Рʹазибуне Бьдьнә Кʹьфше бона Пʹешкʹеша Хwәде кӧ «Найе Готьн»

1, 2. а) Чь йә пʹешкʹеша Хwәде кӧ «найе готьн»? б) Дь wе тʹемайеда әме кʹижан пьрса шеwьр кьн?

ЧАХЕ Йаһоwа Кӧрʹе хwәйи тайе тʹәне шандә сәр әʹрде, бь wе йәке Әwи жь һʹьзкьрьне пʹешкʹешәкә лапә мәзьн да мә! (Йуһʹн. 3:16; 1 Йуһʹн. 4:9, 10). Паwлосе шанди әw пʹешкʹеша Хwәде нав кьр ча пʹешкʹеша кӧ «найе готьн» (2 Корн. 9:15). Чьрʹа Паwлос әw гьли да хәбате?

² Паwлос заньбу кӧ Хwәде wе бь сайа qӧрбана Мәсиһ һʹәму созед хwәйи qимәт әʹсә бинә сери. (Бьхунә 2 Корьнтʹи 1:20.) Әw пʹешкʹеша Хwәде кӧ «найе готьн» дьдә кʹьфше рʹәʹм у һʹьзкьрьна wи, кʹижан кӧ әwи бь сайа qӧрбана Иса мәрʹа да кʹьфше. Бь рʹастийе әw пʹешкʹеш ӧса гьринг ә, кӧ мәрьв нькарә qимәте wе бь хәбәра бежә. Әw пʹешкʹеша qимәт ча гәрәке сәр мә һʹӧкӧм бә? У әw пʹешкʹеш гәрәке мә һелан кә кӧ әм чь бькьн, чахе һазьр дьбьн сәва Биранина мьрьна Мәсиһ, 23 Адаре рʹожа Чаршәме сала 2016?

ПʹЕШКʹЕША ХWӘДЕЙӘ QИМӘТ

3, 4. а) Чахе кәсәк пʹешкʹеше дьдә тә, тӧ чь ль сәр хwә тʹәхмин дьки? б) Пʹешкʹешәкә мәзьн ча дькарә әʹмьре тә бьгӧһезә?

³ Әм бь шабуне тʹьжә дьбьн, чахе кәсәк пʹешкʹеше дьдә мә. Һәнә пʹешкʹешед ӧса, дькарьн гәләк qимәт бьн бона мә у дькарьн әʹмьре мә жи бьгӧһезьн. Мәсәлә, бьдә бәр чʹәʹве хwә кӧ тӧ рʹасти дәрәщәкә хьраб һати, чьмки тә нәһәq дькьн дь шьхӧле хьрабда. Ле ньшкева ӧса дьqәwьмә кӧ мәрьвәк кʹижан кӧ тӧ qә wи нас наки, һазьр ә нәһәqийа тә һьлдә сәр хwә. Һьн жи әw һазьр ә бона тә бьмьрә! Кьред wи мәрьви wе чаwа сәр тә һʹӧкӧм бьн?

⁴ Әw һʹьзкьрьна мәзьн кӧ һьндава тә данә кʹьфше, wе тә һелан кә wәки әʹмьре хwә бьгӧһези. Дьбәкә тӧйе һе мәрʹд би у бь һʹьзкьрьне тʹьжә би һьндава мәрьва, у һәла һе һеса бьбахшини wан кʹе тә дьхәйидинә. У дьбәкә тӧ тʹәмамийа әʹмьре хwәда бьхwази рʹазибуна хwә нишан ки wи мәрьвирʹа, кʹижани кӧ әʹмьре хwә дәwса тә да.

5. Чаwа пʹешкʹеша Хwәдейә кʹьрʹин жь пʹешкʹешед дьн qимәттьр ә?

⁵ Әw пʹешкʹеша кӧ Йаһоwа бь сайа Мәсиһ да мә, һе qимәттьр ә жь wе пʹешкʹеша кӧ дь мәсәла жорьнда һатә гьли кьрьне (1 Пәт. 3:18). Wәрә әм пебьһʹәсьн чьрʹа. Чьмки гӧнә дәрбази мә буйә, ләма әм дьмьрьн (Рʹом. 5:12). Ләма Йаһоwа Кӧрʹе хwә Иса, бь һʹьзкьрьне шандә сәр әʹрде, сәва кӧ «бона һʹәмуйа мьрьн бьдита» (Ибрн. 2:9). Йаһоwа нә кӧ тʹәне дькарә әʹмьре мә хьлаз кә, чаwа кӧ мәсәла жореда һатә гьликьрьне. Ле әwи ӧса бь сайа qӧрбана Иса һʹим дани, сәва кӧ мьрьне бьдә һьлдане һʹәта-һʹәтайе (Иша. 25:7, 8; 1 Корн. 15:22, 26). Мәрьвед кӧ гӧмана wан жийина сәр әʹрде йә, wе һʹәта-һʹәтайе бьн Пʹадшатийа Хwәдеда бьжин. Ле йед рʹункьри wе Пʹадшатийа Хwәдеда тʹәви Иса Пʹадшатийе бькьн (Рʹом. 6:23; Әʹйан. 5:9, 10). Әw пʹешкʹеша жь Йаһоwа диса кʹижан кʹәрәма тинә?

6. а) Һун һивийа кʹижан кʹәрәмед Йаһоwа нә? б) Гьли кьн дәрһәqа се тьшта кʹижан кӧ пʹешкʹеша Хwәде мә һелан дькә кӧ бькьн.

⁶ Пʹешкʹеша Йаһоwада ӧса жи әw ә, кӧ әw wе һʹәму нәхwәшийа бьдә һьлдане, дьнйайе бькә щьнәт, у мьрийа рʹакә (Иша. 33:24; 35:5, 6; Йуһʹн. 5:28, 29). Әм Йаһоwа у Кӧрʹе wи гәләк һʹьз дькьн, у әwе пʹешкʹеша кӧ «найе готьн» гәләк qимәт дькьн. Ле пьрсәк дьминә: «Һʹьзкьрьна Хwәде мә бәрбь чь һелан дькә?» Wәрә әм шеwьр кьн кӧ ча һʹьзкьрьна Хwәде мә һелан дькә кӧ әм 1) пʹегәһа Исада һәрʹьн, 2) һʹьзкьрьне бьдьнә кʹьфше һьндава хушк-бьра, у 3) бь дьл бьбахшиньнә мәрьва.

«ҺʹЬЗКЬРЬНА МӘСИҺ МӘ ДЬДӘʹФИНӘ»

7, 8. Һʹьзкьрьна Иса ча гәрәке ль сәр мә һʹӧкӧм бә, у әw һʹьзкьрьн мә бәрбь чь һелан дькә?

⁷ Йа пешийе, әм гәрәке һелан бьн кӧ бона Иса бьжин. Паwлосе шанди гот: «Һʹьзкьрьна Мәсиһ мә дьдәʹфинә, (ИМ)». (Бьхунә 2 Корьнтʹи 5:14, 15.) Паwлос фәʹм дькьр кӧ әwед кӧ дьшекьриньн qӧрбана Иса, әwана һелан дьбьн кӧ бона Иса бьжин. Һәрге әм жи бь тʹәмами фәʹм дькьн qимәте wе йәке кӧ чь Йаһоwа бона мә кьр, әw йәк wе мә һелан кә кӧ бь дьл у щан пʹегәһа Исада һәрʹьн. Ле әм ча дькарьн әве йәке бькьн?

⁸ Әwед кӧ Йаһоwа һʹьз дькьн тенә дәʹфандьне, демәк һеланкьрьне кӧ чʹәʹв бьдьнә Иса у пʹегәһа wида һәрʹьн (1 Пәт. 2:21; 1 Йуһʹн. 2:6). Чахе әм гӧһдарийа Йаһоwа у Иса дькьн, бь wе йәке әм һʹьзкьрьна хwә һьндава wан избат дькьн. Иса гот: «Әwе кӧ тʹәмийед мьн qәбул дькә у wан хwәй дькә, әw ә йе кӧ мьн һʹьз дькә. У әwе кӧ мьн һʹьз дькә, әwе жь алийе Баве мьнда бе һʹьзкьрьне. Әзе жи wи һʹьз бькьм у хwә wива әʹйан кьм» (Йуһʹн. 14:21; 1 Йуһʹн. 5:3).

9. Әм рʹасти кʹижан щерʹьбандьна тен?

⁹ Wәʹде незикайа Биранине, гәләк фәрз ә кӧ әм бьфькьрьн сәр wе йәке кӧ әм ча дьжин. Пьрсе бьдә хwә: «Дь кʹижан тьштада әз ида ньһа чʹәʹв дьдьмә Иса? У диса чьда әз гәрәке һе баш чʹәʹв бьдьмә wи?» Гәләк фәрз ә кӧ әм пьрсед ӧса бьдьнә хwә, чьмки әм дьжин дьнйа хьрабда у әw дьнйа дьхwазә wәки әм бьжин ӧса, чаwа кӧ әw дьжи (Рʹом. 12:2). Һәрге әм фәсал ниньн, әм дькарьн пәй философийа ве дьнйайе һәрʹьн, у һәла һе жи шькьрийе бьдьнә wан мәрьвед навдар дь спортеда йан бизнеседа (Колс. 2:8; 1 Йуһʹн. 2:15-17). Ле әм чь гәрәке бькьн сәва кӧ жь wе йәке хwә дур бьгьрьн?

10. Чь пьрса әм дькарьн бьдьнә хwә wәʹде незикайа Биранине, у щаба wан пьрса мә бәрбь чь дькарьн һелан кьн? (Бьньһерʹә шькьле әʹwльн.)

¹⁰ Әм дькарьн wәʹде незикайа Биранине, диса щарәке бьфькьрьн сәр кʹьнщхwәкьрьна хwә, сәр wе йәке кӧ әм чь кʹьлама дьбьһен, чь филма дьньһерʹьн, у чь һәйә дь таблет, тʹел, у компотәред мәда. Дина хwә бьдә сәр кʹьнще хwә у пьрсе бьдә хwә: «Һәрге әз бьчума ль wи щийи кʹидәре кӧ Иса йә, мьне жь бо кʹьнщхwәкьрьна хwә шәрм бькьра?» (Бьхунә 1 Тимотʹейо 2:9, 10.) «Һәрге әз әwе кʹьнще хwә кьм, бь wе йәке әзе бьдьмә кʹьфше кӧ әз пәйчуйе Иса мә?» Әм ӧса жи wәʹде жьбартьна филма у мусикайе дькарьн пьрсед wи щурʹәйи бьдьнә хwә: «Гәло Иса wе бьньһерʹийа йан бьбьһиста әв филм йан кʹьлам? Һәрге Иса бьдита әw чь кӧ һәйә тʹел у таблета мьнда, жь бо wе йәке мьне шәрм кьра? Йан жи wе мьнрʹа чәтьн бә, wәки Исарʹа шьровәкьм кӧ чьрʹа мьн хwәш те ве видео листьке бьлизьм?» Һʹьзкьрьна мә һьндава Йаһоwа гәрәке мә һелан кә, кӧ әм инкʹар кьн wан һʹәму тьшта чь кӧ шагьртед Исарʹа нәщайиз ьн, дьхwази әw тьшт чьqас жи qимәт бьн (Кʹар. Шанд. 19:19, 20). Мә wәʹде тʹәсмилкьрьна хwә соз да Йаһоwа, wәки әме ида нә кӧ бона хwә бьжин ле бона Иса. Ләма жи әм гәрәке хwә жь wан тьшта дур бьгьрьн чь кӧ дькарә рʹе мә бьгьрә у нәһелә кӧ пʹегәһа Исада һәрʹьн (Мәт. 5:29, 30; Фили. 4:8).

11. а) Һʹьзкьрьна мә һьндава Йаһоwа у Иса бәрбь чь мә һелан дькә? б) Һʹьзкьрьна мә ча дькарә мә һелан кә кӧ дь щьватеда али хушк-бьра бькьн?

¹¹ Һʹьзкьрьна мә һьндава Иса, мә һелан дькә кӧ хьзмәткьрьнеда у һазьркьрьна шагьртада әм бь дьл кʹар бькьн (Мәт. 28:19, 20; Луqа 4:43). Wәʹде мәһа Биранине әм дькарьн чаwа пешәнге кʹомәкдар 30 йан 50 сьһʹәта хьзмәт кьн. Тӧ дькари дәрәще хwә ӧса сафи ки, сәва кӧ wе мәһеда хьзмәт ки чаwа пешәнге кʹомәкдар? Мере би, кʹижан кӧ 84 сали йә, жь бо әʹмьре мәзьн у кемасийа сьһʹәт-qәwате, сәр хwә гӧман нибу кӧ wе бькарьбә хьзмәт кә чаwа пешәнге кʹомәкдар. Ле пешәнгед дь мьһала wида сафи кьрьн кӧ wе йәкеда аликʹарийе бьдьнә wи. Wана хәм кьрьн бона әʹрәбе у бона мьһаләкә ӧса, кʹидәре кӧ әw бькарьбә 30 сьһʹәте хьзмәтийа хwә тʹәмам кә. Ле тӧ һазьр и дь wе йәкеда аликʹарийе бьди кәсәки дь щьвата хwәда, сәва кӧ әw жи шабуне бьстинә кӧ ча пешәнге кʹомәкдар хьзмәт кә wәʹде мәһа Биранине? Рʹаст ә, һәр кәс жь мә нькарә ча пешәнге кʹомәкдар хьзмәт кә. Ле йәкә, әм дькарьн һʹәму qәwата хwә у wәʹде хwә бьдьнә хәбате, сәва кӧ һе зедә пәсьне Йаһоwа бьдьн. Чахе әм ӧса дькьн, әм дьдьнә кʹьфше кӧ әм wәк Паwлос бь һʹьзкьрьна Иса һатьнә һеланкьрьне. Ле һʹьзкьрьна Хwәде диса бәрбь чь мә һелан дькә?

ӘМ ГӘРӘКЕ ҺӘВДӦ ҺʹЬЗ БЬКЬН

12. Һʹьзкьрьна Хwәде мә бәрбь чь һелан дькә?

¹² Йа дӧда, һʹьзкьрьна Хwәде гәрәке мә һелан кә, кӧ әм һьндава хушк-бьра һʹьзкьрьне бьдьнә кʹьфше. Йуһʹәнна әw йәк фәʹм дькьр: «Дәлално, һәгәр Хwәде аһа әм һʹьз кьрьн, wәки ӧса йә гәрәке әм жи һәвдӧ һʹьз бькьн» (1 Йуһʹн. 4:7-11). Бәле, әме нькарьбьн һежайи һʹьзкьрьна Хwәде бьн, һәрге әм хушк-бьре хwә һʹьз нәкьн (1 Йуһʹн. 3:16). Ле ча әм дькарьн һʹьзкьрьна хwә wанарʹа бьдьнә кʹьфше?

13. Әw йәк кӧ Иса мәрьвед бәләнгаз һʹьз дькьр чь мәсәлә йә бона мә?

¹³ Бьфькьрьн дәрһәqа мәсәла Иса. Иса wәʹде хьзмәткьрьна хwә сәр әʹрде, дина хwә дьда ль сәр илаһи мәрьвед бәләнгаз. Әwи мәрьвед тʹопал, кәрʹ, кор у лал qәнщ дькьрьн (Мәт. 11:4, 5). Мәрьвед «ньфьрʹ ле» бәр чʹәʹве сәрwеред религийа Щьһуйа рʹәш бун, ле бона Иса шабунәкә мәзьн бу кӧ мәрьвед рʹӧһʹанида бьрʹчи тʹер кә (Йуһʹн. 7:49). Иса мәрьвед бәләнгаз һʹьз дькьр у бь дьл у щан дьхәбьти кӧ бәрдәстийе wанарʹа бькә (Мәт. 20:28).

14. Тӧ чь дькари бьки сәва кӧ һʹьзкьрьна хwә бьди кʹьфше һьндава хушк-бьра?

¹⁴ Wәʹде незикайа Биранине мәщала мә һәйә чʹәʹв бьдьнә Иса. Тӧ дькари wәʹдә бьвини сәва кӧ дина хwә бьди сәр хушк-бьред дь щьвата хwәда. Һәрге тӧ ӧса бьки, тӧйе бьвини кӧ чаwа әw мәрьв жь һʹьзкьрьна тә кʹаре дьстинә. Дьбәкә һәнә хушк-бьред әʹмьрда мәзьн, кʹижанарʹа кӧ аликʹари лазьм ә. Тӧ дькари сәрики wан хи? Тӧ дькари хwарьне wанарʹа бини, дь мала wанда аликʹарийе бьди wан, али wан бьки кӧ бенә ль сәр щьвате, у wана тʹәглиф ки, кӧ тʹәви тә дәрен хьзмәтийе бькьн? (Бьхунә Луqа 14:12-14.) Әм гәрәке изьне бьдьн, кӧ һʹьзкьрьна Хwәде али мә бькә, сәва кӧ һʹьзкьрьна ӧса һьндава хушк-бьра бьдьнә кʹьфше.

ДЬЛРʹӘʹМИЙЕ БЬДӘ КʹЬФШЕ ҺЬНДАВА ХУШК-БЬРА

15. Әм гәрәке чь фәʹм бькьн?

¹⁵ Йа сьсийа, һʹьзкьрьна Йаһоwа гәрәке мә һелан кә, кӧ бьбахшиньнә хушк-бьред хwә. Чаwа зӧрʹәтед Адәм, һәр кәс жь мә гӧнә у мьрьн сьтанд. Тʹӧ кәс жь мә нькарә бежә, «кӧ әз һʹәwще кʹьрʹине ниньм». Хьзмәткʹаред Хwәдейи амьн жи һʹәwще бахшандьна Йаһоwа нә, кʹижан кӧ бь сайа кʹьрʹина Иса йә. Әм һәр кәс гәрәке фәʹм бькьн кӧ дәйне мәйи гьран мәрʹа һатийә бахшандьне. Әw йәк чьрʹа фәрз ә? Щаба сәр wе пьрсе әме бьвиньн жь мәсәләкә Иса.

16, 17. а) Әм чь һин дьбьн жь ве мәсәла Иса, демәк дәрһәqа пʹадше у хӧламе? б) Чахе әм дьфькьрьн дәрһәqа wе мәсәле кӧ Иса гьли кьр, әw йәк мә бәрбь чь һелан дькә?

¹⁶ Иса гьли кьр, кӧ пʹадшаки бахшандә хӧламе хwә дәйне wийи мәзьн wәкә 10 000 таланта, йан 60 000 000 динар. Ле әwи хӧлами кӧ дәйне wийи мәзьн жерʹа һатә бахшандьне, хwәха нәбахшандә һәвале хwә, кʹижан кӧ дәйндаре wи бу wәкә 100 динара. Пʹадша гәләк һерс кʹәт чахе пеһʹәсийа, wәки әw хӧламе кӧ әwи бь рʹәʹмти бахшанде, берʹәʹм бу һьндава һәвале хwә. Пʹадша гот: «Хӧламе хьраб! Мьн һʹәму дәйне тә бахшандә тә, бона wе йәке кӧ тә лава жь мьн кьр. Ле жь тә нәдькʹәт кӧ тӧ жи ль хӧлам-һәвале хwә бьһатайи рʹәʹме чаwа кӧ әз тә һатьмә рʹәʹме?» (Мәт. 18:23-35). Бәле, рʹәʹмтийа wи пʹадшайи гәрәке әw хӧлам һелан кьра, кӧ әwи жи бь рʹәʹмтийе бьбахшанда һәвале хwә. Ле һʹьзкьрьн у рʹәʹмтийа Йаһоwа гәрәке мә бәрбь чь һелан кә?

¹⁷ Wәʹде мәһа Биранине мәрʹа мәщал те дайине, сәва кӧ бьфькьрьн сәр wе йәке һәла дьле мәда хәйд һәйә һьндава хушк-бьра. Һәрге дьле мәда хәйд һәйә, һьнге wәʹдәки гәләк баш ә кӧ әм чʹәʹв бьдьнә Йаһоwа дь бахшандьнеда (Нәһәм. 9:17; Зәб. 86:5). Һәрге әм жь Йаһоwа рʹази бьн жь бо wе йәке кӧ әwи дәйне мәйи гьран бахшандә мә, һьнге әме жи бьхwазьн бь дьл бьбахшиньнә хушк-бьра. Һәрге әм йед дьн һʹьз нәкьн у нәбахшиньнә wан, әме нькарьбьн һʹьзкьрьн у бахшандьна Хwәде бьстиньн (Мәт. 6:14, 15). Рʹаст ә бахшандьн wе нькарьбә бьгӧһезә тьштед дәрбазбуйи, йе кӧ дьле мә ешандьн, ле әw йәк wе әʹсә ахьрийа мә дь алийе башда бьгӧһезә.

18. Һʹьзкьрьна Хwәде ча али хушкәке кьр кӧ сәбьре бьдә кʹьфше һьндава хушкәкә дьн?

¹⁸ Гәләк жь мәрʹа дькарә чәтьн бә «сәбьр кьн» хушк-бьред хwә. (Бьхунә Колоси 3:13, 14; Әфәси 4:32.) Мәсәлә, Лили хушка азәп ә, әwе бь һазьрбуне али хушкәкә би дькьр, наве кʹижане Карол^[1] бу. Лили әw хушк дьбьрә wе дәре, кʹидәре кӧ жерʹа лазьм бу, чь кӧ жерʹа лазьм бу дькʹьрʹи, у диса гәләк тьштед дьнда али wе дькьр. Лили чьqас тьштед баш жи дькьр, ле йәкә Кароле дькьрә кӧтә-кӧт, ләма жи һеса нибу перʹа зьман бьдита. Ле йәкә Лилийе дина хwә дьда сәр һʹӧнӧред Каролейә баш. Әwе бәрдәwам дькьр пәй wе бьньһерʹә һʹәта Карол гьран нәхwәш кʹәт у мьр. Лили дьбежә: «Әз һивийа wе йәке мә, кӧ кʹәнге Карол жь мьрьне рʹабә. Дьхwазьм wе бьвиньм чахе әw wе беqьсур бә». Бәле, һʹьзкьрьна Хwәде дькарә мә һелан кә, кӧ әм сәбьре бьдьнә кʹьфше һьндава хушк-бьра, у һивийа wе рʹоже бьн чахе гӧнә ида тʹӧнә бә.

19. Пʹешкʹеша Хwәде кӧ «найе готьн» гәрәке бәрбь чь wе тә һелан кә?

¹⁹ Мә бь рʹастийе пʹешкʹеша qимәт жь Йаһоwа сьтанд, йа кӧ «найе готьн». Wәрә әм әwе пʹешкʹеше һʹәсаб нәкьн ча тьштәки беqимәт. Дәwса wе йәке, илаһи мәһа Биранине бәрдәwам кьн бь рʹазибуне бьфькьрьн дәрһәqа wе йәке чь кӧ Йаһоwа у Иса бона мә кьрьн. Бәле, бьра һʹьзкьрьн мә һелан кә кӧ пʹегәһа Исада һәрʹьн, һʹьзкьрьне һьндава хушк-бьра бьдьнә кʹьфше, у бь дьл бьбахшиньнә wан.