Дьлшәwат бьн Һьндава «Һʹәму» Мәрьва

ЧАХЕ Иса шагьртед хwә һин дькьр кö ча мьзгинийе бәла кьн, әwи wанрʹа пешда гот, wәки нә һʹәму мәрьв wе гöһ бьдьнә wан (Луqа 10:3, 5, 6). Хьзмәтийа мәда жи әм дькарьн рʹасти мәрьвед öса бен, йед кö сар у сәрт ьн һьндава мә у һәла һе жи тʹәви мә шәрʹа дькьн. Һьнге мәрʹа дьбәкә чәтьн бә һьндава wанда дьлшәwат бьн.

Мәрьве дьлшәwат дьвинә чәтьнайи у һʹәwщед мәрьвед майин, дьле wи бона wан дьшәwьтә у дьхwазә али wан бькә. Ле һәрге әм һьндава мәрьва дьле хwә сар кьн, дьqәwьмә әм öса жи хьзмәтийеда хирәта хwә öнда кьн у ида нькарьбьн али wан бькьн. Чаwа кö дар агьр хwәй дькә wәки венәсә, öса жи дьлшәwати али мә дькә wәки әм хирәта хwә хьзмәтийеда öнда нәкьн (1 Тʹеслн. 5:19).

Ле әм ча дькарьн дьлшәwатийе нав хwәда пешда биньн, һәла һе жи гава мәрʹа чәтьн ә ве йәке бькьн? Wәрә әм шеwьр кьн мәсәла Йаһоwа, Иса у Паwлосе шанди, у пебьһʹәсьн кö ча әм дькарьн чʹәʹв бьдьнә wан.

ЧʹӘʹВ БЬДЬНӘ ДЬЛШӘWАТИЙА ЙАҺОWА

Бь һʹәзара сала Йаһоwа тәйах дькә кö мәрьв наве wи беһöрмәт дькьн. Ле йәкә әw «бона бешекьра жи, нәрʹаста жи qәнщ ә» (Луqа 6:35). Әв qәнщийа wи те кʹьфше ве йәкеда, кö әw һьндава wанда бь сәбьр ә. Ле чьрʹа? Чьмки Йаһоwа дьхwазә «һʹәму мәрьв» хьлаз бьн (1 Тимтʹ. 2:3, 4). Рʹаст ә хьраби бәр чʹәʹве Хwәде рʹәш ә, ле мәрьв бона wи qимәт ьн у әw нахwазә тʹö кәс әʹмьре хwә öнда кә (2 Пәт. 3:9).

Йаһоwа занә wәки Шәйтʹан гәләк бь һостәти мәрьва дьхальфинә (2 Корн. 4:3, 4). Гәләк мәрьв жь заротийеда тьштед qәлп у дәрәw һин дьбьн, у паше әw йәк һʹöкöм дьбә сәр wан у wанрʹа чәтьн дьбә рʹастийе qәбул кьн. Йаһоwа гәләк дьхwазә али wан мәрьва бькә. Ле әм жь кʹö заньн?

Дина хwә бьдьне, Йаһоwа ча дьньһерʹи сәр щьмәʹта Нинәwайа бәре. Әwана мәрьвнә гәләк хьраб бун, ле йәкә Йаһоwа готә Уньс: «Һʹәйфа мьн чаwа жь wи бажаре Нинәwайа мәзьн нәйе, кö нав wеда сәд бист һʹәзар мәрьви зедәтьр һәнә, кö дәсте чʹәп у рʹасте жь һәв дәрнахьн» (Унс. 4:11). Йаһоwа заньбу wәки әwана дәрһәqа wи рʹастийе ньзаньн, ләма әwи Уньс шанд сәва пешда әʹлами wан кә.

Әм жи мина Йаһоwа мәрьва qимәт дькьн. Әм дькарьн чʹәʹв бьдьнә wи, һәрге бь дьл у щан дьхwазьн али мәрьва бькьн сәва рʹастийе пебьһʹәсьн һьнге жи, гава әм тʹәхмин дькьн кö нахwазьн гöһ бьдьнә мә.

ЧʹӘʹВ БЬДЬНӘ ДЬЛШӘWАТИЙА ИСА

Иса мина Баве хwә, һьндава мәрьвед кö рʹöһʹанида һʹәwщә бун, дьлшәwат бу. «Гава әwи әʹлаләт дит, гöне wи ль wан һат, чьмки әwана мина пәзе бе шьван, бәрʹәдайи у бәлабуйи бун» (Мәт. 9:36). Иса рʹува мәрьва нәдьньһерʹи, ле әwи тьштед кʹур дьдит. Әwи фәʹм дькьр wәки йед кö дьһатьн сәва гöһ бьдьнә wи, алийе сәрwеред рʹелигийеда нәрʹаст һинкьри нә у һьндава хwәда дьлсари дьдитьн. Рʹаст ә әwи заньбу кö гәләк wе бона щурʹә-щурʹә мәʹнийа нәбьнә шагьртед wи, йәкә Иса бәрдәwам дькьр гәләк тьшт wана һин дькьр (Марq. 4:1-9).

Чахе мәрьв мьзгинийа мә qәбул накьн, әм жи гәрәке сәр ве дәрәще кʹур бьньһерʹьн у фәʹм кьн чьрʹа әwана öса хwә дьдьнә кʹьфше. Һьнәк дьбәкә дәрһәqа Кʹьтеба Пироз йан жи дәрһәqа Мәсиһийа нәрʹаст дьфькьрьн, чьмки дьвиньн wәки һьнә мәрьвед кö хwә дәwса Мәсиһийа датиньн, чьqас тьштед хьраб дькьн. Дьqәwьмә һьнәк жи дәрһәqа баwәрийа мә тьштед дәрәw сә дькьн. Һьнәк жи дьтьрсьн кö нәфәред wан йан жи мәрьвед дьн, wе wана бькʹәньн һәрге бьвиньн кö әwана тʹәви мә хәбәр дьдьн.

Һьнә мәрьв йед кö хьзмәтийеда рʹасти мә тен, әʹмьре хwәда дәрд-кöлед öса дитьнә, кö гәләк хьраб сәр wан һʹöкöм буйә. Мисйонерәкә бь наве Ким гьли дькә: «Мьһаләкә мәда гәләк мәрьва шәрʹ дитьнә у һʹәму һәбука хwә öнда кьрьнә. Баwәрийа wан бона ахьрийе тʹöнә. Әwана дьлшкәсти нә, тьрседа ньн у итʹбарийа хwә тʹö кәси найньн. Ве мьһаледа, әм тʹьме рʹасти мәрьвед öса тен, йед кö мьqабьли мьзгинийа мә нә. Щарәке wәʹде хьзмәтийе һәла һе жи мьн данә тьрсандьне кö wе мьн бькöжьн».

Ле гәло чаwа Ким һьндава wан мәрьвада диса жи дьлшәwат дьминә? Әw дьбежә: «Чахе тʹәви мьн гәләк һерс ьн, әз Мәтʹәлок 19:11 дькьмә бира хwә, кʹидәре те готьне: ‹Фәʹме qәнщ мерьв жь һерсе пашда дехә›. Әз тиньм бира хwә wәки әwан мәрьва әʹмьре хwәда чь дитьнә, у әw йәк али мьн дькә дьлшәwат бьм һьндава wан. У бь рʹасти нә һʹәму мәрьв öса хьраб ьн. Ве мьһаледа әм сәрледанед дöбарә дькьн».

Әм дькарьн пьрсе бьдьнә хwә: «Мьне ча мьзгини qәбул кьра һәрге әз дәwса wан бума?» Мәсәлә, дьбәкә мә гәләк щар дәрһәqа Шәʹдед Йаһоwа тьштед дәрәw бьһистийә. Wан дәрәщада дьбәкә мә жи хwә нәбаш бьда кʹьфше һьндава wанда у нә жи лазьм буйа дьлшәwатийе мәрʹа бьдьнә кʹьфше. Әм гәрәке гьлийед Иса бир нәкьн чахе әwи гот, кö чь кö әм дьхwазьн мәрьв бона мә бькьн, әм жи бона wан бькьн. Wи щурʹәйи әме мәрьва фәʹм кьн у тʹәви wан бь сәбьр бьн һьнге жи, чахе нәһеса йә (Мәт. 7:12).

ЧʹӘʹВ БЬДЬНӘ ДЬЛШӘWАТИЙА ПАWЛОС

Паwлосе шанди һәла һе жи һьндава мәрьвед öса кö мьqабьли wи дәрдькʹәтьн, дьлшәwат бу. Ле чьрʹа? Әwи бир нәдькьр wәки бәре әw хwәха ча бу. Әwи гот: «Әз . . . бәре ль wи дькʹьфьрим, әw дьзеранд у нәйарти ль wи дькьр, ле рʹәʹм ль мьн бу, чьмки мьн нәбаwәрийеда бь нәзанийа хwә кьрьн» (1 Тимтʹ. 1:13). Әwи фәʹм дькьр wәки Йаһоwа у Иса һьндава wида рʹәʹмтийа мәзьн данә кʹьфше. Дьбәкә чахе әwи мәрьвед мьqабьл дьдитьн, һьнге дьани бира хwә кö әw жи бәре öса бу.

Щара Паwлос рʹасти wан мәрьва дьһат, йед кö һинкьрьнед qәлп qәwи баwәр дькьрьн. Ле гәло әwи ча хwә дьда кʹьфше һьндава wан? Кʹаред Шандийа 17:16-да те готьне, wәки чахе Паwлос Атʹинайеда бу, «дьле wи нә рʹьһʹәт бу, чьмки дит бажар нава пʹутпʹарьстийеда бу». Ле әwе йәке рʹе wи нәгьрт кö wанрʹа шәʹдәтийе бьдә (Кʹар. Шанд. 17:22, 23). Әwи һәр тьшт һьлдьда һʹәсаб у чахе лазьм бу щурʹе һинкьрьна хwә дьгöһаст, сәва кö һәр дәрәщада бькарьбә һьнәка хьлаз кә (1 Корн. 9:20-23).

Әм жи дькарьн чʹәʹв бьдьнә Паwлос кö ньһерʹандьна мәрьва фәʹм кьн. Демәк дәрһәqа wана чь кö әм заньн, бьдьнә хәбате сәва бь һостәти мьзгинийе wанрʹа гьли кьн (Иша. 52:7). Хушкәк бь наве Дороти дьбежә: «Мьһала мәда, гәләк мәрьв öса тенә һинкьрьне, wәки Хwәде берʹәʹм ә у тʹәне сущдар дькә. Wәʹде хьзмәтийе әз пʹайе wан мәрьва дьдьм кö әwана Хwәде баwәр дькьн, паше дина wан дькʹьшиньм сәр Кʹьтеба Пироз кʹидәре те готьне, wәки Йаһоwа чьqас бь һʹьзкьрьн ә у чь соз дьдә дәрһәqа ахьрийе».

БЬ QӘНЩИЙЕ СӘР ХЬРАБИЙЕ КʹӘВЬН

Ахьрийа ве дьнйайе бәр шемике йә, ләма әм заньн кö мәрьв wе «хьрабийеда пешда һәрʹьн» (2 Тимтʹ. 3:1, 13). Ле әм гәрәке сәва ве йәке дьлсар нәбьн йан жи хьзмәтийеда шабуна хwә öнда нәкьн. Йаһоwа дькарә мәрʹа qәwате бьдә, wәки әм «бь qәнщийе ... сәр хьрабийе» кʹәвьн (Рʹом. 12:21). Хушкәкә мәйә пешәнг бь наве Щесика дьбежә: «Әз гәләк щар рʹасти wан мәрьва тем, йед кö qöрʹә нә у сәр мә у мьзгинийа мә ньмьз дьньһерʹьн. Бона ве йәке әм дькарьн әʹщьз бьн. Чахе әз тʹәви мәрьвед öса хәбәрдане дәстпедькьм, әз дьле хwәда Йаһоwарʹа дöа дькьм, wәки әw али мьн бькә сәва әз сәр wи мәрьви мина Wи бьньһерʹьм. Әw йәк али мьн дькә нә кö сәр хwә бьфькьрьм, ле али wи мәрьви бькьм».

Әм гәрәке öса жи wәʹде хьзмәтийе хушк-бьра дьлгәрм кьн. Щесика дьбежә: «Чахе хьзмәтийеда qәwьмандьнәкә хьраб дьqәwьмә тʹәви мьн йан жи тʹәви һәвалхьзмәткʹаре мьн, әз дәрһәqа ве йәке гәләк хәбәр надьм. Дәwсе, әз хәбәрдана хwә дьгöһезьм сәр тьштед позитив, мәсәлә дьбежьм кö хьзмәтийа мә чь кʹаре тинә һәрге жи мәрьв мьqабьли мә нә».

Йаһоwа һаш жь һʹәму wан чәтьнайа һәйә йед кö хьзмәтийеда рʹасти мә тен. Әw чьqас ша дьбә чахе дьвинә, кö әм дьлрʹәʹмтийеда чʹәʹв дьдьнә wи (Луqа 6:36). Ле әw дьлшәwатийа Йаһоwа wе һәртʹьм нәкʹьшинә. Әм баwәр ьн wәки әw занә кʹәнге кʹöтасийа ве дьнйайе бинә. Ле һʹәта һьнге, гәләк фәрз ә әм хьзмәтийа хwә дайньн щийе пешьн (2 Тимтʹ. 4:2). Wәрә әм бәрдәwам кьн шьхöле хwә биньн сери, кö бь хирәт хьзмәт кьн у һьндава һʹәму мәрьва дьлшәwат бьн.