Пʹехәмбәрти Йед кö Һатьнә Сери

Ча әм пеһʹәсийан, Кроузес алийе оракулда һатьбу хальфандьне, жь бо чь жи ахьрийе пʹадше Фарьсийайе әw зәфт кьр. Кʹьтеба Пирозда жи һәйә пʹехәмбәрти дәрһәqа пʹадше Фарьсе, кʹижан кö һур бь һур һатә сәри.

Wәкә 200 сал пешда, пешйа буйина пʹадше Фарьсе, пʹехәмбәре Ибрани бь наве Ишайа, әʹйан кьр кö наве wи пʹадшайи wе Кореш бә у шьровәкьр, кö чаwа әw wе шәһәре qәwи, Бабилоне зәфт кә.

Ишайа 44:24, 27, 28, ДТʹ: «Йаһоwа öса дьбежә: ‹Кʹурайа аверʹа дьбежьм: Бьбә һöлм-гöлм, әзе һʹәму чʹәмед тә зьһа кьм; әз әw ьм йе кö бона Корәш дьбежә: Әw шьване мьн ә у әwе һʹәму qьрарʹед мьн бинә щиһ; у öса жи готьна мьнә бона Оршәлиме: ‹Әw wе тʹәзәда бе авакьрьне!› У дәрһәqа пʹарьстгәһе: «Һʹиме тә wе бе авитьн»›».

Ль гора тʹәрихзане Йунани бь наве Һәродот, әскәред Корәш рʹийа ава чʹәме Фәрат гöһастьн, кʹижан кö дора шәһәре Бабилонерʹа дькʹьшийа. Метода Корәш аликʹари да әскәра, кö бькарьбьн чʹәмрʹа дәрбаз бьн у бькʹәвнә шәһәр. Паши зәфткьрьна шәһәр, Корәш Щьһуйед кö дилед Бабилоне бун, аза кьр. Әwи öса жи изьн да щьмәʹте, wәки вәгәрʹьн wәлате хwә у Оршәлиме тʹәзәда ава кьн, кʹижан кö нава 70 салада wеранкьри бу.

Ишайа 45:1: «Хöдан жь Корәше кö бона ль бәр мьн сәре нәтәwан хwар бькә у пьштед qьралан сьст бькә у бона кö дәри нәйед гьртьн, ль бәр wи, бона вәкьрьна qанатед дәрийе, бь дәсте wива гьрти йә, жь мәсьһе хwә рә wöса дьбежә».

Фарьси дәргәһед мәзьнрʹа кʹәтьн шәһәр, кʹижан кö wана бир кьр у вәкьри һишт. Һәрге Бабилонйа дәрһәqа тʹьвдира Корәш бьзаньбуна, әwана wе һʹәму дәргәһед шәһәр дадана. Ле шәһәр нәһатә парьстьне.

Әв пʹехәмбәртийа мәхсус йәк жь wан гәләк пʹехәмбәртийед жь Кʹьтеба Пироз ә, йед кö рʹастә-рʹаст һатьнә сери.a Канийа пешдаготьнед мәрийа, хöданед qәлп ьн, ле канийа пʹехәмбәртийед жь Кʹьтеба Пироз, Әw ә йе кö гот: «Әз сәре-серида дьбежьм ве йәке, чь кö ве хьлазийеда бьбә, у жь бәреда ве йәке, чь кö һе нәбуйә» (Ишайа 46:10, ДТʹ).

Тʹәне Хwәдайе рʹаст, наве киʹжани кö Йаһоwа йә, дькарә тьштәки öса бежә. Наве Wи те һʹәсабе: «Әw пек тинә». Әw йәк әʹйан дькә кö Хwәде занә у дькарә qәwьмандьнед ахьрийе ль гора qьрара хwә рʹебәри бькә. Әв йәк мә дьдә баwәркьрьне, wәки Әwе әʹсәйи һʹәму созед хwә бинә сери.

ПʹЕХӘМБӘРТИЙЕД КÖ ИРО ТЕНӘ СЕРИ

Wәрʹа һʹәwас ә пебьһʹәсьн, һәла Кʹьтеба Пироз дәрһәqа рʹожед мә чь пʹехәмбәрти кьрийә? Wәкә 2 000 сал пешда Кʹьтеба Пироз пʹехәмбәрти кьрийә, wәки «рʹожед ахьрийеда» «зәманед хьраб wе бен». Ле ахьрийа чь? Һәмьки нә кö ахьрийа әʹрде у инсанәте, ле ахьрийа шәрʹ-дәʹва, пәйкʹәтьна, у чәтьнайа кʹижана кö нава 1 000 салада мәрьв зәфти хwә кьрьнә. Wәрен әм шәwьр кьн тʹәне һьнә пʹехәмбәртийа кʹижан кö «рʹожед ахьрийе» әʹйан дькьн.

2 Тимотʹейо 3:1-5: «Рʹожед ахьрийеда . . . мәрьве бьбьнә хwәһʹьз, пʹәрәһʹьз, кʹöбар, бабах, кʹьфьр, нә гöрʹа де-бавада, бешекьр, һʹәрам, дьлсар, берʹәʹм, бöхданбеж, тәмсьст, зöлмкʹар, нәйаред qәнщийе, нәмам, щöләʹт, хwәрʹази, рʹьһʹәтиһʹьз, нә кö Хwәдеһʹьз. Пʹьшке хwәденасийе wе ль wан кʹәвә, ле wе qәwата wе инкʹар кьн».

Рʹожа иройин, хәйсәтед öса нава мәрийада һун дьвиньн? Дьбәк wә öса жи дитийә кö дәр-доре мә мәрьвед хwәһʹьз у бабах ьн. Öса жи хәйисәте мәрьва гьран буйә, у әwана һәврʹа qайил набьн. Хенщи wе йәке зарʹ гöрʹа де бавада ниньн у һәчʹи зәʹф мәрьв бунә рʹьһʹәтиһʹьз, нә кö Хwәдеһʹьз. Һьм жи һәр рʹож һʹале мә дьһа хьраб дьбә.

Мәтта 24:6, 7: «Һуне дәнге шәрʹа у бәʹса шәрʹа бьбьһен, . . . Мьләте рʹабә ль сәр мьләт, пʹадшати ль сәр пʹадшатийе, щи-щийа wе хәлайи-щәлайе у әʹрдһʹәже бьбьн».

Ль гора һʹәсаба, дәстпебуйи жь сала 1914 жь бо шәрʹа 100 милион мәрьва жийина хwә öнда кьрьнә. Әw һʹәсаб һе зедә йә, нә кö бьнәлийед гәләк мьләта. Бьдьнә һʹәсабе хwә пе чьqас һесьр, еш у чәрчьрандьне, әw һʹәсаб пешда һатийә. Ле йазьх, мәрьва жь шашийед хwә дәрс һьлнәдан у шәрʹ нәданә һьлдане?

Мәтта 24:7: «Wе хәлайи-щәлайе . . . бьбьн».

Тʹәшкиләта кö аликʹарийе дьдә мәрьвед кʹәсиб алийе хwарьнеда, дьбежә: «Әʹрд епʹещә хwарьн бона һʹәмуйа дьдә, ле диса жи 815 милйон мәрьв демәк йәк жь нәһә мәрьва, һәр рʹож бьрчи рʹадьзе. Ле йәк жь сьсийа жи, дьчәрчьр ә жь бо тʹернәхwарьне». У ль гора һʹәсаба, һәр сал wәкә се милйон зарʹ жь бьрчибуне дьмьрьн.

Луqа 21:11: «Щи-щийа әʹрдһʹәжед мәзьнe, . . . бьбьн».

Һәр сал wәкә 50 000 әʹрдһʹәжед мәзьн дьбьн. Жь бо 100 әʹрдһʹәжа, хани зийане дьстиньн, у һәр сал әʹрдһʹәжәкә мәзьн дьqәwьмә. Ль гора һʹәсабәке, жь сала 1975-2000, жь бо әʹрдһʹәжа 471 000 мәрьв мьрьнә.

Мәтта 24:14: «Әв Мьзгинийа Пʹадшатийе wе ль нав тʹәмамийа дьнйайе бе даннасинкьрьне, кö һʹәму мьләтарʹа бьбә шәʹдәти у һьнге хьлази wе бе».

Шәʹдед Йаһоwа һʹәйшт милиона зедәтьр ьн. Әwана мьзгинийа Пʹадшатийа Хwәде, wәкә 240 wәлатада бәла дькьн. Әwана әве мьзгинийе бәла дькьн һʹәму щурʹә шәһәрада, гöндада, мешәда у сәр чʹийа. Ль гора пʹехәмбәртийе, чахе әw шьхöл тʹәмам бә, һьнге чаwа кö һатийә пʹехәмбәртикьрьне, «хьлази wе бе». Әw чь те һʹәсабе? Әw те һʹәсабе, wәки кʹöтасийа сәрwертийа мәрьва незик ә у кö Пʹадшатийа Хwәде wе сәрwертийе бькә. Гәло бьн сәрwертийа Пʹадшатийа Хwәде кʹижан созед Wи wе бенә сери? Жь кʹәрәма хwә готара дьн бьхунә.