Мина Йаһоwа Дьлшәwат бьн

1. Йаһоwа чь щурʹәйи хwә Мусарʹа әʹйан кьр у чьрʹа әw йәк фәрз ә бона мә?

ЩАРӘКЕ Хwәде Мусарʹа наве Хwәйи шәхси у һʹöнöред хwә әʹйан кьр. Йаһоwа дькарьбу пешийе бьгота кö әw чьqас qәwат ә йан жи ча билан ә, ле әwи пешийе дәрһәqа рʹәʹмти у дьлшәwатийа хwә гот. (Бьхунә Дәркʹәтьн 34:5-7.) Һьнге Муса дьхwәст баwәр буйа кö Хwәде wе али wи бькә. Ләма Йаһоwа пешийе бәʹса wан һʹöнöра кьр, у бь ве йәке да кʹьфше кö дьхwазә али хьзмәткʹаред хwә бькә (Дәркʹ. 33:13). Ле һун чахе дьфькьрьн сәр wан һʹöнöред Хwәде, һун чь тʹәхмин дькьн? Ве готареда әме дина хwә бьдьн сәр һʹöнöрәки Хwәде, әw һәйә дьлшәwати. Дьлшәwати те һʹәсабе чахе кәсәк кöл-дәрде мәрьве дьн дьвинә, дьле wи дьшәwьтә у дьхwазә али wи бькә.

2, 3. а) Чь дьдә кʹьфше кö нав мәрьвада дьлшәwати һәйә? б) Чьрʹа лазьм ә әм дина хwә бьдьне кö Кʹьтеба Пироз чь дьбежә дәрһәqа дьлшәwатийе?

² Йаһоwа дьлшәwат ә, ләма әw һʹöнöр бал мәрьва жи һәйә, чьмки бь сурәта wи һатьнә чекьрьне. Һәла һе мәрьвед кö Йаһоwа нас накьн, гәләк щара әwана жи дьлшәwатийе дьдьнә кʹьфше у бона йед дьн хәм дькьн (Дәстп. 1:27). Кʹьтеба Пирозда гәләк сәрһатийед мәрьвед дьлшәwат һәнә. Мәсәлә, биньн бира хwә дö жьнед qав кö бәр Сьлеман сәкьнибун у сәва зарʹе һәврʹа кʹәтьбунә дәʹwе. Жь wана йәк дийа зарʹе бу. Сьлеман фәрман да, wәки зарʹе бькьнә дö кәра, сәва кö тедәрхә һәла кʹижан ә дийа зарʹе. Дьле ве жьньке шәwьти, кʹижан кö рʹасти дийа зарʹе бу. Ләма әw qайил бу кö зарʹа wе бьдьнә жьнька дьн, тʹәне зарʹе нәкöжьн (1 Пʹадш. 3:23-27). Йан жи биньн бира хwә qиза Фьрәwьн, йа кö Муса хьлаз кьр чахе әw зарʹа вьрни бу. Рʹаст ә әwе фәʹм дькьр кö әw зарʹа Ибранийа бу у гәрәке wи сах нәһельн, ле «дьле wе сәр шәwьти» у әwе сафи кьр кö wи бькә зарʹа хwә (Дәркʹ. 2:5, 6).

³ Чьрʹа әм гәрәке бьфькьрьн дәрһәqа дьлшәwатийе? Чьмки Кʹьтеба Пироз дьбежә әм гәрәке чʹәʹв бьдьнә Йаһоwа (Әфәс. 5:1). Бәле, әм öса һатьнә чекьрьне кö әв һʹöнöр нав мәда һәйә, ле щара әм хwәһʹьзийе дьдьнә кʹьфше, чьмки әм гöнәкʹар ьн. Ләма жи мәрʹа щара нәһеса йә сафи кьн аликʹарийе бьдьнә мәрьва, йан бькʹәвьнә һʹәйра хwә. Ле чь дькарә али wә бькә кö һе зедә бона мәрьва хәм бькьн? Йа пешьн, wәʹдә хwәрʹа бьвиньн леколин бькьн кö Йаһоwа ча дьлшәwати нишан кьр у öса жи чаwа мәрьвед дьн нишан кьрьн. Йа дöда, бьфькьрьн кö һун ча дькарьн ве йәкеда чʹәʹв бьдьнә Хwәде у әw йәк wе чь кʹаре wәрʹа бинә.

ЙАҺОWА ДЬЛШӘWАТИЙЕДА МӘСӘЛА ЛАПӘ МӘЗЬН Ә

4. а) Чьрʹа Йаһоwа мьлйакʹәтед хwә шандә Содоме? б) Сәрһатийа малбәта Лут чь мә һин дькә?

⁴ Кʹьтеба Пирозда гәләк мәсәлә һәнә кö Йаһоwа ча дьлшәwати дайә кʹьфше. Мәсәлә, бьфькьрьн әwи сәва Лут чь кьр гава әw жь хьрабийа бьнәлийед Содом у Гоморе «ащьз бьбу». Әw мәрьв öса хьраб у бенамус бун, кö Хwәде сафи кьр qьрʹа wан бинә (2 Пәт. 2:7, 8). Хwәде мьлйакʹәтед хwә шанд сәва әʹмьре Лут хьлаз кә. Wана wи у малбәта wи ләз дьхьстьн, сәва жь wан шәһәред кö гәрәке кʹöта буна, зу дәрен. Кʹьтеба Пироз дьбежә: «Лут кö ньгед хwә пашда давит, wан [мьлйакʹәта] дәсте Лут, жьне, qизава гьртьн, бь рʹәʹма Хöданә кö ль wан кьр, әw жь бажер дәрхьстьнә дәр у һьштьн» (Дәстп. 19:16). Әв сәрһати әшкәрә дькә, кö Йаһоwа һʹаш жь чәтьнайед хьзмәткʹаред хwә һәйә у али wан дькә (Иша. 63:7-9; Аqуб 5:11; 2 Пәт. 2:9).

5. Хәбәра Хwәде ча мә һин дькә кö чаwа дьлшәwат бьн?

⁵ Йаһоwа хенщи кö хwәха дьлшәwатийе дьдә кʹьфше, әw öса жи щьмәʹта хwә һин дькә кö әwана жи дьлшәwат бьн. Wәрә дәрһәqа qанунәке шеwьр кьн кö Хwәде дабу Исраелийа. Ве qанунеда дьһатә готьне кö һәрге мәрьв тьштәки дәйни бьдә кәсәки, әw дькарә кʹьнща дәйндаре хwә һьлдә чаwа бьһе, демәк ча избаткьрьн, кö дәйне хwә пашда бьстинә. (Бьхунә Дәркʹәтьн 22:26, 27.) Мәрьве берʹәʹм дьбәкә нә жи бьхwәста кʹьнща wи кәси пашда вәгәрʹинә у дәйндар wе бе кʹьнщ у бе сьтʹар рʹаза. Ле Йаһоwа щьмәʹта хwә һин кьр кö дьлсар нибьн. Йаһоwа дьхwәст щьмәʹта wи дьлшәwат бә. Ле гәло принсипа ве qануне мә чь һин дькә? Әм гәрәке тʹö щар пьшт гöһе хwәва нәвежьн чахе дьвиньн хушк йан бьрак чәтьнайеда нә. У һәрге әм дькарьн али wи бькьн, әм гәрәке дәсте хwә дьрежи wи кьн у дәрде wи сьвьк кьн (Колс. 3:12; Аqуб 2:15, 16; бьхунә 1 Йуһʹәнна 3:17.)

6. Әм чь һин дьбьн жь дьлшәwатийа Йаһоwа һьндава Исраелийа?

⁶ Йаһоwа һәла һе һьнге жи гöне хwә щьмәʹта Исраели дьани, чахе әwана гöнә дькьрьн. Кʹьтеба Пироз дьбежә: «Йаһоwа Хwәдейе кал-баве wан бь сайа qасьдед хwә пешда диса у диса әʹлами wан дькьр, чьмки һʹәйфа хwә щьмәʹта хwә у щиwаре хwә дьани» (2 Дир. 36:15, ДТʹ). Әм жи гәрәке һьндава wан мәрьвед кö һе Йаһоwа нас накьн, дьлшәwат бьн, чьмки дьбәкә әwана жи бенә сәр рʹийа рʹаст у бьбьнә достед wи. Йаһоwа нахwазә кö wәʹде диwана wи кö wе бе, кәсәк бьмьрә (2 Пәт. 3:9). Ләма жи һʹәта Хwәде qьрʹа хьраба нәанийә, wәрә бәрдәwам кьн әʹламәтийа wи бәла кьн, чьмки әw жь рʹәʹма дьле хwә дьхwазә мәрьв пебьһʹәсьн.

7, 8. Чьрʹа малбәтәке баwәр кьр, кö Йаһоwа һьндава wанда дьлшәwати да кʹьфше?

⁷ Иро гәләк хьзмәткʹаред Хwәде дитьнә кö Хwәде чьqас дьлшәwати да кʹьфше һьндава wанда. Дина хwә бьдьне кö чь qәwьми тʹәви малбәтәке. Ве малбәтеда гәдәки 12 сали бу, кʹижани әме нав кьн Милан. Дь салед 1990-да, шәрʹе мьләтийе бу ортʹа мәрьвед бь чʹәрме сьпи у рʹәш. Милан тʹәви де-баве хwә у бьре хwәйи бьчʹук, у öса жи гәләк хушк-бьред дьн, жь Боснйайе һʹәта Сербйайе пе отобусе дьчунә щьвата мәзьн. Сәр wе щьвате де-баве Милан гәрәке бьһатана ньхöмандьне. Чахе әwана бәр синоре wәлат бун, әскәра әв малбәт жь отобусе дәрхьстьн, чьмки әwана жь мьләтәки дьн бун. Ле хушк-бьред дьнрʹа изьн дан кö рʹийа хwә бәрдәwам кьн. Дö рʹожа әw малбәт гьрти бу у паше офисер дәрһәqа wан жь сәроке хwә пьрси кö чь бькә. Әв малбәт һәма wедәре бу у wана гьшка бьһист щаба wи сәроки кö гот: «Wана бьвә гöлә кә!».

⁸ Һʹәта офисера һәврʹа хәбәр дьдан, дö меред нәнас незики ве малбәте бун. Wана бь дәнге ньмьз wанрʹа гот кö әwана жи Шәʹдед Йаһоwа нә у кö бьред отобуседа wанрʹа гьли кьрьнә кö тʹәви ве малбәте чь qәwьмийә. Әв дö бьра готьнә Милан у бьре wи, кö бькʹәвьнә авта wан сәва синор дәрбаз бьн, чьмки документед зарʹа нәдьньһерʹин. Ле де-баврʹа готьн кö һʹәрьн алийе дьни синор у ль wедәре wе рʹасти һәв бен. Милан öса тьрсийа кö ньзаньбу бьгьри йан бькʹәнә. Ле де-бав готьнә wи: «Тә тʹьре әw әскәр wе мә бәрʹдьн?» Чахе әwана дьчун, һәма бәр әскәрарʹа дәрбаз бун, ле әскәра те бежи әwана нәдитьн. Де-бав у зарʹ алийе дьни синор рʹасти һәв һатьн. Әwана гьһиштьнә щьвата мәзьн у баwәр бун кö Йаһоwа щаба дöа-дьрозге wан да у али wан кьр. Жь Кʹьтеба Пироз әм заньн кö Йаһоwа нә һәртʹьм wи щурʹәйи хьзмәткʹаред хwә хwәй кьрийә (Кʹар. Шанд. 7:58-60). Йәкә Милан дьбежә кö ве дәме әwи чь тʹәхмин дькьр. Әwи гот: «Те бежи мьлйакʹәт чʹәʹве ван әскәра кор кьрьн у Йаһоwа мә хьлаз кьр» (Зәб. 97:10).

9. Иса ча дьньһерʹи сәр һʹале щьмәʹте? (Бьньһерʹә шькле әʹwльн.)

⁹ Иса жи дьлшәwатийеда мәсәләкә гәләк баш мәрʹа һишт. Дьле Иса дьшәwьти сәр әʹлаләте кö рʹасти wи һат, чьмки «әwана мина пәзе бе шьван, бәрʹәдайи у бәлабуйи бун». Ле әwи бона wан чь кьр? Әwи «дәстпекьр гәләк тьшт әw һин кьрьн». (Мәт. 9:36; бьхунә Марqос 6:34.) Ле Ферьси мина Иса нибун, әwана һьндава мәрьва дьлсар бун, у тʹалаша wан жи нибу кö али wан бькьн (Мәт. 12:9-14; 23:4; Йуһʹн. 7:49). Ле һун дьхwазьн мина Иса али wан мәрьва бькьн, йед кö рʹöһʹанида бьрчи нә?

10, 11. Гәло рʹаст ә тʹьме дьлшәwатийе бьдьнә кʹьфше? Шьровәкьн.

¹⁰ Ле әв найе һʹәсабе, wәки әм һәр дәрәщада гәрәке дьлшәwат бьн. Чаwа мә жь сәрһатийед Кʹьтеба Пироз дит, Хwәде занә чьчах нәлазьм ә дьлшәwатийе бьдә кʹьфше. Мәсәлә, Шаwул Пʹадша гöне хwә Агаг ани, демәк дьжмьне щьмәʹта Хwәде, у öса жи һʹәйфа хwә һʹәйwанед баш ани. Йанчь дьле wи сәр wан шәwьти, ле бь рʹасти әwи тʹәмийа Хwәде нәани сери. Ләма ахьрийеда Йаһоwа пʹадшати жь Шаwул станд (1 Сам. 15:3, 9, 15). Йаһоwа Һʹакьме һәq ә. Әw дькарә дьле мәрьва бьхунә, у әw занә кʹәнге нәрʹаст ә дьлшәwатийе бьдә кʹьфше (Лур. Йерәм. 2:17; Һәзqл. 5:11). Зутьрәке Йаһоwа wе диwана wан мәрьва бькә, йед кö нахwазьн гöрʹа wи бькьн (2 Тʹеслн. 1:6-10). Һьнге дьле Хwәде wе нәшәwьтә сәр мәрьвед хьраб у зöлм. Әw wе wана кʹöта кә, чьмки гöне хwә мәрьвед рʹаст бинә, кʹижана wе хьлаз кә.

¹¹ Бәле, изьна мә тʹöнә мәрьва сущдар кьн кö әwана һежайи жийине нә йан на. Дәwсе, әм гәрәке һәр тьшти бькьн сәва ньһа али wан бькьн. Ле чаwа әм дькарьн һьндава wанда дьлшәwат бьн? Wәрә чәнд ширәта шеwьр кьн кö ча әwе йәке бькьн.

ЧАWА ДЬЛШӘWАТИЙЕ БЬДЬНӘ КʹЬФШЕ

12. Чаwа һун дькарьн дьлшәwатийе бьдьнә кʹьфше һьндава мәрьва?

¹² Аликʹарийе бьдьн жийина һәррʹожида. Һәрге әм дьхwазьн чʹәʹв бьдьнә Иса, әм гәрәке һьндава хушк-бьред хwә у мәрьвед дьнда дьлшәwат бьн (Йуһʹн. 13:34, 35; 1 Пәт. 3:8). Хәбәра дьлшәwати öса жи те һʹәсабе «тʹәвайи дәрд бькʹьшиньн». Мәрьве дьлшәwат дьхwазә еша мәрьвед дьн сьвьк кә, бь ве йәке кö wәʹде чәтьнайа аликʹарийе бьде. Ләма жи тʹьме бьфькьрьн кö һун чьда дькарьн аликʹарийе бьдьнә мәрьва. Бәʹса хәбәре, дәwса wан һәрʹьн дькʹане йан жи щики кö wанрʹа лазьм ә, йан жи малда шьхöләки бькьн (Мәт. 7:12).

13. Щьмәʹта Хwәде wәʹде хәзәба ча хwә дьдә кʹьфше?

¹³ Аликʹарийе бьдьн wәʹде хәзәбед тʹәбийәте. Чахе әм дьвиньн кö мәрьв жь бо хәзәба зийане дьстиньн, дьле мә дьшәwьтә. Щьмәʹта Йаһоwа әʹйан ә бь ве йәке кö wәʹде öсада тʹьме дьчьнә һәwара wан, йед кö зийан стандьнә (1 Пәт. 2:17). Хушкәкә мә Жапони ль wи щийи дьжит, кʹидәре кö сала 2011-да әʹрдһәж у тсунами qәwьми. Әви щийи зийанәкә мәзьн станд. Әw хушк дьбежә кö әw «гәләк qәwи бу у дьлгәрм бу», чахе дьдит ча хушк-бьра жь Жапонйайе у wәлатед дор бәр, бь рʹәзәдьли аликʹари дьдан кö мал у Одед Щьвата тʹәзә кьн. Әwе ньвиси: «Әве qәwьмандьне әз дамә фәʹмкьрьне кö Йаһоwа мә һʹьз дькә, у хушк-бьра чьqас бона һәвдö хәм дькьн. Гәләк хушк-бьра нав тʹәмамийа дьнйайе бона мә дöа дькьн».

14. Ча һун дькарьн аликʹарийе бьдьнә нәхwәша у кал-пира?

¹⁴ Аликʹарийе бьдьнә нәхwәша у йед әʹмьрда мәзьн. Чахе әм дьвиньн кö мәрьв чьqас дьчәрчьрьн жь бо нәхwәшийа йан жи жь бо кал-пирбуне, гöне мә wана те у әм дьхwазьн али wан бькьн. Бәле, әм гәләк һивийа wи wәʹдәйи нә, чахе нәхwәши у кал-пирбун ида тʹöнә бьн, у әм дöа дькьн wәки Пʹадшатийа Хwәде бе. Ле һʹәта әw wәʹдә бе, әм дьхwазьн чьqас дәсте мә те аликʹарийе бьдьнә wан, йед кö һʹәwщә нә. Дина хwә бьдьн qәwьмандьнәке кö авторәк ньвисийә. Дийа wийә әʹмьрда мәзьн, бь нәхwәшийа Алтсгеймере нәхwәш бу. Щарәке, әwе перʹа нәгиһандьбу һәрʹә дәставе у кʹьнщед хwә кьрьбу qьреж. Чахе әwе дьхwәст хwә тʹәмьз кә, зәнгьле дәри хьстьн. Әw Шәʹдед Йаһоwа бун, йед кö тʹьме дьһатьнә щәм ве жьньке. Хушка жь wе пьрсин һәла тьштәкида аликʹари жерʹа лазьм ә. Жьньке wанрʹа гот: «Мьнрʹа шәрм ә бежьм, ле әре». Әван дö хушка али wе кьрьн кö хwә тʹәмьз кә. Паше, wана жерʹа чай чекьрьн у тʹәви wе хәбәр дьдан. Кöрʹе жьньке гәләк рʹази бу. Әwи ньвиси: «Әʹфәрьм wан Шәʹдед Йаһоwарʹа. Әwана чь һин дькьн, хут öса жи дьжин». Ле дьлшәwати wә һелан дькә кö чьqас дькарьн аликʹарийе бьдьнә кал-пира у нәхwәша? (Фили. 2:3, 4).

15. Хьзмәтийеда әм ча аликʹарийе дьдьнә мәрьва?

¹⁵ Аликʹарийе бьдьнә мәрьва алийе рʹöһʹанида. Чахе әм кöл-дәрдед мәрьва дьвиньн, әм һелан дьбьн кö рʹöһʹанида али wан бькьн. Аликʹарийа лапә мәзьн бона wан wе әw бә, һәрге әм wанрʹа дәрһәqа Хwәде у кʹәрәмед Пʹадшатийа wи гьли кьн. Хенщи ве йәке аликʹарик жи әw ә, чахе wана һин дькьн кö чьqас аqьлайи йә пе принсипед Хwәде бьжин (Иша. 48:17, 18). Бәле, чахе әм хьзмәт дькьн, әм Йаһоwа һöрмәт дькьн у дьлшәwатийе һьндава мәрьва нишан дькьн. Ле һун дькарьн һе зедә хирәт бьн хьзмәтийеда? (1 Тимтʹ. 2:3, 4).

ДЬЛШӘWАТИ WӘРʹА ЖИ КʹАРЕ ТИНӘ!

16. Дьлшәwати чаwа мәрьварʹа кʹаре тинә?

¹⁶ Експертед психоложийе дьбежьн, кö чахе мәрьв дьлшәwатийе дьдә кʹьфше, сьһʹәт-qәwата wи һе баш дьбә у һәләqәтийа wи тʹәви мәрьва һе баш ә. Бәле, чахе һун бәр дьле мәрьвада тен, һун һе бәхтәwар дьбьн, шабуна wә зедә дьбә, тʹәнебуне тʹәхмин накьн у һе кем фькьред нәбаш тенә һʹьше wә. Бәле, дьлшәwати wе кʹаре wәрʹа бинә (Әфәс. 4:31, 32). Мәсиһийед кö бона һалхwәшийа мәрьвед дьн хәм дькьн у аликʹарийе дьдьн, баwәр ьн кö әwана ль гора принсипед Хwәде әве йәке дькьн у исафа wан жи тʹәмьз ә. Һәрге әм дьлшәwат ьн, әме бьбьн де-баве баш, мер йан жьна баш, у һәвале баш. Хенщи ве йәке, чахе мәрьв дьлшәwат ә, гава жерʹа аликʹари лазьм ә, йед дьн жи али wи дькьн. (Бьхунә Мәтта 5:7; Луqа 6:38.)

17. Чьрʹа һун гәрәке дьлшәwат бьн?

¹⁷ Бәле, дьлшәwати мәрʹа кʹаре тинә, ле әw гәрәке мәʹнийа сәрәкә нибә wәки дьлшәwат бьн. Мәʹни кö чьрʹа әм гәрәке дьлшәwат бьн, әw ә кö чʹәʹв бьдьнә Йаһоwа Хwәде у wи һöрмәт кьн, йе кö Канийа һʹьзкьрьне у дьлшәwатийе йә (Мәтʹлк. 14:31). Әw бона мә мәсәла лапә баш ә. Ләма жи wәрә әм һәр тьшти бькьн сәва дьлшәwатийеда чʹәʹв бьдьнә wи, хушк-бьра һʹьз бькьн, у һьндава мәрьва һʹәйф бьн (Галт. 6:10; 1 Йуһʹн. 4:16).