Һун бь Сайа Qәнщийа Нәһежа Аза Бунә

1, 2. Чьрʹа рʹеза жь Рʹомайи 5:12 Шәʹдед Йаһоwарʹа фәрз ә?

ШӘʹДЕД ЙАҺОWАРʹА рʹьнд нас ә рʹеза жь Рʹомайи 5:12, у хьзмәтийеда жи әwана гәләк щар ве рʹезе дьдьнә хәбате. Ве рʹезеда те готьне: «Аwа чаwа бь мәрьвәки гöнә кʹәтә дьне у жь гöнә жи мьрьн һат, öса жи мьрьн сәр һʹәму мәрьва бәла бу, чьмки һʹәмуйа жи гöнә кьр».

² Кʹьтеба «Чь Һин Дькә Кʹьтеба Пирозда?», әw рʹез гәләк щар те хәбьтандьне. Чахе әм тʹәви зарʹед хwә йан тʹәви мәрьвед дьн пе ве кʹьтебе һинбуне дәрбаз дькьн, мәсәлә сәре 3, 5 у 6, фәʹмдари йә әм рʹеза жь Рʹомайи 5:12 жи дьхуньн. Бь ве рʹезе әм wанрʹа шьровәдькьн кö qьрара Хwәде сәва әʹрде чь йә, чьрʹа мәрʹа кʹьрʹин лазьм бу, у мьри чь һʹалида ньн. Ле һун qә дьфькьрин дәрһәqа ве йәке, кö әw рʹез ча һʹöкöм дьбә сәр һәләqәтийа wә тʹәви Йаһоwа, сәр кьред wә, у ахьрийа wә?

3. Әм чь гәрәке бир нәкьн дәрһәqа гöнәкʹарийа хwә?

³ Әм гьшк гәрәке бир нәкьн wәки әм гöнәкʹар ьн, у һәр рʹож шашийа дькьн. Ле Йаһоwа рʹәʹм ә. Әw занә wәки әм жь ахе һатьнә чекьрьне у әw тʹьме һазьр ә бьбахшинә мә (Зәб. 103:13, 14). Иса гот wәки әм дöада жь Хwәде һиви кьн кö «гöнед мә бьбахшинә» (Луqа 11:2-4). Чахе Хwәде дьбахшинә мә, мәʹнийед мә тʹöнә кö бәрхwә кʹәвьн сәва шашийед хwәйә бәре. Wәрә әм ньһа шеwьр кьн, кö Хwәде ча дьбахшинә мә.

ХWӘДЕ ПЕ QӘНЩИЙА ХWӘ КÖ ӘМ ҺЕЖА НИНЬН, ДЬБАХШИНӘ МӘ

4, 5. а) Чь али мә дькә wәки әм рʹеза Рʹомайи 5:12 фәʹм кьн? б) Чь те һʹәсабе гьлийед «qәнщийа нәһежа»?

⁴ Кʹьтеба Рʹомайи, илаһи сәре 6, али мә дькә wәки әм фәʹм кьн гьлийед Паwлос жь Рʹомайи 5:12. Ви сәрида әм педьһʹәсьн кö Йаһоwа ча дькарә гöне мә бьбахшинә. Сәре 3-да, әм дьхуньн: «Һʹәмуйа гöнә кьр . . . Ле жь кʹәрәма wи у бь азакьрьна Мәсиһ Иса рʹастһʹәсаббуне пʹешкʹеш дьстиньн» (Рʹом. 3:23, 24). Ле чь те һʹәсабе хәбәра Йунани кö Паwлос да хәбате, кʹижан кö һатийә wәлгәрʹандьне «кʹәрәм»? Ль гора фәрһәнгәке, нета ве хәбәре әw ә, чахе qәнщийа рʹәзәдьли у беһәq дькьн, ле һивийе ниньн у нә жи дәʹwа дькьн, wәки тьштәки дәwсе бьстиньн. Демәк әw qәнщи wанрʹа те кьрьне, йед кö нәһежа нә.

⁵ Зандар Щон Паркһерст гот, wәки әв гьлийе Йунани гәләк щар Кʹьтеба Пирозда те хәбьтандьне, чахе те гьликьрьне дәрһәqа qәнщийа Хwәде у Исайә мәзьн һьндава инсанәте. Qәнщийа wанә мәзьн әw ә, кö wана бь рʹәзәдьли инсанәт жь гöнә у мьрьне хьлаз кьрьн, бь сайа кʹьрʹине. Ләма «Wәлгәрʹандьна Дьнйа Тʹәзәда» хәбәра «кʹәрәм», һатә wәлгәрʹандьне ча «qәнщийа нәһежа», у әw гьли рʹасти жи лайиq ә. Ле гәло Хwәде ча дьдә кʹьфше qәнщийа хwә, кʹижан кö әм һежа ниньн? У ча qәнщийа wи кʹаре мәрʹа тинә ча иро, öса жи ахьрийеда wе бинә? Wәрә әм шеwьр кьн.

6. Кʹе дькарә бьстинә qәнщийа нәһежа жь Хwәде?

⁶ Бь «мәрьвәки», демәк бь Адәм гöнә кʹәтә дьне, у öса «бь нәһәqийа мәрьвәки у рʹуйе wида мьрьне һʹöкöм кьр». Ле «кʹәрәма Хwәдейә дәwләмәнд», демәк qәнщийа нәһежа, «бь сайа йәки, аwа готи Иса Мәсиһ» бу (Рʹом. 5:12, 15, 17). У бь сайа ве qәнщийа мәзьн, тʹәмамийа инсанәте дькарә кʹәрәма бьстинә. «Бь гöһдарийа йәки [Иса] гәләк wе рʹаст бенә һʹәсабе». Бәле, qәнщийа нәһежа жь Хwәде, дькарә мә бьвә «бәрбь жийина һʹәта-һʹәтайе», бь сайа Иса Мәсиһ (Рʹом. 5:19, 21).

7. Чьрʹа кʹьрʹин әw һәйә qәнщийа Хwәде кʹижан кö әм һежа ниньн?

⁷ Йаһоwа борщдар нибу wәки Кöрʹе хwә бьшинә сәр әʹрде у бькә qöрбан сәва мә. Хенщи ве йәке, мәрьвед гöнәкʹар һежа нибун, кö Хwәде у Иса һәqе кʹьрʹине бьдьн сәва бахшандьна гöнед wан. Демәк, бахшандьна гöнед мә у созе Хwәде кö әм дькарьн бьжин һʹәта-һʹәтайе, бь рʹастийе жи qәнщийа гәләк мәзьн ә, кö әм һежа ниньн. Әм гәрәке гәләк бьшекьриньн әw qәнщийа Хwәде, у һәр рʹож пе жийина хwә жерʹа бьдьнә кʹьфше, кö әм гәләк жь wи рʹази нә.

РʹАЗИ БЬН БОНА QӘНЩИЙА ХWӘДЕЙӘ МӘЗЬН

8. Иро һьнә мәрьв ча дьньһерʹьн сәр гöнед хwә?

⁸ Әм гьшк зöрʹәте Адәм ьн, ләма әм гәләк щар шашийа, тьштед нәрʹаст у гöнә дькьн. Ле һәрге әм öса бьфькьрьн: «Һәрге жи әз тьштәки öса бькьм, кö бәр чʹәʹве Хwәде гöнә йә, ижа чь, Йаһоwа wе бьбахшинә мьн», әw йәк qә нәрʹаст ә. Ле йазьх, һәла һе wәʹде шандийада жи, һьнә Мәсиһи öса дьфькьрин. (Бьхунә Щьһуда 4.) Әм гәрәке тʹö щар нәбьнә мина wан, ле йәкә щара дьqәwьмә кö фькьред öса бенә һʹьше мә. Әм гәрәке дәрберʹа әwан фькьра жь һʹьше хwә дәрхьн, чьмки әw дькарьн һʹьше мәда кʹур рʹунен у мәзьн бьн.

9, 10. Паwлос у йед дьн ча аза бун жь гöнә у мьрьне?

⁹ Ле Паwлос мина wан Мәсиһийа нәдьфькьри, wәки Хwәде чʹәʹве хwә дадьдә сәр кьред хьраб у нәрʹаст. Гәло чьрʹа? Паwлос гот wәки әw Мәсиһи «һьндава гöнада» мьрьн. (Бьхунә Рʹомайи 6:1, 2.) Ле әв йәк ча дькарьбу бьбуйа, һәрге әwана һе сах бун у сәр әʹрде дьжитьн?

¹⁰ Хwәде бь сайа qöрбана Иса, гöнед Паwлос у Мәсиһийед wи wәʹдәйи бахьшанд. Әwи әwана бь рʹöһʹе пироз кʹьфш кьр, сәва кö әwана бьбьнә кöрʹед wийи рʹöһʹани. Паши ве йәке, әwана ида һивийе бун кö һʹәта-һʹәтайе сәр әʹзмана бьжин. Һәрге әwана амьн бьмана, wана wе сәр әʹзмана сәрwерти тʹәви Иса бькьрана. Паwлос гот wәки әwана «һьндава гöнада мьрьн», wи wәʹдәйи чахе һе сах бун у Хwәдерʹа сәр әʹрде хьзмәт дькьрьн. Паwлос wан Мәсиһийарʹа мәсәла Иса ани. Әwи гот wәки Иса мьр чаwа мәри, ле паше жь мьрьне рʹабу бь бәдәна рʹöһʹани у нәмьри. Демәк, иди мьрьне сәр Иса һʹöкöм нәдькьр. Мәсиһийед бь рʹöһʹе пироз бьжарти жи, бь симболик дькарьбун хwә һʹәсаб кьрана ча «һьндава гöнада» мьри, ле «һьндава Хwәдеда сах, бь сайа Мәсиһ Иса» (Рʹом. 6:9, 11). Бь щурʹәки майин бежьн, әwана бона әʹмьре хwәйи бәре мьрьн. Әwана ида бьн һʹöкöме хwәстәка бәдәнеда нибун, wана ида öса дьжитьн, ча Хwәде хwәш те.

11. Йед кö һивийа жийина һʹәта-һʹәтайе сәр әʹрде нә, чь щурʹәйи «һьндава гöнада мьрьн»?

¹¹ Ле дәрһәqа хwә әм чь дькарьн бежьн? Пешийа кö әм бьбуна Мәсиһи, мә гәләк щар гöнә дькьр, дьбәкә qә нә жи дьфькьрин wәки кьред мә бәр чʹәʹве Хwәде чьqас рʹәш ьн. Әм чаwа «хöламед һʹәрамийе у нәһәqийе» бун, у дькарьн бежьн кö әм «хöламед гöнә бун» (Рʹом. 6:19, 20). Паше чахе әм рʹастийе пеһʹәсийан, мә әʹмьре хwә гöһаст. Мә хwә тʹәсмили Хwәде кьр у һатьнә ньхöмандьне. Һьнгеда, нета мә әw ә, кö бь дьл у щан гöрʹа һинкьрьн у принсипед Хwәде бькьн. Бь гьлийед майин бежьн, әм «жь гöнә аза бун у бунә хöламед рʹастийе» (Рʹом. 6:17, 18). Демәк, әм жи сәр хwә дькарьн бежьн wәки әм «һьндава гöнада мьрьн».

12. Һәр кәс жь мә гәрәке чь бьжартьне бькә?

¹² Ньһа бьфькьрьн сәр wан гьлийед Паwлос: «Бьра иди гöнә һʹöкöми сәр qальбе wәйи пʹучʹи-мьри нәкә, кö һун гöрʹа хwәстьнед wи бькьн» (Рʹом. 6:12). Һәрге әм бьһельн wәки гöнә һʹöкöми сәр мә бә, wи чахи әме пәй хwәстьна бәдәне һәрʹьн. Ле йәкә әм дькарьн öса бькьн wәки гöнә «ида» сәрwертийе мә нәкә. Пьрс әw ә, wәки әме чь бьжберьн, йане дьле мә чь дьхwазә. Wе керһати бә кö пьрсед öса бьдьнә хwә: «Чахе хwәстьна бәдәне пешда те, йан фькьред нәрʹаст тенә һʹьше мьн, гәло әз дәрберʹа wана дәрдьхьм, йан дьһельм wәки әw тьштед нәрʹаст дьле мьнда бьминьн? Гәло әз дькарьм бежьм wәки әз һьндава гöнада мьри мә? Гәло әз дьжим öса чаwа кö Хwәде хwәш те?» Һәрге әм дьшекьриньн qәнщийа Хwәде кö әм һежа ниньн, у кö әw ча дьбахшиньнә мә, әме һʹәму тьшти бькьн сәва дьле wи ша кьн.

ШӘРʹ, КʹИДӘРЕДА ҺУН ДЬКАРЬН СӘРКʹӘВЬН

13. Чьрʹа әм дькарьн баwәр бьн wәки әм дькарьн тьштед рʹаст бькьн?

¹³ Хьзмәткʹаред Йаһоwа пешийа кö бьһатана нава рʹастийе, кьред нәрʹаст дькьрьн. Дьбәкә wана тьштед öса дькьрьн, бона «кʹижана ньһа . . . шәрм дькьн» (Рʹом. 6:21). Ле әwана кьред хьраб тʹәрькандьн, у һатьнә гöһастьне. Мәсәлә, Паwлос Мәсиһийед Корьнтʹира нәʹмә ньвиси, у жь wана һьнәк бәре пʹутпʹарьст, дьз, кʹонә, сәрхwәш бун. Ле йәкә әwана «жь гöна һатьнә шуштьне» у «һатьнә бöһöрти-жьбарәкьрьне» (1 Корн. 6:9-11). Мәсиһийед Рʹомеда жи гәрәке әʹмьре хwә бьгöһастана. Паwлос wанрʹа ньвиси: «Әндәмед qальбе хwә нәдьнә гöнә кö бьбьнә һащәтед нәһәqийе, ле бәле хwә бьдьнә дәсте Хwәде, чаwа йәки жь мьрьне рʹабуйи, бьра әндәмед wә бьбьнә һащәтед һәqийе, бона Хwәде» (Рʹом. 6:13). Паwлос баwәр бу, wәки әwана дькарьн тьштед рʹаст бькьн у бәрдәwам кьн жь qәнщийа Хwәде кʹаре бьстиньн.

14, 15. Әм кʹижан пьрса гәрәке бьдьнә хwә, сәва тедәрхьн һәла әм бь дьл гöрʹа Хwәде дькьн йан на?

¹⁴ Иро жи öса нә. Һьнә хушк-бьред мә дьбәкә бәре мина wан Корьнтʹийа дьжитьн. Ле әwана һатьнә гöһастьне. Wана кьред хwәйә хьраб һиштьн у «жь гöна һатьнә шуштьне». Бәле, сәва кö дьле Хwәде ша кьн, әм һатьнә гöһастьне, у Хwәде рʹәʹмтийа хwә мәрʹа да кʹьфше кö гöнед мә бахьшанд. Ле гәло әм пе кьред хwә диса дьле wи ша дькьн, йан пәй хwәстәка бәдәне дькʹәвьн?

¹⁵ Бәле, әм хwә дур дьгьрьн жь гöнед öса гьран, ча мәсәлә һьнә Корьнтʹийа дькьрьн. У әw йәк фәрз ә, чьмки һәрге «гöнә сәрwерийе» мә бькә, wи чахи әме нькарьбьн һивийа кʹәрәма Хwәде бьн. Ле һәрге әм гöнед бьчʹук дькьн, гәло әм дькарьн бежьн, wәки әм рʹасти бь дьл у щан гöрʹа Хwәде дькьн? (Рʹом. 6:14, 17)

16. Әм жь кʹö заньн, wәки Мәсиһи гәрәке хwә нә кö тʹәне жь гöнед гьран дур бьгьрьн, ле жь һе зедә тьшт?

¹⁶ Бьфькьрьн дәрһәqа Паwлосе шанди. Әм дькарьн дöдьли нәбьн кö әwи кьред öса нәдькьр, кʹижан кö 1 Корьнтʹи 6:9-11-да тенә гьликьрьне. Ле йәкә әwи фәʹм дькьр, wәки «гöнә сәр wи йә». Әwи ньвиси: «Әз хун у гошт ьм, хöламәки гöнәрʹа фьроти. Чьмки әз фәʹм накьм чь дькьм. Нә кö wи тьшти дькьм, чь кö дьхwазьм, ле wи тьшти дькьм, чь кö бәр чʹәʹве мьн рʹәш ә» (Рʹом. 7:14, 15). Рʹаст ә Паwлос гöнед гьран нәдькьр, ле жь wан рʹеза те кʹьфше, wәки Паwлос мьqабьли һьнә тьштед дьн шәрʹ дькьр, йед кö әwи һʹәсаб дькьр ча гöнә. Әwи тьштед бьчʹукда жи дьхwаст дьле Хwәде ша кә. (Бьхунә Рʹомайи 7:21-23.) Wәрә әм жи чʹәʹв бьдьнә wи у һʹәму тьштида бь дьл у щан гöрʹа Йаһоwа бькьн.

17. Чьрʹа һун дьхwазьн нәqәлп бьн?

¹⁷ Wәрә шеwьр кьн дәрһәqа нәqәлпийе. Чаwа Мәсиһи әм гәрәке нәqәлп у рʹаст бьн. (Бьхунә Мәтʹәлок 14:5; Әфәси 4:25.) Әм заньн wәки Шәйтʹан «баве дәрәwа йә» у әм нәхwазьн чʹәʹв бьдьнә wи. Һананийа у жьна wи әʹмьре хwә öнда кьрьн, чьмки дәрәw кьрьн. Әм нәхwазьн мина wан бьн, у әм хwә жь дәрәwийе дур дьгьрьн (Йуһʹн. 8:44; Кʹар. Шанд. 5:1-11). Ле нәqәлпи найе һʹәсабе тʹәне дәрәwа нәкьн. Ләма һәрге әм бона qәнщийа Хwәде рʹази нә, әме һʹәму тьштида рʹаст у дьлтʹәмьз бьн.

18, 19. Чь те һʹәсабе нәqәлп бьн?

¹⁸ Хапандьн әw те һʹәсабе тьштәки нәрʹаст бежи. Ле Йаһоwа дьхwазә wәки әм нә кö жь нәрʹастийе дур бьн, ле öса жи мәрьва нәхальфиньн. Йаһоwа щьмәʹта хwә Исраелрʹа гот: «Пироз бьн, чьмки әз Хöдан Хwәдейе wә пироз ьм». Паше Хwәде рʹастә-рʹаст wанрʹа гот: «Дьзийе нәкьн, дәрәwа нәкьн у һәвдö нәхапиньн» (Qан. Кʹаһ. 19:2, 11). Йазьх, ле öса дьqәwьмә кö мәрьв рʹастә-рʹаст дәрәwа накә, ле йәкә дькарә мәрьва бьхапинә у һьндава wан qәлп бә.

¹⁹ Мәсәлә, мәрьвәк мәзьне хәбатерʹа йан һәвал-хәбаткʹаррʹа дьбежә, wәки әw сьбе найе хәбате, чьмки жерʹа лазьм ә һәрʹә бал «һʹәким». Ле бь рʹастийе жерʹа лазьм ә тʹәне һәрʹә дәрман бькʹьрʹә, йан жи пʹәре дәрман бьдә һʹәким. Әw дьхwазә нәчә хәбате сәва кö һәрʹә щики һеса бә, йан малбәта хwә бьвә бәр бәʹре. Бәле, гьлийед wида һьнә рʹасти һәйә, ле гәло әм дькарьн бежьн wәки әw нәqәлп ә? Йан әwи дәрәw кьр? Дьбәкә әwи öса кьр сәва кö жерʹа шәрʹ нәкьн, йан жи бона кʹара хwә. Бәле, әм гәрәке тʹьме гöһ бьдьнә ве тʹәмийа Йаһоwа: «Дәрәwа нәкьн». Рʹеза Рʹомайи 6:19-да Хwәде тʹәми дьдә мә, wәки әм гәрәке һʹәлал бьн: «Әндәмед хwә бьдьнә һʹәлалийе кö бьбьнә хöламед рʹастийе».

20, 21. Qәнщийа Хwәде мә бәрбь чь һелан дькә?

²⁰ Бәле qәнщийа нәһежа жь Хwәде мә һелан дькә, wәки әм гöнед гьран нәкьн, ча qави, сәрхwәши, йан диса йед дьн. Бәʹса хәбәре, әм нә кö тʹәне хwә жь бенамусийе хwәй дькьн, ле әм öса жи тьштед öса накьн кö гьредайинә тʹәви бенамусийе, мәсәлә wәʹдәдәрбазкьрьна нәщайиз. Öса жи әм нә кö тʹәне хwә хwәй дькьн жь сәрхwәшийе, ле әм һаqас вәнахwьн, кö һьндьк дьминә сәрхwәш бьн. Бәле, һеса нинә мьqабьли wан тьштед нәрʹаст һәрʹьн, ле йәкә әм дькарьн.

²¹ Нета мә гәрәке әw бә, wәки ча гöнед гьран, öса жи гöнед сьвьк нәкьн. Ле әм гöнәкʹар ьн у нькарьн хwә жь һʹәму гöна хwәй кьн. Әм гәрәке мина Паwлос, һʹәму тьшти бькьн сәва кö мьqабьли гöнә шәрʹ кьн. Паwлос бьрарʹа гот: «Бьра иди гöнә һʹöкöми сәр qальбе wәйи пʹучʹи-мьри нәкә, кö һун гöрʹа хwәстьнед wи бькьн» (Рʹом. 6:12; 7:18-20). Чахе әм шәрʹ дькьн мьqабьли һʹәму гöна, бь ве йәке әм дьдьнә кʹьфше, wәки әм дьшекьриньн qәнщийа нәһежа жь Хwәде, кö әwи бь сайа Иса кьр.

22. Чь кʹәрәма дькарьн бьстиньн әwед кö рʹази нә бона qәнщийа Хwәдейә мәзьн?

²² Йаһоwа бь сайа qәнщийа хwәйә мәзьн, гöнед мә дьбахшинә у диса дькарә бьбахшинә. Әм чьqас рʹази нә, wәки Йаһоwа öса рʹәʹм ә! Wәрә әм рʹазибуна хwә жерʹа бьдьнә кʹьфше, wәки әм хwә жь һʹәму щурʹә гöна хwәй кьн, һәла һе йед öса жи кö мәрьвед дьн һʹәсаб накьн ча гöнә. Паwлос гот, кö әw йәк чь кʹәрәма дькарә мәрʹа бинә: «Ньһа һун жь гöнә кö аза бун у бунә хöламед Хwәде, бәре һʹәлалийә дьчьньн у ахьрийа wан жи жийина һʹәта-һʹәтайе йә» (Рʹом. 6:22).