Сәрһати 55

Гәдәки Бьчʹук Хԝәдерʹа Ԛӧльх Дькә

ӘВ ГӘДЕ бьчʹук чьԛас хас ә, ӧса нинә? Наве ԝи Самуйел ә. Ле мере дәсте хԝә данийа сәр сәре ԝи, Әли йә, әԝ дь Исраеледа кʹаһине пешьн ә. Ле әԝед кӧ ԝи анинә бәр Әли, де баве ԝи нә. Навед ԝан Һанна у Әлкана йә.

Самуйел һе ԝәкә чар-пенщ сали бу. Ле әԝ гәрәке дь коне Йаһоԝада тʹәви Әли у кʹаһинед дьне бьма. Ле гәло чьрʹа Һанна у Әлкана зарʹәкә ӧса бьчʹук гәрәке бьһишта дь коне Йаһоԝада сәва ԛӧльх кьрьне? Ԝәрʹен пебьһʹәсьн.

Ԝәкә чәнд сала пешда Һанна гәлә бәрхԝә дькʹәт. Чьмки әԝе гәлә дьхԝәст кӧ зарʹәкә ԝе һәбә ле әԝ безӧрʹәт бу. Дәрбәке чахе Һанна һатьбу бәр коне Йаһоԝа, әԝе дӧа кьр: «Йа Йаһоԝа, алийе мьнда бьньһерʹә, мьн бир нәкә! Һәрге тӧ кӧрʹәки мьнрʹа бьди, соз дьдьмә тә әзе ԝи тʹәсмили тә бькьм, кӧ тʹәмамийа әʹмьре хԝә дь коне тәда тәрʹа ԛӧльх кә».

Йаһоԝа дӧайе ԝе бьһист у чәнд мәһа шунда ԝерʹа Самуйел һатә буйине. Һанна кӧрʹе хԝәйи бьчʹук гәлә һʹәз дькьр, у әԝе дәстпекьр зарʹа хԝә жь бьчʹуктайеда дәрһәԛа Йаһоԝа һин бькә. Әԝе готә мере хԝә: «Һәма ча кӧрʹе мә Самуйел жь шир бьԛәтә у һьнәки мәзьн бә, әзе ԝи бьвьм дь коне Йаһоԝада, кӧ ԝирʹа ԛӧльх кә».

Аһан ль сәр шькьл те кʹьвше кӧ ԝана ӧса жи кьр. Самуйел жи бь шабунва ԛайил бу дь коне Йаһоԝада ԛӧльх кьра, чьмки әԝ жь де-баве хԝә гәлә рʹьнд һатә һинкьрьне. Де-баве ԝи жи һәр сал дьһатьнә бәр коне Йаһоԝа кӧ ль ԝьр сәре хԝә бәр Хԝәде дайньн, у һьн жи сәрики кӧрʹе хԝә хьн. Ләма жи һәр сал ча әԝана дьһатьнә кон, Һанна сәва Самуйел кʹьнще сәрда йә мьл-кьн дьани, йе кӧ хԝәха дьдрʹут.

Ԝәʹдә дәрбаз дьбу Самуйел дь коне Йаһоԝада ԛӧльхкьрьна хԝә дәрбаз дькьр. Йаһоԝа у щьмәʹт, гәлә ԝи һʹәз дькьрьн. Ле дӧ кӧрʹе Әли һәбун. Навед ԝан Һофни у Финәһас бу. Әԝана мәрийед хьрав бун йе кӧ гәлә тьште нәрʹаст дькьрьн, у һьн жи мәрийа дьл дькьрьн кӧ әԝана гӧрʹа Йаһоԝа нәкьн. Сәва шьхӧле ԝанә нәрʹаст Әли гәрәке кӧрʹед хԝә жь каһинтийе дәрхьста, ле әԝи ӧса нәкьр.

Рʹаст ә дь коне Йаһоԝада шьхӧле хьрав дьԛәԝьмьн, ле йәкә әв Самуйел нәдьда сәкьнандьне, кӧ бь дьл у щан Йаһоԝарʹа ԛӧльх кә. Мәри йе кӧ бь рʹастийе Йаһоԝа һʹәз дькьрьн, һьнәк бун, ләма жи ида гәлә ԝәʹдә Йаһоԝа тʹӧ кәсирʹа жь мәрийа хәвәр нәдьда. Ле ԝәрә әм бьньһерʹьн чь дьԛәԝьмә чахе Самуйел һьнәки мәзьн дьбә.

Щарәке чахе Самуйел дь конеда рʹаза бу, ньшкева дәнгәки әԝ һʹьшйар кьр. Самуйел щава хԝә да: «Әз вьр ьм». Әԝ рʹадьбә, дьрʹәвә щәм Әли у дьвежә: «Тә гази мьн дькьр, ва әз һатьм».

Ле Әли дьвежә: «На, мьн гази тә нәдькьр. Һәрʹә пʹалдә». Самуйел жи чу кӧ рʹазе.

Щара дӧда дәнг диса гази дькә: «Самуйел!» Самуйел рʹадьбә, дьчә бал Әли у дьвежә: «Тә гази мьн дькьр, аһан әз һатьм». Ле Әли жерʹа гот: «Мьн гази тә нәдькьр лаԝо. Һәрʹә пʹалдә». Самуйел чу нав щийе хԝә рʹаза.

«Самуйел!» щара сьсийа дәнг гази кьр. Самуйел диса дәрбәки рʹадьбә, дьчә бал Әли у дьвежә. «Әз вьр ьм, һатьм, чьмки тә гази мьн кьр». Аһан, ньһа ида Әли фәʹм кьр кӧ әв Йаһоԝа гази Самуйел дькә. Ләма жи әԝ дьвежә Самуйел: «Һәрʹә пʹалдә, у һәрге дәнг диса дәрбәки гази тә бькә, тӧ гәрәке бежи: ‹Йа Хԝәдайе мьн Йаһоԝа, бежә, ԛӧльхчйие тә дьбьһе›».

Паше, чахе дәнг диса гази Самуйел кьр, әԝи щава хԝә һәма ӧса да, ча Әли жерʹа гот. Ньһа Йаһоԝа дьвежә Самуйел кӧ дӧ кӧрʹе Әли, Һофни у Финәһас сәва шьхӧлед хԝәйә нәрʹаст ԝе бенә диԝан кьрьне. Ԝәʹдә шунда Һофни у Финәһас дь нав шәрʹе тʹәви Фьльстиана дьмьрьн, у чахе Әли әв йәк бьһист әԝ кʹәт, стуйе хԝә шкенанд у мьр. Ӧса созе Йаһоԝа һатә сәри.

Самуйел мәзьн дьбә у кʹьвш дьбә ча кʹаһине пашьн дь Исраеледа. Ле чахе әԝ ида әʹмьре хԝәда мәзьн бу щьмәʹте готә ԝи: «Мәрʹа пʹадшаки кʹьвш кә кӧ әԝ сәрԝертийе ль сәр мә бькә». Самуйел нәдьхԝәст әв йәк бькьра, чьмки бь рʹастийе Йаһоԝа пʹадшайе ԝан ә. Ле Йаһоԝа дьвежә Самуйел кӧ әԝ гәрәке гӧрʹа щьмәʹте бькә у һәма ӧса жи бькә.

1 Самуйел 1:1-28; 2:11-36; 4:16-18; 8:4-9.