«Әw йе Wәстийайирʹа Qәwате Дьдә»

1. Иро әм рʹасти чь чәтьнайа тен, у чьрʹа Йаһоwа хьзмәткʹаред хwәйи амьнрʹа ша дьбә? (Бьньһерʹә шькле әʹwльн.)

ӘʹЩЕБМАЙИ нинә wәки әʹмьр ве дьнйайеда бь чәтьнайа тʹьжә йә. Гәләк жь wә хушк-бьред дәлално, рʹасти нәхwәшийед гьран тен. Һьнәк жи рʹаст ә салийед хwәда мәзьн ьн, ле йәкә мьqати мәрьвед хwәйи незик дьбьн кö кал-пир ьн. Йед дьн жи хәм дькьн кö чаwа нәфәред хwә хwәй кьн. У әм заньн кö гәләк жь мә нә кö тʹәне рʹасти чәтьнайики тен, ле щарәкива рʹасти чәнд чәтьнайа тен. Әв йәк гәләк wәʹдә у qәwат дьстинә, һьн жи алийе пʹәрада баргьран дькә. Ле wан чәтьнайада һун дöдьли ниньн, wәки Йаһоwа wе али wә бькә. Һун заньн кö һʹале wә wе алийе башда бе гöһастьне, чьмки Хwәде соз дайә. Әw баwәрийа wәйә qәwи рʹасти жи дьле Йаһоwа ша дькә.

2. Ишайа 40:29 ча мә дьлгәрм дькә, ле кʹижан шашийа мәзьн әм дькарьн бәрʹдьн?

² Бал wә qәwьмийә öса кö һун ида нькарьн тәйах кьн бәр чәтьнайед хwә? Һәрге öса нә, һун тʹәне һʹаләки öсада ниньн. Кʹьтеба Пироз дьдә кʹьфше кö хьзмәткʹаред бәре жи щара öса хwә тʹәхмин дькьрьн, кö qәwата wан тʹöнә чәтьнайа сәбьр кьн (1 Пʹадш. 19:4; Иб. 7:7). Ле wана тʹö щар бина хwә тәнг нәдькьр, чьмки wана итʹбарийа хwә qәwата Йаһоwа дьани. Әwана дьлтәнг нәбун, чьмки Хwәде «йе wәстийайирʹа qәwате дьдә» (Иша. 40:29, ДТʹ). Ле йазьх, иро һьнә хьзмәткʹаред Хwәде фькьринә кö дьһа баш ә хьзмәтийа хwә бьдьнә сәкьнандьне, сәва чәтьнайед хwә сафи кьн. Wана тʹьре кö хьзмәти Йаһоwарʹа баргьрани йә, нә кö кʹәрәм ә. Ләма жи әwана ида Хәбәра Хwәде нәдьхwәндьн, нәдьчунә щьвате, у хьзмәт нәдькьрьн. Шәйтʹан һәма ве йәке жи дьхwәст бона wан.

3. а) Чаwа әм дькарьн qәwи бьминьн у нәкʹәвьнә бәр байе Шәйтʹан? б) Ве готареда әме дәрһәqа чь шеwьр кьн?

³ Шәйтʹан рʹьнд занә кö чахе әм хьзмәтийа Йаһоwада хирәт ьн, әм qәwате дьстиньн. Ле әw тʹö щар нахwазә әм qәwи бьн. Ләма жи чахе һун сьһʹәт-qәwатеда йан жи емосийалида һʹал дькʹәвьн, тʹö щар хwә жь Йаһоwа дур нәхьн. Дәwсе, һе незики wи бьн, у Хwәде wе wә «бьшьдинә, qәwат кә» (1 Пәт. 5:10; Аqуб 4:8). Ве готареда, әме шеwьр кьн дö дәрәща, жь бо кʹижана әм дькарьн хьзмәтийеда сьст бьн. Һьн жи әме шеwьр кьн чаwа принсипед Кʹьтеба Пироз дькарьн али мә бькьн кö qәwи бьминьн. Ле пешийе wәрә әм шеwьр кьн рʹезед жь Ишайа 40:26-31, кʹижан кö дьдьнә кʹьфше wәки qәwата Йаһоwа һәйә мә qәwи кә.

ЙЕД КÖ БАWӘРИЙА ХWӘ ЙАҺОWА ТИНЬН, WЕ QӘWАТЕ БЬСТИНЬН

4. Жь Ишайа 40:26 әм чь һин дьбьн?

⁴ Бьхунә Ишайа 40:26. Тʹö кәс нькарә һʹәсаб кә кö гәрдунеда чьqас стәйрк һәнә. Зандар баwәр дькьн кö тʹәне галактика мәда дькарә 400 милиард стәйрка зедәтьр һәбьн. Бьдьнә бәр чʹәʹве хwә, Йаһоwа һәр стәйркәкерʹа нав у щи дайә. Ле әw йәк чь мә һин дькә? Бьфькьрьн, һәрге Йаһоwа бона wан әʹфьрина хәм дькә, илаһи әw чьqас бона тә хәм дькә у дьфькьрә. Әw занә wәки тö жерʹа хьзмәт дьки нә кö беһʹәмде хwә, ле чьмки тö wи һʹьз дьки! (Зәб. 19:1, 3, 14). Баве мәйи дәлал дәрһәqа тә һәр тьшти занә. Кʹьтеба Пироз дьбежә: «Һәр тʹеләки пʹорʹед сәре wә жьмарти нә» (Мәт. 10:30). Öса жи Кʹьтеба Пирозда те готьне: «Хöдан хәме һʹале беләкʹа дькʹьшинә» (Зәб. 37:18). Бәле, Йаһоwа һәр чәтьнайед тә дьвинә, у әw дькарә qәwатәкә öса бьдә тә, wәки һʹәму чәтьнайа тәйах ки.

5. Чьрʹа әм дькарьн баwәр бьн кö Йаһоwа дькарә qәwате бьдә мә?

⁵ Бьхунә Ишайа 40:28. Йаһоwа канийа һʹәму qәwате йә. Мәсәлә, дина хwә бьдьне, Хwәде енержийа чьqас мәзьн дьдә тәʹве. Зандарәк бь наве Девид Боданис гот: «Тәʹв һәр сәни һаqас енержийа дәрдьхә, кö wәкә бь милиарда бомбед атоме йә». Леколинкʹарәк жи һʹәсаб кьр, wәки енержийа кö тәʹв һәр сәни дәрдьхә, бәси ве йәке йә кö wәкә 200 000 сала нав тʹәмамийа дьнйайеда әw енержийа дькарә тʹера мәрьва бькә! Бәле, әм гәрәке qә дöдьли нәбьн, wәки Хwәде кʹижан кö тәʹверʹа енержийа дьдә, дькарә wәʹде тәнгасийа qәwате бьдә мә wәки әм сәбьр кьн.

6. Чь те һʹәсабе нире Иса сьвьк ә, у занәбуна ве йәке ча сәр мә һʹöкöм дькә?

⁶ Бьхунә Ишайа 40:29. Хьзмәти Йаһоwарʹа дьле мә бь шабуне тʹьжә дькә. Иса готә шагьртед хwә: «Нире мьн һьлдьнә сәр хwә». Паше әwи зедә кьр: «Һуне хwәрʹа рʹьһʹәтийе бьбиньн. Чьмки нире мьн рʹьһʹәт ә у баре мьн сьвьк ә» (Мәт. 11:28-30). Әв йәк рʹасти жи öса нә! Щара әм wәстийайи дьчьнә щьвата, йан жи хьзмәтийе. Ле гава әм вәдьгәрʹьн мал, гәло әм ча хwә тʹәхмин дькьн? Бәле, әм вәдьгәрʹьн бь qәwата тʹәзә у һе qәwи дьбьн кö чәтьнайа тәйах кьн. Нире Иса рʹасти жи сьвьк ә!

7. Гьли кьн qәwьмандьнәк кö дьдә кʹьфше wәки рʹезед жь Мәтта 11:28-30 рʹаст ьн.

⁷ Хушкәкә мә бь wәстийайибуна кʹроники, депресийе у бь сәреша мигрен нәхwәш ә. Фәʹмдари йә кö щара жерʹа чәтьн ә бе сәр щьвате. Ле щарәки чахе жерʹа гәләк чәтьн бу wәки һәрә щьвате, йәкә әw чу. Әwе ньвиси: «Готар дәрһәqа дьлтәнгийе бу. Әw готар öса бь дьлшәwати у бь һʹьзкьрьне һатьбу хwәндьне, кö әз гьрийам. Һьнге мьн диса кьрә бира хwә кö чь жи һәбә, йәкә әз гәрәке тʹьме щьватеда бьм». Бь рʹастийе жи жерʹа нәһесабу бе сәр щьвате, ле әw хушк әшq у ша бу гава һатә щьвате!

8, 9. Паwлос чь дьхwәст бьгота чахе гот: «Гава әз сьст дьбьм, һьнге qәwат дьбьм»?

⁸ Бьхунә Ишайа 40:30. Һәрге жи гәләк фәрәсәтед мә һәнә, йәкә һәнә тьштед öса кö әм пе qәwата хwә нькарьн бькьн, чьмки синоред мә һәнә. Әм гәрәке әве йәке тʹьме бира хwәда хwәй кьн. Рʹаст ә Паwлосе шанди гәләк тьшт дькарьбу бькьра, ле йәкә синоред wи һәбун у ләма qәwата wи нәдьгьһиште кö һәр тьшти бькә чь әwи дьхwәст. Чахе әwи Хwәдерʹа хәмед хwә гьли кьр, Хwәде жерʹа гот: «Qәwата мьн сьстийада мийасәр дьбә». Паwлос фәʹм кьр кö бь wан гьлийа Хwәде чь дьхwәст жерʹа бьгота, ләма әwи гот: «Гава әз сьст дьбьм, һьнге qәwат дьбьм» (2 Корн. 12:7-10). Гәло әw гьли чь дьһатьн һʹәсабе?

⁹ Паwлос фәʹм дькьр wәки әw нькарә һʹәму тьшти пе qәwата хwә бькә. Жерʹа аликʹарийа йе Һәри зор лазьм бу, демәк аликʹарийа Хwәде. Рʹöһʹе Хwәдейи пироз дькарьбу qәwате бьда wи, чахе әw сьст бу. Хенщи ве йәке, рʹöһʹе пироз дькарьбу Паwлос qәwат кьра, сәва шьхöлед öса бькә кö әwи пе qәwата хwә тʹö щар wе нькарьбуйа бькьра. Qәwата Хwәде дькарә бона мә жи öса бькә. Гава Йаһоwа рʹöһʹе хwәйи пироз дьдә мә, әм бь рʹастийе qәwи дьбьн!

10. Йаһоwа ча али Даwьд кьр чахе әw рʹасти тәнгасийа дьһат?

¹⁰ Даwьде зәбурбеж гәләк щар сәр хwә тʹәхмин дькьр чахе рʹöһʹе Хwәдейи пироз wи qәwи дькьр. Әwи дьстьра: «Пе тә әз һʹьщуми сәр ордийе дькьм у пе Хwәдейе хwә сәр сурарʹа банздьдьм» (Зәб. 18:29). Мина суре, демәк мина диwаре кö әм нькарьн сәррʹа банздьн, щара чәтьнайед мә жи öса мәзьн ьн кö әм нькарьн пе qәwата хwә сафи кьн. Һьнге мәрʹа аликʹарийа Йаһоwа лазьм ә.

11. Рʹöһʹе Хwәдейи пироз ча али мә дькә wәʹде чәтьнайа?

¹¹ Бьхунә Ишайа 40:31. Тәйр тʹәне бь qәwата хwә нафьрә, ле qәwата һәwа гәрм али wи дькә кö бьфьрә. Бь сайа ве йәке тәйр дур у бьльнд ль әʹзмен дьфьрә у qәwата хwә жи хwәй дькә. Чахе һун рʹасти тәнгасийа гьран тен, бьфькьрьн дәрһәqа тәйр. Һиви жь Йаһоwа бькьн wәки һе зедә qәwате бьдә wә бь сайа «пьштован, аwа готи рʹöһʹе пироз» (Йуһʹн. 14:26). Ча баш ә кö әм тʹьме дькарьн рʹöһʹе Хwәдейи пироз бьхwәзьн. Дьбәкә мәрʹа һе гәләк аликʹарийа Йаһоwа лазьм ә, чахе щьватеда әм сәр кәсәки хәйиди нә, йан жи мә данә хәйидандьне. Ле чьрʹа щара öса дьqәwьмә?

12, 13. а) Чьрʹа ортʹа Мәсиһийа щар-щара һәвнәфәʹмкьрьн пешда те? б) Сәрһатийа Усьв дәрһәqа Йаһоwа чь мә һин дькә?

¹² Әм гьшк гöнәкʹар ьн, у щара әм һәв фәʹм накьн. Ләма жи wе дәрәщед öса һәбьн кö әм һерс кʹәвьн сәр гьли йан кьред хушк-бьред щьватеда, йан жи әwана сәр мә һерс кʹәвьн. Әв бь рʹасти дькарә бьбә щерʹьбандьнәкә мәзьн. Ле әw щерʹьбандьн мәрʹа мәщале дьдә сәва амьнийа хwә Йаһоwарʹа избат кьн, у һин бьн кö йәктийе у әʹдьлайе тʹәви хушк-бьред хwә хwәй кьн. Рʹаст ә кемасийед wан хушк-бьра һәнә, ле йәкә Йаһоwа wана һʹьз дькә у әм гәрәке чʹәʹв бьдьнә wи.

¹³ Йаһоwа хьзмәткʹаред хwә жь щерʹьбандьна хwәй накә, у әw йәк те кʹьфше жь сәрһатийа Усьв. Чахе Усьв щаһьл бу, бьред wи жь һʹәвсудийе wи фьротьн, у паше wи бьрьн Мьсьре (Дәстп. 37:28). Йаһоwа һаш жь һʹале wи һәбу у бешьк әw бәрхwә кʹәт кö чь һатә сәре wи. Ле йәкә Йаһоwа нәкʹәтә нав wи шьхöли. Wәʹдә шунда Усьв кʹәтә кәле чьмки шәрʹ авитьнә wи кö йанчь әw дьхwәст тʹәви жьна Потифар рʹазе. Һьнге жи Хwәде Усьв хьлаз нәкьр. Ле гәло әв те һʹәсабе кö Хwәде wи һишт? Тʹö щар на! Кʹьтеба Пироз дьбежә: «Хöдан тʹәви wи бу у һʹәму шьхöле wи Хöдан жерʹа ль һәв дани» (Дәстп. 39:21-23).

14. Һәрге әм «һерс» нәкʹәвьн, әме чь кʹаре бьстиньн һьн алийе рʹöһʹанида, һьн жи алийе физикида?

¹⁴ Wәрә сәрһатийа Даwьд шеwьр кьн. Һьнә мәрьв кʹәтьнә һʹале мина йа Даwьд. Ле Даwьд кö һәвале Хwәде бу, изьн нәда хwә кö бьбә йәки зöлм у хwә жь Хwәде бьqәтинә. Ле дәwсе әwи ньвиси: «Һерс нәкʹәвә, нәqьлqьлә, бинтәнг нәбә кö хьрабийе бьки» (Зәб. 37:8). Мәʹнийа лапә мәзьн кö чьрʹа әм гәрәке «һерс» нәкʹәвьн, әw ә кö әм чʹәʹв дьдьнә Йаһоwа, йе кö «wәкә гöнәйед мә, сәре мә накә» (Зәб. 103:10). Һерсбун дькарә сьһʹәт-qәwата мә хьраб кә, мәсәлә, тансийона хуне дькарә бьльнд бә у проблемед бинкʹьшандьнева гьредайи пешда бен. Öса жи әw хьраб һʹöкöм дькә сәр щәгәре у щийе мәһʹандьна хwарьне. Чахе әм һерс ьн, әм тʹәвһәв дьбьн у гәләк щар рʹаст нафькьрьн. У чахе һерса мә дьреж дькʹьшинә, әм дькарьн сәр гәләк wәхт бькʹәвьнә депресийе. Һе баш ә һәрге әм һерсе хwәй нәкьн, чьмки әw йәк бона кʹара мә йә. Кʹьтеба Пироз дьбежә кö «дьле рʹьһʹәт жийина бәдәне йә» (Мәтʹлк. 14:30). Ле гәло чаwа әм дькарьн чәтьнайи ортʹа хушк йан бьра сафи кьн у ль һәв бен? Әм гәрәке ширәтед Кʹьтеба Пироз бьдьнә хәбате.

ЧАХЕ ЩЬВАТЕДА МӘ ДЬДЬН ХӘЙИДАНДЬНЕ

15, 16. Һәрге кәсәк мә дайә хәйидандьне, әм ча гәрәке әве чәтьнайе сафи кьн?

¹⁵ Бьхунә Әфәси 4:26. Әм әʹщебмайи наминьн чахе мәрьвед жь ве дьнйайе һьндава мә нәһәqийе дькьн. Ле чахе хушк йан бьрак пе гьли йан кьре хwә дьле мә дьешинә, бь ве йәке ча бежи шур дьле мә дьхьн. Һәрге әм нькарьн хәйде бир кьн, гәло әме бьһельн wәки әw хәйид бь сала дьле мәда бьминә? Йан әме ширәта Кʹьтеба Пироз бьдьнә хәбате у зу әве чәтьнайе сафи кьн? Чьqас дьреж әв проблем нәсафикьри бьминә, һаqас wе мәрʹа чәтьн бә әʹдьлайе чекьн тʹәви хушк йан бьра кö әм данә хәйидандьне.

¹⁶ Ле һәрге һун нькарьн хәйде бир кьн, һун чь дькарьн бькьн сәва әʹдьлайе чекьн? Йа пешийе, Йаһоwарʹа дöа бькьн. Аликʹари жь wи һиви кьн wәки тʹәви хушк йан жи бьре хwә бь нәрми хәбәр дьн. Бир нәкьн, кö әw жи досте Йаһоwа йә (Зәб. 25:14). Йаһоwа wи һʹьз дькә. Әw тʹәви достед хwә qәнщ ә, у дьхwазә кö әм жи öса бьн (Мәтʹлк. 15:23; Мәт. 7:12; Колс. 4:6). Паше, бьфькьрьн кö һун чь дьхwазьн жерʹа бежьн. Нәфькьрьн кö әw һʹәмде хwә дьле wә ешанд. Һʹәлал бьн у биньн сәр хwә кö дьqәwьмә wә тьштәки нәрʹаст фәʹм кьр, ләма чәтьнайи пешда һат. Мәсәлә, һун дькарьн хәбәрдане öса дәстпекьн: «Дьqәwьмә әз гәләк бәр дьле хwә һьлдьдьм, ле чахе дöһö тә тʹәви мьн хәбәр да, әз фькьрим . . . ». Һәрге хәбәрдан нәбаш дәрбаз бу чаwа wә дьхwәст, мәщала дьн бьгәрʹьн сәва әʹдьлайе чекьн. Öса жи дöа бькьн бона wи кәси, у жь Йаһоwа һиви кьн кö wи кʹәрәм кә у али wә бькә һун дина хwә бьдьн сәр хәйсәт-һʹöнöред wийи баш. Чь жи һәбә, баwәр бьн wәки Йаһоwа wе ша бә кö wә һәр тьшт алийе хwәда кьр, wәки бьре хwә, демәк досте Хwәде qазанщ кьн.

ЧАХЕ ӘМ СӘВА КЬРЕД ХWӘЙӘ БӘРЕ ДЬЛТӘНГ ДЬБЬН

17. Чахе әм гöнә дькьн Йаһоwа бь сайа чь али мә дькә wәки әм рʹöһʹанида qәнщ бьн, у чьрʹа әм гәрәке аликʹарийа wи qәбул кьн?

¹⁷ Һьнәк хwә нәһежа һʹәсаб дькьн кö бьбьнә хьзмәткʹаред Йаһоwа, чьмки wана гöне гьран кьрийә. Чахе мәрьв хwә нәһәq дькә, әw ча барәки гьран ә сәр стуйе wи. Даwьд Пʹадша кʹижан кö хwә дьчәрчьранд сәва гöнед хwә, һʹале хwә öса шьровәкьр: «Гава мьн гöнәйе хwә нәда рʹуйе хwә, һәстуйед мьн һʹәлийан-машийан. Чьмки һәр рʹож дәсте тә сәр мьн гьран бу». Даwьд ве дәрәщеда чаwа мәрьвәки рʹöһʹани хwә да кʹьфше. Әwи ньвиси: «Һьнге мьн гöнәйе хwә тәва әʹйан кьр у нәһәqийа хwә вәнәшарт . . . У тә нәһәqийа гöнәйе мьн бахшанд» (Зәб. 32:3-5). Һәрге тә гöнәки гьран кьрийә, Йаһоwа һазьр ә бьбахшиньнә тә у али тә бькә кö рʹöһʹанида qәнщ би. Ле тö гәрәке аликʹарийа wи кö әw бь сайа щьвате дьдә, qәбул ки (Мәтʹлк. 24:16; Аqуб 5:13-15). Ләма жи паш нәхә аликʹарийе qәбул ки, чьмки әw йәк жийина тәйә һʹәта-һʹәтайева гьредайи йә! Ле тö чь дькари бьки һәрге гöне тә һатә бахшандьне, ле исафа тә диса жи тә дьчәрчьринә сәва шашийед тәйи бәре?

18. Мәсәла Паwлосе шанди ча дькарә али wан бькә, йед кö дьфькьрьн wәки һежа ниньн Йаһоwарʹа хьзмәт кьн?

¹⁸ Щара Паwлосе шанди дьлтәнг дьбу сәва гöнед хwәйи бәре. Әw гот: «Әз жь шандийа йе һәри паш ьм, кö нә лайиq ьм шанди жи бемә готьне, чьмки мьн щьвина Хwәде зеранд». Ле йәкә паши wан гьлийа әwи öса гот: «Ле әз бь кʹәрәма Хwәде мә чь жи һәмә» (1 Корн. 15:9, 10). Йаһоwа Паwлос qәбул кьр чь жи әw һәбу, у Әw дьхwәст wәки Паwлос жи ве йәке фәʹм кә. Һәрге тә гöнед хwәйи бәре тʹобә кьрийә у дәрһәqа гöнед хwәйи гьран тә тʹәви рʹуспийа хәбәр дайә, тö гәрәке дöдьли нәби wәки Йаһоwа wе әʹсә бьбахшиньнә тә. Баwәр бә кö Йаһоwа дьбахшиньнә тә, у бахшандьн у рʹәʹма wи qәбул кә (Иша. 55:6, 7).

19. Рʹеза сала 2018 кʹижан ә, у чьрʹа әw рʹасти жи лайиq ә бона wәʹде мә?

¹⁹ Әм чьqас һе незики ахьрийа ве дьнйайе дьбьн, әʹмьр һе зедә чәтьн дьбә. Ле баwәр бьн кö Хwәде, йе кö «qәwате дьдә йе wәстийайирʹа у йед сьст qәwи дькә», дькарә һʹәму тьштида али wә бькә, сәва һун бәрдәwам кьн жерʹа хьзмәт кьн (Иша. 40:29, ДТʹ; Зәб. 55:22; 68:19). Wәʹде сала 2018, чахе әм бенә сәр щьвата, әме әве йәке һәр гав бькьн бира хwә. Әме хәбәред рʹеза сале бьвиньн, кʹидәре кö те готьне: «Йед кö баwәрийа хwә Йаһоwа тиньн, wе qәwате бьстиньн» (Иша. 40:31, ДТʹ).