Гәло бь Рʹасти Иса Йәки Чаwа бу?

Тʹö кәс ньзанә, кö Иса рʹу у бәжьн-бала хwәда йәки чаwа бу, чьмки әw тʹö щар бәр нәqьшкʹара нәдьсәкьни, кö wи бьнәqьшиньн йан жи һәйкәле wи чекьн. Ле йәкә нава qьрнада гәләк нәqьшкʹара һәлбәстед хwәда дәрһәqа wи ньвисинә у әw нәqьш кьрьнә.

Әwан һʹәму нәqьшкʹара ньзаньбун, кö бь рʹасти Иса йәки чаwа бу. Wана ль гора култура, һинкьрьнед религийайе у хwәстьнед мәрьва, Иса нәqьш дькьрьн. У әв шькьл йан һәйкәлед wан нәqьш кʹара, һʹöкöм дькьрьн сәр ньһерʹандьна мәрийа дәрһәqа Иса у һинкьрьнед wи.

Һьнә нәqьшкʹар Иса әʹйан дькьн, ча йәки сьст, бь пʹоред дьреж у рʹуйе тәньк йан жи йәки бәләнгаз. Һьнәк жи Иса әʹйан дькьн ча мәләк бь тʹащәки гьрʹовәр кö шәwq дьдә, йан жи кö Әw хwә жь мәрьва дур дьгьрә. Гәло әв шькьл рʹаст Иса әʹйан дькьн? Ле әʹламәтийа рʹаст әм жь кʹö дькарьн пебьһʹәсьн? Леколина Кʹьтеба Пироз дькарә али мә бькә, кö тедәрхьн бь рʹасти Иса йәки чаwа бу. Әв öса жи дькарә али wә бькә, wәки ньһерʹандьна мә һьндава Исада рʹаст бә.

«ТӘ БОНА МЬН QАЛЬБӘК ҺАЗЬР КЬР»

Әw гьли Иса wәхте ньхöмандьна хwә дöакьрьнеда готьбу (Ибрани 10:5; Мәтта 3:13-17). Әв qальб чь щурʹәйи бу? 30 сал пешда Щьбрайил мәләк, Мәрийамерʹа әʹйан кьр: «Те һʹәмлә дәрейи кöрʹәки бини . . . әw Кöрʹе Хwәде wе бе готьне» (Луqа 1:31, 35). Иса мәрьве кʹамьл бу, чаwа пешийе Адәм бу (Луqа 3:38; 1 Корьнтʹи 15:45). Демәк Иса qальбе хwәда жи кʹамьл бу, у дьqәwьмә әw һьнәки мина дийа хwә Мәрийәм бу, кʹижан кö Щьһу бу.

Иса ль гора әʹдәте Щьһуйа, рʹуйе хwә бәрдьда. Ле нава Рʹомайада әв йәк бәлабуйи нибу. Рʹуйе мера симбола мерани у qәдьргьртьне бу; рʹуйе wан дьреж у һәфкʹәти нибу. Бе шьк Иса дьчу кö рʹуйе хwә һьнәки бьбьрʹә чекә, у пʹорʹе хwә кöрʹ кә. Тʹәне әwед кö ча Нәзир һатьбун бьжартьне, мәсәлә мина Шьмшон, пʹоред хwә нәдьбьрʹин (Жьмар 6:5; Һʹакьмти 13:5).

Иса гәләк баш шьхöле нәщарийе дькьр, у әw бе һащәтед електроникә модерн дьхәбьти (Марqос 6:3). У һәмьки, тьштед wийи чекьри жи qәwи бун. Дәстпека хьзмәта хwәда, Әwи тʹәне, «һʹәму жь пʹарьстгәһе, пәз у дәwаред wанва дәрхьстьн, пʹәрʹед сәрафа рʹетьн у тʹәхтед wан wәлгәрʹандьн» (Йуһʹәнна 2:14-17). Тʹәне мәрьве qәwи дькарә тьште öса бькә. Иса әw qальбе кö Хwәде дабу wи да хәбате, сәва кö фәрмана Хwәде бинә сери, дәрһәqа кʹижани кö әwи гот: «Гәрәке әз бажаред дьнда жи Мьзгинийа Пʹадшатийа Хwәде бьдьм, чьмки әз бона wе йәке һатьмә шандьне» (Луqа 4:43). Бь рʹасти жи qәwатәкә мәзьн лазьм бу, сәва кö нава тʹәмамйа Фьльстинеда ньга һәрʹьн, у әве мьзгинйе бәла кьн.

«WӘРЬНӘ ЩӘМ МЬН . . . У ӘЗЕ РʹЬҺʹӘТИЙЕ БЬДЬМӘ WӘ»

Рʹабун-рʹуньштандьна Исайә маqули у дьлгәрми, сәр wе тʹәглифкьрьне һʹöкöм дькьр у дьле мәрьвед «wәстийайи у баргьран» дькʹшанд бәрбь wи (Мәтта 11:28-30). Дьлгәрми у qʹәнщийа wи избат дькьрьн созе wи, кö мәрьвед дьлсах дькарьбун рʹьһʹәти бьстандана. Һәла һе зарʹа жи дьхwәстьн незики Иса бьн. Кʹьтеба Пироз дьбежә: «Әw зарʹ данә һʹәмеза хwә» (Марqос 10:13-16).

Рʹаст ә пешийа мьрьна хwә Иса гәләк чәрчьри, ле әw мәрьвеки дьлшкәсти у дьлтәнг нибу. Мәсәлә, чахе дь Qанайеда дәʹwат бу, Иса тьштәк жь алийе хwәда кьр, демәк ав кьрә шәрава баш (Йуһʹәнна 2:1-11). Сәр щьвинед дьн әwи дәрһәqа дәрсед öса гьли дькьр, кʹижан кö бира мәрийа нәдьчун (Мәтта 9:9-13; Йуһʹәнна 12:1-8).

Хенщи wе йәке, бь һевийа жийина һәрһәйи, Иса гöһдаред хwәрʹа шабунәкә мәзьн дьани (Йуһʹәнна 11:25, 26; 17:3). Чахе 70 шагьртед wи гьли кьрьн дәрһәqа qәwьмандьнед хwә хьзмәтийеда, әw «ша бу» у гот «ша бьн, кö навед wә ль әʹзмана ньвисар ә» (Луqа 10:20, 21).

«ЛЕ ҺУН ÖСА НӘБЬН»

Wәʹде Иса, сәрwеред религийайе һʹöкöмтийа хwә дьданә кʹьфше, у дина мәрийа бәрбь хwә дькʹшандьн (Жьмар 15:38-40; Мәтта 23:5-7). Иса нә мина wан бу у әwи шагьртед хwә һин дькьр wәки сәр йед дьнена «һʹöкöм» нәкьн (Луqа 22:25, 26). Бь рʹасти Иса ширәт да: «Һʹәвза хwә жь wан qанунзана бькьн, йед кö һʹьз дькьн бь чöхед дьреж бьгәрʹьн, базарада сьлаве бьдьнә wан» (Марqос 12:38).

Иса бь рʹасти жи нә мина wан бу, әw тʹьме нава щьмәʹтеда бу у щарәке wана әw нас нәкьр (Йуһʹәнна 7:10, 11). Һәла һе нава 11 шандийед хwәда жи, әwи хwә нәдьда кʹьфше. Щьһудайе нәмам бь рʹамусане «әʹшәрәт дабу», сәва әʹйан бә кö кʹижан ә Иса (Марqос 14:44, 45).

Рʹаст ә гәләк тьшт нә әʹйан ьн, ле әʹшкәрә йә кö Иса иро öса надьнә кʹьфше чаwа кö бь рʹасти һәбу. Фәрз нинә кö Иса бь рʹасти рʹу у qальбе хwәда йәки ча бу, ле даһа фәрз әw ә, кö ньһа әм сәр wи ча дьньһерʹьн.

«ҺЬНӘКИ ШУНДА ИДИ ДЬНЙАЙЕ МЬН НӘБИНӘ»

Әв гьли, Иса пешийа мьрьна хwә гот (Йуһʹәнна 14:19). Әwи жийина хwә ча кʹьрин да, «кö гәләка бькʹьрʹә» (Мәтта 20:28). Рʹожа сьсйа Хwәде әw «алийе рʹöһʹанида» wәгәрʹандә жийине у һишт кö әw һьнә шагьртед хwәва бе «әʹйанкьрьне» (1 Пәтрус 3:18; Кʹаред Шандийа 10:40). Чахе Иса шагьртед хwәва хöйа бу, рʹу у qальбе хwәда әw йәки чаwа бу? Әʹшкәрә йә кö әw һатьбу гöһастьне, чьмки һәла һе шагьртед wи жи, дәрберʹа әw нас нәкьрьн. Мәрйама Мәждәлани тʹьре, кö әw бахчәван ә, ле чахе дö шагьртед wи сәр рʹийа Әмwасе рʹасти Wи һатьн, wана тʹьре кö әw хәриб ә (Луqа 24:13-18; Йуһʹәнна 20:1, 14, 15).

Ча әм дькарьн иро Иса бьдьн бәр чʹәʹве хwә? 60 сал зедәтьр паши мьрьна Иса, Йöһʹәннайе шанди хәwн-хәйаледа Иса дит. Хәйаледа Йöһʹәнна нәдит кәсе кö сәр кʹенар дьмьрә. Әwи дит «Пʹадше пʹадша у хöдане хöдана», демәк Пʹадше Пʹадшатийа Хwәде, йе кö зутьрәке wе дьжмьнед Хwәде алт кә. Әw дьжмьн щьн ьн у мәрьв ьн. Әв Пʹадшати wе кʹәрәмед һәрһәйи инсанәтерʹа бинә (Әʹйанти 19:16; 21:3, 4).