Сәрһати 81
Ԝана Гӧмана Хԝә Данә Сәр Хԝәде
ԜӘКӘ 50 000 мәри рʹекә дьреж жь Бабилоне һʹәта Оршәлиме дәрбаз бун. Гава әԝана гьһиштьнә щи, ԝана дина хԝә дайе кӧ Оршәлим ԝеран у рʹут-вала йә у тʹӧ кәс ль вьр нажи. Ԝана фәʹм кьр кӧ гәрәке һʹәму тьшт тʹәзәда ава кьн.
Ле пешийе ԝана ԛӧрбангәһ ава кьр, сәва кӧ ль сәр ви ԛӧрбанед бь һʹәйԝана Йаһоԝарʹа биньн. Чәнд мәһ шунда ԝана ида авакьрьна пʹарьстгәһе жи дәстпекьр. Ле дӧр-бәре ԝан гәлә нәйаред ԝан һәбун, йе кӧ нәдьхԝәстьн ԝәки исраели пʹарьстгәһе ава кьн. Ԝана дьхԝәст тьрсе текьнә дьле исраелийа, сәва кӧ авакьрьне бьдьнә сәкьнандьне. Хьлазийе дьжмьн ӧса кьрьн, кӧ пʹадшайе фарьса тʹәзә, ԛануна ӧса дәрхьст бь кʹижани авакьрьна исраелийа һатә ԛәдәхә кьрьне у сәкьнандьне.
Сал дәрбаз дьбун. Паши вәгәрʹандьна жь Бабилоне ида 17 сал дәрбаз бу. Ньһа Йаһоԝа пʹехәмбәред хԝә Һагай у Зәкәрийа дьшинә щәм исраелийа, ԝәки щьмәʹт пашда дәстпекьн пʹарьстгәһе ава кьн. Рʹаст ә авакьрьн ԛәдәхәкьри бу, ле щьмәʹта исраели гӧмана хԝә данә сәр Йаһоԝа, гӧрʹа пʹехәмбәра кьрьн у авакьрьн дәстпекьрьн.
Паши ве йәке сәркʹарәк жь Фарьсийа Татʹәнай һатә ль Оршәлиме, ԝәки жь исраелийа бьпьрсә һәла кʹи изьн дайә ԝан пʹарьстгәһе ава кьн. Исраелийа жи ԝирʹа готьн кӧ чахе әԝана һе дь Бабилонеда бун Корәш пʹадша готә ԝан: «Вәгәрʹьн Оршәлиме у пʹарьстгәһа Хԝәдайе хԝә Йаһоԝа тʹәзәда ава кьн».
Татʹәнай жи нәмәке дьшинә Бабилоне у пьрс дькә, һәла бь рʹастийе Корәш пʹадша, йе кӧ ида сах нибу, фәрманәкә ӧса дайә. Һьнә ԝәʹдә шунда пʹадше Фарьсийе тʹәзә, щава хԝәда Татʹәнайрʹа гот, кӧ рʹасти жи әв йәк ԛәԝьмийә, у сәрда жи зедә кьр: «Бьра щьмәʹта исраели пʹарьстгәһе Хԝәдайе хԝәр’а ава кьн. Ле һьн жи әз фәрмане дьдьмә ԝә, ԝәки һун али ԝан бькьн». Нава чар сала пʹарьстгәһ ида һазьр бу, у щьмәʹта исраели жь бо ве йәке гәлә ша дьбун.
Паши авакьрьна пʹарьстгәһе ԝәкә 48 сал дәрбаз бьбун. Щьмәʹта исраели гәлә кʹәсиб бун. Шәһәр у пʹарьстгәһ жи, мина бәре ӧса бәдәԝ нибун ле ида хьрав бьбун. Дь Бабилонеда мерәк бь наве Әзра пеһʹәсийа, кӧ пʹарьстгәһ лазьмә бе тʹәзәкьрьне. Кʹа әм бьньһерʹьн әԝи чь кьр.
Әзра дьчә бал пʹадше фарьсийа Артаһшашт. Пʹадша жи гәлә мәрики ԛәнщ бу. Әԝи гәлә пʹешкʹеш да Әзра, сәва кӧ ван п’ешк’еша хԝәрʹа бьвә Оршәлиме. Әзра жи аликʹарийе дьхԝазә жь ԝан исраелийа йе кӧ дь Бабилонеда дьман, сәва кӧ әԝана али ԝи бькьн ван пʹешкʹеша бьвьн Оршәлиме. Ԝи чахи ԝәкә 6 000 исраели һатьн кӧ тʹәви Әзра һәрʹьн. Ԝана гәлә зерʹ-зив у тьштед дьне жи хԝәрʹа бьрьн Оршәлиме.
Ле Әзра гәлә бәрхԝә дькʹәт, чьмки ль сәр рʹе гәлә мәрийед зӧлм у ԛачах һәбун. Ԝана дькарьбу зерʹ-зиве исраелийа бьстанда у һьн жи ԝана бькӧштана. Ча ль сәр шькьл те кʹьвше, Әзра щьмәʹт тʹәвайи тʹоп дькә у әԝана дәстпедькьн Йаһоԝарʹа дӧа бькьн, сәва кӧ әԝ али ԝан бькә сах сьламәт бьгьһижьнә Оршәлиме.
Чар мәһа шунда әԝана сах-сьламәт гьһиштьнә Оршәлиме, чьмки Йаһоԝа ԝанрʹа бу хԝәй. Бь ве йәке те кʹьвше кӧ Йаһоԝа дькарә али ԝан мәрийа бькә йе кӧ ль сәр аликʹарийа Хԝәде гӧман ьн.
Әзра сәре 2 һатә 8.