Пʹәре Хԝә бь Билани Хәрщ кьн

ЧЬРʹА ӘВ ЙӘК ФӘРЗ Ә?

Һәрге тӧ тьштәки наки, сәва кӧ пʹәре хԝә бь щурʹе рʹаст хәрщ ки, чәтьнайед тәйә материйали ԝе һе зедә бьн у тӧйе дьһа хәмгин би. Һәрге тӧ дәсттәнг и, диса жи тӧ дькари һьнә тьшта бьки, сәва кӧ пʹәре хԝә бь билани хәрщ ки.

ТӦ ЧЬ ДЬКАРИ БЬКИ?

Ль гора дәрәща хԝәйә материйали бьжи. Һәрге тӧ жь ве зедәтьр хәрщ нәки чьԛас кӧ дәсте тәда һәйә, тӧйе бькарьби һʹале хԝәйи материйали контрол ки у гава ньшкева дәрәщәкә ӧса пешда бе, кӧ пʹәрә тәрʹа лазьм бә, мәщала тә ԝе һәбә ԝан хәрща дади.

Һәрге тӧ хԝәрʹа бьньвиси кӧ чьԛас пʹәрә дьстини у тӧйе чьԛас хәрщ ки, әв йәк ԝе али тә бькә жь ве йәке зедәтьр хәрщ нәки чьԛас кӧ дәсте тәда һәйә. Гава тӧ әве плане хԝәрʹа бьньвиси, избат бә ԝәки тӧ пʹәре хԝә сәр ԝан тьшта хәрщ дьки, чь кӧ тәрʹа бь рʹасти лазьм ьн. Хԝә контрол кә ԝәки хԝә ве плане бьгьри у гава баһе һәр тьшти зедә дьбә йан жи һәԛе хәбата тә те гӧһастьне, әве плане жи ль гора дәрәще бьгӧһезә. Һәрге тӧ зәԝьщи йи, һʹәму сафикьрьна тʹәви һәвалзәԝаще хԝә бькә.

Ширәт: Дәԝса кӧ тьшта пе кредите һьлди, дьһа баш ә пе пʹәре хԝә бькʹьрʹи. Һьнәка тедәрхьстьнә кӧ бь сайа ве йәке әԝана пʹәре хԝә паш дьхьн у дәйна накьнә стийе хԝә. Ӧса жи ԝәʹдә бьвинә сәва кӧ дина хԝә бьди карта хԝәйә банке, һәла нава мәһеда тә чьԛас пʹәрә станд у чьԛас хәрщ кьр. Тӧйе кем бәр хԝә кʹәви, гава бьзаньби ԝәки чьԛас пʹәре тә майә.

Дьбәкә чәтьн бә гәләк пʹәра хәрщ нәки у пе ԝан пʹәра бьжийи, кӧ дәсте тәда һәйә, ле һәрге тӧ планәкә баш хԝәрʹа бьньвиси, әв йәк дькарә али тә бькә хԝә контрол ки. Ӧса жи тӧйе бь зедәйи хәмгин нәби у дьле тә ԝе рʹьһʹәт бә.

Хирәт бә кӧ хәбата хԝә ӧнда нәки. Тӧ чь дькари бьки сәва кӧ хәбата хԝә ӧнда нәки? Дина хԝә бьдә һьнә ширәта: Ԝәʹдәда һәрʹә сәр хәбате. Ньһерʹандьна позитив һьндава хәбата хԝә хԝәйи кә. Хәбатһʹәз бә у бьдә кʹьфше, ԝәки тӧ һазьр и һе зедә жи бьки. Бь ԛәдьр бә. Хԝә ль рʹебәрийа бьгьрә у фәрәсәтед хԝәда пешда һәрʹә.

Пʹәре хԝә сәр тьштед нәлазьм хәрщ нәкә. Жь хԝә бьпьрсә: ‹Гәло мьн хԝәрʹа кьрийә хәйсәт кӧ пʹәре хԝә бадиһәԝа хәрщ кьм?› Мәсәлә, гәләк мәрьв ԝан пʹәра кӧ анщах ԛазанщ кьрьнә, сәр наркотика, щьхаре у ичкәвәхԝарьна бь зедәйи хәрщ дькьн, йан жи хӧмаре дьлизьн. Әв хәйсәт-һʹӧнӧр дькарьн ӧса жи зийане бьдьнә сьһʹәт-ԛәԝата ԝан у сәр хәбата ԝан хьраб һʹӧкӧм кьн.

Пʹәре хԝә бона рʹожед чәтьн паш хьн. Чахе мәщал һәйә, һьнә пʹәрә паш хьн бона дәрәщед кӧ ньшкева дькарьн бьԛәԝьмьн. Әв пʹәрә ԝе али ԝә бькьн бәр хԝә нәкʹәвьн һәрге һун йан нәфәред ԝә нәхԝәш кʹәвьн, хәбате ӧнда кьн, йан жи гава ньшкева рʹасти тәнгасике бен.