«Бьра Һʹьзкьрьна Бьрати Тʹьме Нав Wәда Һәбә»!

1, 2. Чьрʹа qьрʹна йәкеда Паwлосе шанди Мәсиһийед Ибранирʹа ньвиси?

САЛА 61 Д.М. йә. Щьвата Мәсиһи нав тʹәмамийа Исраеледа wәʹде әʹдьлайерʹа ша дьбьн. Рʹаст ә Паwлосе шанди дь Рʹомеда кәледа бу, ле әwи заньбу кӧ зутьрәке wе бе бәрʹдане. Һәвале wийи рʹеwитийеда Тимотʹейо ида жь кәле дәркʹәтьбу, у әw тʹәви Паwлос дьхwастьн кӧ рʹасти Мәсиһийед дь Щьһустанеда бен (Ибрн. 13:23). Ле чаwа кӧ Иса пʹехәмбәрти кьрьбу, паши пенщ сала «ордийа дора Оршәлиме» гьрт. У ләма Мәсиһийед Щьһустанеда у илаһи әwед кӧ Оршәлимеда дьжитьн, гәрәке һазьр буна. Иса тʹәми да wан, кӧ чахе әwана ордийа дора Оршәлиме бьвиньн, гәрәке дәрберʹа бьрʹәвьн (Луqа 21:20-24).

² Ида 28 сал дәрбаз бу, чахе Иса әw йәк пʹехәмбәрти кьр. Wи wәʹдәйи Мәсиһийед Щьһу кӧ дь Исраеледа дьжитьн, ида рʹасти гәләк пәйкʹәтьна у зерандьна һатьбун у амьн мабун (Ибрн. 10:32-34). Ле йәкә Паwлос заньбу кӧ зутьрәке әwана wе рʹасти чәтьнайикә мәзьн бен, кʹижанида кӧ баwәрийа wан wе бе щерʹьбандьне (Мәт. 24:20, 21; Ибрн. 12:4). У ләма әwи дьхwаст кӧ әwана һазьр бьн бона чәтьнайед кӧ wе рʹасти wан бен. Wанрʹа илаһи ньһа лазьм бу сәбьркьрьн у баwәрийа ӧса qәwи, кӧ әʹмьре хwә хьлаз кьн. (Бьхунә Ибрани 10:36-39.) Ләма Паwлос бь рʹебәрийа рʹӧһʹе Хwәде һелан бу кӧ wан хушк-бьред дәлалрʹа бьньвисә, сәва кӧ wана qәwи кә. Әw нәʹмә ньһа нас ә чаwа кʹьтеба Ибрани.

3. Чьрʹа гәрәке мәрʹа һʹәwас бә кʹьтеба Ибрани?

³ Иро, жь мә һәр кәсирʹа гәрәке һʹәwас бә гьлийед Паwлос кӧ әwи Мәсиһийед Ибранирʹа ньвиси. Ле гәло чьрʹа? Чьмки әм жи ве дәрәщеда ньн. Wәʹде wан «зәманед хьрабда», щьмәʹта Йаһоwа рʹасти һʹәму щурʹә пәйкʹәтьна у зерандьна тен (2 Тимтʹ. 3:1, 12). Бешьк, әм баwәри у амьнийа хwә хwәй дькьн. Ньһа гәләк жь мә wәʹде әʹдьлайеда дьжин, демәк пәйкʹәтьн тʹӧнә. Ле йәкә, мина Мәсиһийед wәʹде Паwлосда, тʹӧ кәс жь мә гәрәке бир нәкә кӧ зутьрәке баwәрийа мә wе qайим бе щерʹьбандьне! (Бьхунә Луqа 21:34-36.)

4. Кʹижан ә рʹеза сала 2016 у чьрʹа әw рʹез һатә жьбартьне?

⁴ Чь дькарә али мә бькә кӧ әм хwә һазьр кьн бона qәwьмандьнед кӧ гәрәке рʹасти мә бен? Дь кʹьтеба Ибранида Паwлос гәләк тьшт кʹьфш дькә, кʹижан кӧ wе али мә бькьн баwәрийа хwә qәwи кьн. Жь wан тьшта йа фәрз ньвисар ә Ибранида сәре хьлазийе, рʹеза әʹwльнда. Әw рʹез һатә жьбартьне бона рʹеза сала 2016. Әw рʹез мә ширәт дькә: «Бьра һʹьзкьрьна бьрати тʹьме нав wәда һәбә» (Ибрн. 13:1, ДТʹ).

ЧЬ ТЕ ҺʹӘСАБЕ ҺʹЬЗКЬРЬНА БЬРАТИ?

5. Чь те һʹәсабе һʹьзкьрьна бьрати?

⁵ Чь те һʹәсабе һʹьзкьрьна бьрати? Хәбәра Йунани «филаделфиа» кӧ Паwлос дайә хәбате, рʹастә-рʹаст те һʹәсабе «һʹьзкьрьна һьндава бьра». Һʹьзкьрьн һьндава бьра qәwи йә у гәрм ә, ча кӧ һʹьзкьрьна һьндава нәфәред мале йан һәвала (Йуһʹн. 11:36). Әм нә кӧ тʹәне хwә дьдьнә кʹьфше кӧ йанчь әм хушк-бьред һәв ьн, ле әм бь рʹастийе жи чаwа хушк-бьра нә (Мәт. 23:8). Һәма дәрһәqа һʹьзкьрьна wи щурʹәйи әw гьлийед хwәш дьдьнә кʹьфше: «Һʹьзкьрьнеда чаwа хушк-бьра сәр һәв шәwат бьн, qәдьркьрьнеда жь һәвдӧ дәрбазтьр бьн» (Рʹом. 12:10). Һʹьзкьрьна бьрати гьредайи йә тʹәви һʹьзкьрьна «агапе» кӧ сәр һʹиме принсипа йә, у әw һʹьзкьрьн щьмәʹта Хwәде йәктийеда хwәй дькә.

6. Мәсиһийед рʹаст ча дьдьнә кʹьфше һʹьзкьрьна бьрати?

⁶ Зандарәки гот кӧ хәбәра «һʹьзкьрьна бьрати» кӧ дь Кʹьтеба Пирозда һатийә хәбьтандьне, дь «әʹдәбйәтед дьнда гәләк һьндьк те хәбьтандьне». Щьһустанеда, хәбәра «бьра» дьһатә һʹәсабе нә кӧ тʹәне бьре һʹәлал, ле ӧса жи мәрьвед незик. Ле әw хәбәр әwана тʹӧ щар дәрһәqа мәрьвед жь мьләтед дьн нәдьданә хәбате. Ле Мәсиһи Мәсиһийед дьн һʹәсаб дькьн чаwа «бьра», у фьрqи тʹӧнә әwана чь мьләт ьн (Рʹом. 10:12). У Йаһоwа әм һин кьрьн кӧ һʹьзкьрьна мәйә бьрати һәбә (1 Тʹеслн. 4:9). Ле гәло чьрʹа гәләк фәрз ә кӧ тʹьме нав мәда һʹьзкьрьна бьрати һәбә?

ЧЬРʹА ФӘРЗ Ә КӦ ТʹЬМЕ ҺʹЬЗКЬРЬНА БЬРАТИ БЬДЬНӘ КʹЬФШЕ?

7. а) Кʹижан ә мәʹнийа сәрәкә кӧ чьрʹа әм гәрәке һʹьзкьрьна бьрати бьдьнә кʹьфше? б) Мәʹнийед дьн биньн кӧ чьрʹа фәрз ә әм һʹьзкьрьна хwә һьндава һәвдӧ qәwи кьн.

⁷ Щаба ве пьрсе әw ә, кӧ Йаһоwа жь мә дәʹwа дькә кӧ әм тʹьме һʹьзкьрьна бьрати бьдьнә кʹьфше. Һәрге әм хушк-бьред хwә һʹьз нәкьн, әм нькарьн бежьн кӧ әм Йаһоwа һʹьз дькьн (1 Йуһʹн. 4:7, 20, 21). Һьн жи, әм һәвдӧрʹа лазьм ьн, у илаһи wәʹде чәтьнайа. Паwлос заньбу кӧ зутьрәке һьнә Мәсиһийед Ибранирʹа, кʹижанарʹа кӧ әwи нәʹмә ньвисибу, wе лазьм бә мал у һәбукед хwә бьһельн. У Иса әʹйан кьр кӧ әw wәʹдә wе чьqас чәтьн бә (Марq. 13:14-18; Луqа 21:21-23). Ләма илаһи wи чахи Мәсиһийарʹа лазьм бу һʹьзкьрьна һьндава һәвдӧ һе qәwи кьн (Рʹом. 12:9).

8. Пешийа дәстпебуна тәнгасийа мәзьн әм гәрәке чь бькьн?

⁸ Тәнгасийа мәзьн зутьрәке wе бе (Марq. 13:19; Әʹйан. 7:1-3). У wи чахи, бона мә wе баш бә кӧ әве тʹәмийе биньн сери: «Wәрә, йа нәтәwа [щьмәʹта] мьн, бькʹәвә одәйед хwәйи һӧндьрин у ль пәй хwә дәрийан бьгьрә; һʹәта кӧ хәзәб дәрбаз бьбә һьнәки хwә вәшерә!» (Иша. 26:20). Әw «одәйед һӧндьр» дьбәкә тенә һʹәсабе щьватед мә, демәк әw щи, кʹидәре кӧ әм тʹәвайи чаwа хушк-бьра Йаһоwарʹа хьзмәт дькьн. Ле бәс нинә кӧ әм тʹәне тʹьме тʹәвайи тʹоп бьн. Паwлос ани бира Мәсиһийед Ибрани кӧ чахе әwана тʹоп дьбьн, гәрәке «һʹьзкьрьне у qәнщикьрьнеда» һелана бьдьнә һәв (Ибрн. 10:24, 25). Әм ида ньһа гәрәке һʹьзкьрьна хwә һьндава хушк-бьра qәwи кьн, чьмки әw йәк wе али мә бькә wәʹде щерʹьбандьн у чәтьнайед ахьрийеда.

9. а) Кʹижан мәщалед мә һәнә кӧ бьдьнә кʹьфше һʹьзкьрьна бьрати? б) Мәсәла биньн, чаwа щьмәʹта Хwәде данә кʹьфше һʹьзкьрьна бьрати.

⁹ Һәла һе ньһа жи, пешийа дәстпебуна тәнгасийа мәзьн, һʹьзкьрьна бьрати мәрʹа гәләк лазьм ә. Гәләк жь хушкбьред мә зийан стандьнә жь бо әʹрдһәжа, селава, фьртона, тсунамийа, у жь бо хәзәбед дьн. Һьнәк жи, тәйах дькьн бәр зерандьна у пәйкʹәтьна (Мәт. 24:6-9). Хенщи wан тьшта, әм гьшк жи һәр рʹож рʹасти проблемед економи тен, демәк пʹәрава гьредайи, чьмки әм дьжин дь ве дьнйа хьрабда (Әʹйан. 6:5, 6). Рʹаст ә проблемед ӧса зедә дьбьн, ле wәрә әм һе зедә бьдьнә кʹьфше һʹьзкьрьна хwә һьндава хушк-бьра. Бәле, «һʹьзкьрьна гәләка wе сар бә», ле һʹьзкьрьна мәйә бьрати гәрәке тʹьме һәбә (Мәт. 24:12).^[1]

ЧАWА ӘМ ДЬКАРЬН ҺʹЬЗКЬРЬНА ХWӘЙӘ БЬРАТИ ХWӘЙ КЬН

10. Әме ньһа дәрһәqа чь шеwьр кьн?

¹⁰ Рʹожа иройин әм рʹасти гәләк проблема тен. Ле ча әм дькарьн бьзаньбьн кӧ һʹьзкьрьна мә һәйә һьндава хушк-бьрада? Дь кʹижан дәрәщада әм дькарьн избат кьн, кӧ дьдьнә кʹьфше әwе һʹьзкьрьне? Паши wан гьлийе Паwлос, «бьра һʹьзкьрьна бьрати тʹьме нав wәда һәбә (ДТʹ)», әwи чәнд тьшт гот кӧ чаwа Мәсиһи дькарьн әwе һʹьзкьрьне бьдьнә кʹьфше. Wәрен ньһа әм шәш жь wан тьшта шеwьр кьн.

11, 12. Чь те һʹәсабе кӧ меванһʹьзийе бьдьнә кʹьфше? (Бьньһерʹә шькьле әʹwльн.)

¹¹ «Меванһʹьзийе бир нәкьн». (Бьхунә Ибрани 13:2.) Әw гьлийе «меванһʹьзи» кӧ Паwлос дайә хәбате, рʹастә-рʹаст те һʹәсабе «qәнщикьрьн хәрибарʹа». Дьбәкә әw гьли дькә бира мә мәсәла Бьраһим у Лут. Әw һәр дӧ мера qәнщи данә кʹьфше wан меванарʹа, кʹижан кӧ нас нәдькьрьн. Әw меван мьлйакʹәт бун (Дәстп. 18:2-5; 19:1-3). Паwлос әw мәсәлә анин, сәва кӧ Мәсиһийед Ибрани һелан кә, wәки әwана һʹьзкьрьна хwә һьндава хушк-бьрада бьдьнә кʹьфше кӧ меванһʹьз бьн.

¹² Әм ча дькарьн меванһʹьзийе бьдьнә кʹьфше? Әм дькарьн хушк-бьра тʹәглифи мала хwә кьн, мәсәлә сәр хwарьне, сәва кӧ тʹәви һәв хәбәр дьн у һәвдӧ дьлгәрьм кьн. Нәлазьм ә щурʹә-щурʹә тьшт, йан жи гәләк пʹәрә хәрщ кьн сәва кӧ меванһʹьзийе бьдьнә кʹьфше. Һьн жи әм нахwазьн кӧ тʹәне wана тʹәглиф кьн, йед кӧ wе бькарьбьн мәрʹа qәнщийе бькьн (Луqа 10:42; 14:12-14). Нета мә гәрәке әw бә кӧ һәвдӧ дьлгәрьм кьн, нә кӧ бь тьшта хушк-бьра әʹщебмайи кьн! Дьбәкә әм бәрпьрсийаре мьһале у жьна wи нас нәкьн, ле әм wанарʹа жи дькарьн меванһʹьзийе бьдьнә кʹьфше (3 Йуһʹн. 5-8). Рʹаст ә wәʹде мәйи аза һаqас тʹӧнә йә у ӧса жи стресед һәр рʹожи әм дьстиньн, ле гәләк фәрз ә «меванһʹьзийе» бир нәкьн!

13, 14. Әм ча дькарьн «гьртийа бир биньн»?

¹³ «Гьртийа бир биньн». (Бьхунә Ибрани 13:3.) Паwлос дь wе рʹезеда нәдьгот дәрһәqа һʹәму гьртийа. Әwи бона wан бьра хәбәрда, кʹижан кӧ бона баwәрийе һатьбун гьртьне. Паwлос хwәха жи чар сала кәледа бу, чахе әwан гьлийа Мәсиһийед Ибранирʹа ньвиси (Фили. 1:12-14). Әwи пʹайе бьра да кӧ әwана «дькʹәтьнә һʹале гьртийа» (Ибрн. 10:34). Һьнә бьра али Паwлос дькьрьн чахе әw кәледа бу, ле йед дьн дур дьман. Ле әwана ча дькарьбун али wи бькьрана? Wана карьбун бона wи дӧа кьрана (Ибрн. 13:18, 19).

¹⁴ Иро, әм жи дьбәкә мина wан Мәсиһийа дур ьн жь бьрайед кӧ кәледа ньн. Дьбәкә әм нькарьн али wан бькьн, мина wан хушк-бьра кӧ незики кәлайед wан дьминьн. Ле әм дькарьн дӧайед хwәда бьдьнә кʹьфше бәрдьлийе у һʹьзкьрьне һьндава хушк-бьра, демәк тʹьме бона wан Йаһоwарʹа дӧа бькьн. Мәсәлә, әм дькарьн бир биньн у дӧа бькьн бона wан хушк-бьра у һәла һе зарʹа жи, кʹижан кӧ Әритрейайеда кәледа ньн, у ӧса жи әw се бьра кӧ ида 20 сал ә кәледа ньн, әw һәнә Паулос Ейасу, Есак Могос, у Негеде Теклемариам.

15. Әм ча дькарьн һьндава зәwаще qәдьр бьдьнә кʹьфше?

¹⁵ «Бьла һәр кәс бь һӧрмәт ль зәwаще бьнерʹә», (ИМ). (Бьхунә Ибрани 13:4.) Әм ӧса жи дькарьн һʹьзкьрьне һьндава хушк-бьрада бьдьнә кʹьфше, чахе намусийеда хwә тʹәмьз хwәй дькьн (1 Тимтʹ. 5:1, 2). Һәрге кәсәк «намуса хушк-бьрарʹа дьлизә», демәк бенамусийе дькә, әw бь wе йәке зийане һьн дьдә wи тʹәви кʹе бенамуси кьр, һьн жи малбәта wи. Хенщи ве йәке, итʹбарийа кӧ сәр һʹиме һʹьзкьрьна бьратийе йә зийане дькʹәвә (1 Тʹеслн. 4:3-8). Ӧса жи бьдьнә бәр чʹәʹве хwә, кӧ жьн wе чь тʹәхмин кә, чахе пебьһʹәсә кӧ мере wе порнографйайе дьньһерʹә, кʹижан те һʹәсабе чаwа бенамуси. Гәло мер бь wе йәке дьдә кʹьфше кӧ әw жьна хwә һʹьз дькә у сәр зәwаща хwә бь һӧрмәт дьньһерʹә? (Мәт. 5:28).

16. Чахе әм рʹази нә, әw йәк ча али мә дькә кӧ һʹьзкьрьне һьндава хушк-бьра бьдьнә кʹьфше?

¹⁶ «Дәстед wәда чьqас һәйә, рʹази бьн». (Бьхунә Ибрани 13:5.) Чахе әм итʹбарийа хwә Йаһоwа тиньн әм рʹази нә. Әw йәк али мә дькә кӧ рʹаст бьньһерʹьн сәр һәбуне у пʹәра (1 Тимтʹ. 6:6-8). Һьн жи, әw али мә дькә кӧ әм фәʹм кьн, кӧ һәләqәтийа мә тʹәви Йаһоwа у хушк-бьред мә һе фәрз ә, нә кӧ тьштәки кӧ дькарьн пе пʹәра бькʹьрʹьн. Мәрьве кӧ рʹази йә, офә-оф накә, нә жи кәсәки гӧнәкʹар дькә сәва һʹале хwә. Әw мәрьв нә чʹәʹвнәбарийе дькә у нә жи тьма йә, чьмки әw һʹӧнӧр дькарьн һʹьзкьрьна һьндава хушк-бьра бьтәмьриньн. Дәwсе, әw мәрьв кӧ рʹази йә мәрʹданийе дьдә кʹьфше (1 Тимтʹ. 6:17-19).

17. Чаwа мерхаси али мә дькә кӧ һʹьзкьрьна бьрати бьдьнә кʹьфше?

¹⁷ «Рʹуйе мә дьгьрә кӧ әм бежьн: ‹Хӧдан пьштоване мьн ә у әз натьрсьм›». (Бьхунә Ибрани 13:6.) Итʹбари һьндава Йаһоwа мерхасийе дьдә мә, сәва кӧ әм бәр чәтьнайед гьран тәйах кьн. Әw мерхаси али мә дькә кӧ ньһерʹандьна мә позитив бә. Һʹьзкьрьна бьрати у ньһерʹандьна мәйә позитив, wе али мә бькә кӧ һәвдӧ бьшьдиньн у дьлгәрм кьн (1 Тʹеслн. 5:14, 15). Һәла һе wәʹде тәнгасийа мәзьн жи, wәʹде лапи чәтьнда, әме бькарьбьн бь мерхаси «рʹабьн сәре хwә бьльнд кьн», чьмки әме бьзаньбьн кӧ азабуна мә незик ә (Луqа 21:25-28).

18. Әм чаwа дькарьн һʹьзкьрьна хwәйә бьрати һьндава рʹуспийа qәwи кьн?

¹⁸ «Рʹебәред хwә бир биньн». (Бьхунә Ибрани 13:7, 17.) Чахе әм дьфькьрьн дәрһәqа wе хәбата гьран йа кӧ рʹуспи бона мә беһәq дькьн, һʹьзкьрьна мә һьндава wан qәwи дьбә у әм һе зәʹф шьхӧле wана дьшекьриньн. Әм тʹӧ щар нахwазьн бьбьнә сәбәбе wе йәке кӧ әwана шабуне ӧнда кьн йан әʹщьз бьн. Дәwсе, һәрге әм гӧһдарийа wан бькьн у тʹәви wан шьхӧлкʹарийе бькьн, әме «qәдьре wана бь һʹьзкьрьне һе бьльнд бьгьрьн бона шьхӧле wан» (1 Тʹеслн. 5:13).

WЕ ЙӘКЕДА ҺЕ ПЕШДА ҺӘРʹЬН

19, 20. Әм ча дькарьн «һе пешда һәрʹьн» һʹьзкьрьна хwәйә һьндава хушк-бьрада?

¹⁹ Бешьк, щьмәʹта Йаһоwа бь һʹьзкьрьна хwәйә һьндава хушк-бьра те наскьрьне. Паwлос жи wе йәкеда избат бу. Ле әwи һʹәмуйа һелан кьр кӧ һʹьзкьрьне бьдьнә кʹьфше у дь «wе йәкеда һе пешда һәрʹьн» (1 Тʹеслн. 4:9, 10). Әʹйан ә, кӧ тʹьме һәнә тьштед ӧса, чьда әм дькарьн һе пешда һәрʹьн!

²⁰ Чахе әм нава тʹәмамийа саледа рʹеза сале бьньһерʹьн, wәрә әм ӧса жи бьфькьрьн сәр wан пьрса: «Гәло әз дькарьм һе зедә меванһʹьз бьм? Әз ча дькарьм һʹьзкьрьне бьдьмә кʹьфше һьндава wан хушк-бьра, кʹе кәледа ньн? Гәло әз дьдьмә кʹьфше кӧ әз бь һӧрмәт дьньһерʹьм сәр зәwаще кӧ Хwәде саз кьрийә? Әз ча дькарьм бь рʹастийе рʹази бьм wан тьштарʹа чь кӧ бал мьн һәйә? Әз ча дькарьм һе зәʹф итʹбарийа хwә Йаһоwа биньм? Әз ча дькарьм бь тʹәмами шьхӧлкʹарийе бькьм тʹәви йед щабдар?» Һәрге әм дь wан шәш тьштада һе пешда һәрʹьн, әw рʹеза сале дь Ода Щьватеда wе тʹәне нишан нибә. Ле әw wе бинә бира мә кӧ әм әве ширәте бьдьнә хәбате: «Бьра һʹьзкьрьна бьрати тʹьме нав wәда һәбә» (Ибрн. 13:1, ДТʹ).