Һьш-Аqьле Хwә Хwәй кьн!

Паwлосе шанди заньбу кö пропаганда Шәйтʹан гәләк хоф ә. Ле йазьх һьнә Мәсиһи дьфькьрин, кö әw нә һаqас хоф ә. Мәсәлә, ча те кʹьфше һьнә Мәсиһийед Корьнтʹи дьфькьрин, кö әwана рʹöһʹанида qәwи нә у Шәйтʹан wе тʹö щар wана нәхальфинә (1 Корн. 10:12). Ләма жи Паwлос әw ширәт да: «Әз дьтьрсьм, тöwәрә чаwа мәʹр бь фелбазийа хwә Һеwа хапанд, öса жи әw һʹьше wә бьчәлqинә у һун дәсте хwә жь ширһʹәлали у дьлсахийа хwәйә һьндава Мәсиһда бькьн» (2 Корн. 11:3).

Гьлийед Паwлос нишан дькьн кö гәләк фәрз ә әм зәʹф хwәда баwәр нибьн. Сәва кö Шәйтʹан wә нәхальфинә, һун гәрәке рʹьнд һаш пе һәбьн кö пропаганда wи чьqас хоф ә у зийанкʹар ә. Һьнге һуне бькарьбьн хwә хwәй кьн жь wе йәке.

ЧЬQАС ХОФ Ә ПРОПАГАНДА?

Пропаганда чь йә? Әw һәйә информасийа дәрәw, кʹижан кö мәрийа дьхальфинә у һʹöкöм дькә сәр фькьред wан у кьред wан. Ль гора кʹьтебәке, пропаганда әw һәйә «дәрәwи, qәлпи, хальфандьн, кʹижан кö һʹöкöм дькә сәр психоложийайе», йане сәр һʹьше мәрьва. Ве кʹьтебеда öса жи һатә готьне кö пропаганда «нәщайиз ә, зийандар ә, у бь нәһәqийе йә» («Propaganda and Pеrsuasion»).

Бәле, пропаганда гәләк хоф ә, чьмки әw дькарә һеди-һеди öса һʹöкöм кә сәр фькьред мә, кö әм qә һаш пе жи тʹöнә бьн. Әм дькарьн әwе йәке бәрамбәри газе кьн, чьмки газ жи найе кʹьфше у нә жи бина wе һәйә. Експертәки, наве кʹижани Ванс Пакерд ә, гот кö пропаганда дьзива һʹьше мә дькә бьн контрола хwә, кö «әм һаш жь хwә жи тʹöнә нә». Зандарәки жи гот кö гәләк мәрьв бьн һʹöкöме пропагандайеда, «кьред зийанкʹар кьрьнә». Мәсәлә, «генотсид, шәрʹ, нәфрʹәткьрьна мьләта, нәфрʹәткьрьна религийа, у гәләк кьред бехwәдети», бьн һʹöкöме пропагандайеда һатьн кьрьне («Еasily Lеd—A History of Propaganda»).

Һәрге мәрьв дькарьн пе пропаганда хwә мә бьхальфиньн, һәмьки Шәйтʹан һе зедә дькарә мә бьхальфинә. Шәйтʹан рʹабун-рʹуньштьн у психоложийа мәрьва жь дәстпека әʹфьрандьна wан леколин дькә. У иро «тʹәмамийа дьнйайе» бьн һʹöкöме wида йә. У ве дьнйайеда әw дькарә һәр тьшти бьдә хәбате сәва кö дәрәwед хwә бәла кә (1 Йуһʹн. 5:19; Йуһʹн. 8:44). Шәйтʹан öса бь һостәти фәʹме мәрьва корʹ дькә, кö «тʹәмамийа дьне» дьхальфинә (2 Корн. 4:4; Әʹйан. 12:9). Ле һун ча дькарьн мьqабьли пропаганда wи һәрʹьн?

БАWӘРИЙА ХWӘ QӘWИ КЬН

Иса гот кö ча әм дькарьн хwә хwәй кьн жь пропагандайе: «Рʹастийе нас кьн у рʹастийе wә аза кә» (Йуһʹн. 8:31, 32). Шәрʹда әскәр гәрәке информасийа рʹаст бьзаньбьн дәрһәqа дьжмьна, сәва дьжмьн wана нәхальфиньн. Мәрʹа жи лазьм ә информасийа рʹаст сәва хwә жь пропагандайе хwәй кьн. Ле кʹидәре йә информасийа рʹаст? Йаһоwа мәрʹа бь сайа Кʹьтеба Пироз информасийа рʹаст у ширәта дьдә, сәва кö нәкʹәвьнә бьн байе пропаганда Шәйтʹан (2 Тимтʹ. 3:16, 17).

Шәйтʹан һаш жь ве йәке һәйә. Ләма жи әw ве дьнйа бьн һʹöкöме хwәда дьдә хәбате, сәва рʹе мә бьгьрә, кö әм Кʹьтеба Пироз нәхуньн у леколин нәкьн. Хwә хwәй кьн кö нәкʹәвьнә ве тʹәлька wи! (Әфәс. 6:11) Бона ве йәке әм гәрәке бь тʹәмами «фәʹм бькьн» рʹастийе (Әфәс. 3:18). Әв йәк һеса нинә, ле лазьм ә әм qәwате хәрщ кьн сәва ве йәке. Авторәки бь наве Ноем Чампски гот: «Тʹö кәс wе рʹастийе нәкә һʹьше тә. Тö гәрәке хwәха рʹастийе бьгәрʹи». Ләма жи бь дьл у щан «һәр рʹож» Ньвисара леколин бькьн, у һуне рʹастийе бьвиньн (Кʹар. Шанд. 17:11).

Бир нәкьн кö Шәйтʹан нәхwазә һун рʹаст бьфькьрьн у фәсал бьн. Ле гәло чьрʹа? Чаwа ньвисарәкеда те готьне, пропаганда «һе зәʹф у зу һʹöкöм дькә» сәр wан мәрьва, «йед кö тьшта кʹур леколин накьн» у «нә жи дьщерʹьбиньн һәла рʹаст ә йан на» («Mеdia and Sociеty in thе Twеntiеth Cеntury»). Ләма жи тʹö щар чʹәʹвгьрти тьшта баwәр нәкьн, ле аqьле хwә бьдьнә хәбате (Мәтʹлк. 14:15). Хwәде һʹьш-аqьл у сәрwахти дайә мә, сәва әм рʹастийе дьле хwәда хwәй кьн у баwәрийа хwә qәwи кьн (Мәтʹлк. 2:10-15; Рʹом. 12:1, 2).

ЙӘКТИЙЕДА БЬМИНЬН

Шәрʹда гәләк щар пропагандайе дьдьнә хәбате, сәва тьрсе бькьнә дьле әскәра у wәки әwана нәхwазьн шәрʹ бькьн. Дьжмьн дькарьн нав әскәрада дәрәwа бәла кьн, сәва шәрʹ бькʹәвә ортʹа wан у жь әскәред хwә бьqәтьн у дур кʹәвьн. Генераләки Алмани дәрһәqа мәʹники гот, кö чьрʹа Алманийа Шәрʹе Һʹәмдьнйайе йа йәкеда да дәр. Әwи гот кö щьмәʹт «пе пропаганда дьжмьна гипноз бьбун, чаwа кʹеврушк бьн гипноза мәʹрда». Тʹәлькед Шәйтʹан жи öса ньн. Әw нахwазә wәки әм щьватеда йәктийеда бьн, у ләма һәр тьшти дькә сәва әм жь щьвате бьqәтьн. Бәʹса хәбәре, әw öса дькә, wәки һәвнәфәʹмкьрьн бькʹәвә ортʹа хушк-бьра. Йан жи һәрге щьватеда кәсәк хәйди йан фькьри кö һьндава wи нәһәqи һатә кьрьне, Шәйтʹан öса дькә, wәки әw тʹәшкиләта Хwәде бьһелә.

Тʹö щар нәкʹәвьнә ве тʹәлька wи! Пе рʹебәри у ширәтед Хәбәра Хwәде һәрʹьн. Мәсәлә, Кʹьтеба Пироз дьбежә wәки «ль һәв бьбахшиньн», у чәтьнайед ортʹа һәвдöда зу сафи кьн, демәк зу ль һәв бен (Колс. 3:13, 14; Мәт. 5:23, 24). Öса жи әw рʹастә-рʹаст дьбежә кö хwә дур нәхьн у башqә нәкьн жь щьвате (Мәтʹлк. 18:1). Хwә бьщерʹьбиньн һәла һун чьqас хwәйкьри нә жь пропаганда Шәйтʹан. Жь хwә бьпьрсьн: «Һәрге wан пашwәхтийада хушкәке йан бьраки мьн хәйдандийә, мьн ча хwә дайә кʹьфше? Мьн дьле Хwәде ша кьр йан дьле Шәйтʹан?» (Галт. 5:16-26; Әфәс. 2:2, 3)

ИТʹБАРИЙА ХWӘ ÖНДА НӘКЬН

Әскәре кö бь тʹәмами сәроке хwәрʹа амьн нинә, шәрʹда wе qәwи нибә. Ләма жи дьжмьн пропагандайе дьдьнә хәбате, сәва кö әскәр баwәри у итʹбарийа хwә һьндава сәроке хwә öнда кьн. Дьжмьн дькарьн бь wан гьлийа шьке бькьнә дьле әскәра: «Итʹбарийа хwә сәрокед хwә нәйньн!» йан жи «Әwана wе wә бькьнә qәзийе!» Хенщи ве йәке, әwана дькарьн шашийед сәрока бежьн сәва һе зедә шьке бькьнә дьле әскәра. Шәйтʹан һәма ве йәке жи дькә. Әw тʹьме дьхwазә шьке бькә дьле мә, сәва әм итʹбарийа хwә wан мәрьва нәйньн, йед кö тʹәшкиләта Йаһоwада рʹебәрийе дькьн.

Ле һун ча дькарьн хwә жь ве йәке хwәй кьн? Тʹьме хwә ль тʹәшкиләта Йаһоwа бьгьрьн. Бь амьни пьштгьрийа wан бькьн, йед кö рʹебәрийа щьмәʹта Хwәде дькьн, у дьбәкә щара шашийа дькьн (1 Тʹеслн. 5:12, 13). Һәрге рʹабәр йан кәсәки дьн пе гьлийед хwә дьхwазьн wә бьхальфиньн у шьке бькьнә дьле wә, «фькьре хwәда зу шаш нәбьн», һәрге жи чь кö әwана дьбежьн рʹасти те кʹьфше (2 Тʹеслн. 2:2; Тито 1:10). Ширәта Паwлос бьдьнә хәбате, кʹижан кö әwи Тимотʹейорʹа дайә. Демәк, нава рʹастийеда кö wә нас кьр бьминьн, у бира хwәда хwәй кьн һун чь пеһʹәсийан (2 Тимтʹ. 3:14, 15). Бьфькьрьн кö чьqас избаткьрьн һәнә кö әм дькарьн итʹбарийа хwә wан рʹебәра биньн, кö Йаһоwа ида бь сәда сала дьдә хәбате сәва әwана рʹебәрийе мә бькьн (Мәт. 24:45-47; Ибрн. 13:7, 17).

БЬРА ТЬРС НӘКʹӘВӘ ДЬЛЕ WӘ

Бир нәкьн wәки щара пропаганда Шәйтʹан әʹйан те кʹьфше. Щара әw тьрсе дькә дьле мәрьва, кʹижан кö «щурʹе пропаганда бәре йә» («Еasily Lеd—A History of Propaganda»). Професоре Британи Филип М. Тейлоре гот, wәки Асура пропаганда данә хәбате у пе тьрсе дьжмьнед хwә һьлдьданә бьн дәсте хwә. Шәйтʹан жи иро тьрсе дьдә хәбате. Мәсәлә, әw дьдә хәбате тьрса бәр мәрьва, тьрса бәр пәйкʹәтьна, тьрса бәр мьрьне, у тьрса бәр тьштед майин, сәва кö әм ида Йаһоwарʹа хьзмәт нәкьн (Иша. 8:12; Йерәм. 42:11; Ибрн. 2:15).

Нәһельн wәки Шәйтʹан тьрсе бькә дьле wә, кö һун сьст бьн у амьнийа хwә öнда кьн! Иса гот: «Жь wана нәтьрсьн, йед кö бәдәне дькöжьн, жь wе пештьр тьштәки дьн нькарьн бькьн» (Луqа 12:4). Бь тʹәмами итʹбарийа хwә созе Йаһоwа биньн кö әwе wә хwәй кә у «зорайийа qәwате» бьдә wә, сәва һун нәкʹәвьнә тʹәлька Шәйтʹан (2 Корн. 4:7-9; 1 Пәт. 3:14).

Ле щара дьбәкә һун хwә сьст тʹәхмин кьн йан жи бьтьрсьн. Ле бир нәкьн кö Йаһоwа wәрʹа жи гьлийе öса дьбежә, кʹижан кö Йешурʹа гот: «Мерхас у qәwи бә. Нәтьрсә у хоф нәкә, чьмки Йаһоwа Хwәдейе тә тʹәви тә йә кʹöда жи һәрʹи» (Йешу 1:9, ДТʹ). Һәрге һун бона тьштәки тʹәвһәв дьбьн у бәрхwә дькʹәвьн, дәрберʹа Йаһоwарʹа дöа бькьн у дьле хwә жерʹа вәкьн. У дöдьли нәбьн wәки «әʹдьлайийа Хwәде . . . wе дьл у фькьред wә» хwәй кә, сәва кö һун qәwи бьн у мьqабьли пропаганда Шәйтʹан бьсәкьньн (Фили. 4:6, 7, 13).

Те бира wә чахе wәкʹиле Асури бь наве Рабшак чь пропаганда бәла кьр нава щьмәʹта Хwәдеда? Әwи гот кö йанчь жь дәсте Асура тʹö кәс wе wана хьлаз нәкә, у һәла һе Йаһоwа Хwәде жи нькарә али wан кә». Әwи бь мерхаси зедә кьр кö йанчь Йаһоwа хwәха wанрʹа гот wәки qьрʹа ви әʹрди бинә. Ле гәло Йаһоwа сәр ве йәке чь щаба хwә да? Йаһоwа гот: «Жь бәр готьнед кö хöламед qьрале Асуре, бона кö хәбәран жь мьнрʹа бьдьн готьнед у мьн жи wан бьһистьнә, нәтьрсә!» (2 Пʹадш. 18:22-25; 19:6). Паше, Йаһоwа мьлйакʹәте хwә шанд, йе кö шәвәкеда qьра 185 000 Асура ани (2 Пʹадш. 19:35).

СӘРWАХТ БЬН У ТʹЬМЕ ГÖҺ БЬДЬНӘ ЙАҺОWА

Qә öса буйә кö һун филме дьньһерʹьн, у wедәре листькчи те хапандьне, ле һаш пе тʹöнә йә? Дьбәкә һун дьбежьн: «Баwәр нәкә! Әwана тә дьхапиньн». Бьдьнә бәр чʹәʹве хwә, кö мьлйакʹәт жи wәрʹа дьбежьн: «Фәсал бә! Нәкʹәвә бьн байе дәрәwе Шәйтʹан!»

Гöһе хwә нәдьнә пропаганда Шәйтʹан (Мәтʹлк. 26:24, 25). Гöһ бьдьнә Йаһоwа у һәр тьштида итʹбарийа хwә wи биньн (Мәтʹлк. 3:5-7). Әw бь һʹьзкьрьне әве ширәте дьдә wә: «Кöрʹе мьн, сәрwахт бә у дьле мьн ша кә, кö әз бькарьбьн щаба qардаред хwә бьдьм» (Мәтʹлк. 27:11). Һәрге һун öса бькьн, һуне һʹьш-аqьле хwә хwәй кьн у нәкʹәвьнә бьн байе дәрәwед Шәйтʹан!