«Итʹбарийа Хwә Йаһоwа Бинә у Qәнщийе Бькә»

1. Йаһоwа әм бь кʹижан фәрәсәта әʹфьрандьнә?

ЙАҺОWА мәрьв бь фәрәсәт у һʹöнöред баш әʹфьрандийә. Әwи һʹьш-аqьл дайә мә сәва кö әм бькарьбьн чәтьнайа сафи кьн у нета дайньн пешийа хwә (Мәтʹлк. 2:11). Әwи qәwат дайә мә, wәки әм бькарьбьн нетед хwә биньн сери (Фили. 2:13). Әwи öса жи исаф дайә мә, wәки әм бькарьбьн тедәрхьн чь рʹаст ә у чь жи на. Исаф öса жи али мә дькә хwә жь кьред нәрʹаст дур бьгьрьн у шашийед хwә рʹаст кьн (Рʹом. 2:15).

2. Йаһоwа дьхwазә кö әм фәрәсәтед хwә ча бьдьнә хәбате?

² Йаһоwа дьхwазә кö әм wан фәрәсәта рʹаст бьдьнә хәбате. Ле гәло чьрʹа? Чьмки әw мә һʹьз дькә у занә кö һәрге әм wан пʹешкʹеша, демәк wан фәрәсәта бьдьнә хәбате, әме бәхтәwар бьн. Мәсәлә, Ньвисаред Ибранида те готьне, кö «тʹьвдира мәрьве хирәт әʹсә кʹаре тинә» у «тьште кö бона ль сәр хәбат кьрьне тә дитийә һәр чь бә, бь һеза [qәwата] хwә ль сәр wе бьхәбьтә» (Мәтʹлк. 21:5; Wаиз 9:10). Ле Ньвисаред Йунанида ньвисар ә: «Һʹәта кö wәхт дәстед мәда йә, һʹәмуйарʹа qәнщийе бькьн» у «жь wә кʹе чь пʹешкʹеш стандийә, бь wе жи һәврʹа хьзмәткʹарийе бькьн» (Галт. 6:10; 1 Пәт. 4:10). Әʹйан ә, Йаһоwа дьхwазә wәки әм чьqас дькарьн һʹәму тьшти бькьн, wәки һьн хwәрʹа, һьн жи мәрьвед дьнрʹа кʹаре биньн.

3. Qәwата мәрьва нагьһиже кö чь бькьн?

³ Рʹаст ә Йаһоwа дьхwазә, wәки әм фәрәсәтед хwә бьдьнә хәбате, ле әw öса жи занә кö qәwата мә һаqас нагьһиже wәки бь тʹәмами wан фәрәсәта бьдьнә хәбате. Мәсәлә, әм нькарьн нә qьсуртийе, нә гöнә у нә жи мьрьне бьдьнә һьлдане. Әм öса жи нькарьн мәрьвед дьн контрол кьн, чьмки азайа бьжартьна һʹәму мәрьва һәйә (1 Пʹадш. 8:46). У фьрqи тʹöнә занәбуна мә чьqас һәйә йан әм чьqас щерʹьбанди нә, йәкә әм бәр Йаһоwа тʹьме чаwа зарʹ бьн (Иша. 55:9).

4. Ве тʹемайеда әме дәрһәqа чь шеwьр кьн?

⁴ Әм гәрәке тʹьме рʹе бьдьнә Йаһоwа wәки әw рʹебәрийе мә бькә, у итʹбарийа хwә wи биньн кö әwе али мә бькә. Öса жи чь кö әм нькарьн бькьн, әw wе бона мә бькә. Ле йәкә Йаһоwа дьхwазә, wәки әм хwәха жи бьфькьрьн дәрһәqа ве йәке, кö әм чь дькарьн бькьн, сәва чәтьнайа сафи кьн у али йед дьн бькьн. (Бьхунә Зәбур 37:3.) Әм гәрәке итʹбарийа хwә Йаһоwа биньн у qәнщийе бькьн, у öса жи амьнийа хwә хwәй кьн. Ле гәло чь щурʹәйи? Wәрен әм шеwьр кьн мәсәлед Нöһ, Даwьд у хьзмәткʹаред дьн, йед кö итʹбарийа хwә Йаһоwа дьанин. Әме ньһа бьвиньн, wәки һәбун тьшт кö wана нькарьбу бькьрана, ле öса жи һәбун тьшт кö дькарьбун бькьрана.

ЧАХЕ ДОР БӘРЕ МӘ МӘРЬВЕД ЗÖЛМ ЬН

5. Шьровәкьн дәрәща Нöһ.

⁵ Нöһ дьнйакә öсада дьма, кʹижан кö «хьрабийава» тʹьжи бу (Дәстп. 6:4, 9-13). Рʹаст ә әwи заньбу кö Йаһоwа wе әв дьнйа зöлм кʹöта кә, ле йәкә әw гәләк дьлтәнг дьбу жь бо зöлмийе кö дьqәwьми. Нöһ фәʹм дькьр wәки һәбун тьшт кö әw нькарә бькә, ле һәбун тьшт кö әwи дькарьбу бькьра.

6, 7. а) Нöһ чь нькарьбу бькьра? б) Чьда дәрәща мә мина дәрәща Нöһ йә?

⁶ Нöһ чь нькарьбу бькьра: Рʹаст ә Нöһ бь амьни дәрһәqа диwана Хwәде гьли дькьр, ле әwи нькарьбу зоре бькә, wәки әw мәрьвед зöлм кö дор бәре wи бун, гöһ бьдьнә ве әʹламәтийе. Әwи нә жи дькарьбу öса бькә wәки Селав зу бе. Нöһ гәрәке итʹбарийа хwе Йаһоwа бьанийа кö әw wе зöлмийе бьдә һьлдане. Öса жи Нöһ гәрәке баwәр кьра wәки Хwәде wе әwе йәке wәʹдеда бькә. (Дәстп. 6:17).

⁷ Әм жи дьжин дьнйакә зöлм у хьрабда, у Йаһоwа wе зутьрәке әве дьнйайе кʹöта кә (1 Йуһʹн. 2:17). У әм жи нькарьн зоре мәрьва бькьн, wәки «мьзгинийа Пʹадшатийе» qәбул кьн. Әм öса жи нькарьн дәстпебуна тәнгасийа мәзьн ләз хьн (Мәт. 24:14, 21). Мина Нöһ, мәрʹа жи баwәрийа qәwи лазьм ә, wәки итʹбарийа хwә Йаһоwа биньн, кö әwе һʹәму хьрабийе кʹöта кә (Зәб. 37:10, 11). Әм баwәр ьн wәки Йаһоwа wе нәһелә кö әw дьнйа рʹожәке зедә бькʹьшинә, чьмки әwи чьqас qьрар кьрийә wе һаqас жи бькʹьшинә (Һәбq. 2:3).

8. Нöһ ча дина хwә дабу сәр wан тьшта, чь кö qәwата wи дьгьһиште кö бькьра? (Бьньһерʹә шькле әʹwльн.)

⁸ Нöһ чь дькарьбу бькьра: Нöһ дәwса кö бәрхwә кʹәта сәва чь кö нькарьбу бькьра, әwи дина хwә дьда сәр wан тьшта, чь кö qәwата wи дьгьһиште. Нöһ «рʹасти даннасин дькьр», у бь амьни дәрһәqа диwана Хwәде әʹлам дькьр (2 Пәт. 2:5). Бешьк, әwе йәке али Нöһ дькьр, wәки баwәрийа хwә qәwи хwәй кә. Хенщи хьзмәткьрьне, әwи öса жи qәwата хwә да хәбате, wәки бь рʹебәрийа Йаһоwа гәмийе ава кә. (Бьхунә Ибрани 11:7.)

9. Әм ча дькарьн чʹәʹв бьдьнә мәсәла Нöһ?

⁹ Әм жи мина Нöһ дькарьн öса бькьн, wәки «шьхöле Хöданда пешда һәрʹьн» (1 Корн. 15:58). Мәсәлә, әм дькарьн аликʹарийе бьдьн бона авакьрьн у хwәйкьрьна Одед Щьвата у Одед Щьвата мәзьн. Öса жи бь рʹәзәдьли сәр щьвата мәзьн кʹомәке бьдьн, йан Бәйтʹәледа хьзмәт кьн, йан жи офисед wәлгәрʹандьнеда кö нә филиалада ньн. Ле йа лапә фәрз әw ә, wәки әм хирәт бьн бәлакьрьна мьзгинийеда, у әм заньн wәки öса әм баwәрийа хwә һьндава ахьрийе qәwи хwәй дькьн. Хушкәкә мә дьбежә кö чахе әw тʹәви мәрьва хәбәрдьдә дәрһәqа кʹәрәмед Пʹадшатийа Хwәде, әw дьвинә wәки баwәрийа wан һьндава ахьрийе qәт тʹöнә йә, у әwана дьфькьрьн кö чәтьнайед wан wе хьлаз нәбьн. Бәле, хьзмәткьрьн али мә дькә, wәки баwәрийа хwә сәр ахьрийе öнда нәкьн у бәрдәwам кьн ләщмәйданеда бьрʹәвьн wәки жийине бьстиньн (1 Корн. 9:24).

ЧАХЕ ӘМ ШАШИЙА ДЬКЬН

10. Гьли кьн кö Даwьд рʹасти чь дәрәща һат.

¹⁰ Йаһоwа гот кö әwи «мәрик дьле хwәрʹа дит», у әw мәрик Даwьд бу (Кʹар. Шанд. 13:22). Даwьд мәрьвәки амьн бу, ле һәла һе әwи жи щарәке гöне гьран кьр. Әwи тʹәви Бат-Шәбайе бенамуси кьр. Хьраб әw ә, wәки әwи дьхwәст гöне хwә вәшерә бь ве йәке, кö мере wе Урийа шәрʹда бе кöштьне. Дәрһәqа ве йәке Даwьд нәʹмәкеда фәрман да, у әw нәʹмәк бь дәсте Урийа шанд (2 Сам. 11:1-21). Ахьрийа-ахьрийе гöнед Даwьд әʹйан бун (Марq. 4:22). Ле гәло Даwьд һьнге ча хwә да кʹьфше?

11, 12. а) Паши wе йәке ча Даwьд гöнә кьр, әwи ида чь нькарьбу бькьра? б) Әм чьда дькарьн баwәр бьн чахе әм гöне хwә тиньн рʹуйе хwә?

¹¹ Даwьд чь нькарьбу бькьра: Даwьд чь кö кьрьбу, ида нькарьбу шашийа хwә рʹаст кьра. Әwи öса жи нькарьбу хwә хьлаз кьра жь бәред шашийед хwә. Жь бо шашийед хwә, Даwьд тʹәмамийа әʹмьре хwәда щәфа дькʹьшанд (2 Сам. 12:10-12, 14). Ләма Даwьдрʹа гәләк лазьм бу баwәри. Әwи гәрәке итʹбарийа хwә Йаһоwа бьанийа, wәки әw wе бьбахшинә wи, һәрге әw гöне хwә бинә рʹуйе хwә. Öса жи әwи гәрәке баwәр кьра кö Хwәде wе али wи бькә сәва әw тәйах кә бәр wан тәнгасийа, кö жь бо гöнед wи пешда һатьн.

¹² Әм гьшк гöнәкʹар ьн ләма жи гöна дькьн. Һьнә шашийед мә мәзьн ьн, һьнә жи бьчʹук ьн. Щара әм нькарьн шашийед хwә рʹаст кьн, у бона ве йәке кöл-дәрда дькʹьшиньн (Галт. 6:7). Ле әм итʹбарийа хwә созе Хwәде тиньн, кö һәрге әм бь дьл у щан гöне хwә биньн рʹуйе хwә, Йаһоwа wе wәʹде чәтьнайа али мә бькә. Әw һәла һе wан чәтьнайада жи wе али мә бькә, кʹижанада әм хwәха нәһәq ьн. (Бьхунә Ишайа 1:18, 19; Кʹаред Шандийа 3:19.)

13. Ча һәләqәтийа Даwьд тʹәви Йаһоwа диса qәwи бу?

¹³ Даwьд чь дькарьбу бькьра. Даwьд дьхwәст wәки Йаһоwа али wи бькә кö рʹöһʹанида qәнщ бә. Ле әwи ча әв йәк да кʹьфше? Йа пешьн, әwи ширәткьрьна Натʹан пʹехәмбәр qәбул кьр (2 Сам. 12:13). Даwьд гöнед хwә дьани рʹуйе хwә у Йаһоwарʹа дöа дькьр, wәки бьбахшинә wи. Әwи бь дьл у щан дьхwәст диса qәбулкьрьна Йаһоwа бьстинә (Зәб. 51:1-17). Даwьд дәwса кö дьлтәнг буйа жь бо гöнед хwә, дәрсәкә баш хwәрʹа һин бу. Әwи ида тʹö щар гöне öса гьран нәдькьр. Әw һʹәта мьрьне амьн ма, у әw бира Йаһоwада нә ча мәрьве амьн у дьлсах (Ибрн. 11:32-34).

14. Әм чь дькарьн һин бьн жь мәсәла Даwьд?

¹⁴ Әм чь дькарьн һин бьн жь мәсәла Даwьд? Һәрге әм гöнәки гьран бькьн, әм гәрәке жь Йаһоwа бахшандьне һиви кьн. Әм гәрәке бәр wи «гöнед хwә бьдьнә рʹуйе хwә» (1 Йуһʹн. 1:9). Öса жи әм гәрәке һәрʹьнә щәм рʹуспийа, сәва кö әwана рʹöһʹанида али мә бькьн. (Бьхунә Аqуб 5:14-16.) Чахе әм аликʹарийа Йаһоwа qәбул дькьн, бь ве йәке әм нишан дькьн wәки әм итʹбарийа хwә созе wи тиньн, кö әw wе мә qәнщ кә у бьбахшинә. Паши ве йәке әм гәрәке жь шашийед хwә дәрсе хwәрʹа һьлдьн, бәрдәwам кьн Йаһоwарʹа хьзмәт кьн, у бь баwәрийе һивийа ахьрийе бьн (Ибрн. 12:12, 13).

ДӘРӘЩЕД ДЬН

15. Әм чь һин дьбьн жь мәсәла Һаннайе?

¹⁵ Дьбәкә һун щара дьфькьрьн дәрһәqа хьзмәткʹаред бәре, йед кö тәнгасийада итʹбарийа хwә Йаһоwа дьанин, у öса жи алийе хwәда тьштәк дькьрьн, сәва чәтьнайед хwә сафи кьн. Мәсәлә, Һанна безöрʹәт бу, у нькарьбу әве дәрәща хwә бьгöһезә. Ле әwе баwәр дькьр, wәки Йаһоwа wе бәр дьле wеда бе, у әwе бәрдәwам дькьр пʹарьстгәһеда хьзмәт кә. Хенщи ве йәке, әwе дöада дьле хwә Хwәдерʹа вәдькьр (1 Сам. 1:9-11). Чьqас мәсәләкә баш ә сәва мә! Чахе сьһʹәт-qәwата мә нәбаш ә йан жи чәтьнайед дьн һәнә кö әм нькарьн бьгöһезьн, әм хәмед хwә давежьн сәр Йаһоwа, чьмки заньн wәки әw мә һʹьз дькә у али мә бькә (1 Пәт. 5:6, 7). Öса жи әм чьqас дькарьн һʹәму тьшти дькьн, wәки кʹаре бьстиньн жь щьвата у жь хwарьна рʹöһʹани, кö тʹәшкиләта Йаһоwа дьдә мә (Ибрн. 10:24, 25).

16. Де-бав чь дәрсе дькарьн һин бьн жь Самуйел кö әʹмьрда мәзьн бу?

¹⁶ Чь дькарьн бькьн әw де-бав, зарʹед кʹе жи жь рʹийа рʹаст дәркʹәтьнә? Мәсәлә, Самуйел нькарьбу зоре зарʹед хwәйи мәзьн бькә, wәки Хwәдерʹа амьн бьминьн (1 Сам. 8:1-3). Әwи әw чәтьнайи да дәсте Йаһоwа. Ле һәла wи чахи жи Самуйел амьнийа хwә хwәй дькьр, у дьле Баве хwәйи әʹзмана ша дькьр (Мәтʹлк. 27:11). Иро дәрәща һьнә де-бавед Мәсиһи жи мина йа Самуйел ә. У әwана жи баwәр дькьн, wәки Йаһоwа мина wи бави кö мәтʹәлока Исада нә, тʹьме һазьр ә qәбул кә wан гöнәкʹара кö гöнед хwә дьдьнә рʹуйе хwә (Луqа 15:20). Әw де-бав һʹәму тьшти дькьн сәва амьн бьминьн Йаһоwарʹа у баwәр дькьн, wәки зарʹ wе чʹәʹв бьдьнә wан у вәгәрʹьн щәм Хwәде.

17. Ча сәрһатийа жьнәбийа кʹәсиб мә дьлгәрм дькә?

¹⁷ Бьфькьрьн сәр сәрһатийа жьнәбикә бәләнгаз, кö wәʹде Исада дьжит. (Бьхунә Луqа 21:1-4.) Әwе заньбу кö пʹарьстгәһеда чьqас хьраби у нәрʹастийе дькьн, у әwе нькарьбу әw дәрәщә бьгöһаста (Мәт. 21:12, 13). Һьн жи әwе хwәха нькарьбу пʹәре зедә хwәрʹа qазанч кьра. Йәкә әwе бь рʹәзәдьли «дö пол» qöрбан кьр. Әwе «һʹәму тьште кö пе әʹбура хwә бькьра» qöрбан кьр. Әw кʹöлфәта амьн нишан кьр, wәки бь дьл итʹбарийа хwә Йаһоwа тинә. Әwе заньбу, wәки һәрге әw тьштед рʹöһʹани дайнә щийе пешьн, Йаһоwа wе бона һʹәwще wе хәм бькә. Әwе итʹбарийа хwә Йаһоwа дьани, ләма жи пьштгьрийа һʹәбандьна рʹаст дькьр. Әм жи итʹбарийа хwә Йаһоwа тиньн кö әw wе бона мә хәм бькә, һәрге әм шьхöле wи дайньн щийе пешьн (Мәт. 6:33).

18. Мәсәла бьра гьли кьн, кʹижан кö рʹаст дьньһерʹи сәр чәтьнайа.

¹⁸ Иро гәләк хушк-бьред мә жи бь шьхöлед хwә дьдьн кʹьфше, кö итʹбарийа хwә Йаһоwа тиньн. Wәрә бьньһерʹьн мәсәла бьраки мә бь наве Малкам, кʹижан кö сала 2015-да мьрийә. Әw һʹәта мьрьне Хwәдерʹа амьн ма. Нава гәләк салед хьзмәткьрьна wи у жьна wида, wана чәтьнайи жи дитьнә у шабун жи. Әwи гот: «Жийина мә щара дәрберʹа дькарә бе гöһастьне, öса бә кö әм ньзаньбьн сәр чь нә-бәр чь нә, у һәла һе гәләк чәтьн жи. Ле Йаһоwа wана кʹәрәм дькә йед кö хwә ль wи дьгьрьн». У әw бьра ширәт да: «Дöа бькьн wәки шьхöле Йаһоwада хирәт бьн у пешда һәрʹьн. Һʹьш-аqьле хwә бьдьнә сәр ве йәке чь кö һун дькарьн бькьн, нә кö чь нькарьн бькьн».a

19. а) Чьрʹа бона сала 2017, рʹеза сале лайиq һатийә бьжартьне? б) Һуне жийина хwәда ча бьдьнә хәбате рʹеза сала 2017?

¹⁹ Әw дьнйа «хьрабийеда» пешда дьчә, у әм гәрәке һазьр бьн wәки әме һе зедә рʹасти чәтьнайа бен (2 Тимтʹ. 3:1, 13). У әм ида ньһа гәрәке һин бьн кö нәкʹәвьн һʹәйра чәтьнайед хwә. Дәwсе әм гәрәке qайим итʹбарийа хwә Йаһоwа биньн у чь дәсте мә те бькьн. Бь рʹастийе жи рʹеза сала 2017, рʹезәкә гәләк баш ә: «Итʹбарийа хwә Йаһоwа бинә у qәнщийе бькә»! (Зәб. 37:3, ДТʹ).