Хwәйе Мә Йаһоwа йә
«Хwәзи ль wи мьләти, Хwәдейе кʹижани Йаһоwа йә у ль wе щьмәʹте, кʹижан әwи бьжарт кьрә wаре Хwә» (ЗӘБ. 33:12, ДТʹ).
1. Чьрʹа Йаһоwа йә хwәйе һәр тьшти? (Бьньһерʹә шькле әʹwльн.)
ЙАҺОWА хwәйе һәр тьшти йә! «Әʹзман у әʹзмане әʹзмана, әʹрд у һʹәму чь ль сәр ә», йед wи нә (Qан. Дщр. 10:14; Әʹйан. 4:11). Һʹәму мәрьв жи йед wи нә, чьмки әwи әwана әʹфьрандьн (Зәб. 100:3). Ле йәкә нава тʹәмамийа тʹәрихийа инсанәтеда, Хwәде һьнә мәрьв башqә кьрьнә, йед кö бь щурʹе мәхсус пʹара wи нә.
2. Ль гора Кʹьтеба Пироз, Йаһоwа кʹе бьжарт бь щурʹе мәхсус ча щьмәʹта хwә?
2 Мәсәлә, Зәбура 135-да сәр хьзмәткʹаред Йаһоwа wәʹде Исраела бәре, те готьне ча «мьлкʹе» wи (Зәб. 135:4). Öса жи кʹьтеба Һосәйада һатьбу пʹехәмбәртикьрьне wәки мәрьвед жь нә мьләте Исраели жи wе бьбьнә щьмәʹта Йаһоwа (Һос. 2:23). Әw пʹехәмбәртийа Һосәйа һатә сери чахе Йаһоwа мәрьвед жь нә мьләте Щьһу бьжарт, сәва тʹәви Иса пʹадшатийе бькьн (Кʹар. Шанд. 10:45; Рʹом. 9:23-26). Әw «мьләте бöһöрти» мьлкʹе Йаһоwайи мәхсус ә. Әwана бь рʹöһʹе пироз кʹьфшкьри нә у һатьнә бьжартьне бона жийина сәр әʹзмана (1 Пәт. 2:9, 10). Ле әм чь дькарьн бежьн дәрһәqа Мәсиһийед иройин, йед кö һивийа жийина һʹәта-һʹәтайе сәр әʹрде нә? Йаһоwа wана жи һʹәсаб дькә ча щьмәʹта хwә у бьжартийед хwә (Иша. 65:22).
3. а) Иро кʹе тʹәви Йаһоwа һәләqәтийа мәхсусда нә? б) Ве готареда әме дәрһәqа чь шеwьр кьн?
3 Иро «кәрийе пези бьчʹук», демәк йед кö wе сәр әʹзмана бьжин, у «пәзед . . . дьн», йед кö wе сәр әʹрде бьжин, тʹәвайи «кәрик» ьн, кʹижан кö Йаһоwа ча щьмәʹта хwә һʹәсаб дькә (Луqа 12:32; Йуһʹн. 10:16). Бешьк, әм дьхwазьн бьшекьриньн ве йәке кö Йаһоwа мәрʹа qәдьрәки öса дайә, wәки һәләqәтийа мәйә мәхсус тʹәви wи һәйә. Ве готареда әме шеwьр кьн кö әм ча дькарьн Йаһоwарʹа бьдьнә кʹьфше, wәки әви qәдьре мәхсус qимәт дькьн.
ӘМ ХWӘ ТʹӘСМИЛИ ЙАҺОWА ДЬКЬН
4. Ча әм дькарьн рʹазибуна хwә Йаһоwарʹа нишан кьн, wәки изьн дайә мә тʹәви wи достийе бькьн? У Иса ча рʹазибуна хwә да кʹьфше?
4 Чахе әм хwә тʹәсмили Йаһоwа дькьн бь тʹәмамийа дьле хwә, әм рʹазибуна хwә жерʹа дьдьнә кʹьфше. Пе ньхöмандьне әм гьшкарʹа шәʹдәтийе дьдьн, wәки әм пʹара Йаһоwа нә у кö әм һазьр ьн тʹьме гöрʹа wида бьн (Ибрн. 12:9). Чахе Иса һатә ньхöмандьне, әwи жи тьштәки öса кьр. Дькарьн бежьн әwи Йаһоwарʹа гот: «Әз дьхwазьм хwәстьна Тә бьqәдиньм йа Хwәде» (Зәб. 40:7, 8). Рʹаст ә чахе Иса һатә буйине ида жь wи мьләти бу кʹижан кö тʹәсмилкьрийе Хwәде бу, ле йәкә әwи Йаһоwарʹа да кʹьфше wәки әw һазьр ә qьрара wи бинә сери.
5, 6. а) Йаһоwа чь гот чахе Иса һатә ньхöмандьне? б) Мәсәле биньн кö Йаһоwа ча дьньһерʹә сәр тʹәсмилбуйина мә wирʹа.
5 Йаһоwа ча ньһерʹи сәр ньхöмандьна Иса? Кʹьтеба Пироз дьбежә: «Һәма чаwа Иса һатә ньхöмандьне у жь аве дәркʹәт, әʹзман вәбун у әwи дит кö рʹöһʹе Хwәде мина кәвоткәке һатә хwаре у сәр wи дани. У дәнгәки жь әʹзмана гот: ‹Әв ә Кöрʹе мьни дәлал, кö әз жь wи рʹази мә›» (Мәт. 3:16, 17). Рʹаст ә Иса ида пʹара Баве хwәйи әʹзмана бу, йәкә дьле Йаһоwа гәләк ша бу, чахе дит кö Кöрʹе wи дьхwазә у һазьр ә әʹмьре хwәда qьрара Wи бинә сери. Чахе әм хwә тʹәсмили Йаһоwа дькьн, һьнге жи дьле wи ша дьбә, у әw wе әʹсә мә кʹәрәм кә (Зәб. 149:4).
6 Бьдьнә бәр чʹәʹве хwә, мәрьвәки гәләк кöлиркед бәдәw бахче хwәда чандийә. Рʹожәке qиза wийә бьчʹук жь бахчә кöлиркәке дьqәтинә у пʹешкʹеш дьдә баве хwә. Фәʹмдари йә әв кöлирк йа баве wе йә. Ле баве һʹьзкьри, нә жи wе бьфькьрә сәр ве йәке, чьмки занә wәки qиза wи жь һʹьзкьрьне әw кöлирк да wи у әw wе бь дьл әве пʹешкʹеша wе һьлдә. Әw бав wе нава һʹәму кöлиркед хwәда, кöлирка жь qиза хwә qимәт кә. Әw мәсәлә дьдә кʹьфше, wәки дьле Йаһоwа жи гәләк ша дьбә, чахе әм бь дьл әʹмьре хwә тʹәсмили wи дькьн (Дәркʹ. 34:14).
7. Малахи чаwа да кʹьфше кö Йаһоwа ча дьньһерʹә сәр wан, йед кö бь дьл у щан жерʹа хьзмәт дькьн?
7 Бьхунә Малахи 3:16. Һәрге wә һе хwә тʹәсмили Йаһоwа нәкьрийә у ньхöманди ниньн, дәрһәqа ве йәке бьфькьрьн. Рʹаст ә һун ча дьне кʹәтьнә, ида йед Йаһоwа бунә, чаwа һʹәму мәрьв. Ле бьфькьрьн wәки Йаһоwа wе чьqас ша бә, һәрге һун wи qәбул кьн ча Сәрwере хwә у әʹмьре хwә тʹәсмили wи кьн (Мәтʹлк. 23:15). Йаһоwа wана нас дькә йед кö бь дьл жерʹа хьзмәт дькьн, у наве wан «кʹьтеба биранинеда, ДТʹ» дьньвисә.
8, 9. Йаһоwа чь дәʹwа дькә жь wана, наве кʹижана кʹьтеба wийә биранинеда ньвисар ә?
8 Ле сәва кö наве мә кʹьтеба Йаһоwайә биранинеда ньвисар бә, у әм нава щьмәʹта wида бьн, әм борщдар ьн тьштәки бькьн. Малахи рʹастә-рʹаст гот, wәки әм гәрәке жь Йаһоwа бьтьрсьн у сәр наве wи бьфькьрьн. Һәрге әм хенщи Йаһоwа хwә тʹәсмили кәсәки йан тьштәки дькьн, ахьрийеда наве мә wе кʹьтеба wийә жийинеда бе һьлдане (Дәркʹ. 32:33; Зәб. 69:28).
9 Бәс нинә тʹәне соз бьдьнә Йаһоwа кö әме qьрара wи бьqәдиньн, у бенә ньхöмандьне. Әwе йәке әм тʹәне щарәке дькьн, ле паше ида тʹәмамийа әʹмьре хwә жерʹа хьзмәт дькьн. Әw йәк кö әм алийе Йаһоwа нә чаwа щьмәʹта wи, әм гәрәке тʹьме пе жийина хwә избат кьн. Әм гәрәке ча иро öса жи ахьрийеда, у һʹәта кö әм сах ьн, гöрʹа wида бьн (1 Пәт. 4:1, 2).
ӘМ ХWӘСТЬНЕД ХЬРАБ ДЬТʹӘРЬКИНЬН
10. Чь фьрqи гәрәке һәбә ортʹа хьзмәткʹаре Хwәде у йе кö Хwәдерʹа хьзмәт накә?
10 Готара пешийа веда, мә сәрһатийа дәрһәqа Qайин, Сьлеман у Исраелийа шеwьр кьр. Әwана гьшк жи дьготьн йанчь Йаһоwа дьһʹәбиньн, ле бь рʹасти жерʹа амьн нибун. Әw мәсәлед wан әшкәрә дьдьнә кʹьфше, wәки әwед кö хwәйе wан бь рʹасти Йаһоwа йә, гәрәке мьqәрʹм хwә ль рʹастийе бьгьрьн у мьqабьли хьрабийе бьн (Рʹом. 12:9). Дина хwә бьдьн кö кʹьтеба Малахида Йаһоwа гот кö wе әшкәрә бе кʹьфше «фьрqийа ортʹа мәрьве рʹаст у мәрьве хьраб, ортʹа хьзмәткʹаре Хwәде у йе кö Хwәдерʹа хьзмәт накә» (Малх. 3:18, ДТʹ).
11. Чьрʹа мәрьварʹа гәрәке әʹйан бе кʹьфше, wәки мә хwә тʹәсмили Йаһоwа кьрийә?
11 Диса мәщаләкә дьн һәйә кö әм дькарьн Йаһоwарʹа бьдьнә кʹьфше, wәки әм qимәт дькьн кö әwи әм ча щьмәʹта хwә бьжартьн. Пешдачуйина мә алийе рʹöһʹанида гәрәке «һʹәмуйава әʹйан бә» (1 Тимтʹ. 4:15; Мәт. 5:16). Хwә бьпьрсьн: «Гәло мәрьварʹа әʹйан ә wәки әз бь тʹәмами Йаһоwарʹа амьн ьм? Гәло әз фьрнаq дьбьм гава дьвежьмә мәрьва кö әз Шәʹде Йаһоwа мә?» Дьле Йаһоwа wе бешә һәрге паши wе йәке чахе әwи әм бьжартьн ча щьмәʹта хwә, әм шәрм дькьн мәрьварʹа бежьн кö әw хwәйе мә йә. (Зәб. 119:46; бьхунә Марqос 8:38.)
Әw йәк кö тö ча дьжи, әшкәрә дьдә кʹьфше wәки тö Шәʹде Йаһоwа йи? (Бьньһерʹә абзаса 12, 13)
12, 13. Чьрʹа сәр һьнәка найе кʹьфше wәки әwана Шәʹдед Йаһоwа нә?
12 Йазьх, ле һәла һе һьнә Шәʹдед Йаһоwа жи чʹәʹв дьдьнә «рʹöһʹе ве дьнйайе». Бона wе йәке зәлал ида найе кʹьфше фьрqийа ортʹа хьзмәткʹаре Хwәде у йе кö хьзмәткʹаре Хwәде нинә (1 Корн. 2:12). Рʹöһʹе ве дьнйайе мәрьва һелан дькә пәй «дьлһавьжийед бьнйатʹа мәрьвайе» кʹәвьн (Әфәс. 2:3). Мәсәлә, рʹаст ә гәләк ширәт мәрʹа тенә дайинә дәрһәqа кʹьнщхwәкьрьн у хәмьландьне, йәкә һьнәк диса жи нәщайиз хwә дькьн. Әwана кʹьнще тәнг у вәкьри хwә дькьн, һәла һе сәр щьвате жи. Һьнәк жи пе пʹоре хwә дина мәрьва дькʹьшиньнә сәр хwә (1 Тимтʹ. 2:9, 10). Ләма жи чахе әwана нав мәрьвада ньн, ида чәтьн ә тедәрхьн кö кʹе йә хьзмәткʹаре Йаһоwа у кʹе йә һәвале дьнйайе (Аqуб 4:4).
13 Һәнә хушк-бьред öса жи, кö хwә öса дьдьнә кʹьфше, ча мәрьвед ве дьнйайе. Мәсәлә, чахе әwана wәʹде хwә дәрбаз дькьн, рәqас у рʹабун-рʹуньштьна wан öса нә, кö нәщайиз ьн бона Мәсиһийа. Әwана шькле хwә дькьн интернете у теда тьштед öса дьньвисьн, кö те кʹьфше wәки әwана мәрьвнә рʹöһʹани ниньн. Дьбәкә щьватеда әw Мәсиһи гöнәки гьран накьн wәки бенә ширәткьрьне, ле йәкә әwана дькарьн хьраб һʹöкöм бьн сәр wан хушк-бьра, йед кö дьхwазьн рʹабун-рʹуньштьна хwә тʹәмьз хwәй кьн, чаwа щьмәʹта Хwәдерʹа дькʹәвә. (Бьхунә 1 Пәтрус 2:11, 12.)
Нәһелә wәки мәрьвед кö мьqәрʹм алийе Йаһоwа нагьрьн, сәр тә һʹöкöм кьн
14. Әм жь чь гәрәке хwә хwәй кьн, wәки һәләqәтийа хwә тʹәви Йаһоwа öнда нәкьн?
14 Һәр тьшт ве дьнйайеда мәрьва һелан дькьн бәрбь «дьлһавьжи, чʹәʹвһавьжи» у кʹöбар-бабахийе (1 Йуһʹн. 2:16). Ле әм пʹара Йаһоwа нә, у ләма жи әм чʹәʹв надьнә ве дьнйайе. Әм гәрәке «нәпʹакийе у дьлһавьжийед дьнйайе инкʹар кьн» у «аqьлда гьран, бь рʹастийе у хwәденасийе бьжин ль ве дьне» (Тито 2:12). Әм ча хәбәр дьдьн, ча дьхwьн-вәдьхьн, ча ль хwә дькьн, дьхәмьлиньн, у дьхәбьтьн, әw һәр тьшт гәрәке мәрьварʹа әʹйан нишан кә, wәки әм тʹәсмилбуйед Йаһоwа нә. (Бьхунә 1 Корьнтʹи 10:31, 32.)
ҺʹЬЗКЬРЬНА МӘ ҺЬНДАВА ҺӘВДА БЬ ДЬЛ У ЩАН Ә
15. Чьрʹа әм гәрәке хушк-бьрарʹа һʹәйф у бь һʹьзкьрьн бьн?
15 Әw йәк кö әм ча ньн һьндава хушк-бьра дьдә кʹьфше, wәки әм чьqас qимәт дькьн достийа хwә тʹәви Йаһоwа. Әwана жи пʹара Йаһоwа нә, у һәрге әм ве йәке бир нәкьн, әме тʹьме хушк-бьрарʹа һʹәйф у бь һʹьзкьрьн бьн (1 Тʹеслн. 5:15). Иса готә шагьртед хwә: «Бь ве йәке һʹәмуйе заньбьн һун шагьртед мьн ьн, һәгәр һун һәвдö һʹьз бькьн» (Йуһʹн. 13:35).
16. Кʹижан мәсәлә жь Qануна Муса дьдә кʹьфше, кö Йаһоwа ча нә һьндава щьмәʹта хwә?
16 Wәрә пе мәсәла бьвиньн кö әм гәрәке һьндава хушк-бьред щьватеда чаwа бьн. Бәре, пʹарьстгәһа Йаһоwада һәбун тьшт, кö башqә дькьрьн бона һʹәбандьне у дьһатьнә һʹәсабе пироз. Qануна Мусада дьһатә готьне, wәки чаwа мьqати wан тьшта бьн, у әwед кö әв тʹәми нәанийана сери, гәрәке бьһатана кöштьне (Жьмар 1:50, 51). Һәрге Йаһоwа әw тьштед кö һʹәбандьна wида дьданә хәбате хwәй дькьр, илаһи әw wе чьqас хwәй кә wан хьзмәткʹаред хwәйә амьн, кö әwи жьбарт ча щьмәʹта хwә! Щарәке чахе Йаһоwа тʹәви щьмәʹта хwә хәбәр дьда, әʹлам кьр: «Йе дәсте хwә ль wә дьхә, әw ль бибока чʹәʹве мьн дьхә!» (Зәкәр. 2:8, ДТʹ).
17. Йаһоwа гöһ дьдә чь?
17 Малахи гот wәки Йаһоwа гöһ дьдә у дьбьһе кö чаwа щьмәʹта Wи тʹәви һәв хәбәр дьдьн (Малх. 3:16). Бәле, Йаһоwа «йед пʹара хwә нас дькә» (2 Тимтʹ. 2:19). Әw һаш жь һәр кьред мә у гьлийед мә һәйә (Ибрн. 4:13). Чахе әм хушк-бьрарʹа һʹәйф ниньн, Йаһоwа әве йәке дьвинә у мә дьбьһе. Ле әw öса жи дьвинә гава әм һьндава wанда меванһʹьз, дәствәкьри у һʹәйф ьн у öса жи һәвдö дьбахшиньн (Ибрн. 13:16; 1 Пәт. 4:8, 9).
ЙАҺОWА «ЩЬМӘʹТА ХWӘ ЖЬ БӘР ХWӘ НАВЕЖӘ»
18. Ча әм дькарьн Йаһоwарʹа бьдьнә кʹьфше, wәки әм qимәт дькьн кö щьмәʹта wи нә?
18 Бешьк, әм дьхwазьн Йаһоwарʹа нишан кьн, wәки дьшекьриньн wи qәдьри кö әм нава щьмәʹта wи нә. Әм заньн wәки әw сафикьрьнәкә билан бу кö мә хwә тʹәсмили wи кьрийә. Рʹаст ә әм иро нав «ньсьле нәһәq у хальфида» дьжин, ле әм дьхwазьн «беләкʹә у беqöсур» бьминьн у «шәwq бьдьн мина рʹонайед әʹзмана» (Фили. 2:15). Әм хwә жь һәр хьрабийе дур дьгьрьн (Аqуб 4:7). У әм хушк-бьред хwә һʹьз дькьн у qәдьре wан дьгьрьн, чьмки әwана жи пʹара Йаһоwа нә (Рʹом. 12:10).
19. Йаһоwа чь кʹәрәма дьдә wан, йед кö пʹара wи нә?
19 Кʹьтеба Пироз соз дьдә: «Хöдан щьмәʹта Хwә жь бәр Хwә навежә» (Зәб. 94:14). Бәле, чь жи әʹмьре мәда бьqәwьмә, Йаһоwа wе тʹьме тʹәви мә бә. Һәла һе мьрьн жи нькарә мә жь һʹьзкьрьна Йаһоwа бьqәтинә (Рʹом. 8:38, 39). «Һәгәр әм дьжин, бона Хöдан дьжин у һәгәр әм дьмьрьн бона Хöдан дьмьрьн. Аwа һәгәр әм бьжин йан бьмьрьн, пʹара Хöдан ьн» (Рʹом. 14:8). Әм гьшк гәләк һивийа ве рʹоже нә, гава Йаһоwа һʹәму достед хwәйә амьн йед кö мьрьнә, жь мьрьне рʹакә (Мәт. 22:32). Ле әм иро жи гәләк кʹәрәмед wи дьвиньн. Чаwа кö Кʹьтеба пироз дьбежә, «хwәзи ль wи мьләти, Хwәдейе кʹижани Йаһоwа йә у ль wе щьмәʹте, кʹижан бьжарт кьрә wаре Хwә» (Зәб. 33:12, ДТʹ).