Гәло Сьтʹара Wә Йаһоwа йә?
«Хöдан нәфса хöламед хwә хьлаз дькә у диwана әwед кö хwә данә бьн сийа Wи набә» (ЗӘБ. 34:22).
1. Жь бо гöнә, хьзмәткʹаред Хwәде щара ча хwә тʹәхмин дькьн?
«ӘЗ Чь мәрьвәки һесир-бәләнгаз ьм!» (Рʹом. 7:24). Гәләк хьзмәткʹаред Хwәде öса хwә тʹәхмин дькьн чаwа Паwлос гот. Гәло чьрʹа? Чьмки әм гьшк гöнәкʹар ьн у шашийа дькьн. У чахе әм щара пе кьред хwә дьле Йаһоwа дешиньн, әм дьлтәнг дьбьн. Һьнә Мәсиһи йед кö гöне гьран кьрьнә, һәла һе жи дьфькьрьн кö Йаһоwа wе тʹö щар wана нәбахшинә.
2. а) Зәбур 34:22 ча дьдә кʹьфше wәки хьзмәткʹаред Хwәде гәрәке хwә гәләк нәчәрчьриньн сәва гöнед хwә? б) Ве готареда әме дәрһәqа чь шеwьр кьн? (Бьньһерʹә чаргошә бь наве «Дәрс йан Шьровәкьрьна Симболик?»)
2 Кʹьтеба Пироз мәрʹа дьбежә wәки әwед кö бал Йаһоwа сьтʹаре дьгәрʹьн, гәрәке сәва гöнед хwә һәр гав хwә нәһәq нәкьн у нәчәрчьриньн. (Бьхунә Зәбур 34:22.) Ле чь те һʹәсабе хwә бькьн бьн сийа Хwәде, демәк бьн сьтʹара wи? Әм гәрәке чь гава бавежьн сәва кö рʹәʹм у бахшандьна Йаһоwа бьстиньн? Щаба wан пьрса әме пебьһʹәсьн чахе шеwьр кьн дәрһәqа шәһәред сьтʹарбуне кö бәре Исраеледа һәбун. Дәрһәqа башqәкьрьна wан шәһәра, һатә готьне пәймана Qанунеда, кʹижан кö сала 33 Д.М., Рʹожа Пенщийе Һʹәсабе жь qәwате дәркʹәт. Ле биньн бира хwә кö әв Qанун жь Йаһоwа бу. Ләма жи жь wан шәһәред сьтʹарбуне, әм дькарьн пебьһʹәсьн кö Йаһоwа ча дьньһерʹә сәр гöнә, сәр wан кʹе гöнә кьрьнә, у сәр тʹобәкьрьне. Пешийе, wәрә әм пебьһʹәсьн кö әв шәһәр бона чь бун.
«БАЖАРЕД . . . СЬТʹАРГӘҺ, ХWӘРʹА ҺЬЛБЬЖЕРЬН»
3. Исраелийа гәрәке чь бькьрана һьндава меркöжа?
3 Йаһоwа сьвьк наньһерʹә сәр хунрʹетьне. Wәʹде бәре, һәрге Исраели кәсәк бькöшта, мәрьве йе мьри гәрәке wи бькöшта. Әw гәрәке мер буйа, у сәр wи дьготьн «йе кö һʹәйфа хуне» һьлдьдә (Жьмар 35:19). Öса меркöж һәqе хwә дьстанд, чьмки әʹмьре мәрьве бесущ сьтандьбу. Һәрге әw меркöж нәһата щәзакьрьне, Әʹрде Создайи һʹәрам дьбу, демәк ида пироз нибу, чьмки Йаһоwа тʹәми да Исраелийа: «Әʹрде кö һун ль сәр дьжин, нәһʹәрʹьминьн, чьмки хун [хунрʹетьна мәрьва] әʹрде дьһʹәрʹьминә» (Жьмар 35:33, 34).
4. Чахе кәсәки бе һʹәмде хwә мәрьвәк бькöшта, әв qәwьмандьн ча сафи дьбу?
4 Ле чь дьqәwьми тʹәви wи мәрьви, йе кö бе һʹәмде хwә хуна кәсәки бьрʹета? Рʹаст ә әwи нәдьхwәст мьрьна wи мәрьви, ле әw диса жи нәһәq бу кö хуна мәрьве бесущ һатә рʹетьне (Дәстп. 9:5). Ве дәрәщеда, әwе кö бе һʹәмде хwә кöшт, дькарьбу бьрʹәвийа бажарәки сьтʹарбуне, сәва кö хwә жь дәсте wи хьлаз кьра, йе кö гәрәке һʹәйфа хуне һьлда. Wедәре әw хwәйкьри бу. Әw гәрәке wи шәһәре сьтʹарбунеда бьма, һʹәта мьрьна сәрәккʹаһин (Жьмар 35:15, 28).
5. Чаwа бажаред сьтʹарбуне дькарьн али мә бькьн wәки һе рʹьнд Йаһоwа фәʹм кьн?
5 Әв бажаред сьтʹарбуне мәрьва хwәха жь бәр хwә дәрнәхьстьнә. Әв Йаһоwа тʹәми да Йешу: «Исраелрʹа бежә кö бьра бажаред жь wанрʹа бьбьн сьтʹаргәһ, хwәрʹа һьлбьжерьн». Әw бажар һатьнә пирозкьрьне, демәк башqәкьрьне (Йешу 20:1, 2, 7, 8). Бәле, Йаһоwа хwәха рʹебәри кьр, wәки әв шәһәр башqә бьн бона нетәкә мәхсус. Дьбәкә ньһа бал мә әw пьрс пешда те: «Гәло жь ве тʹәмийе, ча зәлал рʹәʹма Йаһоwа те кʹьфше? У ча әм дькарьн иро бьн сьтʹара wида бьн?»
«ӘW ГӘРӘКЕ . . . РʹУСПИЙАРʹА ГЬЛИ КӘ КÖ ЧЬ QӘWЬМИ»
6, 7. а) Рʹуспийа чь дькьрьн һьндава мәрьве кö бе һʹәмде хwә кәсәк кöштьбу? (Бьньһерʹә шькле әʹwльн.) б) Чьрʹа бь билани бу һәрге әw меркöж незики рʹуспийа буйа?
6 Һәрге Исраелики бе һʹәмде хwә кәсәк бькöшта, әw гәрәке бьрʹәвийа шәһәре сьтʹарбуне, у бәр дәргәһ «рʹуспийарʹа» гьли кьра кö «чь qәwьми». Рʹуспийа гәрәке wи бь дьл у щан qәбул кьрана (Йешу 20:4, ДТʹ). Һьнә wәʹдә шунда, wана wи дьшандьнә бал рʹуспийед wи шәһәри, кʹидәре кö кöштьн qәwьмибу, сәва әwана диwане бькьн кö ча у чьрʹа кöштьн qәwьми. (Бьхунә Жьмар 35:24, 25.) Һәрге әван рʹуспийа әʹлам кьрана кö әwи бь рʹастийе нәхwәстьбу у бе һʹәмде хwә кöштьбу, әw дькарьбу диса вәгәрʹийа шәһәре сьтʹарбуне.
7 Ле чьрʹа лазьм бу кö рʹуспи бькʹәвьнә нав wи шьхöли? Чьмки әwана гәрәке щьвата Исраел хwәй кьрана, у öса жи али wи бькьрана йе кö бе һʹәмде хwә кöштьбу, сәва әwи рʹәʹма Йаһоwа бьстанда. Зандарәки Кʹьтеба Пироз ньвиси кö һәрге йе рʹәви нәчуйа бал рʹуспийа, «әwи хwә дькьрә хәтайе». Әwи гот: «Хуна wи сәр стуйе wи дьма, чьмки әwи нәхwәст хwәйкьрьна Хwәде бьстинә». Wирʹа лазьм бу аликʹарийе бьгәрʹә у qәбул кә. Һәрге әwи щи-сьтʹар нәдьгәрʹийа wан шәһәрада йед кö Йаһоwа башqә кьрьбу, изьна мәрьве незик йе мьри һәбу кö һʹәйфе һьлдә у wи бькöжә.
8, 9. Һәрге Мәсиһи гöне гьран кьрийә, чьрʹа гәрәке һәрʹә бал рʹуспийа?
8 Иро, һәрге Мәсиһи гöне гьран кьрийә, әw гәрәке һәрʹә бал рʹуспийа, сәва кö әwана wи рʹöһʹанида qәнщ кьн. Гәло чьрʹа әw йәк фәрз ә? Йа пешьн, хwәха Йаһоwа щабдари да рʹуспийа, wәки гöнед гьран сафи кьн, у Хәбәра wи әwе йәке зәлал дьдә кʹьфше (Аqуб 5:14-16). Йа дöда, рʹуспи али wи кәси дькьн кö диса qәбулкьрьна Хwәде бьстинә у ида гöнә нәкә (Галт. 6:1; Ибрн. 12:11). Йа сьсийа, рʹуспи щабдар ьн у һинкьри нә, кö дьлбинийе бьдьнә wан йед кö тʹобә дькьн, wәки әwана хwә нәчәрчьриньн сәва гöне хwә у еша wан сьвьк бә. Йаһоwа wан рʹуспийа нав дькә ча щи-сьтʹара кö «жь байе . . . вәдьшерә» (Иша. 32:1, 2). Бәле, әw тʹәми кö Йаһоwа дайә, дьдә кʹьфше wәки әw ча рʹәʹм ә һьндава мә.
9 Гәләк хьзмәткʹаред Хwәде дьлрʹьһʹәт бунә чахе незики рʹуспийа бунә у аликʹари жь wана хwәстьнә. Мәсәлә, бьраки мә бь наве Даниел, гöне гьран кьр, у чәнд мәһа әwи шәрм дькьр кö незики рʹуспийа бә. Әw гьли дькә: «Һаqас wәʹдә дәрбаз бу кö әз дьфькьрим wәки ида рʹуспи нькарьн али мьн бькьн. Ле тʹьме тьрса мьн һәбу кö кьред мьн әшкәрә бьн у әзе ахьрийа кьред хwә бьстиньм. Гава мьн Йаһоwарʹа дöа кьр, мьн жь wи бахшандьн һиви дькьр бона кьред хwә». Ахьрийеда, Даниел чу бал рʹуспийа. Әw тинә бира хwә у дьбежә: «Бәле, әз гәләк дьтьрсийам незики wан бьм. Ле чахе мьн тʹәви wан хәбәр да, те бежи барәки гьран сәр мьн һатә һьлдане. Ньһа әз ида аза дькарьм тʹәви Йаһоwа хәбәр дьм». Иро исафа Даниел тʹәмьз ә, у wан пашwәхтийа әw ча бәрдәстийе щьвате һатә кʹьфшкьрьне.
«БЬРʹӘВӘ ЖЬ ВАН БАЖАРА ЙӘКИ»
10. Әwе кö бе һʹәмде хwә кәсәк кöшт, ча дькарьбу бахшандьн бьстанда?
10 Мәрьве кö бе һʹәмде хwә кәсәк кöштьбу, сәва кö бахшандьн бьстанда, гәрәке бьрʹәвийа шәһәре сьтʹаргәһе. (Бьхунә Йешу 20:4.) Сәва әʹмьре хwә хьлаз кьра, әw гәрәке зу бьрʹәвийа wи шәһәри у wедәре бьма. Әw йәк бона wи һеса нибу, чьмки әwи гәрәке гәлә тьшт жь хwә кем кьра. Бәʹса хәбәре, әwи гәрәке хәбата хwә у мал-һале хwә бьһишта. Әw öса жи һʹәта мьрьна сәрәккʹаһин wе нькарьбуйа кʹöда бьхwазә һәрʹәa (Жьмар 35:25). Ле чь жи әwи жь хwә кем дькьр, һежа бу. Ле һәрге әw жь wи шәһәри бьчуйа, бь ве йәке әwи нишан дькьр кö тʹалаша wи нибу кö хуна кәсәки һатә рʹетьне, у һьн жи әwи әʹмьре хwә дькьрә бьн qәзийе.
11. Мәсиһийе кö гöне хwә тинә рʹуйе хwә, ча нишан дькә wәки рʹәʹма Хwәде qимәт дькә?
11 Иро жи әwе кö гöне хwә тинә рʹуйе хwә, гәрәке тьштәки бькә сәва рʹәʹма Хwәде бьстинә. Әw гәрәке бьһелә рʹийа нәрʹаст, у жь һәр тьшти хwә дур бьгьрә чь кö дькарә wи бәрбь гöнед гьран бьвә. Паwлосе шанди гьли кьр кö Мәсиһийед Корьнтʹи ча пе кьред хwә, гöнед хwә анинә рʹуйе хwә. Әwи ньвиси: «Дина хwә бьдьнә wе бәрхwәкʹәтьна ль гора хwәстьна Хwәде кö чьqас кʹар да wә: Wә чаwа щәʹданд бь рʹуспити щаба хwә да! Чь һерс, чь хоф, чь һʹьзрәт, чь хирәт, чь щәзадайина бона нәһәqийе!» (2 Корн. 7:10, 11). Чахе әм һәр тьшти дькьн сәва ида гöнә нәкьн, әм нишан дькьн wәки әм хwәрʹази ниньн, ле пʹошман дьбьн, у әм рʹәʹма Хwәде һьндава хwә qимәт дькьн.
12. Сәва кö Мәсиһи бәрдәwам кә рʹәʹма Хwәде бьстинә, әw гәрәке чь бьтʹәрькинә?
12 Ле Мәсиһи чь гәрәке бьтʹәрькинә, сәва кö Йаһоwа бәрдәwам кә рʹәʹма хwә жерʹа нишан кә? Әw гәрәке wан тьшта жи бьтʹәрькинә кʹижана әw бәгәм дькә, ле дькарьн wи бәрбь гöнә бьвьн (Мәт. 18:8, 9). Мәсәлә, һәрге һәвал тә һелан дькә ве йәке бьки чь кö Йаһоwа хwәш найе, гәло тöйе диса бәрдәwам ки тʹәви wи һәвалтийе бьки? Йан жи һәрге тö хwә дьгьри wәки ичʹке гәләк вәнәхwи, тö дькари хwә дур бьгьри жь wан дәрәща, кʹидәреда wе тәрʹа чәтьн бә хwә бьгьри? Һәрге тәрʹа чәтьн ә хwәстьнед сексуали контрол ки, тöйе хwә дур бьгьри жь филм, малпәр, у тьштед дьн кʹижан кö фькьред нәтʹәмьз пешда тиньн? Бир нәкьн кö һежа йә әм тьштәки жь хwә кем кьн сәва амьнийа хwә һьндава Йаһоwа хwәй кьн. Һәрге Йаһоwа мә бьһелә, жь ве хьрабтьр тьштәк тʹöнә. Ле чахе әм тʹәхмин дькьн «һʹьзкьрьна wийә амьн», жь ве четьр тьштәк тʹöнә (Иша. 54:7, 8, ДТʹ).
«ӘW БОНА WӘ WЕ БЬБЬН ЩИ-СЬТʹАР»
13. Шьровәкьн кö чьрʹа йе рʹәви шәһәре сьтʹарбунеда дькарьбу бетьрс, хwәйкьри у бәхтәwар бьжита.
13 Гава кö йе рʹәви дькʹәтә бажаре сьтʹарбуне, wедәре әw хwәйкьри бу. Дәрһәqа ван бажара Йаһоwа гот: «Әw бона wә wе бьбьн щи-сьтʹар» (Йешу 20:2, 3, ДТʹ). Йаһоwа дәʹwа нәдькьр wәки әwе кö бе һʹәмде хwә кöштьбу, диса бона ве йәке бе диwанкьрьне. У әw мәрьве кö дькарьбу һʹәйфе һьлдә, изьна wи тʹöнә бу бькʹәта бажаре сьтʹарбуне. Демәк, әв мәрьв тʹö щар wе нәтьрсийа кö кәсәке wи щәза бькә. Wи шәһәрида әw бьн хwәйкьрьна Йаһоwада бу. Әw кәледа нибу. Ви шәһәрида әw дькарьбу бьхәбьтийа, али мәрьва бькьра, у әʹдьлайеда Йаһоwарʹа хьзмәт кьра. Бәле, әwи дькарьбу бь әʹмьре бәхтәwар бьжита!
Дöдьли нәбьн кö Йаһоwа дьбахшинә (Бьньһерʹә абзаса 14-16)
14. Мәсиһи кö гöне хwә тинә рʹуйе хwә чьда дькарә баwәр бә?
14 Һьнә Мәсиһи кö гöнед гьран кьрьнә, ле паше тʹобә кьрьнә, йәкә диса хwә дьчәрчьриньн сәва гöнед хwә. Һьнәк һәла һе жи дьфькьрьн кö Йаһоwа wе тʹö щар бир нәкә гöнед wан. Һәрге тö öса хwә тʹәхмин дьки, дöдьли нәбә кö чахе Йаһоwа тә дьбахшинә, дьле тә гәрәке рʹьһʹәт бә, чьмки Йаһоwа бь тʹәмами дьбахшинә. Даниел, бәʹса кʹижани мә жоре кьр, баwәр кьр кö әв йәк öса нә. Рʹуспийа wи ширәт кьрьн у али wи кьрьн, wәки әw исафа хwә тʹәмьз кә. Даниел гьли кьр: «Те бежи әз тʹәзәда сах бум. Чахе һәр тьшт сафи бу ча лазьм бу, ида мьн хwә нәһәq нәдькьр. Гава гöнә те бахшандьне, әw ида дәрбаз дьбә дьчә. Чаwа Йаһоwа гот, әw баре мә һьлдьдә у давежә дур. Һуне тʹö щар ида ве нәвиньн». Чахе йе рʹәви дькʹәтә бажаре сьтʹарбуне, әw ида гәрә нәтьрсийа, wәки йе кö һʹәйфа хуне гәрәке һьлда, wе wи бькöжә. Öса жи әм дькарьн бежьн дәрһәqа хwә, гава Йаһоwа гöне мә дьбахшинә, әм ида гәрәке нәтьрсьн кö әw wе мәʹнийа бьгәрʹә сәва диса әви гöнәйи бькә бира мә йан жи мә щәза кә. (Бьхунә Зәбур 103:8-12.)
15, 16. Qöрбана Иса у щабдарийа wи ча Сәрәккʹаһин, ча дькарә баwәрийа wә һьндава рʹәʹма Хwәде qәwи кә?
15 Иро дьһа зәʹф мәʹнийед мә һәнә кö рʹәʹма Йаһоwада дöдьли нәбьн. Чахе Паwлос гот кö әw хwә чьqас һесир-бәләнгаз тʹәхмин дькә, паше гот: «Шькьр жь Хwәдерʹа, бь сайа Хöдане мә Иса Мәсиһ!» (Рʹом. 7:25). Рʹаст ә әwи шәрʹ дькьр мьqабьли гöнә у пʹошман дьбу бона кьред хwәйи бәре, ле йәкә әw баwәр бу кö Хwәде бь сайа Иса wи бахшандийә. Иса бона мә әʹмьре хwә да ча кʹьрʹин, у әw исафа тʹәмьз у дьлрʹьһʹәтийе дьдә мә (Ибрн. 9:13, 14). Чаwа Сәрәккʹаһин, «әw һәр гав дькарә wан хьлаз кә, йед кö бь дәсте wи незики Хwәде дьбьн, чьмки әw тʹьме сах ә, кö бона wан лава-навчетийе бькә» (Ибрн. 7:24, 25). Wәʹде бәре сәрәккʹаһин али Исраелийа дькьр кö баwәр кьн, wәки Йаһоwа гöнед wан дьбахшиньнә. Илаһи әм гәрәке ве йәкеда qә дöдьли нәбьн, чьмки Иса йә сәрәккʹаһине мә. Әw дьбежә кö «рʹәʹме бьстиньн у кʹәрәме бьбиньн кö гава әм һʹәwщә бьн, аликʹарийа мә бькә» (Ибрн. 4:15, 16).
16 Хwә бькә бьн сьтʹара Йаһоwа у баwәрийа хwә qöрбана Иса бинә. Бәле, qöрбана Иса бона тʹәмамийа инсанәте йә, ле баwәр кә кö хут шәхси бона тә йә жи (Галт. 2:20, 21). Дöдьли нәбә кö qöрбана Иса әw һәйә һʹиме бахшандьна гöнед тә. Qайим баwәр кә кö әв qöрбан тәрʹа мәщале дьдә кö жийина һʹәта-һʹәтайе бьстини. Qöрбана Иса жь Йаһоwа пʹешкʹеш ә хут бона тә жи.
17. Чьрʹа һун дьхwазьн бьн сьтʹара Йаһоwада бьн?
17 Бәле, шәһәред сьтʹарбуне зәлал әʹйан дькьн рʹәʹма Йаһоwа. Бь тʹәмийа дәрһәqа ван шәһәра, Йаһоwа нә кö тʹәне нишан кьр кö әʹмьр qимәт дькә, ле öса жи нишан кьр чаwа рʹуспи али мә дькьн, чь те һʹәсабе бь рʹастийе гöнед хwә тʹобә бькьн, у чьрʹа әм гәрәке дöдьли нәбьн wәки Йаһоwа бь тʹәмами мә дьбахшинә. Ле һун хwә дькьнә бьн сьтʹара Йаһоwа? Һун тʹәне ве сьтʹареда дькарьн хwәйкьри бьн! (Зәб. 91:1, 2). Готара дьнда әме бьвиньн чаwа әв шәһәред сьтʹарбуне дәрсе дьдьнә мә, wәки чʹәʹв бьдьнә һәqийа у рʹәʹма Йаһоwа.
a Ль гора һьнә кʹьтебед Щьһуйа, нәфәред wи кәси жи дькарьбун тʹәви wи шәһәре сьтʹарбунеда бьжитана.