ҺӘР ТЬШТ БЬҺА ДЬБӘ ЧА ӘʹБУРА ХԜӘ БЬКЬН?

Ве Йәкерʹа Рʹази бьн Чь кӧ Дәсте Ԝәда Һәйә

Мәрьвед шекьрдар жь әʹмьре хԝә рʹази нә. Гава дәрәща әʹмьре ԝан те гӧһастьне, әԝана жи гӧһастьнед лазьм дькьн, сәва кӧ бькарьбьн әʹбура хԝә бькьн.

ЧЬРʹА ӘВ ЙӘК ФӘРЗ Ә?

Психолож Щесика Кӧлер дьбежә ԝәки ньһерʹандьна мәрьвед шекьрдар дьһа позитив ә. Әԝ ӧса жи дьбежә кӧ әԝана һʹәвсудийа кәсед дьн накьн. Ләма жи әʹщебмайи нинә кӧ мәрьвед шекьрдар дьһа бәхтәԝар ьн у кем дькʹәвьнә стресе. Һьнә жь мәрьвед лапә бәхтәԝар дәсттәнг ьн. Әв йәк бь рʹасти ӧса нә, чьмки бона ԝан мәрьва тьштед лапә ԛимәт пе пʹәра найнә кʹьрʹине. Мәсәлә, шабуна кӧ пешда те, гава әм ԝәʹдә тʹәви малбәт у һәвалед хԝә дәрбаз дькьн.

«Кʹьнщ у хӧрәке мә һәбьн, бь ԝан әм рʹази бьн» (1 Тимотʹейо 6:8).

ТӦ ЧЬ ДЬКАРИ БЬКИ?

Хԝә бәрамбәри тʹӧ кәси нәкьн. Һәрге әм дәсттәнг ьн у әʹмьре хԝә бәрамбәри әʹмьре мәрьвед дәԝләти кьн, әм дькарьн дәстпекьн жь әʹмьре хԝә рʹази нибьн у һәла һе бьбьнә мәрьвнә һʹәвсуд. Хенщи ве йәке, әв щӧдәбун кӧ әм ортʹа хԝә у мәрьве дәԝләтида дьвиньн, дькарә шаш бә. Һьнә мәрьвед кӧ хԝә ча кәсед дәԝләти дьдьнә кʹьфше, бь рʹасти дәйнада дьхәньԛьн. Никол, кӧ Сәнәгаледа дьжи, дьбежә: «Мьнрʹа гәләк тьшт нәлазьм ә, сәва кӧ бәхтәԝар бьм. Һәрге әз жь һʹале хԝә рʹази мә, бона мьн фьрԛи тʹӧнә кӧ дәсте кәсәкида дьһа зедә һәйә нә кӧ бал мьн».

Ширәт: Хԝә дур бьгьрә жь ван малпәред сосийали, кʹижан кӧ дьдьнә кʹьфше ԝәки мәрьвед дәԝләти бь әʹмьрәки чь щурʹәйи дьжин.

«Әʹмьре инсен гьредайи нинә ве йәкева кӧ һәбука ԝи чьԛас ә» (Луԛа 12:15).

Шекьрдар бьн. Мәрьве шекьрдар жь әʹмьре хԝә дьһа рʹази йә у нафькьрә кӧ һежайи һе зедә тьшта йә. Роберто, йе кӧ жь Һаити йә, ӧса дьбежә: «Әз ԝәʹдә дьвиньм сәва кӧ бьфькьрьм дәрһәԛа ве йәке, кӧ кәсед дьн бона мьн у малбәта мьн чьԛас ԛәнщи кьрьнә. Паше әз ԝан мәрьварʹа дьбежьм кӧ әз ԛәнщийа ԝан чьԛас ԛимәт дькьм. Ӧса жи әз кӧрʹе хԝәйи һʹәйшт сали һин дькьм, ԝәки әԝ рʹазибуна хԝә бьдә кʹьфше бона һәр тьшти чь кӧ дьдьнә ԝи».

Ширәт: Һәр рʹож хԝәрʹа бьньвисә, һәла тӧ бона чь рʹази йи. Мәсәлә бона сьһʹәт-ԛәԝата баш, һәләԛәтийа баш малбәтеда, һәвалед незик, у һәла һе бона бәдәԝбуна ве йәке, гава рʹо дьчә ава.

«Хԝәйе дьле ша һәр тʹьм шайеда йә» (Мәтʹәлок 15:15).

Щарна мә һʹәмуйарʹа жи чәтьн дьбә рʹази бьн ве йәкерʹа, чь кӧ дәсте мәда һәйә. Ле һәрге әм ԛәԝате бьдьнә хәбате сәва кӧ ньһерʹандьна хԝә бьгӧһезьн, әме әʹсә кʹаре бьстиньн! Гава әм сәр хԝә дьхәбьтьн сәва кӧ бьбьнә мәрьвнә шекьрдар, әм ӧса жи дьбьнә мәрьвнә бәхтәԝар, у әв һʹӧнӧрәки ӧса йә, кӧ пе пʹәра найе кʹьрʹине!