Щаһьлно Һун Ча Дькарьн Хwә Һазьр кьн бона Ньхӧмандьне?

1, 2. а) Шьровәкьн кӧ чьрʹа ньхӧмандьн гавәкә фәрз ә. б) Әwе кӧ дьхwазә бе ньхӧмандьне, чьда гәрәке баwәр бә, у чьрʹа?

ҺӘРГЕ тӧ щаһьл и, у дьхwази бейи ньхӧмандьне, әw те һʹәсабе кӧ qәдьрәки мәзьн һивийа тә йә. Чаwа кӧ тʹема дьнда һатә готьне, ньхӧмандьн гавәкә гәләк фәрз ә. Чьмки әw те һʹәсабе кӧ тӧ хwә тʹәсмили Йаһоwа дьки, демәк wирʹа соз дьди кӧ тӧйе һʹәта-һʹәтайе wирʹа хьзмәт ки. Һьн жи, тӧ соз дьди кӧ тӧйе жийина хwәда жь һʹәму тьшти qьрара wи дайни щийе пешийе. Фәʹмдари йә, кӧ тӧ гәрәке бейи ньхӧмандьне, чахе епʹещә гьһишти йи кӧ әwе сафикьрьне бьки. Хенщи ве йәке, әw гәрәке хwәстьна тәйә шәхси бә, у тӧ гәрәке фәʹм бьки чь те һʹәсабе тʹәсмилбуйин.

² Ле һәрге тӧ дӧдьли дьби кӧ һазьр и бейи ньхӧмандьне? Йан жи һәрге тӧ дьхwази бейи ньхӧмандьне, ле де-баве тә дьбежьн кӧ һе зу йә, дьбәкә сәва кӧ тӧ һе щерʹьбанди би? Һәрдӧ дәрәщада жи, бәрхwә нәкʹәвә. Дәwсе, әwи wәʹдәйи чаwа мәщал бьдә хәбате, сәва кӧ һе пешда һәрʹи, у зутьрәке бькарьби бейи ньхӧмандьне. Тӧ дькари нете дайни пешийа хwә кӧ пешда һәрʹи wан тьштада: 1) баwәрийа хwәда, 2) кьред хwәда, у 3) рʹазибунеда.

БАWӘРИЙА ТӘ

3, 4. Щаһьл чь дькарьн һин бьн жь Тимотʹейо?

³ Бьфькьрә һәла тӧйе ча щаба хwә бьди сәр wан пьрса: Чьрʹа әз баwәр дькьм кӧ Хwәде һәйә? Чь мьн дьдә баwәркьрьне кӧ Кʹьтеба Пироз Хәбәра Хwәде йә? Чьрʹа әз дьфькьрьм кӧ бьжим пе принсипед Хwәде һе кʹар ә, нә кӧ бьжим бь wи щурʹәйи чаwа әв дьнйа дьжи? Әw пьрс нә бона ве йәке нә, кӧ тӧ хwәда дӧдьли би. Дәwсе, әw пьрс дькарьн али тә бькьн кӧ пәй ве ширәта Паwлос һәрʹи: «Избат бьн чь йә qьрара Хwәде, кӧ qәнщи, хwәши у кʹамьли йә» (Рʹом. 12:2, ДТʹ). Ле чьрʹа гәрәке тӧ избат би ве йәкеда?

⁴ Wәрә әм шеwьр кьн мәсәла Тимотʹейо. Тимотʹейо Ньвисар рʹьнд заньбу. Әw «жь зарʹотийе» жь дийа хwә у пирька хwә һатә һинкьрьне. Ле йәкә Паwлос wи ширәт кьр у готә wи: «Нава wан тьштада бьминә, чь кӧ һин буйи у чьда избат буйи» (2 Тимтʹ. 3:14, 15, ДТʹ). Тимотʹейо хwәха «избат» бу кӧ рʹасти дитийә. Әwи рʹасти qәбул кьр нә жь бо ве йәке, чьмки дийа wи у пирька wи wирʹа готьн кӧ qәбул кә, ле әw дьфькьри сәр wан тьшта чь кӧ педьһʹәсийа у wан тьштада избат дьбу. (Бьхунә Рʹомайи 12:1, ДТʹ.)a

5, 6. Чьрʹа фәрз ә кӧ тӧ щаһьлтийеда һин би бьфькьри?

⁵ Дьбәкә тӧ ида гәләк wәхт рʹастийед Кʹьтеба Пироз зани. Һәрге ӧса йә, wе керһати бә кӧ тӧ хwәрʹа нете дайни, wәки һе кʹур леколин бьки кӧ чь мәʹни һәнә wәки тӧ рʹастийед Кʹьтеба Пироз баwәр дьки. Чахе тӧ ӧса бьки, тӧйе һе баwәрийа хwә qәwи ки. Хенщи ве йәке, әw йәк wе али тә бькә кӧ нәкʹәви бәр байе щаһьлед ве дьнйайе, ӧса жи пропаганда ве дьнйайе, йан жи һәстед хwәйә шәхси.

⁶ Чахе тӧ щаһьлтийеда һин би кӧ бьфькьри, те һазьр би кӧ щабед хwә бь аqьлайи бьди сәр пьрсед щаһьлед дьнена, мәсәлә сәр wан пьрса: «Тӧ чьрʹа баwәри кӧ Хwәде һәйә? Чьрʹа Хwәдейе һʹьзкьрьн дьһелә кӧ зӧлми һәбә? Ча дькарә ӧса бә кӧ Хwәде тʹьме һәбуйә?» Чахе тӧ һазьр и, пьрсед ӧса wе нә кӧ баwәрийа тә сьст кьн, ле тӧйе һелан би һе зедә леколинкьрьна шәхси бьки.

7-9. Гьли кьн кӧ чаwа рʹебәри бона леколинкьрьне «Чь Һин Дькә Кʹьтеба Пироз?» йа онлайн, дькарә али wә бькә кӧ баwәрийа хwәда qәwи бьн.

⁷ Һәрге тӧ кʹур һинбуна хwәйә шәхси бьки, әw йәк wе али тә бькә, кӧ щаба хwә бьди сәр пьрса, һʹәму шькед дьле хwәда кʹӧта ки, у баwәрийа хwә qәwи ки (Кʹар. Шанд. 17:11). Гәләк әʹдәбйәтед мә һәнә, кʹижан кӧ дькарьн ве йәкеда али тә бькьн. Гәләкарʹа керһати бу кӧ леколин бькьн әʹдәбйәтед кӧ шьровәдькьн дәрһәqа Әʹфьрандар у әʹфринед wи. Хенщи ве йәке, гәләк щаһьла хwәш те у кʹар стандьнә жь дәрхьстьна онлайн «Чь Һин Дькә Кʹьтеба Пироз?» Әw рʹебәрийа леколинкьрьне дькарьн сәр jw.org. бьвиньн. Бьньһерʹьн ҺИНКЬРЬНЕД КʹЬТЕБА ПИРОЗ > ЩАҺЬЛ. Әw рʹебәри бона леколинкьрьне һатә чекьрьне, сәва qәwи кә баwәрийа wә һьндава һинкьрьнед Кʹьтеба Пироз.

⁸ Тӧ ида зани Кʹьтеба Пироз, у ләма дьбәкә тӧ дәрберʹа щаба хwә бьди сәр һьнә пьрсед ве рʹебәрийа леколинкьрьне. Ле чьрʹа тӧ дь wан щабада сәд сәләфи баwәр и? Әw рʹебәрийа леколинкьрьне тә һелан дькә, кӧ бьфькьри сәр щурʹә-щурʹә рʹезед Кʹьтеба Пироз у паше бьньвиси фькьред хwә дәрһәqа wан рʹеза. Әw йәк дькарә али тә бькә кӧ һазьр би, чаwа шьровәки йед дьненарʹа кӧ тӧ чь баwәр дьки. Әw дәрхьстьна онлайн «Чь Һин Дькә Кʹьтеба Пироз?» али гәләк щаһьла дькә, кӧ баwәрийед хwәда дӧдьли нәбьн. Wе гәләк керһати бә кӧ әw рʹебәрийа леколинкьрьне һинбуна хwәйә шәхсида жи бьди хәбате.

⁹ Чахе тӧ баwәрийа хwәда избат дьби, әw йәк дьбә гавәкә фәрз пешийа ньхӧмандьне. Хушкәкә щаһьл гот: «Пешийа кӧ мьн сафи кьр wәки бемә ньхӧмандьне, мьн Кʹьтеба Пироз леколин кьр у мьн дит кӧ әw рʹелигийа рʹаст ә. У ве йәкеда әз һәр рʹож жийина хwәда һе qәwи избат дьбьм».

КЬРЕД ТӘ

10. Чьрʹа жь Мәсиһийе ньхӧманди те дәʹwакьрьне кӧ баwәрийа хwә бь шьхӧла избат кә?

¹⁰ Кʹьтеба Пироз дьбежә: «Ӧса жи баwәри, һәгәр кьред wе тʹӧнәбьн, бь тʹәне мьри йә» (Аqуб 2:17). Һәрге тӧ баwәрийа хwәда qәwи йи, фәʹмдари йә кӧ тӧйе әwе йәке пе кьред хwә бьди кʹьфше. Ле әw кьр кʹижан ьн? Кʹьтеба Пироз дьбежә дәрһәqа «кьред пироз» у «амьнийе Хwәдерʹа». (Бьхунә 2 Пәтрус 3:11, ДТʹ.)b

11. Шьровәкьн чь те һʹәсабе әв гьли: «кьред пироз».

¹¹ Сәва кӧ «кьред пироз» тʹьме бьки, тӧ гәрәке фькьред хwәда у намусийеда тʹәмьз би. Ве йәкеда дәрһәqа хwә тӧ чь дькари бежи? Мәсәлә, бьфькьрә сәр шәш мәһед пашwәхтийе. Тә ча дайә кʹьфше кӧ тӧ һин буйи рʹастийе у хьрабийе жь һәв дәрхи? (Ибрн. 5:14). Тӧ дькари дәрәщед ӧса бини бира хwә, чахе тӧ нәкʹәти бәр байе щерʹьбандьнәке, йан жи бәр байе щаһьлед дьн? Рʹабун-рʹуньштьна тәйә мәкʹтәбеда әʹйан дькә баwәрийа тә? Тӧ Йаһоwарʹа амьн дьмини, йан дьхwази бьби мина һәвалед хwәйә дәрсхане, чьмки нахwази кӧ әwана qәрфа тә бькьн? (1 Пәт. 4:3, 4). Бәле, әм гьшк жи гӧнәкʹар ьн. У һәла һе әwед кӧ гәләк сал Йаһоwарʹа хьзмәт дькьн, дькарьн щара шәрм кьн бәр һʹәмуйа бежьн дәрһәqа баwәрийа хwә. Ле йәкә, мәрьве кӧ хwә тʹәсмили Йаһоwа кьрийә, wе фьрнаq бә кӧ наве Хwәде сәр wи йә, у әwе йәке wе пе кьред хwә бьдә кʹьфше.

12. Бь кʹижан шьхӧла тӧ дькари бьди кʹьфше «амьни Хwәдерʹа», у тӧ ча гәрәке сәр ван шьхӧла бьньһерʹи?

¹² Чь те һʹәсабе «амьни Хwәдерʹа»? Әw те һʹәсабе кʹаркьрьн щьватеда, мәсәлә чуйина сәр щьвине у бәлакьрьна мьзгине. Ӧса жи, әw те һʹәсабе тьштед рʹӧһʹани кӧ йед дьн нькарьн бьвиньн. Мәсәлә, дӧайед тә у һинбуна тәйә шәхси. Кәсе кӧ әʹмьре хwә тʹәсмили Йаһоwа кьрийә, тʹӧ щар wан тьшта ча баргьрани һʹәсаб нәкә. Дәwсе, әwе мина Даwьд Пʹадша бьфькьрә, кʹижани кӧ гот: «Йа Хwәдайе мьн, жь кьрьна хwәстьна тә, әз зәwqә дьгьрьм» (Зәб. 40:8).

13, 14. Чь дькарә али тә бькә кӧ бь шьхӧла «амьнийе Хwәдерʹа» бьди кʹьфше, у ча һьнә щаһьла жь ве йәке кʹар стандьнә?

¹³ Сәва кӧ бь шьхӧла «амьнийе Хwәдерʹа» бьдьнә кʹьфше, wе керһати бә кӧ сәр һьнә пьрса бьфькьри. Мәсәлә: «Дӧайед тә чьqас конкрет ьн? Әw дӧайед тә ча әʹйан дькьн һʹьзкьрьна тә һьндава Йаһоwа? Чь дькʹәвә нава һинбуна тәйә шәхси? Тӧ бәрдәwам дьки хьзмәт ки, һәрге жи де-баве тә хьзмәт накьн?»^[1][7] Хwәрʹа щабед пьрсед wан щурʹа бьньвисә. Чьмки әw йәк wе али тә бькә, кӧ хwәрʹа нете дайни кӧ һе баш ки дӧайед хwә, һинбуна хwәйә шәхси, у бәлакьрьна мьзгине.

¹⁴ Гәләк щаһьлед кӧ дьхwазьн бенә ньхӧмандьне, щабед пьрсед wи щурʹәйи хwәрʹа ньвисинә, у кʹарәкә мәзьн стандьнә. Хушкәкә щаһьл Тилда гот, кӧ чахе әwе щабед сәр wан пьрса хwәрʹа дьньвиси, әве йәке али wе кьр кӧ нета дайнә пешийа хwә. Әwе нет пәй нета дьани сери, у саләке шунда ида һазьр бу бона ньхӧмандьне. Бьраки Щаһьл Патрик жи жь wе йәке кʹар стандийә. Әw гьли дькә: «Рʹаст ә мьн ида заньбу кӧ нетед мьн чь нә, ле мьн әw нет ньвисин, у әwе йәке әз һелан кьрьм, кӧ һʹәта мьн һәйә wан нета биньм сери».

15. Шьровәкьн кӧ чьрʹа тʹәсмилкьрьн сафикьрьна шәхси йә.

¹⁵ Пьрсәкә лапә фәрз әw ә: «Тӧйе wи чахи жи хьзмәт ки Йаһоwарʹа, һәрге де-баве тә йан һәвалед тә ида хьзмәт нәкьн?» Бира хwәда хwәй кә, чахе тӧ хwә тʹәсмили Йаһоwа ки у бейи ньхӧмандьне, ида те хwәха бәр Хwәде щаба хwә бьди. У ләма хьзмәткьрьна тә Йаһоwарʹа мәрьвед дьнва гьредайи нинә, нә жи жь де-баве тәва. Кьред тәйә пироз у амьни Хwәдерʹа избат дькьн кӧ тә хwәха рʹастийа Хwәде qәбул кьрийә у дьхwази пе принсипед wи бьжийи. У зутьрәке тӧйе бьгьһижи ньхӧмандьне.

РʹАЗИБУНА ТӘ

16, 17. а) Чь гәрәке мәрьва һелан кә кӧ бьбә Мәсиһи? б) Рʹазибуна һьндава qӧрбане тʹәви чь дькарьн бәрамбәр кьн?

¹⁶ Мәрьвәки кӧ рʹьнд заньбу Qануна Муса, жь Иса пьрси: «‹Qанунеда кʹижан ә тʹәмийа һәрә мәзьн?› Иса готә wи: ‹Хӧдан Хwәдейе хwә һʹьз бькә бь тʹәмамийа дьле хwә, бь тʹәмамийа щанийа хwә у бь тʹәмамийа һʹьше хwә›» (Мәт. 22:35-37). Бь wан гьлийа Иса да кʹьфше, кӧ һʹьзкьрьна һьндава Йаһоwа гәрәке мә һелан кә кӧ бьбьнә Мәсиһи у бенә ньхӧмандьне. Тӧ дькари һʹьзкьрьна хwә һьндава Йаһоwа qәwи ки, һәрге бьфькьри сәр пʹешкʹешәкә wийә мәзьн, демәк qӧрбана Кӧрʹе wи. (Бьхунә 2 Корьнтʹи 5:14, 15; 1 Йуһʹәнна 4:9, 19.) Чахе тӧ бьфькьри сәр ве qӧрбане у ӧса жи кӧ әw чь те һʹәсабе бона тә, тӧйе һелан би кӧ Хwәдерʹа рʹазибуне бьди кʹьфше.

¹⁷ Рʹазибуна тә һьндава ве qӧрбане дькарә бәрамбәри ве мәсәле бә: Бьдә бәр чʹәʹве хwә кӧ тӧ нӧqи аве буйи у кәсәки тӧ хьлаз кьри. Паши wе йәке, гәло wе рʹаст бә кӧ тӧ һәрʹи мал, хwә зьһа ки, у бир ки кӧ әwи кәси бона тә чь кьр? Һьлбәт на! Тӧйе әʹсә хwә дәйндaре wи һʹәсаб ки. Бь рʹастийе тӧ бь әʹмьре хwә дәйндаре wийи! Ле әм һе зедә дәйндaре Йаһоwа у Иса нә. Бейи ве qӧрбане, һәр кәс жь мә wе нӧqи нава гӧнә у мьрьне буйа. Ле жь бо ве һʹьзкьрьна мәзьн, мәщәла мә һәйә кӧ һʹәта-һʹәтайе бьжин щьнәтеда сәр әʹрде!

18, 19. а) Чьрʹа һун гәрәке нәтьрсьн кӧ хwә тʹәсмили Йаһоwа кьн? б) Ча хьзмәткьрьна Йаһоwарʹа жийина wә баш дькә?

¹⁸ Тӧ рʹази йи кӧ Йаһоwа бона тә чь кьрийә? Һәрге әре, тӧйе һелан би кӧ әʹмьре хwә тʹәсмили Хwәде бьки у бейи ньхӧмандьне. Ча ида һатә готьне, кӧ тʹәсмилбуйина тә ӧса жи әw ә, кӧ тӧ соз дьди Йаһоwа кӧ чь жи бьqәwьмә, тӧйе qьрара wи бини сери һʹәта-һʹәтайе. Ле гәло лазьм ә бьтьрси кӧ тӧйе әwи сози нькарьби бини сери? На! Бира хwәда хwәй кә, wәки Йаһоwа тәрʹа qәнщийе дьхwазә, у әw «wе wан хәлат кә, кʹижан кӧ ль wи дьгәрʹьн» (Ибрн. 11:6). Тʹәсмилбуйин у ньхӧмандьн жийина тә wе нә кӧ чәтьн кә, ле дәwсе тӧйе бәхтәwар би у хwәйкьри би. Бьраки щаһьл кӧ 24 сали йә, һатә ньхӧмандьне чахе һе 13 сали нибу, дьбежә: «Һәрге әз мәзьн бума у паше бьһатама ньхӧмандьне, дьбәкә занәбуна мьн һе гәләк буйа, ле чьмки мьн сафи кьр wәʹде щаһьлтийе хwә тʹәсмили Йаһоwа кьм, бь wе йәке мьн хwә жь хwәстьн у нетед ве дьнйайе хwәй кьр».

¹⁹ Бь рʹастийе ча Йаһоwа жь Шәйтʹан щӧдә дьбә. Шәйтʹан дәрһәqа wә qә хәм накә! Һәрге һун пәй wи һәрʹьн, әw нькарә wә хәлат кә йан тьштед баш бьдә wә. Әw wе ча бькарьбә wан тьшта бьдә, чь кӧ бал wи тʹӧнә? Нә мьзгина баш щәм wи һәйә, нә жи ахьрийа баш. Әw тʹәне ахьрийа хьраб дькарә бьдә, кʹижан кӧ һивийа wи йә! (Әʹйан. 20:10).

20. Щаһьл пешийа тʹәсмилбуйине у ньхӧмандьне чь дькарьн бькьн сәва кӧ һе пешда һәрʹьн? (Бьньһерʹә чаргошә «Сәва кӧ Рʹӧһʹанида Мәзьн би wе Тәрʹа Бьбә Аликʹари.»)

²⁰ Әʹйан ә, кӧ хwә тʹәсмили Йаһоwа кьн сафикьрьна рʹаст ә. Ле тӧ һазьр и әве гаве бавежи? Һәрге әре, паш нәхә. Алики дьнва жи, һәрге тәрʹа лазьм ә һе зедә wәʹдә, ширәтед ве тʹемайе бьдә хәбате сәва кӧ һе пешда һәрʹи. Паwлос Филипийарʹа ньвиси: «Әм гьһиштьнә чь дәрәще, анәгори wе йәке бьжин» (Фили. 3:16). Һәрге тӧ пәй wан ширәта һәрʹи, зутьрәке тӧйе бьхwази хwә тʹәсмили Йаһоwа ки у бейи ньхӧмандьне.