ҺӘР ТЬШТ БЬҺА ДЬБӘ ЧА ӘʹБУРА ХԜӘ БЬКЬН?
Мәрʹд бьн
Һәрге ԝәрʹа чәтьн ә әʹбура хԝә бькьн, дьԛәԝьмә һун дьфькьрьн кӧ мәщала ԝә ԛә тʹӧнә йә кӧ мәрʹданийе бьдьнә кʹьфше. Ле бь рʹасти, гава әм бь мәрʹдани али кәсед дьн дькьн, әв йәк али мә дькә проблемед хԝәйә материйалида сәр кʹәвьн. Бәле, һун дькарьн рʹаст пʹәра хәрщ кьн у һьм жи дәствәкьри бьн.
ЧЬРʹА ӘВ ЙӘК ФӘРЗ Ә?
Гава әм дәствәкьри нә, әв йәк мә дьһа бәхтәԝар дькә, һәла һе һьнге жи һәрге әв йәк, чь кӧ әм дьдьнә кәсед дьн, тьштәки бьчʹук ә. Һьнә лекʹолин дьдьнә кʹьфше, ԝәки мәрʹдани дькарә баш һʹӧкӧм кә сәр сьһʹәт-ԛәԝата мәйә физики у емосийали. Мәсәлә, мәрʹдани дькарә али мә бькә кем бәр хԝә кʹәвьн, нәкʹәвьнә стресе, тансийона хуна мә нормал дьбә у һәла һе ешед мә жи кем дьбьн. Ӧса жи хәԝа мә дькарә дьһа баш бә.
Чахе әм пʹәра дьдьнә кәсед дьн йан жи бь щурʹәки дьн али ԝан дькьн, мәрʹа дьһа һеса дьбә аликʹарийе ԛәбул кьн гава әм хԝәха жи һʹәԝще аликʹарийе дьбьн. Хорвард, йе кӧ жь Инглистане йә, ӧса дьбежә: «Гава әз у жьна мьн мәщале дьгәрʹьн кӧ али кәсед дьн бькьн у дәствәкьри бьн, әм тʹәхмин дькьн кӧ мәрʹа жи һеса дьбә аликʹарийе ԛәбул кьн у кем бона ве йәке бәр хԝә кʹәвьн». Һәмьки, мәрьвед дәствәкьри, кӧ жь дьл дьдьн, тʹӧ щар һивийа ве йәке ниньн кӧ әԝана ԝе тьштәки дәԝсе бьстиньн. Ле әԝана дькарьн һәвалед баш ԛазанщ кьн, йед кӧ чәтьнайада ԝе кʹеләка ԝан бьсәкьньн.
ТӦ ЧЬ ДЬКАРИ БЬКИ?
Чь кӧ дәсте тәда һәйә, пʹарәвәкә. Һәрге дәсте тәда гәләк тʹӧнә йә, диса жи тӧ дькари тьштәки бьки, сәва кӧ кʹомәке бьди кәсед дьн, мәсәлә әв дькарә хԝарьн бә жи. Дункан у малбәта ԝи Угандайеда дьминьн, әԝана дәсттәнг ьн, ле диса жи жь дьл дьхԝазьн мәрʹданийе бьдьнә кʹьфше. Дункан дьбежә: «Һәр рʹожа Ләʹде әз у кʹӧлфәта мьн, әм кәсәки тʹәглифи мала хԝә дькьн, ԝәки тʹәвайи нан бьхԝьн. Әм ша дьбьн кӧ мәщала мә һәйә ԝәʹдә тʹәви мевана дәрбаз кьн».
Һәмьки, гава мәрʹданийе дьдьнә кʹьфше, лазьм ә ӧса жи сәрԝахт бьн. Ԝе нәрʹаст бә, һәрге әм бь мәрʹданийа хԝә һʹале малбәта хԝә дьһа хьраб кьн (Ибо 17:5).
Ширәт: Тʹәви кәсәки хԝарьн-вәхԝарьне пʹарәвәкьн. Һәрге кʹьнщ йан тьштед дьн щәм ԝә һәнә кӧ һун ида надьнә хәбате, ԝе баш бә бьдьнә ԝан, йед кӧ һʹәԝщә нә, мәсәлә һәвала йан щинара. Әԝана ԝе ша бьн у жь ԝә рʹази бьн.
Тьштед дьнда жи мәрʹд бә. Пʹешкʹешед лапә ԛимәт пе пʹәра найнә кʹьрʹинә. Мәсәлә, әм дькарьн ԝәʹдә у ԛәԝата хԝә хәрщ кьн сәва кӧ ԛәнщийе бькьн. Һәла һе хәбәред ширьн жи дькарьн бьбьнә пʹешкʹеш! Ләма жи тʹьме мәрьварʹа бежә кӧ тӧ чьԛас ԝана ԛимәт дьки у һʹәз дьки.
Ширәт: Али мәрьва бькә гава ԝанрʹа шьхӧлед маледа, һʹәйатеда, йан жи шьхӧлед дьнда аликʹари лазьм ә. Тӧ дькари һәваләки хԝәрʹа һәма дӧ гьлийа жи бьньвиси, кӧ бьди кʹьфше ԝәки тӧ бона ԝи дьфькьри.
Гава тӧ мәщала дьгәрʹи сәва кӧ мәрʹд би, тӧйе хԝәха жи гәләк кʹәрәма бьстини.