Тö Жийин öса Qимәт Дьки Чаwа Хwәде Qимәт Дькә?

1, 2. Илаһи кʹижан пʹешкʹеша Хwәде әм гәрәке qимәт кьн у чьма?

БАВЕ мәйи әʹзмана пʹешкʹешед пʹьрʹ баш дайә мә, әwи жийин у сәрwахти дайә мә. Бь аликʹарийа сәрwахтийе әм дькарьн хәйсәт-һʹöнöред Йаһоwа нав хwәда пешда биньн (Дәстпебун 1:27). Сәрwахти öса жи али мә дькә кö принсипед Кʹьтеба Пироз фәʹм бькьн, чьмки әwана мәрʹа кʹаре тиньн. Һәрге әм принсипед Кʹьтеба Пироз бьдьн хәбате әме рʹöһʹанида пешда һәрʹьн у бькарьбьн хwә һини wе йәке кьн, wәки «qәнщи у хәрабийе жь һәв дәрхьн» (Ибрани 5:14, ИМ).

² Рʹожа иройин сәрwахти мәрʹа зәʹф лазьм ә, сәва әм бьфькьрьн сәр принсипед Кʹьтеба Пироз, чьмки сәр һʹәму дәрәщед рʹожа иройин qанун тʹöнәнә. Мәсәлә, бона дәрман у qәнщкьрьнед öса кʹижанада кö хун те хәбьтандьне, дь Кʹьтеба Пирозда тʹö qанун тʹöнә. Ле һәр кәс, кʹи кö дьхwазә гöрʹа Хwәдеда бьминә гәрәке дь ван пьрсада бе тʹалаш нибә. Һәрге әм фәʹм бькьн, кö кʹижан принсипед Кʹьтеба Пироз әм дькарьн дь ван дәрәщада бьдьн хәбате, wи чахи әме бькарьбьн һʹәму тьшти бь билани сафи кьн, у әв йәк wе али мә бькә кö исафа мә тʹәмьз бә у әм нава һʹьзкьрьна Хwәдеда бьминьн (Зәбур 2:6-11). Ньһа әм дәрһәqа һьнә жь ван принсипа хәбәр дьн.

ӘʹМЬР У ХУН ПИРОЗ ЬН

3, 4. Щара пешьн Хwәде кʹәнге да кʹьфше, кö хун пироз ә у әw ль сәр һʹиме кʹижан принсипа нә?

³ Йаһоwа щара пешьн wи чахи да кʹьфше кö хун әʹмьрва гьредайи йә у пироз ә, чахе Qайин Һабил кöшт. Паши кöштьна Һабил Хwәде готә Qайин: «Тә чь кьрийә? Дәнге хуна бьре тә жь әʹрде шькийате хwә ль мьн дькә» (Дәстпебун 4:10, ПКʹМ). Сәва Йаһоwа, хуна Һабил дьһатә һʹәсабе жийина wи, кʹижан кö бь зöлмийе һатә бьрʹине. Ләма жи, бь симболик, хуна Һабил жь әʹрде шькийат ль Хwәде дькьр бона һʹәйфһьлдане (Ибрани 12:24).

⁴ Паши Селава Дьнйайе Хwәде изьн да мәрийа кö гошт бьхwьн, ле тʹәне бе хун: «Тʹәне гошт сахийеда, аwа готи хунева нәхwьн. Ле әзе әʹсә дәʹwа хуна жийина wә бькьм» (Дәстпебун 9:4, 5, ПКʹМ). Әва qануна Хwәде, бона һәр кәсе жь рʹькʹьнйата Нöһ бу, у һʹәта рʹожа иройин qәwатеда нә. У избат дькә әв Хәбәра Хwәде кö әwи Qайинрʹа готьбу дәрһәqа wе йәке, кö хун те һʹәсабе нәфс, йан жи әʹмьре һʹәму әʹфьрина. Жь ве qануне әм öса жи педьһʹәсьн, wәки Йаһоwа һәйә Канийа жийине у әw wе щәза кә wан һʹәму мәрийа йед кö хуне йан жи жийине qимәт накьн (Зәбур 36:9).

5, 6. Жь qануна Муса ча те кʹьфше, кö хун пироз ә у qимәт ә? (Бьньһерʹә чаргошә «Әʹмьре Һʹәйwана Qимәт Кә»).

⁵ Әв дö рʹастийед фәрз qануна Мусада жи щи гьрт ьн. Дь Qануна Кʹаһинтийе 17:10, 11-да ньвисар ә: «Әзе бәре хwә бьдьмә әw кәсе хунхwар у wи жь нава щьмәʹта wи öнда кьм. Чьмки әʹмьре һәр бинбәри хунеда йә у мьн әw да wә кö һун пе wе ль сәр горигәһе кʹәwандьне бона әʹмьре хwә бькьн, чьмки хун бона әʹмьр кʹәwандьне дькә (ПКʹМ)». (Бьньһерʹә чаргошә «Хун у кʹьрʹин».)

⁶ Һәрге хуна һʹәйwане кöшти сәва кʹәwандьне нәдьһатә хәбьтандьне, wи чахи әв хун гәрәке бьһата рʹетьне ль сәр әʹрде. Öса хун бь симболик вәдьгәрʹийа щәм Канийа жийине (Qануна Дöщари 12:16; Әзәqийел 18:4). Ле жь Исраелийа нәдьһатә дәʹwакьрьне wәки öса бькьн кö ньqьткә хун гоштда нәминә. Һәрге һʹәйwан рʹаст дьһатә сәржекьрьне у хун öса ле дьчу чаwа лазьм бу, һьнге Исраелийа дькарьбу бь исафа тʹәмьз әв гошт бьхwарана, чьмки һәр тьшт öса кьрьбун wәки бьдьнә кʹьфше кö qәдьре Канийа жийине дьгьрьн.

7. Даwьд ча нишан кьр, кö qәдьре пирозийа хуне дьгьрә?

⁷ Даwьд дьле Хwәде хwәш дьһат. Әwи рʹьнд заньбу qанунед дәрһәqа хуне. Хенщи ве йәке, әwи рʹьнд фәʹм дькьр кö кʹижан принсип һәнә ль һʹиме wан qанунада, кʹижан кö Хwәде бона хуне дабу (Кʹаред Шандийа 13:22). Щарәке чахе Даwьд гәләк тʹи бу, се әскәред wи кʹәтьнә нав ордийа дьжмьна у жь wедәре ав wирʹа анин. Ле гәло Даwьд чь кьр? Әwи гот: «Әзе ча хуна ван мәрийа вәхwьм, йед кö нәфса хwә данә бәр qәзийе, ДТʹ?» Wан мәрийа жийина хwә данә бәр qәзийе бона аве. Ләма жи, сәва Даwьд вәхwарьна ве аве дьһатә һʹәсабе, вәхwарьна хуна wан әскәра, чьмки хун бәрамбәри жийине дьбә. Рʹаст ә Даwьд гәләк тʹи бу, ле әwи әв ав һьлда у бәр Йаһоwа рʹет (2 Самуйел 23:15-17).

8, 9. Гәло паши сазкьрьна щьвата Мәсиһийайә qьрʹна йәке, ньһерʹандьна Йаһоwа һьндава жийине у хуне һатийә гöһастьне, йан на? Шьровәкә.

⁸ Wәкә 2 400 сал паши wе йәке чахе Нöһрʹа тʹәми дәрһәqа хуне һатьбу дайине, у wәкә 1 500 сал паши wе йәке чахе тʹәви Исраелийа пәйман һатә гьредане, qьрʹна йәкеда Йаһоwа бь сайа рʹöһʹе хwә һʹöкöм кьр сәр кʹома рʹебәрийе, кö öса бьньвисә: «Ль Рʹöһʹе Пироз хwәш һат, öса жи ль мә, кö тʹö бари нәдьнә сәр мьле wә, пештьри ван тьштед һʹәwщә: Дури qöрбанед пʹута, хуне, мьрарийе у бенамусийе бьн» (Кʹаред Шандийа15:28, 29).

⁹ Фәʹмдари йә, кö кʹома рʹебәрийе йа wан чаха фәʹм дькьр кö хун пироз ә, у хуне нәрʹаст бьдьн хәбате гöнәки öса гьран ә ча пʹутпʹарьсти у qавикьрьн. У рʹожа иройин Мәсиһийед рʹаст, хwә әве дәʹwакьрьнева дьгьрьн. Әwана кʹур дьфькьрьн ль сәр принсипед Кʹьтеба Пироз, у ләма дь wан пьрсада йед кö хунева гьредайи нә, әwана дькарьн Йаһоwа хwәш бен.

ХӘБЬТАНДЬНА ХУНЕ ДЬ ПЬРСЕД QӘНЩКЬРЬНЕДА

10, 11. (а) Ньһерʹандьна Шәʹдед Йаһоwа һьндава хәбьтандьна хуне у чар компонентед wе чь щурʹәйи йә? (б) Ньһерʹандьна Мәсиһийа һьндава хуне дь кʹижан дәрәщада дькарә жь һәв щöда бә?

¹⁰ Шәʹдед Йаһоwа фәʹм дькьн кö «дури . . . хуне . . . бьн» әв те һʹәсабе кö гәрәке хуне бәри хwә нәдьн, нә жи бьдьн бона кәсәки дьн у нә жи бона хwә бьдьн хwәйкьрьне. Әwана qәдьре qануна Хwәде дьгьрьн, у инкʹар дькьн чар компонентед хунейә сәрәкә бьдьн хәбате. Әв һәнә еритросит, лейкосит, тромбосит у плазма.

¹¹ Рʹожа иройин ван чар компонента пʹарәвәдькьн у фьраксийа дьстиньн, кʹижан кö паше дь щурʹә-щурʹә дәрәщада дьдьн хәбате. Ле гәло Мәсиһи дькарә рʹази бә бона хәбьтандьна ван фьраксийа? Гәло Мәсиһи фьраксийа һʹәсаб дькә ча хун, йан на? Һәр кәс гәрәке хwәха сафи кә qәбул кә әван фьраксийа, йан на. Хенщи ве йәке, Мәсиһи хwәха сафи дькә кö бьдә хәбате һемодиализе, һемодилусийайе йан жи ренфузийа, wәʹде кʹижани кö wе бе хәбьтандьне һәма хуна wи, кʹижан кö щики нәһатийә хwәйкьрьне. (Бьньһерʹә Әʹламәтийа Зедә бь наве «Фьраксийед Хуне у Операси»).

12. Әм ча дькарьн сафи кьн wан пьрса, кʹижана кö гәрәке бь исафа хwә сафи кьн?

¹² Сәва Йаһоwа йәк нинә кö сафикьрьнед мә чь щурʹәйи нә. Чьмки, әw хәм дькә бона wе йәке һәла әм бона чь дьфькьрьн у нетед мә чь нә. (Бьхунә Мәтʹәлок 17:3; 24:12). Ләма жи, пешийе әм гәрәке бь дöа жь Йаһоwа рʹебәрийе бьхwазьн, öса жи пьрсед дәрһәqа дәрманед һʹәкимтийе у проседуред wан леколин кьн, у паше ида әве пьрсе сафи кьн бь исафа хwәйә бь Кʹьтеба Пироз һинкьри (Рʹомайи 14:2, 22, 23). Бәле, кәсәки дьн гәрәке нәкә сәр мә wәки бь ньһерʹандьна wи бькьн, у әм жи гәрәке пьрсәкә öса нәдьнә мәрьвед дьн: «Һәрге тö дәwса мьн буйайи тәйе ча бькьра?» Дь пьрсед öсада һәр Мәсиһи wе хwәха «хöрща хwә һьлгьрә» (Галати 6:5; Рʹомайи 14:12; бьньһерʹә чаргошә «Әз Хуне Пироз Һʹәсаб Дькьм?»).

ДЬ QАНУНЕД ЙАҺОWАДА ҺʹЬЗКЬРЬНА WИ ТЕ КʹЬФШЕ

13. Qанун у принсипед Йаһоwа, дәрһәqа wи чь мәрʹа әʹйан дькьн? Шьровәкә.

¹³ Qанун у принсипед Кʹьтеба Пироз избат дькьн, кö Йаһоwа Qанундарәки билан ә у әw чаwа Бавәки qәнщ, бона һʹалхwәшийа зарʹед хwә хәм дькә (Зәбур 19:7-11). Тʹәмийа Йаһоwа кö «дури . . . хуне . . . бьн» ләма һатә дайине, чьмки хун пироз ә. Ле әв qанун öса жи мәрʹа кʹаре тинә. Мәсәлә, әв qанун мә хwәй дькә жь wан нәхwәши у проблема, кö дькарьн пешда бен һәрге хуне бәрʹи хwә дьн (Кʹаред Шандийа 15:20). Гәләк һʹәким жь һʹәму метʹодед иройин qәнщкьрьна бе хун, һʹәсаб дькьн «стандартәкә зер». Әв фькьред һан, Мәсиһийед рʹастрʹа диса дьдьнә кʹьфше кö Йаһоwа пʹьрʹ билан ә у бь һʹьзкьрьн тʹьжә йә. (Бьхунә Ишайа 55:9; Йуһʹәнна 14:21, 23.)

14, 15. (а) Һʹьзкьрьна Хwәде дь кʹижан qанунада дьһатә кʹьфше? (б) Тö чаwа дькари бьди хәбате әван принсипа, йед кö әʹмьрва гьредайи нә?

¹⁴ Хәмкьрьна Йаһоwа бона һʹалхwәшийа Исраелийа, дьһатә кʹьфше жь гәләк qанунед кö Йаһоwа дабу wан. Мәсәлә, Хwәде дәwа дькьр, wәки Исраели дора банийед малед хwә суре чекьн, wәки ньшкева кәсәк жорда нәкʹәвә, чьмки wана wәʹде хwә дьһа зәʹф ль сәр банийед малед хwә дәрбаз дькьрьн (Qануна Дöщари 22:8; 1 Самуйел 9:25, 26; Нәһәмийа 8:16; Кʹаред Шандийа 10:9). Хwәде öса жи дәwа дькьр, wәки хwәйе гаһе һʹар хәм бькә кö әв гаһ тʹö зийане нәдә мәрийа (Дәркʹәтьн 21:28, 29). Кʹи кö әван дәʹwакьрьнед Йаһоwа инкʹар дькьр, бь ве йәке нишан дькьр кö һьндава һʹалхwәшийа мәрьвед дьнена бетʹалаш ә, у öса әwи дькарьбу хуна кәсәки бькьра сьтуйе хwә.

¹⁵ Гәло әм ча дькарьн бьдьн хәбате әwан принсипа, ль сәр һʹиме кʹижани кö әв qанун ьн? Бьфькьрә бона һʹале мала хwә, щийе хәбата хwә, авта хwә, һʹәйwанед хwә, бьжартьна wәʹдәдәрбазкьрьна хwә у автоажотьна хwә. Дь һьнә шәһәрада авто һәв дькʹәвьн у әв дьбә мәʹнийа мьрьна гәләк щаһьла, чьмки әwана бадиһәwа тöрöш дькьн. Ле әw щаһьлед кö дьхwазьн нава һʹьзкьрьна Йаһоwада бьминьн, жийин qимәт дькьн у рʹьһʹәтийе нагәрʹьн дь шьхöлед öсада, йед кö дькарә qәзийе wанарʹа бинә. Әwана хwә нахапиньн бь wе йәке кö тʹö тьшт найе сәре wан. Ле дәwсе, әwана хwә жь тьштед зийандар хwәй дькьн у щаһьлтийа хwәрʹа ша дьбьн (Wаиз 11:9, 10).

16. Дь Кʹьтеба Пирозда чь принсип һәнә бона зарʹбәркьрьне? (Сьпартьне жи бьньһерʹә.)

¹⁶ Әʹмьре зарʹа нәбуйи жи бәр чʹәʹве Хwәде qимәт ә. Бәре дь Исраеледа һәрге кәсәки зийан бьда кʹöлфәтәке һәмлә, у әв кʹöлфәт йан зарʹа wе бьмьра, жь бо wе йәке әwи гәрәке «әʹмьр жь бәр әʹмьрва» бьда, чьмки Хwәде әв мәрьв һʹәсаб дькьр чаwа меркöж. (Бьхунә Дәркʹәтьн 21:22, 23).a Дә бьдә һʹәсабе хwә Йаһоwа чь сәр хwә тʹәхмин дькә, чахе дьвинә кö чаwа һәр сал беһʹәсаб жийина зарʹед нәбуйи те бьрʹине, жь бо хwәһʹәзийе у әʹмьре бенамуси.

17. Тö ча дькари дьл бьди wе кʹöлфәте, йа кö пешийа занәбуна рʹастийа Кʹьтеба Пироз, зарʹ бәрхwә кьрийә?

¹⁷ Гәло Хwәде wе бьбахшинә wан кʹöлфәта, йед кö пешийа занәбуна рʹастийа Кʹьтеба Пироз, зарʹ бәрхwә кьрьнә? Бәле! Чьмки әwед кö гöне хwә бь рʹасти дьдьнә рʹуйе хwә, дькарьн баwәр бьн кö Йаһоwа бь хуна Исайә рʹети гöне wан афу дькә (Зәбур 103:8-14; Әфәси 1:7). Иса гот: «Әз нәһатьмә гази йед рʹаст кьм, ле гази гöнәкʹара бона тʹобәйийе» (Луqа 5:32).

БЬРʹӘВӘ ЖЬ ФЬКЬРЕД ХЬРАБ!

18. Дь Кʹьтеба Пирозда дәрһәqа мәʹнийа нәфрʹәтбуне чь те готьне?

¹⁸ Йаһоwа дьхwазә, wәки әм нә кö тʹәне зийане нәдьнә мәрьвед дьнена ле әw öса жи дьхwазә wәки әм нәфрʹәтбуне жь дьле хwә дәрхьн, жь бо чь жи гәләк хун те рʹетьне. Йуһʹәнна ньвиси: «Һәр кәсе кö бьре wи бәр чʹәʹва рʹәш ә, әw меркöж ә» (1 Йуһʹәнна 3:15). Мәрьве öса бьре хwә нә кö тʹәне нәфрʹәт дькә, ле әw һәла һе мьрьна wи жи дьхwазә. Әw дькарә бь дьжмьнати öса шәрʹа wи гьли кә, йан чь әwи тьштәки öса кьрийә чь кö бәр чʹәʹве Хwәде нәрʹаст ә (Qануна Кʹаһинтийе 19:16; Qануна Дöщари 19:18-21; Мәтта 5:22). Бь рʹасти жи гәләк лазьм у фәрз ә, wәки әм һәр щурʹә нәфрʹәтбун жь дьле хwә дәрхьн (Аqуб 1:14, 15; 4:1-3).

19. Мәрьве кö бь Кʹьтеба Пироз те рʹебәрикьрьне, ньһерʹандьна wи һьндава хәбәред дь Зәбур 11:5 у Филипи 4:8, 9-да чь щурʹәйи йә?

¹⁹ Кʹи кö жийин мина Йаһоwа qимәт дькә у дьхwазә нава һʹьзкьрьна wида бьминә, һәр щурʹе зордарийе нәфрʹәт дькә. Дь Зәбур 11:5-да ньвисар ә: «[Йаһоwа], жь кәсед хәраб у йед кö жь зордарийе һʹәз дькьн, нәфрʹәте дькә, ДО». Әв рʹез нә кö тʹәне дьдә кʹьфше кö Йаһоwа йәки ча нә, ле öса жи дьдә кʹьфше принсипа лапә фәрз бона жийине. Әв принсип али хьзмәткʹаред Хwәде дькә wәки бьрʹәвьн жь wәʹдәдәрбазкьрьнед öса, кʹижан кö дькарьн бьбьн мәʹни кö әwана зордарийе һʹьз бькьн. Йаһоwа «Хwәдейе әʹдьлайийе» йә, ләма жи хьзмәткʹаред wи дьхwазьн кö һʹьш у дьле хwәда тьштед öса бьчиньн, чь кö һежайи һʹьзкьрьне йә, чь кö әʹсли у лайиqи qәнщготьне нә у чь кö бь һʹәлали йә. (Бьхунә Филипи 4:8, 9).

ТʹӘВИ WАН ТʹӘШКИЛӘТА НӘБӘ ЙӘК, ЙЕД КÖ ХУНРʹЕТЬНЕДА НӘҺӘQ ЬН

20-22. Ньһерʹандьна мәсиһийа һьндава ве дьнйайе чь щурʹәйи йә у чьма?

²⁰ Дьнйа Шәйтʹан Мире-щьна бәр чʹәʹве Йаһоwа дь хунрʹетьнеда нәһәq ә. Системед политика ве дьнйайе, йед кö дь Кʹьтеба Пирозда тенә шьровәкьрьне ча щәʹнәwьр, бь мьлийона мәрийа у хьзмәткʹаред Йаһоwа жи кöштьн (Данийел 8:3, 4, 20-22; Әʹйанти 13:1, 2, 7, 8). Системед политикайи йед кö мина щәʹнәwьр ьн, бь комерсийа у бь аликʹарийа öлмдара чʹәкед гәләк хоф чекьрьнә, бь рʹазийа чь жи кʹарәкә мәзьн сьтандьн. Бь рʹасти жи: «Тʹәмамийа дьнйайе бьн һʹöкöме Йе Хьрабда йә» (1 Йуһʹәнна 5:19).

²¹ Шандийед Иса «нә пʹара дьнйайе нә», ләма жи мьqим дь пьрсед политике у шәрʹада нәтʹәвбуйине хwәй дькьн, бь ве йәке әwана һьн хwәха хуне нарʹежьн у һьн жи хwә дури wан кʹома дьгьрьн йед кö хуне дьрʹежьн (Йуһʹәнна 15:19; 17:16)b. Ча Иса öса жи шандийед wи кʹине wан мәрийарʹа нажон, йед кö wана дьзериньн. Ле дәwсе әwана һьндава wан һʹьзкьрьне дьдьнә кʹьфше, у һәла һе бона wан дöа жи дькьн (Мәтта 5:44; Рʹомайи 12:17-21).

²² Хенщи ве йәке, Мәсиһийед рʹаст накʹәвьнә нав тʹö шьхöлед «Бабилона мәзьн», демәк накʹәвьнә нав тʹö шьхöлед религийа qәлп, йа кö щийе сәрәк дьгьрә дь хунрʹетьнада. Дь Хәбәра Хwәдеда те готьне: «Хуна пʹехәмбәр у щьмәʹта Хwәде кʹәтә стуйе wи бажари, бәле хуна wан һʹәмуйа кö ль сәр рʹуйе әʹрде һатьнә рʹетьне» (Әʹйанти 17:6; 18:2, 4, 24).

23. Чь те һʹәсабе жь Бабилона мәзьн дәрен?

²³ Сәва кö жь Бабилона мәзьн дәрен, бәс нинә кö тʹәне әндәме wи нибьн, ле öса жи гәрәке нәфрʹәт кьн һʹәму шьхöлед хьраб, кʹижан кö әw һелан дькә. Мәсәлә Бабилона мәзьн пьштгьрийа кьред öса дькә ча бенамуси, дь шьхöлед политикайеда тʹәвбуйин у кö пәй һәбуне кʹәвьн. (Бьхунә Зәбур 97:10; Әʹйанти 18:7, 9, 11-17.) Һәма жь бо ван шьхöла һаqас хун дьрʹьжә!

24, 25. (а) Ль сәр һʹиме чь Хwәде дькарә һьндава wи мәрьви рʹәʹм бә, йе кö гöне хwә дьдә рʹуйе хwә? (б) У әв йәк чь qәwьмандьна wәʹде бәре, дькә бира мә?

²⁴ Пешийа кö мә бькʹәта нав хьзмәткьрьна рʹастда, һәр кәс жь мә бь щурʹәки пьштгьрийа система политика ве дьнйайе дькьр, у дь хунрʹетьнеда гöнәкʹарийа мә жи һәбу. Ле гава мә жийина хwә гöһаст у баwәрийа хwә һьндава qöрбанбуна Иса Мәсиһ да кʹьфше, у öса жи жийина хwә тʹәсмили Хwәде кьр, бь ве йәке мә рʹәʹма Йаһоwа у хwәйкьрьна рʹöһʹани сьтанд (Кʹаред Шандийа 3:19). Әв йәк дькә бира мә бажаред сьтʹарбуне, йед кö wәʹде бәре һәбун (Жьмар 35:11-15; Qануна Дöщари 21:1-9).

²⁵ Гәло бажаред сьтʹарбуне бона чь бун? Мәсәлә һәрге рʹуйе Исраеликида ньшкева кәсәк бьмьра, wи чахи әв Исраели гәрәке бьрʹәвийа wи бажари. У һәрге һʹакьма избат кьра кö әв мьрьн бь рʹасти ньшкева qәwьмийә, wи чахи меркöж гәрәке һʹәта мьрьна сәрәккʹаһин ви бажарида бьма. Паши мьрьна сәрәккʹаһин әw ида сәрбәст бу, у дькарьбу wедәре бьжита. Бь рʹасти жи, әва мәсәла нишан дькә кö Йаһоwа гәләк рʹәʹм ә, у öса жи нишан дькә кö жийина мәрийа бәр чʹәʹве Хwәде пʹьрʹ qимәт ә! Бажаред сьтʹарбуне әм дькарьн бәрамбәри wе йәке бькьн чь кö Йаһоwа бона мә кьр, әwи сәва мә хуна Иса рʹет. Хуна Иса мә хьлаз дькә жь мьрьне, мәсәлә һәрге мә жь бо нәзанәбуне гöнә кьрийә, у һәрге мә qанунед Йаһоwа йе бона хуне у жийине нәqәдандийә. Тö әве йәке qимәт дьки, чь кö Йаһоwа бона тә кьрийә? Тö чаwа дькари нишан ки, wәки qимәт дьки? Тö wи чахи дькари нишан ки, һәрге мәрьвед дьнена тʹәглиф ки, сәва кö qәбул кьн аликʹарийа Хwәде у бькарьбьн бенә хwәй кьрьне, илаһи wәʹде незикайа рʹоже «тәнгасикә . . . мәзьн» (Мәтта 24:21; 2 Корьнтʹи 6:1, 2).

ЖИЙИН QИМӘТ КӘ У БОНА ПʹАДШАТИЙЕ ӘʹЛАМ КӘ

26-28. Һʹале мә чьда мина һʹале Һәзәqел пʹехәмбәр ә, у әм ча дькарьн нава һʹьзкьрьна Хwәдеда бьминьн?

²⁶ Рʹожа иройин һʹале щьмәʹта Хwәде мина һʹале Һәзәqел пʹехәмбәр ә. Йаһоwа әw сәр мала Исраеле чаwа qәрәwьле рʹöһʹани кʹьфш кьрьбу. Хwәде готе: Тö «жь алийе мьнва wан һʹьшйар бькә». Һәрге Һәзәqел әв дәʹwакьрьна Хwәде пек нәанийа, wи чахи әw wе нәһәq дәркʹәта дь хунрʹетьна wан мәрийада, йед кö wәʹде һьлшандьна Оршәлиме бьмьрана (Һәзәqел 33:7-9). Ле Һәзәqел гöрʹа Йаһоwа кьр у гöне хуна wан нәкʹәтә сьтуйе wи.

²⁷ Зутьрәке дьнйа Шәйтʹан Мире-щьна wе бе кʹöтакьрьне. Ләма жи, Шәʹдед Йаһоwа хwә борщдар һʹәсаб дькьн кö әʹлам кьн бона рʹожа һʹәйфһьлдана Хwәде у Пʹадшатийа wи, у әв йәк сәва wана qәдьр ә (Ишайа 61:2; Мәтта 24:14). Гәло тö бь тʹәмами шьхöлкʹарийе дьки дь ви шьхöле фәрз да? Паwлосе шанди шьхöла бәлакьрьна мьзгинийе һʹәсаб дькьр ча шьхöләкә фәрз, у дькарьбу бьгота: «Әз...щабдаре хуна wә тʹö кәси ниньм, чьмки мьн хwә нәда паш, тʹәмамийа qьрара Хwәде wәрʹа гот» (Кʹаред Шандийа 20:26, 27). Бь рʹасти Паwлос бона мә мәсәләкә пʹьрʹ баш ә!!

²⁸ Бәле, һәрге әм дьхwазьн нава һʹьзкьрьна Хwәдеда бьминьн, әм гәрәке нә кö тʹәне ль сәр жийин у хуне öса бьньһерʹьн ча кö Йаһоwа дьньһерʹә, ле öса жи бәр чʹәʹве Хwәде гәрәке дьлсоз у пироз бьминьн. Ле әве йәке чаwа дькарьн бькьн, әме дь сәре майинда пебьһʹәсьн..