Wә Заньбу?

Чьрʹа Иса бона сондхwарьне Щьһу сущдар кьрьн?

ЛЬ ГОРА Qануна Муса, һәбун дәрәщә чахе сондхwарьн лайиq бу. Ле wәʹде Исада, Щьһу һини сонда бьбун у дькарьн бежьн кö wана һәр гьлийед хwә пе сондхwарьне избат дькьрьн. Wана йанчь дьхwәст wәки гьлийед wан баwәр кьн, ле Иса дö щара әв кьре wан сущдар кьр. Иса гот: «Бьра готьна wә бьбә ‹бәле-бәле›, йан жи ‹на-на›» (Мәт. 5:33-37; 23:16-22).

Фәрһәнгәк шьровәдькә wәки жь Талмуде әшкәрә те кʹьфше кö Щьһу һини сондхwарьне бьбун. Wана сәр һʹәму готьнед хwә сонд дьхwарьн сәва рʹастийа хwә избат кьн. Талмудеда һур бь һур те готьне кö кʹижан сонд гәләк фәрз бун, у кʹижан на (Thеological Dictionary of thе Nеw Tеstamеnt).

Ле Иса тʹәне нибу кö Щьһу сущдар дькьрьн бона ви хәйсәте нәбаш. Мәсәлә, тʹәрихзан Усьве Флавиус дәрһәqа сектәкә Щьһуйа ньвиси, кö wана сонд нәдьхwарьн, чьмки һʹәсаб дькьрьн кö сондхwарьн жь дәрәwийе хьрабтьр ә. Wана дьгот кö һәрге кәсәк сонд дьхwә тʹәне сәва кö гьлийед wи баwәр кьн, әw мәрьвәки дәрәwин дәрте. Кʹьтебәкә Щьһуда кö те навкьрьне «Биланийа Сирах», дьбежә: «Мәрьве кö тʹьме сонд дьхwә, мәрьвәки беqанун ә». Иса wан мәрьва кö бона тьштед бьчʹук сонд дьхwарьн, сущдар кьр. Һәрге әм һʹәлал ьн у тʹьме рʹастийе дьбежьн, мәрʹа wе нәлазьм бә сонд бьхwьн сәва гьлийед мә баwәр кьн.