Әм Чь Дькарьн Бьдьнә Wи Кәси, йе кö Хwәйе Һәр Тьшти йә?

1, 2. Йаһоwа чь щурʹәйи мәрʹданийе дьдә кʹьфше?

ЙАҺОWА Хwәдайе мәрʹд ә. Һәр тьшт чь кö бал мә һәйә, жь wи йә. Һʹәму зер, зив у һʹәму тьштед qимәт чь кö әʹрд дьдә, йед wи нә, у әw wан тьшта дьдә хәбате сәва әʹмьр һәбә (Зәб. 104:13-15; Һаг. 2:8). Жь Кʹьтеба Пироз әм педьһʹәсьн кö Йаһоwа ча wан тьштед qимәт бь кʹәрәмәт бона кʹара щьмәʹта хwә дьда хәбате.

² Мәсәлә, 40 сала Йаһоwа манна у ав дьда щьмәʹта Исраел, чахе әwана бәрʹийеда бун (Дәркʹ. 16:35). Ләма жи «qәт кемасийед wан тʹöнә бун» (Нәһәм. 9:20, 21). Йаһоwа öса жи бь Елиша пʹехәмбәр, бь кʹәрәмәт öса кьр кö бьзьр мала жьнәбикә амьнда зедә бу. Хwәде бь сайа ве йәке али wе кьр, wәки әw дәйне хwә бьдә у сәва епʹещә пʹәре wе һәбә wәки хwә у кöрʹед хwә хwәй кә (2 Пʹадш. 4:1-7). Бь аликʹарийа Йаһоwа, Иса али мәрьва дькьр бь хwарьне у һәла һе жи бь пʹәра чахе әw йәк лазьм бу (Мәт. 15:35-38; 17:27).

3. Ве готареда әме дәрһәqа чь шеwьр кьн?

³ Йаһоwа дькарә һәр тьшт бьдә хәбате сәва әʹфьрине хwәйә сәр әʹрде хwәй кә. Ле Йаһоwа öса жи хьзмәткʹаред хwә һелан дькә, wәки әwана һәбука хwә бьдьнә хәбате сәва пьштгьрийа тʹәшкиләта wи бькьн. (Дәркʹ. 36:3-7; бьхунә Мәтʹәлок 3:9.) Ле гәло чьрʹа Йаһоwа дьхwазә wәки әм пе һәбука хwә рʹазибуна хwә wирʹа бьдьнә кʹьфше? Чаwа мәрьвед амьнә бәре аликʹари дьдан бона шьхöле Йаһоwа? Иро чаwа тʹәшкиләта Йаһоwа пʹәре qöрбанкьри дьдә хәбате? Щаба wан пьрса әме ве готареда пебьһʹәсьн.

ЧЬРʹА ӘМ ТЬШТЕД ХWӘЙӘ QИМӘТ ДЬДЬНӘ ЙАҺОWА?

4. Чахе әм пьштгьрийа шьхöле Йаһоwа дькьн, бь ве йәке әм чь нишан дькьн?

⁴ Әм тьштед хwәйә qимәт дьдьнә Йаһоwа, чьмки wи һʹьз дькьн у qимәт дькьн. Чахе әм дьфькьрьн сәр ве йәке кö Йаһоwа чь бона мә дькә, дьле мә бь рʹазибуне тʹьжә дьбә. Даwьд Пʹадша чахе шьровәкьр кö чь лазьм ә сәва пʹарьстгәһе ава кьн, әwи гот кö һәр тьшт әм жь Йаһоwа дьстиньн, у чь жи әм дьдьнә wи, әw тьшт диса жи жь wи нә. (Бьхунә 1 Дирок 29:11-14.)

5. Кʹьтеба Пироз ча нишан дькә wәки мәрʹдани әw һәйә пʹара һʹәбандьна мә?

⁵ Әм öса жи тьштед qимәт дьдьнә Йаһоwа, чьмки wи щурʹәйи жи әм wи дьһʹәбиньн. Йуһʹәннайе шанди хәwн-хәйаледа бьһист кö чаwа әʹзменда хьзмәткʹаред Йаһоwа дьготьн: «Йа Хöдан Хwәдейе мә, тö һежа йи кö рʹумәт, һöрмәте у qәwате бьстини. Чьмки тә һәр тьшт әʹфьрандьн у бь хwәстьна тә әw әʹфьрин у һәнә» (Әʹйан. 4:11). Бешьк, Йаһоwа һежайи һʹәму рʹумәт-һöрмәте йә, ләма әм дьхwазьн тьштед лапи баш бьдьнә wи. Йаһоwа бь Муса щьмәʹта Исраелрʹа тʹәми да, кö сале се щара щәжьне дәрбаз кьн, у бәр Йаһоwа бьсәкьньн. Әw щәжьн бун пʹара һʹәбандьна wан. Исраели wәʹде wан щәжьна «дәст вала ль бәр Хöдан» гәрәке нәсәкьнийана (Qан. Дщр. 16:16). Иро жи öса нә, мәрʹданийа рʹәзәдьли дькʹәвә нава һʹәбандьна мә, у öса әм нишан дькьн кö тʹәшкиләта Йаһоwа qимәт дькьн у пьштгьрийа шьхöле wи дькьн.

6. Чьрʹа чахе әм мәрʹд ьн әм кʹаре дьстиньн? (Бьньһерʹә шькле әʹwльн.)

⁶ Чахе әм бь мәрʹданийе дьдьн, нә кö тʹәне дьстиньн, әw мәрʹа жи кʹаре тинә. (Бьхунә Мәтʹәлок 29:21.) Бьдьнә бәр чʹәʹве хwә зарʹа кö де-баве хwәрʹа пʹешкʹешәки дьдә, кʹижан кö әwи пе пʹәре wан кʹьрʹийә. Бона де-бав әв пʹешкʹеш гәләк qимәт ә! Öса жи бьдьнә бәр чʹәʹве хwә qиз йан кöрʹ кʹижан кö пешәнг ә, мала де-баве хwәда дьжи у пʹәрә дьдә де-баве хwә сәва хәрще мале дадьн йан жи хwарьне бькʹьрʹьн. Рʹаст ә де-бав жь зарʹе дәʹwа накьн ве йәке, ле әwана qәбул дькьн пʹешкʹеша wи. Чьрʹа? Чьмки де-бав заньн кö öса зарʹ дьдә кʹьфше кö әмәке wан дьшекьринә. Мина ве йәке, Йаһоwа жи занә кö чахе әм тьштед хwәйә qимәт дьдьн, әw бона мә кʹар ә.

МӘРʹДАНИЙА ХЬЗМӘТКʹАРЕД БӘРЕ

7, 8. Wәʹде бәре щьмәʹта Йаһоwа чь мәсәлә һишт qöрбанкьрьнеда а) бона шьхöлед мәхсус? б) бона пьштгьрийа шьхöле хьзмәтийе?

⁷ Жь Кʹьтеба Пироз әм педьһʹәсьн кö сәва шьхöле Хwәде, щьмәʹта Йаһоwа тьштед хwәйә qимәт qöрбан дькьр. Мәсәлә, Муса Исраелийа һелан кьр wәки бона кончекьрьне qöрбана бькьн. Паше чахе Даwьд Пʹадша дьхwәст пʹарьстгәһе ава кьра, әwи жи щьмәʹт һелан кьр wәки qöрбанкьрьна бькьн (Дәркʹ. 35:5; 1 Дир. 29:5-9). Öса жи wәʹде Йоаш Пʹадша, кʹаһина пе пʹәре qöрбанкьри пʹарьстгәһе тʹәзә кьрьн (2 Пʹадш. 12:4, 5). Qьрʹна йәкеда, Мәсиһи бьһистьн кö Щьһустанеда хәлайи дәстпедьбу у хушк-бьрарʹа аликʹари лазьм ә. Ләма жи wана хwәрʹа qьрар кьр, кö «жь дәсте кʹева чьqас те аликʹарийе бона баwәрмәндед Щьһустане бьшиньн» (Кʹар. Шанд. 11:27-30).

⁸ Щьмәʹта Йаһоwа öса жи аликʹари дьда wан, йед кö рʹебәрийа шьхöле wи дькьрьн. Пе Qануна Муса, Леwи хwәйе wар нибун мина бәрәкед майин. Ле Исраели жь һәбука хwә дәһәк дьданә Леwийа, у әw йәк али wан дькьр wәки һʹьш-аqьле хwә бь тʹәмами бьдьнә сәр хьзмәтийа хwә (Жьмар 18:21). Мина ве йәке, qьрʹна йәкеда жьн бь мәрʹдани Исарʹа у шандийарʹа «бь һәбука хwәва . . . бәрдәсти дькьрьн» (Луqа 8:1-3).

9. Бәре чь щурʹәйи qöрбан дькьрьн?

⁹ Бәле, щурʹе qöрбанкьрьне кö хьзмәткʹаред бәре дькьрьн, жь һәв щöдә дьбун. Чахе Исраели бәрʹийеда qöрбан анин сәва авакьрьна кон, дьqәwьмә wана әw тьшт анин, кʹижан кö жь Мьсьре тʹәви хwә бьрьбун (Дәркʹ. 3:21, 22; 35:22-24). Qьрʹна йәкеда, һьнә Мәсиһи һәбука хwә дьфьротьн, мәсәлә әʹрде хwә йан жи малед хwә, у әw пʹәрә дьданә шандийа. Шанди жи әw пʹәрә дьданә хәбате бона хушк-бьред кö һʹәwщә бун (Кʹар. Шанд. 4:34, 35). Ле йед дьн пʹәрә башqә дькьрьн у тʹьме qöрбан дькьрьн сәва пьштгьрийа шьхöле Хwәде бькьн (1 Корн. 16:2). Wи щурʹәйи һʹәму мәрьв, һьн мәрьвед дәwләти һьн жи йед кʹәсиб алийе хwәда дькарьбун qöрбана бькьн (Луqа 21:1-4).

QÖРБАНКЬРЬН РʹОЖА ИРОЙИН

10, 11. а) Чаwа әм дькарьн чʹәʹв бьдьнә мәрʹданийа хьзмәткʹаред бәре? б) Һун чь дьфькьрьн дәрһәqа ви qәдьри кö дькарьн пьштгьрийа шьхöле Пʹадшатийе бькьн?

¹⁰ Иро жи дьбәкә жь мә бе хwәстьне кö бона проектәки мәхсус qöрбана бькьн. Мәсәлә, дьбәкә щьвата wә дьхwазә Ода Щьвата тʹәзә ава кә йан жи тʹәзә бькә. Öса жи дьбәкә пʹәрә лазьм ә сәва филиала wә тʹәзә кьн, йан жи хәрще щьвата мәзьн дадьн, йан жи аликʹари бьдьнә хушк-бьра wәʹде тʹәшqәлед тʹәбийәте. Qöрбанкьрьнед мә öса жи аликʹари дьдьнә мисйонера, пешәнгед мәхсус, бәрпьрсийаред мьһале, хьзмәткʹаред филиала сәрәкә у öса жи филиалед дьн нав тʹәмамийа дьнйайе. Щьвата wә öса жи дьбәкә тʹьме пʹәрә дьшинә бона авакьрьна Одед Щьвата у щьватед мәзьн, сәва хушк-бьред нав тʹәмамийа дьнйайе кʹаре бьстиньн.

¹¹ Һәр кәс жь мә дькарә алийе хwәда пьштгьрийа шьхöле Йаһоwа бькә, кʹижан кö wан рʹожед ахьрийеда те кьрьне. Чахе әм пʹәрә qöрбан дькьн qöтʹийед Ода Щьватеда йан жи малпәра мә jw.org-да, әм тʹö кәсирʹа навежьн кö мә пʹәрә qöрбан кьрийә. Дьбәкә әм дьфькьрьн wәки пʹәре кö әм qöрбан дькьн, qә тьштәки нинә чьмки һьндьк ә. Ле бь рʹастийе һʹәчʹи зәʹф пʹәре qöрбанкьри кö тенә тʹәшкиләте, бь сайа qöрбанкьрьнед һьндьк тʹоп дьбьн, нә кö чәнд qöрбанкьрьнед мәзьн. Хушк-бьред мә, һәла һе йед дәсттәнг жи, мина мәрьвед Мәкәдони нә, кʹижан кö «кʹәсибийа хwәйә гьранда жи», бь дьл у щан бь мәрʹданийе qöрбана дькьрьн (2 Корн. 8:1-4).

12. Чаwа тʹәшкиләта мә qöрбанкьрьна хәрщ дькә?

¹² Әw йәк кö чаwа Кʹома Рʹебәрийе пʹәре тʹәшкиләте хәрщ дькә, амьни у сәрwахти дьдә кʹьфше (Мәт. 24:45). Әwана дöа дькьн, wәки wан пʹәра кö тенә qöрбанкьрьне рʹаст хәрщ кьн (Луqа 14:28). Wәʹде бәре, мәрьвед амьн йед кö щабдар бун бона тьштед qöрбанкьри, дина хwә дьдан wәки әw тьшт хут тʹәне бона шьхöле Йаһоwа бенә хәрщкьрьне. Мәсәлә, Әзра жь Пʹадше Фарьси вәдьгәрʹийа Оршәлиме пе тьштед qöрбанкьри, демәк зер, зив у тьштед дьнә qимәт. Баһе wан тьшта иро 100 милйон долара зедәтьр ә. Әзра һʹәсаб дькьр кö әw тьштед qöрбанкьри хут бона Йаһоwа бун, у әwи рʹебәри кьр сәва әw тьштед qимәт öнда нәбьн, чьмки рʹийед wедәре хоф бун (Әзр. 8:24-34). Qьрʹна йәкеда, Паwлосе шанди пʹәрә тʹоп кьр, wәки аликʹари бьдә хушк-бьред Щьһустанеда. Әwи алийе хwәда һәр тьшт кьр сәва әw пʹәрә рʹаст бе хәрщкьрьне, «нә кö тʹәне ль бәр Хöдан, ле ль бәр мәрьва жи». (Бьхунә 2 Корьнтʹи 8:18-21.) Иро жи тʹәшкиләта мә чʹәʹв дьдә Әзра у Паwлосе шанди ве йәкеда, кö рʹаст у бь аqьлайи qöрбанкьрьна хәрщ дькә.

13. Чьрʹа тʹәшкиләта мәда гöһастьн һатьнә кьрьне?

¹³ Малбәт дькарә гöһастьна бькә, wәки пʹәре хwә гәләк хәрщ нәкьн, йан жи әʹмьре хwә дьһа һеса кьн, сәва һе зедә Йаһоwарʹа хьзмәт кьн. Дькарьн бежьн тʹәшкиләта Йаһоwа жи ве йәке дькә. Салед пашwәхтийеда, һәбун гәләк проектед тʹәзә, у чәнд щара пʹәрә һе зедә һатә хәрщкьрьне, нә кö чьqас һатә стандьне. Ләма жи тʹәшкиләт һәр тьшти дькә wәки хәрщ дьһа кем бьн у хәбат жи сьвьк бә. Бь wи щурʹәйи пе пʹәре wәйи qöрбанкьри кö һун бь мәрʹданийе дьдьн, һе зедә шьхöл те кьрьне.

КʹАР ЖЬ QÖРБАНКЬРЬНЕД WӘ

14-16. а) Qöрбанкьрьнед wә бона чь тенә хәбьтандьне? б) Һун чь кʹаре дьстиньн жь wан тьшта кö пе пʹәре qöрбанкьри тенә кьрьне?

¹⁴ Гәләк хушк-бьред мә йед кö епʹещә wәхт нава рʹастийеда ньн, дьбежьн кö жь тʹәшкиләта мә тʹö щар һаqас зәʹф пʹешкʹешед рʹöһʹани нәстандьбун. Бьфькьрьн, иро бал мә һәйә малпәра jw.org у öса жи JW Бродкастинг. Хенщи ве йәке, сәр гәләк зьмана «Wәлгәрʹандьна Дьнйа Тʹәзә» һатийә дәрхьстьне. Һьн жи сала 2014/2015-да, нав тʹәмамийа дьнйайеда 14 шәһәрада, щьвата мәзьнә се рʹожи йа һʹәмдьнйайе дәрбаз бу, бь наве «Бәре Пешьн Пʹадшатийа Хwәде Бьгәрʹьн». Әwед кö һатьн сәр ве щьвате, шабунәкә гәләк мәзьн стандьн.

¹⁵ Гәләк хушк-бьра готьн кö әwана зәʹф рʹази нә сәва wан тьшта, кʹижан кö жь тʹәшкиләта Йаһоwа дьстиньн. Мәсәлә, дәрһәqа JW Бродкастинге, жьн-мерәк кö Асйайеда хьзмәт дькьн, ньвисин: «Әм һатьнә кʹьфшкьрьне шәһәрәки бьчʹукда. Щара әм хwә тʹәне тʹәхмин дькьн чьмки дур дьминьн, у бир дькьн кö шьхöле Йаһоwа чьqас мәзьн ә. Ле гава әм сәр JW Бродкастинге щурʹә-щурʹә програма дьньһерʹьн, әм тиньн бира хwә wәки әм пʹара бьратийа һʹәмдьнйайе нә. Хушк-бьред мәйи дәлал ве мьһаледа, гәләк ша дьбьн чахе JW Бродкастинге дьньһерʹьн. Гәләк щар әwана мәрʹа дьбежьн кö паши Бродкастинге, әwана хwә һе незики Кʹома Рʹебәрийе тʹәхмин дькьн. Ньһа әwана дьһа фьрнаq дьбьн кö нава тʹәшкиләта Хwәдеда ньн».

¹⁶ Нав тʹәмамийа дьнйайе, wәкә 2 500 Одед Щьвата тенә авакьрьне йан жи тʹәзәкьрьне. Әндәмед щьвата Һондурас, чахе Ода Щьвата хwәйә тʹәзә дәстпекьрьн бьдьнә хәбате, ньвисин: «Әм бь рʹастийе гәләк бәхтәwар ьн кö әм жи дькʹәвьнә нава малбәта Йаһоwа, у әм бьратийа хwәйә һʹәмдьнйайерʹа ша дьбьн, чьмки бь сайа ве йәке хwәстьна дьле мә һатә сери кö Ода Щьвата тʹәзә бал мә һәйә». Гәләк хушк-бьред мә öса жи рʹази нә сәва Кʹьтеба Пироз у әʹдәбйәта, кʹижан кö сәр зьмане wан һатьнә wәлгәрʹандьне. Гәләк жи рʹази нә сәва аликʹарийа wәʹде тʹәшqәлед тʹәбийәте, у öса жи бона хьзмәтийа пе стенда, кʹижан кö бәред баш тинә.

17. Әм жь кʹö заньн wәки Йаһоwа пьштгьрийа тʹәшкиләта хwә дькә?

¹⁷ Гәләк мәрьвед кö нә Шәʹдед Йаһоwа нә, нькарьн баwәр кьн wәки һʹәму шьхöл кö әм дькьн, тʹәне пе qöрбанкьрьна рʹәзәдьли тенә кьрьне. Щарәке директоре компанийәкә мәзьн һатә щийед кö әʹдәбйәтед мә тенә нәшьркьрьне. Әw гәләк әʹщебмайи ма wәки һʹәму шьхöл хушк-бьра бь рʹәзәдьли дькьн, пе qöрбанкьрьнед рʹәзәдьли, у бе тʹопкьрьна пʹәра. Әwи гот wәки чь кö әм дькьн, әw тьштәки нәбуйи йә. Рʹасти жи öса нә! Әм заньн кö әw һʹәму шьхöл тʹәне пе аликʹарийа Йаһоwа пешда дьчә (Иб. 42:2).

МӘРʹДАНИ КʹӘРӘМА ТИНӘ

18. а) Әм чь кʹәрәма дьстиньн чахе пьштгьрийа шьхöле Пʹадшатийе дькьн? б) Ча әм дькарьн зарʹед хwә у йед тʹәзә һин кьн wәки шьхöле Хwәдеда мәрʹд бьн?

¹⁸ Йаһоwа мәщал у qәдьрәки мәзьн да мә, кö әм дькарьн пьштгьрийа шьхöле wи бькьн. Әw соз дьдә мә кö һәрге әм пьштгьрийа Пʹадшатийа wи бькьн, әw wе әʹсә мә кʹәрәм кә (Малх. 3:10). Йаһоwа öса жи соз дьдә wәки мәрьве мәрʹд, wе пешда һәрʹә. (Бьхунә Мәтʹәлок 11:24, 25.) Чахе әм мәрʹд ьн әм бәхтәwар дьбьн, чьмки Кʹьтеба Пироз дьбежә «хwәзи ль дайийа, нә кö ль стандийа» (Кʹар. Шанд. 20:35). Пе хәбәрдан у кьред хwә, әм öса жи дькарьн зарʹед хwә у йед кö тʹәзә һатьнә нава рʹастийе һин кьн, wәки шьхöле Хwәдеда мәрʹд бьн у гәләк кʹәрәма бьстиньн.

19. Әв готар чьда wә һелан кьр?

¹⁹ Һәр тьшт чь кö бал мә һәйә, жь Йаһоwа йә. У чахе әм пашда wан тьшта дьдьнә wи, бь ве йәке әм дьдьнә кʹьфше кö wи һʹьз дькьн у qимәт дькьн һәр тьшт кö әw бона мә дькә (1 Дир. 29:17). Чахе Исраели qöрбан анин сәва авакьрьна пʹарьстгәһе, әwана чь жи «бь дьле хwәва пʹешкʹеши кьрьн кʹефхwәш бун, жь бәр кö бь һʹәмуйа дьле хwә жь Хöданрʹа пʹешкʹеш кьрьн» (1 Дир. 29:9). Дә wәрен әм жи бь дьл ша бьн у ләзәте бьстиньн кö Йаһоwарʹа, демәк хwәйе һәр тьштирʹа, wан тьшта бьдьн кʹижан кö жь дәсте wи тен.