дәрс бона мә йә жи. Сәва кö әм нәкʹәвьнә һәйрʹа хәмед хwә у Исарʹа избат кьн кö әм wи һʹьз дькьн, әм гәрәке тʹьме «пʹара qәнщ» бьжберьн. Öса һәләqәтийа мә тʹәви Хwәде wе щийе пешьн бьгьрә.

НЬҺЕРʹАНДЬНА МӘ СӘР ҺЕСАБУНЕ У WӘʹДӘДӘРБАЗКЬРЬНЕ

11. Кʹьтеба Пироз чь дьбежә дәрһәqа һесабуне у wәʹдәдәрбазкьрьне?

¹¹ Әм гәләк шьхöл дькьн у дьвәстьн, ләма щара мәрʹа лазьм ә әм һеса бьн у рʹьһʹәт бьн. Хәбәра Хwәдеда әм дьхуньн: «Бона зьлам жь хwарьн у вәхwарьне у жь бь кʹәде щане хwә ша кьрьне qәнщтьр тьштәк нинә» (Wаиз 2:24). Хwәха Иса жи фәʹм дькьр, wәки щара лазьм ә мәрьв һеса бә. Щарәке, чахе Иса тʹәви шагьртед хwә мьзгини бәла дькьр, у әwана вәстийан, әwи готә wан: «Дә wәрьн әм тʹәне һәрʹьнә щики хәwлә у һьнәки рʹьһʹәт бьн» (Марq. 6:31, 32).

12. Чьрʹа әм гәрәке фәсал бьн һьндава һесабуне у wәʹдәдәрбазкьрьне?

¹² Чахе әм тьштәкива мьжул дьбьн у хwәрʹа wәʹдә дәрбаз дькьн, әм һеса дьбьн. Ле һәрге һʹьш-аqьле мә тʹәне сәр һесабуне йә, әw дькарә жийина мәда щийе пешьн бьгьрә. Qьрʹна йәкеда, гәләк мәрьв öса дьфькьрин: «Әм бьхwьн-вәхwьн, чьмки әме сьбе бьмьрьн» (1 Корн. 15:32). Иро жи гәләк мәрьв öса дьфькьрьн. Мәсәлә, бь сала пешда гәдәки жь Әwропайе дәстпекьр бе сәр щьвате. Ле һʹьш-аqьле wи öса зәʹф сәр wәʹдәдәрбазкьрьне бу, кö ида һәләqәтийа хwә тʹәви Шәʹдед Йаһоwа бьрʹи. Wәʹдә шунда, әwи фәʹм кьр кö әwан wәʹдәдәрбазкьрьна тʹәне чәтьнайи жерʹа анин у әw бәхтәwар нинә. Ләма жи әwи диса дәстпекьр Кʹьтеба Пироз һин бә у паше бь хирәт дәстпекьр мьзгинийе бәла кә. Паши ньхöмандьна хwә, әwи гот: «Әз гәләк пʹошман дьбьм кö мьн дәрәнг фәʹм кьр, wәки хьзмәти Йаһоwарʹа һе зәʹф шабуне тинә, нә кö чь әw дьнйа дьдә мә».

13. а) Мәсәле биньн чь хоф һәйә чахе әм гәләк wәʹдә хәрщ дькьн сәр һесабуне. б) Чь дькарә али мә бькә рʹаст бьньһерʹьн сәр һесабуне?

¹³ Чахе әм һеса дьбьн, нета мә әw ә кö qәwате бьстиньн. Ле гәло чьqас wәʹдә гәрәке әм хәрщ кьн сәр һесабуне? Бьфькьрьн сәр ве мәсәле: Гәләк жь мә һʹьз дькьн щара ширьнайи бьхwьн, ле әм заньн кö һәрге әм һәма һәргав ширьнайи бьхwьн, сьһʹәт-qәwата мә wе хьраб бә. Ләма жи әм һе зәʹф хwарьне дьхwьн, нә кö тьштед ширьн. Һесабун у wәʹдәдәрбазкьрьн жи öса йә. Һәрге әм wәʹде хwә сәр һесабуне зәʹф хәрщ кьн, һәләqәтийа мә тʹәви Йаһоwа дькарә хьраб бә. Ләма жи әм гәрәке тʹьме шьхöле Хwәдеда хирәт бьн. Ле ча әм дькарьн тедәрхьн һәла ньһерʹандьна мә сәр һесабуне рʹаст ә йан на? Мәсәлә, әм дькарьн бьньвисьн кö һʹәфтийеда чьqас wәʹде мә чу сәр щьвате, хьзмәтийе, һинбуна шәхси у qöльхкьрьна тʹәви малбәте. Паше, әwан сьһʹәта бәрамбәр кьн тʹәви сьһʹәтед кö мә бона һесабуне хәрщ кьр, мәсәлә сәр спорте, мьжулбуна мә тьштәкива кö мә хwәш те, бәр телевизоре, йан сәр видео листька. У бьньһерʹьн һәла әw һʹәсаб wе чь нишан кьн. Дьбәкә һун тʹәхмин кьн кö лазьм ә «ширьнайи» һьнәки кем кьн. (Бьхунә Әфәси 5:15, 16.)

14. Чь дькарә али мә бькә кö wәʹде хwә рʹаст дәрбаз кьн?

¹⁴ Йаһоwа азайе дьдә мә, у малбәтеда малхе мале дькарә сафи кә чь wәʹдәдәрбазкьрьн бьжберʹьн. Кʹьтеба Пирозда Йаһоwа рʹебәри у принсип дайә мә, сәва әм сафикьрьнед рʹаст бькьн.a Бь рʹастийе чахе мәрьв һеса дьбә у рʹьһʹәт дьбә әw «дайина Хwәде йә» (Wаиз 3:12, 13). Ле wәʹдәдәрбазкьрьна һәр мәрьва дькарә щöдә бә (Галт. 6:4, 5). Әм гәрәке мьqати хwә бьн кö һесабун әʹмьре мәда щийе пешьн нәгьрә. Иса гот: «Хьзна тә кʹидәре бә, дьле тә жи wе ль wе дәре бә» (Мәт. 6:21). Бәле, һәрге әм бь дьл у әшq Иса һʹьз дькьн, wе бь фькьред мә, хәбәрдан у кьред мә бе кʹьфше, wәки шьхöле Пʹадшатийе әм сәр һәр тьштирʹа дьгьрьн (Фили. 1:9, 10).

НӘКʹӘВЬНӘ ПӘЙ ҺӘБУКЕ

15, 16. а) Бона Мәсиһийа һәбук ча дькарә бьбә тʹәльк? б) Иса дәрһәqа тьштед материали чь ширәт да?

¹⁵ Иро һʹьш-аqьле гәләк мәрьва тʹәне сәр тьшта йә, мәсәлә әwана пәй моде дькʹәвьн, пәй тьштед әләктроник, у диса пәй гәләк тьштед дьн. Бона wан һәбук у пʹәрә жь һәр тьшти фәрзтьр ьн. Ләма жи Мәсиһи гәрәке тʹьме хwә бьщерʹьбинә һәла хwәстьнед wи чь нә. Мәсәлә, пьрсед öса бьдьнә хwә: «Гәло бона мьн чь һе фәрз ә у сәр чь әз һе зәʹф wәʹдә хәрщ дькьм? Гәло дьбәкә әз дьһа зәʹф wәʹде хwә сәр тьшта хәрщ дькьм, мәсәлә тʹьме дьгәрʹьм у дьньһерʹьм әʹрәбед тʹәзә йан тьштед дьнә модерн, ле һе кем wәʹде мьн дьминә сәва хwә һазьр кьм бона щьвате? Дьбә кö сәр шьхöлед һәррʹожи wәʹде мьн һе зәʹф хәрщ дьбә, ле һьндьк wәʹдә хәрщ дькьм сәр дöа йан жи хwәндьна Кʹьтеба Пироз?» Һәрге wә тедәрхьст кö һʹьш-аqьле wә дьчә тʹәне сәр тьшта, у һʹьзкьрьна wә һьндава Иса сар дьбә, һун гәрәке гöһ бьдьн wан гьлийед Иса: «Һаш жь хwә һәбьн у һʹәвза хwә жь тьмайе бькьн» (Луqа 12:15). Гәло чьрʹа Иса ширәтәкә öса да?

¹⁶ Иса гот кö «тʹö кәс нькарә дö ахарʹа хöламтийе бькә». Паше Иса зедә кьр: «Һун нькарьн һьн Хwәдерʹа, һьн жи һәбукерʹа хöламтийе бькьн». Бәле, öса набә кö һәрдö ахарʹа амьн бьминьн. Ләма Иса гот wәки мәрьве кö дö ахарʹа хöламтийе дькә, «йан wе һʹиле wи жь йәки һәрʹә у йе дьне һʹьз бькә», йан жи «wе qәдьре йәки бьгьрә у йе дьне беһöрмәт кә» (Мәт. 6:24). Әм гьшк гöнәкʹар ьн, ләма жи мәрʹа лазьм ә шәрʹ бькьн мьqабьли хwәстьнед хwәйә бәдәне, демәк öса жи мьqабьли һʹьзкьрьна һьндава һәбуке (Әфәс. 2:3).

17. а) Чьрʹа һьнәкарʹа чәтьн ә рʹаст бьньһерʹьн сәр һәбуке? б) Чь дькарә али мә бькә сәва әм нәкʹәвьнә пәй һәбуке?

¹⁷ Гәләк мәрьв һʹьш-аqьле хwә öса зәʹф дьдьнә сәр хwәстьнед дьле хwә, кö wанрʹа чәтьн дьбә рʹаст сәр һәбуке бьньһерʹьн. Гәло чьрʹа? Чьмки әwана ида тедәрнахьн кö бәр чʹәʹве Хwәде чь qимәт ә. (Бьхунә 1 Корьнтʹи 2:14.) Һʹьш-аqьле wан те дадан, ләма wанрʹа чәтьн дьбә qәнщи у хьрабийе жь һәв дәрхьн (Ибрн. 5:11-14). Ахьрийеда, әwана ида нькарьн хwә бьгьрьн, у һе зәʹф у зәʹф тьшта дьхwазьн у тʹер набьн (Wаиз 5:10). Ле чʹарә һәйә кö әм ча дькарьн хwә жь ве йәке хwәй кьн. Әм гәрәке тʹьме Хәбәра Хwәде, демәк Кʹьтеба Пироз бьхуньн, сәва нәкʹәвьнә тʹәлька һәбуке (1 Пәт. 2:2). Иса тʹьме дьфькьри сәр рʹастийа у принсипед Хwәде, у әwе йәке али wи кьр кö wәʹде щерʹьбандьне амьн бьминә. Иро жи һәрге әм нахwазьн бькʹәвьнә тʹәлька һәбуке, әм гәрәке жийина хwәда принсипед Кʹьтеба Пироз бьдьнә хәбате (Мәт. 4:8-10). Бь ве йәке әме нишан кьн кö әм һе зедә Иса һʹьз дькьн нә кö һәбуке.

18. Нета дьле wә чь йә?

¹⁸ Чахе Иса жь Пәтрус пьрси, «Тö мьн жь wан зедәтьр һʹьз дьки?», ДТʹ, бь ве пьрсе әwи дьхwәст Пәтрус ширәт кә, кö чьqас фәрз ә хьзмәти щийе пешьн бә. Наве Пәтрус кö те һʹәсабе «Qәйа» йан «Зьнар» рʹасти жи wи дьһат. Әw мина qәйайе йәки qәwи бу, у һʹöнöред wийә баш һәбун (Кʹар. Шанд. 4:5-20). Иро әм жи дьхwазьн кö һʹьзкьрьна мә һьндава Мәсиһ qәwи бьминә. Ләма хәбат, һесабун у тьштед материали әʹмьре мәда гәрәке щийе пешьн нәгьрьн. Wәрә тʹьме мина Пәтрус бь жийина хwә избат кьн кö әм Иса һʹьз дькьн, у бежьн: «Хöдан, тö зани кö әз тә һʹьз дькьм».